跟住綽姿身後,踩落佢踩過嘅淤泥。

我都好小心,又輕輕腳咁…

大力少少都唔知會唔會被淤泥吸咗落去…

再借幾件垃圾做踏腳石,好快就跳到對面湖邊。

上返行人路,大家都冇停落嚟嘅跡象。



大家都保持速度…再跳得遠啲…跑得快啲!

以忍步方式跑,好快就跑出公園!喺西鐵站地面向住警署方向跑!

一出西鐵站地面,大家都立即四散!

我就跟住綽姿身後,跑向警署嘅正門!跳上對面座工廠大廈!

我就同綽姿躲藏喺工廠大廈嘅簷蓬上,凝視住對面荒廢咗嘅屯門警署。



雖然我已經感覺唔到其餘六個行者嘅氣息,但我估…佢哋已經就位掛…

而我哋而家就係等…等時間到就殺入去!

拎部電話出嚟睇睇…仲有成三分四十五秒!

啲時間好似過得好慢咁…

「收返埋部電話。」綽姿凝視住對面。



『睇吓仲有幾耐嘛…』又唔得吖?

「自己感覺。而且時間一到,電話會震。而家就同我一齊好好觀察。」綽姿對眼發晒紅光!

『哦…』感覺…點感覺吖?

精神化緊嘅時候,時間時快時慢咁…好難捉摸呀!

再者…觀察?有乜好觀察?

我就試吓跟綽姿咁,集中精神!觀察對面間荒廢嘅警署!

果然!冇乜特別…

咪同我中午嚟到嘅時候一鳩樣~



荒廢咗就係荒廢咗~短短半日可以有乜變化呢?

唉~我都係唔好浪費能量~唔係嘅話都唔知捱唔捱到完成任務!

我就踎喺綽姿身邊,靜候。

放鬆成個人,時間就好似回復正常…過得好快…

就好似只係過咗一陣,綽姿就有所舉動!

綽姿由腰間拔出刀柄!

我當然都不敢怠慢!立即拔出刀柄!



夠鐘喇?要殺入去喇?

只見綽姿未亮出刀刃,我都唔敢將精神集中喺左手…

今次真係要好好睇睇…要做好啲!威返次!

以我所知…裡面都係得揸刀嘅露宿者姐…難唔到我嘅!

話唔定…處理得好…唔使死人…

此時,綽姿踏前一步,左腳就踩喺簷蓬邊!

我都跟住綽姿!左腳踩喺簷蓬邊!

準備喇…準備喇!



我感覺到個電話一震!與此同時,綽姿一跳!跳過對面馬路!凌空三百六十度轉身!

“嗡!”刺眼嘅紅光刀刃隨即亮出!

唔好食花生喇!我都要跟住綽姿!一跳!跳過對面馬路!但就冇凌空三百六十度轉身…

集中精神…集中精神喺左手…喺刀柄!

“嗡!”就係我落地之時,及時亮出紅光刀刃!

我就同綽姿…企正喺警署嘅停車場!

就係得我同綽姿…成個擺放爛車廢鐵嘅停車場,淨係得我哋兩個?!



唔…唔對路…

『其…其他人呢?』又話夠鐘就一齊上?!

我集中精神…望望四周…望望遠處…望到…掠過企喺燈柱上!

唔止掠過…就連閃偷都係踎喺壞咗嘅燈柱上,雙眼發住紅光咁凝視住我同綽姿!

點解…點解唔係一齊…

「果然…」綽姿同我一齊望住燈柱上嘅閃偷!

『果…然?』

就喺呢個時候…

“噴超!”背後傳來一聲響!

我回頭一望,正正就望到有粒…尾部噴住火光嘅物體…由警署樓層…向住我哋身處嘅方位…飛緊埋嚟!

呢粒嘢係…

『火…火箭炮?!』

睇住粒火箭炮越嚟越近…

綽姿企到我面前…

“嗡!”由左下到右上,揮刀一切!

“轟隆!”火箭炮隨即爆開!火炎同爆風迎面撲埋嚟!

『嘩!』雖然話有綽姿頂住,但威力都唔細!

點解會有…點解會有火箭炮㗎?!

爆風過後,隨即而來嘅係…

“啪啪啪啪啪!”槍聲!

仲要係嚟自四方八面!

前面有綽姿,我就回身一望,望到遠處…喺架爛車後面…有個人拎住自動步槍向我掃射!

睇住一粒粒子彈以龜速飄緊過嚟…

神經反射之下,我舉起精神刀!

“嗡!嗡!嗡!”擋!擋!擋!

一粒又一粒金光閃閃嘅子彈,接觸到紅光刀刃嘅一瞬間…化成輕煙!

擋咗四粒!五粒!六七八粒之後…子彈嘅速度明顯加快!

越嚟越快!越嚟越快!快到就快…就快…

“啪!啪!”擋唔住!有兩粒打中膊頭!

子彈打中長袍嘅一瞬間,紅色光膜閃一閃!冇俾子彈穿入體內!

果然真係擋到子彈!

之不過…

“啪!啪!”有啲痛!

雖然唔入肉,但就好似被BB彈射緊咁!

我強行用精神刀擋住子彈!

“啪!啪!啪!”但越漏越多!

“啪!啪!啪啪!”越嚟越快!

“啪!啪啪!啪啪啪!”已經開始擋唔住!

就喺子彈快要回復正常速度之時,綽姿喺我身邊擦身而過!以忍步跑向爛車!

“嗡嗡嗡!”綽姿揮咗幾刀,就將架爛車…連同躲喺爛車後面開槍嘅人都斬成碎件!

手起…刀落…快…狠…準…

「唔好淨係擋。」綽姿回頭望我一眼。

唔好淨係擋?

我回頭一望,背後遠處有架爛車同樣被斬件!地上仲有幾件屍體!

原來綽姿已經解決咗後面嘅敵人…

“啪啪啪啪啪!”又有幾下槍聲由四方八面傳過嚟!

我立即跑呀跑!

唔淨擋咪避囉!

四方八面都有子彈飛緊埋嚟!

左閃右避咁!但都要中幾粒!

『嘩!痛痛…』仲好似越嚟越痛咁!

唔得!唔可以再中槍!

雖然話唔入肉,但咁樣痛法令到我冇辦法集中!只會越中越多槍!

我要再集中啲!盡量避開!盡量用精神刀擋子彈!

喺槍林彈雨之間,我左閃右避…

“嗡!嗡!嗡!”又用手上把精神刀擋!

“啪!啪!”當然唔少得中槍!

仆街呀!都打咗咁耐啦!班仆街仲未捨得落嚟幫拖!

我偷偷望上去,閃偷同掠過仲係喺燈柱上觀察住我哋嘅戰況!

屌你老母食夠花生未呀?!

綽姿一路手起刀落砍!斬!殺殺殺!

我就一路閃!避!擋擋中中中!

當我避到去見到前方有一架…燒焦咗嘅爛車…有個人躲喺爛車後面,拎住支自動步槍對住我瘋狂掃射!

我就只好順勢以忍步跑向前!

“嗡!嗡!嗡!”揮動手中把精神刀,擋住子彈咁衝過去!

當我衝到去爛車面前,進入我嘅攻擊範圍…

“嗡!嗡!嗡!嗡!”我將架爛車連同敵人手上把自動步槍斬成碎件!

成功喇…我成功喇!

原來…斬開物件嘅感覺係…咁爽…

我都仲未爽完…敵人就喺腰間拔出…手槍!對正我塊面!

“砰啪!”一聲!子彈直射落我塊面!

『嗚呀!』雖然有衫領擋住,但就好似食咗個大隻佬嘅兜拳窩面!

就喺我向後倒,快要倒在地上之時,自然反應之下我揮動精神刀!

“嗡!嗡!”兩聲,就將敵人對手斬咗落嚟!

「嗚呀!嗚呀!手呀!我對手呀!」倒臥喺地上嘅我就望住敵人望住佢自己斷咗嘅雙手慘叫!

斷咗…係我斬斷…

「呀!呀!手呀!呀!」敵人慘叫多兩聲,身上就有道紅光由上至下,右至左咁斬開兩件!

望住敵人嘅上身跌落地…

「啊…嗄…」斷氣之前仲爬咗兩下…

原來…就算係斬開咗…都唔係立即死亡…

咁樣死法…一啲都唔痛快…

綽姿單膝半跪跪喺我面前:「唔好手軟。」

唔…唔好手軟?

我而家唔單止手軟…腳都軟埋添啦!

「你再係咁浪費精神能量,好快就耗盡。」綽姿嚴厲咁訓示我。

浪費…耗盡…

就喺我仲未意識到,我嘅精神能量正被自己多餘嘅動作消耗緊之時…

“啪!”一聲巨響由警署大樓傳出!

“嗡!”綽姿立即舉起精神刀!

粒子彈超級快咁射中刺眼嘅紅光刀刃!化為輕煙!

「係Sniper…」綽姿話口未完…

“啪!啪!”又有兩聲巨響由警署大樓傳出!

綽姿用精神刀擋多一粒之後,就兩個單手後空翻避開狙擊!

“啪!啪!啪!”

我都立即向後爬!子彈就射落我腳前!

石屎地都被子彈打穿一個個大窿!

嘩屌!乜撚嘢狙擊槍呀?!Barrett呀?!

“啪!”只見一粒子彈都射穿晒綽姿身旁架爛車!

綽姿想探頭出去…

“啪啪啪啪啪啪!”又有幾下自動步槍射過嚟!

仲有一個?兩個?

應該仲有兩個揸自動步槍喺附近…

綽姿指一指住我…又整咗幾下手勢…

點呀?想我點呀?你不如講返中文啦~

綽姿再指指出面!

嗯?出面?指住出面做乜春呀?

我伸出半個龜頭…

“啪!”一聲巨響!

我感覺到成千噸衝擊力打落我個太陽穴!

『哎呀!』我應聲而倒!

與此同時,綽姿飛身而出!一邊用精神刀擋住子彈,一邊以忍步衝向拎住自動步槍嘅敵人…由上而下一斬!再一個回身氣刃斬!將身後另一個拎住自動步槍嘅敵人都一刀兩斷!

媽呀~型到呢!

當我仲欣賞緊綽姿帥氣嘅身影之時…

“噴超!噴超!”又有兩聲響由警署大樓傳出!

今次係…兩粒火箭炮正向住綽姿方向射過去!

兩粒火箭炮一前一後咁飛向綽姿!

綽姿氣定神閒,二話不說就用力一跳!踩一踩第一粒火箭炮,借力再一跳!踩一踩第二粒火箭炮再用力一跳!

綽姿借助兩粒火箭炮就跳到上警署樓層!

與此同時,由於兩粒火箭炮被綽姿踩過,航道受影響…變咗飛緊過嚟!

『嘩嘩嘩嘩!!!』我立即跑開!

“轟轟隆隆!”兩聲巨響後,原先企緊嘅位置黑煙飄散!石屎地被炸開一個大窿!

嘩…收買人命咩…

我再抬頭望上綽姿身處嘅樓層,幾道紅光閃閃閃!

一個人由地面殺到上樓層…你玩晒啦…

就喺呢個時候,突然…

“吱!”有架裝甲車衝緊過嚟!

『嘩嘩嘩!』我立即避開!

“砰啪!”裝甲車輾過鐵閘嘅殘骸,衝出警署!

架…裝甲車…

裝甲車衝出警署後,綽姿都跳返落地面!

「追。」綽姿平淡咁講出單字後,立即以忍步衝上前!

追…追!

我仲係慢半拍咁跟住綽姿身後!

跑到出警署,除咗我同綽姿追緊架裝甲車外,其餘六條花生友終於有舉動!

六條花生友飛簷走壁咁追住架裝甲車!仲要比我哋追得更貼!

仆你個臭街頭先我哋打生打死又唔落嚟幫拖!而家就追得咁落力…

咁即係話…公文袋就喺架裝甲車裡面?

如果公文袋喺架裝甲車裡面嘅話…再唔快啲追上去,就做義工㗎喇!

我就跟住綽姿跳上簷蓬!跳上窗台!跳上街燈!

當我哋再跳上一座工廠大廈嘅天台之時,綽姿急停!同時截停咗我!

『做…做咩呀?做咩停低呀?再唔追上去,就俾班仆街得手㗎喇!』我望住遠處…六個身影越嚟越接近架裝甲車!

只見綽姿粒聲唔出咁望實架裝甲車…望實六條仆街…

我又集中精神咁,望住六條仆街同一時間飛身撲向裝甲車!

就喺呢個時候…裝甲車車身好似綠綠地…越嚟越綠…發出綠光…極刺眼嘅綠光!

“轟隆!”一聲巨響!

『嗚呀!』我被極刺眼嘅綠光閃到白茫茫一片!

咩事呀?!發生咩事呀?!

我雙手掩住對眼!過咗好一陣子!

『點呀?喂!』當我再勉強睜開雙眼…『搞…咩呀…』

我望到原本裝甲車嘅位置…得返一個大窿!

仲有…少量嘅綠色粒子…閃吓閃吓…就好似漆黑中嘅...螢火蟲…

架裝甲車呢?六條仆街呢?!