《香港傭兵》: [Day 03－活在當下] PART 07
跟住綽姿跳上街燈。
喺漆黑嘅街道之上…跳過一支…又跳過一支…
極速跳過幾支之後，又跳去簷蓬上…窗台邊…穿過黑暗嘅夾縫…
經過尋晚之後，我已經學識飛簷走壁。
再加上而家只要跟住綽姿…跳上佢跳過嘅街燈…簷蓬…窗台…貨車頂…根本就難唔到我！
『嘩嘩！』呢頭都未型完，嗰頭就踩爛塊紙皮石…跣一跣腳！
嘩屌！差啲就由三樓跌落街！
睇嚟跟住綽姿都未必安全…自己都要小心啲！
有過差啲仆街嘅經驗，我都好小心咁跟住綽姿，輕腳啲…輕盈啲…迅速啲…再冇任何差池就嚟到…屯門市鎮公園！
咁快就跟上綽姿嘅步伐，睇嚟我都真係好有做行者嘅天份～
走到入嚟荒廢咗嘅屯門市鎮公園，冇一盞燈係著。
地上鋪滿枯葉…大樹都係光脫脫…涼亭瓦頂都穿晒大窿…
“咔 咔”踩住地上嘅枯葉行…行多幾步…行到過嚟“露天劇場”。
望落露天劇場嘅講台…屏風都已經倒下…一地碎石…亭頂都已經冧咗大半…
跟住綽姿一步一步咁行落碎裂嘅石級…行多幾步…我見到喺講台最入…接近乾涸湖邊嘅位置…好似有…有幾個身影？
現場嘅環境太黑…都唔係睇得太清楚…
但當我再集中精神…集中視力…我見到…我見到有…有六個人！
好清楚！有六個人！
有兩個坐咗喺爛木柱…又有三個望緊個乾涸咗嘅人工湖…另外一個就鬆緊對手。
我跟住綽姿繼續行…向住呢六個人身處嘅方向行…
而呢六個人都望咗過嚟…望住我哋！
呢六個人…就係…
「哦？終於都嚟喇？」其中一個…著住黑色長袍嘅中年大叔就行近我哋。
唔止眼前呢個中年大叔，就連身後嗰五條友都著住黑色長袍。
果然…就係佢哋…佢哋就係今次委託其餘嗰六名隊員！
「你就係…西貢攻防戰嘅倖存者…瓦解喇？睇嚟唔係好敢以真面目視人喎～」個中年大叔望住…我？
係唔係搞錯啲嘢？
前面嗰個先係喎…
不過…原來綽姿個朵咁響㗎？
「我並唔介意俾你哋睇我嘅真面目…」綽姿揭開頂帽，拉低衫領，「反正睇你哋個樣都唔似長命得去邊。」
個中年大叔一見到綽姿個樣，就流晒口水咁：「哦哦～估唔到原來瓦解係一個咁動人嘅小妹妹？小妹妹～小妹妹～叔叔最愛就係嬌滴滴嘅小妹妹㗎喇～嚟～俾叔叔抱抱～」
就喺個中年大叔攤開雙手，行近綽姿之時…
“啪！”一聲！綽姿就握住中年大叔條頸，推埋去碌爛柱度！
好快！由綽姿啱啱企緊嘅位置，去到碌爛柱…起碼有十步嘅距離！
之但係…頭先嗰吓…快到睇唔到…
而同時…都感覺到…另外嗰五個人身上…
我望望另外嗰五個人…身上都有紅色粒子飄吓飄吓！
係氣息…每個行者身上獨有嘅氣息！
今次係第一次…除咗綽姿之外，喺其他人身上感應到氣息！
不過而家…個氣氛好似唔係咁好…好似有啲緊張…
我就扮晒淡定咁行去中間，擋住嗰五個精神化咗嘅行者嘅視線！
嗱！唔好亂嚟呀！我唔打得㗎！嚇吓鬼㗎咋！
「嗄…嗄…冷靜…啲…」身後被綽姿握住條頸撳埋柱嘅中年大叔口震震咁，「玩吓姐…講…吓笑姐…唔使咁…咁認真…」
「我而家話俾你哋聽，我好認真。」綽姿冷冷放下一句…
「係嘅…咳咳…係嘅係嘅…」我回頭望一望，望到綽姿放開中年大叔。
中年大叔鬆鬆條頸，回回氣。
就咁睇…行者與行者之間…好似…唔多友好…
「好喇…咳！唔好再晒時間喇！IM咗先啦～」中年大叔拎出精神液，用力一捏：「獨奏，執行者。」
獨奏？
原來中年大叔就係今次委託嘅隊長！
「劫奪～執行者～」其餘五個嘅其中一個都跟住IM。
哦？呢個賊眉賊眼咁嘅男人就係劫奪？
睇佢個樣…都係大我少少…
「掠過！執行者！」另外一個惡形惡相嘅又跟住IM！
個樣就夠晒惡！但睇起上嚟…都係同我差唔多年紀…
仲要成陣MK味咁囉…
「閃偷…執行者…」另一個外型瘦削嘅又跟住IM。
嘩…呢個排骨仔，好似冇飯開咁款…仲瘦過我喎！
唔打得…又唔睇得咁…
「潛伏…執行者…」另一個鬼鬼祟祟咁嘅又跟住IM。
成隻老鼠咁嘅樣…
「尾刀…執行者…」最後一個陰陰濕濕咁嘅又跟住IM。
三尖八角咁嘅款…睇到都唔開胃…
個個都自我介紹完…係唔係應該輪到我呢？
『呃…吞…』我都未將我嘅稱號講晒出嚟…
「得喇～你就係嗰個隨行者吖嘛～你嘅氣息咁弱，係人都知㗎喇～」獨奏半帶恥笑咁Cut停我。
咩意思？
暗寸我弱呀？
你又好強咩？
我自己嘅氣息有幾弱，就真係感應唔到。（或者係我仲未識感應。）
之但係…在場咁多個人，冇一個比得上綽姿！
綽姿嘅氣息…充滿霸道…壓迫感！
就好似漆黑中嘅螢火蟲一樣！（屌！關咩事呀？！）
但如果夾硬要比，就只有…身後嗰兩個件袍溶溶爛爛穿晒窿嘅…潛伏同尾刀。
唔使用肉眼睇佢哋身上嘅紅色粒子，單憑感應都感覺得到佢哋壓迫感比較大。
係因為其他人刻意壓抑住氣息？定抑或真係比較弱？
我都唔清楚…
始終今次都係第一次…第一次遇上綽姿以外…其他行者。
「好喇！真係唔好再嘥時間…」獨奏拎出電話，「大家都有睇過地圖㗎啦？」
睇地圖？
仆街喇！我冇睇過喎！
我掃完睇過確保成個工廠區都掃晒之後，就冇再睇過喇！
要睇啲乜㗎？有乜特別要注意㗎？
只見大家都拎出電話…我都只好跟住拎部電話出嚟先。（人哋做乜我跟住做，應該冇衰嘅…）
左手拎部電話打開SPIRIT App，再打開現有委託…睇吓資料…睇吓我今日掃過嘅地圖…
應該點睇？
獨奏繼續講：「大家都應該知道…要搶嘅嘢就收藏喺…警署。」
警署…係被攻陷咗…已經荒廢咗嘅屯門警署？！
原來係喺嗰度…
之但係…嗰度乜都冇…就只有爛車爛鐵危樓…仲有…露宿者…
唔通個…公文袋係班露宿者收埋？定抑或係警署未被攻陷之前，就已經收藏喺裡面嘅重要文件？
咁我哋今次嘅任務，係唔係要入去荒廢咗嘅警署尋寶？
獨奏繼續講解：「由於警署嘅圍牆開咗好多個缺口…為免俾佢哋有機會運走…我哋由四方八面包圍住成間警署！」
我見到地圖裡…屯門警署嘅四周…出現紅點！
總共有…八粒紅點…之上仲陸續出現…稱號！
獨奏…閃偷…劫奪…掠過…潛伏…尾刀…瓦解…吞噬…我哋八個人嘅稱號圍住成間警署！
而我同綽姿…就喺警署嘅…正門前？
「我Set定時間…時間一到，我哋就一齊攻入去！」當獨奏話“Set時間”之時，每個稱號之上都有個時計出現！
時計顯示…5:00…4:59…4:58…一直倒數！
時間一到…就一齊攻入去？
呢個就係個Plan？
點解好似…咁Hea咁嘅？
只見各人都好似冇乜疑問咁…
就連綽姿都冇乜異樣咁…
難道就只有我一個覺得唔對路？！
等我再諗諗先…
除咗話個Plan好似有啲Hea之外…仲好似…
頭先用完精神液之後，跟住綽姿飛奔過嚟用咗大約一分鐘…
喺度同獨奏擾攘、自我介紹同“高呼”一下又用咗差唔多…兩分鐘…
大約仲有…四分半鐘後就行動…
一支Level 2嘅精神液對我嚟講…生效時間大約有一個鐘…
即係…大約要喺五十三分鐘內完成！
五十三分鐘…真係夠用？
咁又唔使咁擔心嘅～就算唔夠，我袋裡面都仲有一支Level 1可以補嘅～
「大家有冇問題？」獨奏循例問問。
大家都冇異議咁。
我諗最多問題嗰個都係我姐…
但綽姿都唔覺有問題，我又點敢話有問題吖…
「另外喺出發之前，我有一個…」奏獨諗一諗，「提議…」
提議？
倒數緊㗎喇喎！仲想提議啲乜呀？
獨奏繼續講：「就係…我想改一下報酬獲得方式為…獨吞。」
獨…吞？！
即係咩意思呀？點獨吞法呀？
久久冇出過聲嘅綽姿終於開口：「你係指…邊個搶到公文袋…邊個就可以獨吞全部報酬？」
「冇錯！就係咁！」獨奏點點頭！
原來係咁！
所謂嘅獨吞，就係邊個搶到寶藏，邊個就可以成寶藏嘅主人！
公平咩？咁樣好自私姐…
完成到委託，就只有一個人享用到成果…其他人做義工㗎喇喎！
「其實有你哋著數…」獨奏行近綽姿面前，「你哋有兩個人…我哋其他…各自各得一個人…」
我哋有...兩個人...
原…原來係咁㗎？！
我同綽姿夾埋一齊分報酬…亦代表我哋兩個夾埋做一份！
我哋兩個可以合力…
咦喂！咁又唔同講法喇！成件事立即公平晒！
「我冇所謂。」綽姿冷冷放下一句。
梗係冇所謂啦！我都識計，綽姿冇理由計唔到啦！我哋最著數啦！
「咁其他人呢？」獨奏再問問其餘五人。
其餘五人冇出聲。
冇出聲即係冇意見啦～
有成六個傻仔幫我哋做義工，今次仲唔發達？！
「好啦～咁就改啦！」獨奏拎起部電話撳撳撳…
大家又望住手上部電話…
我都跟住大家，望住自己手上部電話…唔使幾耐…上方出現“隊長要求更改報酬方式為：獨吞。同意/拒絕”嘅訊息！
當然同意啦～
我好快手咁撳完之後…
「好～搞掂晒～大家準備出發！」獨奏行近乾涸嘅湖邊。
其餘五個行者收好電話，都行到湖邊。
WOW～出發喇～出發喇～好緊張呀～
綽姿行近我身邊：「跟實我。」
『哦哦…』唔使你講我都會啦～
一行八人行近乾涸嘅湖邊…
望清楚個湖…就只有淤泥同垃圾…
昔日嘅人工湖…好似有龜…仲有鴨仔…
喺禽流感肆虐香港那年，所有鴨仔都變晒燒鴨…
咁啲龜呢？仲有放船仔嘅大叔呢？
聽老豆講，以前呢度仲有水上單車踩同艇仔撐。
老豆仲話喺我好細個嘅時候，我哋一家三口都會嚟撐吓艇仔，餵吓鴨仔，睇吓大叔放船仔。
但我就冇乜記憶…
我總係記唔起，細個嘅時候有呢啲家庭樂…
而家望住眼前淨返淤泥同垃圾嘅人工湖…就只可以幻想…
鳥語花香嘅屯門市鎮公園…難道就只有喺FF之中出現？
六個行者連同綽姿都拉起衫領，笠上頂帽之後…
獨奏就向住乾涸嘅人湖一跳！
其餘五人又跟住獨奏身後跳！
等到綽姿都行動…
好喇…要跟上綽姿嘅步伐！
（距離精神液失效仲有…五十二分鐘。）