“依!依!!!”架紅Van左劈右劈!

我真係諗極都唔明,明明前晚揸車出去都暢通無阻...

“吼!吼~”衝住去!

點解雨姐同林雪都話只有呢架紅Van出到去市區?

目的地都係...深井姐...



而且...咩人會出市區呢?

成五百蚊一程咁貴喎!

我再偷偷望望車上嘅乘客...

個個都係頭耷耷...自己顧自己...完全唔在意身邊任何事...

仲有一點係...男男女女都係著沉色嘅衣著...都係一件大褸包到實...



其實我都留意咗幾耐...

唔單止係而家小巴上,就連之前街上嘅人都係咁著。

喺屯門又好...喺元朗都好...

我喺街上遇過嘅人,不論男男女女定係露宿者,都一定會著件沉色大褸包實自己...

就好似...我哋SPIRIT咁...



仲有梓翹...仲有子茵...

咁樣嘅話...同街上嘅人嘅衣著都係一樣...我哋真係好容易就喺鬧市中隱藏自己嘅身份。

唔知出到去市區...又會係點呢?

“依!!!吼!”紅Van好快就差唔多衝到去小欖。

就喺呢個時候,紅Van減慢車速...

我八八卦卦咁望望車外...見到西貢獻命!

我見到...路上兩旁都有西貢獻命嘅人...拎晒長槍咁...駐守?

仲有啲...帳幕...仲有啲...障礙物!



呢度設有...西貢獻命嘅路障?!

冇理由㗎...前晚駛到嚟呢邊...乜都冇㗎喎!

唔好話前晚見唔到佢哋嘅蹤影...再之前....班警察又點入嚟黃金海岸?!

屯門裡面已經冇晒警察...

警察由市區入嚟黃金海岸...呢條係必經之路!

有西貢獻命駐守...警察冇可能入到嚟㗎喎!

點解呢?點會...唔通...呢度夜晚冇人駐守嘅?



我哋架紅Van雖然行得慢,但西貢獻命班人冇截停我哋...冇上車搜查...

我哋都係可以直行直過,直接駛過。

唔通...呢個就係只有紅Van可以出去市區嘅原因?

“吼...吼!”紅Van駛過西貢獻命嘅路障後,就沿住小欖條路繼續行駛!

嚟到小欖...我又諗起每次巴士去到呢頭附近,都總係收唔到電話!

唔知而家又係唔係呢?

我偷偷拎部電話出嚟,睇睇...

真係收唔到喎!



過咗咁多年,呢頭都係冇發射站㗎?

或者...曾經有過...但而家又冇...

畢竟...呢頭應該已經被廢棄...

最多都係得...西貢獻命駐守...

咁SPIRIT App又收唔收到呢?

我又偷偷打開SPIRIT App...

沒有訊號?!



連SPIRIT App都開唔到?!

我仲以為SPIRIT App係上到太空都開得到㗎添!

原來...都係有死位...

呢點都真係要好好記住!

“吼!吼~”紅Van繼續衝住去!

沿路上都幾震吓...(紅Van啲避震出名差!)

“依!”仲有啲廢棄咗嘅爛車同雜物!

而車外嘅景色...好多樹...好多草...一地都係枯葉...

雖然啲樹葉都落晒...草都枯枯黃黃咁...但總係充滿郊外Feel...

或者係因為再冇乜車駛經呢條青山公路,或者少咗人喺呢頭,所以樹木野草都可以好好咁生長。

或者Keanu Reeves講得啱...地球無咗人類...就可以回復健康。

“吼~依!依!吼!”逢彎劈彎!直路直衝咁喺鋪滿枯葉嘅青山公路上飛馳!

唔使幾耐...離遠又見到啲...建築物...

離遠嘅山頭有一棟棟木屋...鐵皮屋...

海邊又有幾棟舊樓...

睇嚟差唔多到...差唔多到目的地...深井...

“依!吼...吼...”紅Van開始減慢車速...我已經見到...見到有...警察?!

我見到路邊有幾架警車停泊咗喺度...

又有幾塊...藍色...紅色LED路牌!

呢啲LED路牌真係充滿未來感!

然後又見到幾架鐵馬...仲有幾個著晒避彈衣嘅警察!

警察身上嘅裝備...都唔係平時見開!

全身上上下下都包咗黑色薄身裝甲!

真係好有未來感!

“依!依...啪!”紅Van停定後,隨即打開車門!

車上嘅乘客紛紛落車!

咦咦咦...睇嚟係呢度喇喎...

我都快快手手跟住落!免得又俾林雪屌屎忽!

落到車之後,身邊都有唔少警察...

個個都係手持長槍!Full Gear咁!

不過...就冇對我哋點...

我都跟住班乘客行...一直沿住路邊...同班Full Gear嘅警察擦身而過咁行...

“沙 沙 沙”路面都鋪咗唔少碎沙石...

跟住班乘客穿過警察設置嘅閘口後,終於都嚟到深井!

算係第一次...出到嚟市區...

我企定定咁望望四周...除咗班警察之外,呢度都係冇乜點變...都係比較舊嘅區域。

望望一齊坐紅Van過嚟嘅乘客都好似好清楚自己既目標,各自跟住自己嘅方向四散...

我...又應該去邊呢?

我而家要去...青衣...又應該點去呢?

搭咩車?又應該喺邊度搭呢?

唔係真係要走去問問警察叔叔咁柒呀化?!

“咕嚕...咕嚕...”又肚仔餓添...

睇嚟今朝綽姿煮嘅辣殺不足以填飽我個肚...

都係...搵吓嘢食醫吓肚仔先~

“沙 沙”沿住條鋪滿碎沙石嘅行人路一直行,行入深井。

“汪!汪!“四周都有一兩隻唐狗見到我就吠!

再行入啲...行入屋村...

“喵~喵~”仲有幾隻貓貓趴喺雜物上曬太陽~

我走近啲貓貓~望吓佢哋~

佢哋又好似唔係好怕人~應該話...直頭係無視我~繼續有佢哋享受陽光~

仲要都住咗...唔少隻~

隻隻都懶洋洋咁~

如果俾阿月見到,實開心死佢~

阿月咁鍾意貓,實要留喺度玩足成日都唔願走~

當我忍唔住想伸手摸摸隻貓咪之時...

“喵!”隻貓咪凶神惡煞露晒齒咁!

『好好~唔摸唔摸~唔阻你曬太陽~』我立即Say晒Sor~

唉~睇嚟我都係冇阿月咁受貓貓歡迎㗎喇~

同幾隻貓貓Say句Bye之後,就繼續行入“小鎮”。

行多幾步,身邊都有唔少三層高嘅村屋。

再行多幾步,又有幾間士多。

一路上都遇到唔少警察巡邏...

有啲係Full Gear...有啲淨係著套軍裝...

又再行多幾步,終於俾我見到有茶記!

茶記...唔...一心諗住嚟到深井食燒鵝㗎嘛...而家又要捱茶記...

唉算啦~有得食好食喇~

我一拉開玻璃門...

『嘩...咁多人嘅..』仲要好多都係著住制服嘅警察叔叔同嬸嬸...

「喂...隨便坐啦...唔好企喺路中心阻~~~~~~住晒啦...」一個著住白色茶記侍應衫,成個黎根咁嘅阿叔就拎住支筆,指指啲空位。

『哦哦...唔好意思...唔好意思...』我就隨便搭咗張六人檯...

張六人檯除咗我之外,仲坐咗兩個軍裝阿蛇同一個便裝男人。

兩個軍裝坐得比較親密...明顯就係識嘅...咁個便裝呢?

正當我靜觀周圍...耳聽八方...

「想食啲咩吖?」黎根放咗杯水喺我面前。

仲要係隻手指插晒落杯!洗晒手指嗰隻!

嘩...你咁搞法...我連用嚟洗筷子都唔想囉...

『呃...有咩食?』檯上好似冇Menu喎...

「自己睇...」黎根指指牆身。

『呃...』我矇起對眼...『唔係好睇到...』

其實我本身係有二百幾度近視,百幾度散光,但就從來都唔帶眼鏡。

點解睇得咁辛苦都唔配返副眼鏡?

因為我總係覺得做人唔好睇得咁清楚...唔清唔楚會比較開心...

「都係嗰啲啦...」

『即係邊啲呢?』

「快餐常餐午餐嗰啲啦...」

『快餐有咩?』

「快餐有腸仔火腿餐午煙肉煎蛋五香肉丁沙嗲嘔選二配米粉通粉公仔麵...」

『出前一丁使唔使加錢?』

「加十蚊...」

嘩屌!出前一丁加十蚊?我唔好自己買返屋企自己煮?!

腿仔火腿UFO嗰啲今朝食過喇...都係食其他...

『咁常餐呢?』

「腸仔火腿煎蛋多士沙嗲嘔麵...」

屌...咁同快餐咪一鳩樣...

『咁午餐呢?』

「洋蔥豬扒白汁雞扒黑椒牛扒飯...」

又係豬牛雞頹飯...

『轉意粉得唔得?』

「冇意粉...」

『咁薯菜呢?』

「冇薯菜...」

『咁...洋蔥牛扒得唔得?』

「得...」

『咁就洋蔥牛扒啦唔該。』

「不過冇洋蔥...」

『咁...黑椒豬扒啦...』

「冇豬扒...」

『洋蔥雞扒...』

「冇洋蔥...」

『白汁豬扒...』

「冇豬扒...」

『洋蔥豬扒...』

「冇洋蔥冇豬扒...」

『咁...咁...咁黑椒牛扒有喇掛?!』屌你老母乜鳩都冇嘅!

「黑椒牛扒飲咩?」

『凍撚茶!』

「凍飲加十蚊...」黎根放低張單就行咗去...

嘩我屌!出面天寒地凍,而家叫杯凍飲都要加十蚊?!

你啲冰由北極運嚟㗎?!

「喂~你就好啦~前晚突然唔使當值~」突然坐喺面前嘅軍裝A同佢身邊嘅便裝講。

唔?前晚?

便裝攪住杯熱奶茶陰陰嘴笑:「OK咁啦~」

睇嚟真係講前晚...我哋捉宋伯伯出嚟嗰晚...

等我又細心聽吓先...

軍裝B又追住問:「點解咁好死嘅?」

便裝飲啖熱奶茶諗一諗:「又唔知點解喎...上頭突然叫我哋全部落更!咁咪聽Order落更囉...」

軍裝A又接住講:「返少晚咪好囉~又少一晚危險~」

便裝急不及待咁講:「呢句真呀!呢個形勢都唔知革命軍班人會點㗎!」

革命軍?係指西貢獻命同天門?

軍裝B又接住講:「革咩命軍呀?恐怖份子就恐怖份子啦!由十幾年前話搞真普選,跟住又佔領呢度佔領嗰度!又話搞革命又話搞港獨!仲扯晒旗咁話自己係反抗軍!而家呢?有軍火㗎佢哋!之前仲襲擊警署呀!我哋死咗幾多兄弟呀?」

講到真係好似十惡不赦咁喎...

雖然我又真係唔係好認同西貢獻命...不過講真嗰句,唔係官迫民反,又點會有人揭竿起義呀?

「凍撚茶...」黎根放杯凍撚茶喺我面前...

『唔該...』杯凍撚茶濁到呢...未篤都見唔到隻羹...

篤兩下...飲一啖...

冇茶味冇檸味淨係得澀味...真係衰撚到呢...

軍裝A又繼續講:「啱吖!諗返起嗰時都恐怖!嗰時我仲喺學堂!睇新聞話警署受襲!仲要又機槍!又菠蘿咁!成間警署著晒火咁!我幾驚嗰時阿Sir要我哋立即出去支援呀!」

屌...驚咪咪撚當差囉...

便裝又接住講:「嘩你咁就叫驚呀?我呀!嗰時仲同個師姐行緊孖Beat!一收到Call個師姐嚇撚到腳都軟埋!跪撚咗喺條街度呀!」

軍裝B又追問:「嘩咁撚刺激?咁你點呀?」

便裝氣定神閒咁答:「點呀?咪Call上台話個伙記唔舒服要睇住佢囉!」

嘩...真係好撚刺激囉...

等我仲以為會Dom鳩個師姐埋一二邊,自己九秒九鳩衝去支援添...

軍裝B又接住講:「你唔好話吖,嗰時都真係幾驚㗎!行Beat真係撳住支槍嚟行!有乜事立即掹槍就射㗎喇!」

嘩...乜警察可以亂掹槍㗎咩?

仲要話射就射?打飛機咩?

便裝又接住講:「不過而家守呢邊都算好㗎喇...好過守錦綉花園啦...」

錦綉花園?

係...元朗嗰邊?

如果話...深井係屯門呢邊嘅出入口...

咁錦綉花園嗰邊...會唔會就係元朗嗰邊嘅出入口呢?

照咁推斷...喺西貢獻命管轄之下嘅市民就靠呢邊出入市區...

天門嘅...就靠錦綉花園嗰邊...

真係得呢兩條路?

冇其他路徑喇咩?!