《香港傭兵》: [Day 04－進入天門] PART 03
搭返好似輕鐵咁慢嘅西鐵返屯門。
今次身邊都有唔少乘客。
當然唔稱得上多，但至少每個車廂都有啲人。
而且發現，大部份乘客都係喺天水圍落車。亦都冇乜人喺天水圍站上車。
過咗天水圍之後，成架西鐵列車就得返我同六七個乘客。
天水圍...元朗...大部份乘搭西鐵嘅乘客都係進出呢兩個地方？
呢兩個地方...都係屬於天門嘅勢力範圍...
咁講法...
除咗以上嗰點，我仲察覺到好似只有進入天門先需要通行證...
出天門呢？進入西貢獻命嘅勢力範圍呢？
以我推測就唔使喇。
你睇吓屯門站，都冇西貢獻命嘅人駐守。
就算喺元朗站，西貢獻命嘅人都係巡邏...出入都冇話要睇證件。
咁即係話...喺西貢獻命勢力範圍居住嘅市民，要有通行證先可以進入天門...但天門嘅市民就可以自由進出西貢獻命勢力範圍？
照現時手上僅有嘅情報就係咁。
但點解會咁㗎呢？
大家都係反抗組織姐...而且成個屯門領域都係由天門佢哋讓出嚟俾西貢獻命...
點解喺佢哋之間...好似...好大隔膜咁嘅呢？
“依...咔咔...”西鐵繼續以慢速行駛...
我都係諗唔通西貢獻命同天門之間點解會有隔膜嘅感覺。
或者手上嘅情報真係太少...問題自然多。
而家可以做嘅就只有...見步行步。
西鐵到達屯門站後，就趕過去Today Coffee。
屯門站同Today Coffee其實都幾近，只係過兩條馬路就到。
“叮 叮”拉開木門行入咖啡店，我就見到...雨姐喺舖面抹緊檯。
「嚟咗喇？」著上一身整齊嘅侍應服裝，紮辮嘅雨姐就帶住親切嘅微笑同我打招呼。
『係...係吖...得你一個嘅？』見雨姐咁親切，我都有啲怕羞...
「輝哥放假...Owner喺入面。Owner！飛揚嚟咗喇！」雨姐大聲咁向住櫃檯入面叫！
話說...雨姐一提起輝哥就黑黑地面咁...
「哦～嚟咗喇？」Owner拎住包...咖啡豆同張...白色卡片，由櫃檯行出嚟。
『嗯...係吖...』我望住Owner手上張白色卡片...
「今日輝哥放假...唔係好夠人手...所以就辛苦你喇～」Owner將包咖啡豆同張白色卡片交到我手。
『哦哦...唔辛苦...』接過Owner手上包咖啡豆同張白色卡片...我只係注視住張卡片...
呢張殘舊...黃黃地色...仲有唔少摺痕...咖啡跡...上面仲印有QR Code嘅白色卡片...就係通行證？！
返呢份Part Time唔單止可以達到綽姿所講嘅收集情報...仲有助我執行任務！
睇嚟我揀呢份工真係揀得好啱！
不過講返張卡...好似咁兒戲咁嘅？
只係一張白色卡紙...印個QR Code...
等我仲以為會係啲咩高科技產品...至少都應該好似身份識別卡咁...
「咁就麻煩你將包咖啡豆喺...三點前送過去元朗...地址就印咗喺紙袋上～」Owner指指包咖啡豆。
啡色嘅牛皮紙袋上，印咗個黑色嘅QR Code...
你睇吓！一間咖啡店仔都係用QR Code咋嘛！
可想而知QR Code係幾咁普通！
不過又點解會...用QR Code？
「你去到元朗先好Scan喎～唔係就唔會Show路線㗎喎～」
『哦...好好...』我諗都係因為想方便用電話嘅地圖搵路。
「咁人工方面呢...七十蚊...」Owner都未講完...
「起碼都一百啦。」雨姐一邊抹檯，一邊冷冷放下一句。
「一百？！雨姐呀...我哋已經搵得唔多...今個月開始仲要交兩次管理費...下個月都唔知仲有冇錢俾呀...」Owner喊晒口咁...
「你要人哋去到元朗嗰邊咁遠，唔一百點得呀？」雨姐翹起對手，向Owner幫我討價。
雨姐雙手一翹...胸前兩舊肉一谷...
原來雨姐...咁好身材...
「係姐...之但係...」Owner又未講完...
「再講就一百五十！」雨姐再谷一谷...件白色恤衫快要迫爆！
「好喇好喇好喇...一百喇...一百喇...唉...再咁落去...好快執笠...」Owner無奈咁擰擰頭。
『呃呃...咁我送完貨...可唔可以唔返嚟住吖？』呢點好重要！
三點前...我諗都係要送完包咖啡豆到目的地先開始搵車...
先唔好諗要搵幾耐...就算俾我順順利利好快搵到，搵完仲要駛去指定地點...仲要唔知跟住有乜嘢搞...仲要唔知搞幾耐...都唔知幾時先返到嚟！
「哦？你想喺嗰邊遊覽吓呢？」Owner摸摸自己啲鬍鬚。
『呃...係吖係吖～難得而家有通行證可以過去行吓，咪遊覽吓囉～』唔通我要過去Fast And Furious又話你知咩...
「都係嘅...而家要入去元朗都唔易...好吖～你鍾意嘅話...聽日先返嚟俾返張證我都得～咁我又可以遲一日先出糧俾你...呵呵呵～」Owner笑得勁奸咁。
「唉...黑心老闆始終都係黑心老闆...」雨姐擰擰頭後，就繼續抹檯。
「搵食姐...」
「唔好同我講...我唔想知...」
「唔好咁啦...」
「都話唔好同我講咯！再嘈你自己抹埋佢！」
其實幾時出糧俾我都唔重要...
最重要都係...而家有通行證...可以進入天門！
「好喇～小心啲喇～」Owner同雨姐向我揮手送別。
『哦哦...好好...我會㗎喇...』揮個手，道過別，再次向元朗出發！
喺屯門西鐵站等西鐵...
“依...咔咔...”又坐喺架慢速行駛嘅西鐵車廂發呆...
“下一站天水圍”望望由天水圍上車嘅乘客...
“下一站元朗”又同幾個乘客一齊落車...
來來回回都花咗唔少時間...
不知不覺原來都已經成十二點幾。
話說如果我搵唔到架車返嚟...唔知會點㗎呢？
會唔會有乜懲罰㗎呢？
都係唔好諗咁多！快手快腳盡力而為！
落到下一層，都仲係有咁多西貢獻命嘅人巡緊。
我就拎住張通行證，急急腳咁行去出閘機...行去天門守衛面前：『通行證！』
天門守衛拎咗我張通行證，皺住眉咁望咗眼，再用電話掃掃張通行證後...
「嗯！」天門守衛點住頭咁俾返張通行證我！
你無啦啦皺咩眉呀？
搞到我仲以為又唔知有乜問題唔俾我過！
好喇！總算成功過咗嚟元朗！
而家就要...睇睇包咖啡豆究竟要送去邊先！
我行埋一二邊，拎部電話出嚟，打開相機App對住包咖啡豆上個QR Code...
鏡頭一對到個QR Code，就立即打開地圖App！
地圖顯示住...元朗站...係我而家身處嘅位置...
然後就有條紅線...一直伸延...伸延...伸延...好遠..好遠好遠...一直伸延到去...
『南生圍？！』我望到地圖上有支紅色大頭針插喺南生圍嗰邊！
嘩...唔係咁老遠呀化？
呢度行去南生圍...
有冇得搭車呀？
都係行咗出去先算啦！
我就跟住條紅線行，行出元朗站。
企喺路邊左望望...右望望...好似...冇乜分別。
係啲樹好似長得高啲...啲草長啲...
路面總算完整...附近嘅建築物都唔算殘舊...
我啱啱行出嚟嘅時候，仲諗住會好似屯門咁。
而事實上，我而家身處嘅元朗，同我嗰個年代嘅元朗係冇乜分別。
點解會咁？
時間並無洗禮過元朗...就只有洗禮過屯門？
我再行出啲...
“颼～颼！”馬路上都有車輛行駛。
唔算得上多，但總算係有。
之不過呢...就唔係好覺眼有的士囉！
仲要連搵架Van仔都冇！
睇嚟呢邊同屯門一樣，除咗輕鐵同西鐵之外，就再冇其他公共交通工具㗎喇！
好啦好啦～行就行啦！
我就跟住條紅線喺馬路邊行，又留意住有冇的士駛過。
但係呢條路唔好話有冇的士，就連車都冇架！
頭先未行入嚟，都叫有啲私家車睇吓～
唔通而家冇人會再入南生圍郊遊？
郊遊吖～郊遊吖～講起上嚟好似都好耐冇郊過遊...
上次郊遊係幾時呢？
好似係同阿月去...咗...城門水塘同馬騮大戰？
講起上嚟...都差唔多成年前嘅事...
呢一年嚟都冇機會再同阿月郊遊...估唔到再有時間郊遊，就得返我自己一個...
唔知仲有冇機會同阿月郊遊呢？
可以嘅話...行吓山都唔錯吖...有得露營仲好添！
同阿月一齊...做咩都好㗎啦...
阿月...我真係好想快啲見返你...
繼續跟住條紅線行，又咬吓麵包。
好Dry...乾咬麵包真係Dry到核爆！
尤其喺咁Q凍嘅冬天！
“颼！颼！”啲冷風吹埋嚟，好似刀削面咁！
仲要咬Dry包，又淡又冰冷！
唉～
不過我又好奇喇...點解喺咁凍嘅寒冬之下，啲野草又會長得咁長㗎呢？
越行入南生圍，我就發現啲野草越長得長！
係唔夠綠囉...有啲黃囉...有啲耷囉...但真係好長囉！仲好密囉！
唔單止野草...連樹都係又高又粗！只係啲葉落晒囉...
南生圍幾時變到咁有生機？
唔通真係同少咗人入去有關？
所以話呢～想保護大自然其實乜都唔使做，唔去打擾自然生態自然會好～
我再行得入啲，路都被野草遮蓋。
真係不得了！
寒冬都咁茂盛，春天嘅話...豈不是變熱帶雨林？！
我就只好喺野草堆之中勉強搵返條路...
一路搵路...一路跟住條紅線行...越行就越難行！
『妖！妖！妖妖妖！』其實我都算係一個愛護大自然嘅人。但遇到咁強大嘅大自然， 搞到我都火火地！
就喺我火到想一把火燒晒成個南生圍之時...
『嘩嘩嘩！！！』我差啲一腳就跌落河！
我立即穩住腳步！退後兩步！
河...係河...
條河嘅水位雖然唔係好高...之但係要過去嘅話...
我左望望，右望望，望到有隻木船喺岸邊！
我就行過去睇睇...睇睇隻木船...
『隻木船咁舊咁...會唔會沉㗎？』
不過而家唔靠隻木船都唔知點過對面...
『唉...死就死啦！』
我用隻腳踩一踩...確保冇穿窿...冇入水...再小心翼翼咁上船...
喺船上再拎起霉晒嘅船槳撐呀撐！
好唔容易先俾我撐到去對面！
一泊近岸邊就立即跳上岸！
回頭一望：『好彩冇沉到～』
沉船唔吉利呀嘛！
好啦！繼續上路！
繼續跟住紅線行，其實都行咗幾耐...
條路又長又難行...之不過...距離大頭針已經好近！
仲有大約...二百米？過咗對面馬路？
我望住對面馬路...樹林嘅深深處...光禿禿嘅大樹之間...好似...隱約見到好似...有一座...
『大宅？！』