「黑椒牛扒飯...」黎根放低碟飯喺我面前...

嘩...又係乜撚嘢嚟㗎?!

啲黑椒似曱甴仔多過黑椒...

啲飯爛到好似糊仔咁就唔再講喇...

塊牛扒又灰灰黑黑咁...生化牛扒?!



點吖?而家係唔係冇嘢係食唔死人㗎喇?

軍裝B接住講:「其實錦綉花園又冇乜點嘅...係比呢邊更加偏僻...更加荒蕪姐...仲有嘅就係唔似得呢邊咁,久唔久無啦啦話唔使當值囉~」

錦綉花園嗰邊冇得久唔久無啦啦唔使當值?

呢句真係聽唔明...

我就咬一啖生化牛扒...



咦喂!又幾好味喎!

果然係假嘢比真嘢好!

軍裝A接住講:「點都好啦...唔想繼續喺呢啲鬼地方囉...都唔知班友幾時屎忽痕亂嚟!講真吖,呢啲情況唔應該要我哋守囉!應該叫解放軍守囉!」

講真隻警犬又錯唔晒...

前晚見到解放軍...我初初都仲以為真係由解放軍駐守...



點知佢哋帶咗宋伯伯上裝甲車之後就撤離...

講真嗰句,唔好話守...我直頭覺得解放軍可以攻入去添啦!

頭先見到班Full Gear嘅警察都唔簡單...

我估以現時解放軍嘅裝備...唔使一日就可以將西貢獻命同天門一舉殲滅...直頭將屯門元朗天水圍夷平!

咁點解唔咁做呢?

便裝又擰擰頭:「唔可以亂嚟㗎...西貢嗰次已經搞到好麻煩...」

西貢...西貢攻防戰?!

便裝又繼續講:「而家外面啲人睇住...唔可以郁吓都動用解放軍...」



外面啲人?

軍裝A又接住講:「外國?算罷啦~佢哋都俾民主制度玩死自己啦~仲邊得閒理我哋咁多吖~」

哦...原來係指外國...

之但係又可以點俾民主制度玩死吖?

唔係應該一黨專政先係最易死咩?

便裝又接住講:「都係嘅...英國就唔好講啦~一早就收晒皮~而家美國都撤出亞洲!日本冇咗美國做靠山都唔敢多事~睇嚟唔使幾耐,可以理直氣壯咁出動解放軍!」

咁就仆街啦...



老實講句,當解放軍可以隨便咁喺市區大搖大擺走嚟走去...

人民就失去自由㗎喇!

自古以嚟,軍隊係保護國家,應該係對外!唔係對內㗎!!!

動用軍隊對付自己國家嘅人民,呢啲咪叫暴政囉!!!!

你話一般小市民諗唔通唔緊要...

就連警察都唔撚明呢點...個腦係唔係裝屎㗎?!

我一路喪爬啲爛飯入口!真係越聽越扯火!

軍裝B又接住講:「喂話時話...你哋有冇聽過...秘密組織吖?」



秘密...組織?

便裝接住答:「嗯...聽就有聽過吓咁...好似話只有某特別部隊先會搵佢哋幫手...」

搵佢哋幫手嘅“佢哋”...係唔係即係指緊我哋?

軍裝A又好驚訝咁問:「真係有秘密組織㗎?!」

便裝繼續答:「嗯...好似話係著黑袍...對眼仲會發紅光添...不過都係聽返嚟~我都未見過~」

果然真係...

著黑袍...對眼發紅光...正正就係講緊我哋SPIRIT!



軍裝A繼續好驚訝咁問:「著黑袍...對眼仲要發紅光?!有冇咁型呀?」

乜好型咩?睇嚟呢個軍裝A平日好鍾意睇動漫喎...

便裝繼續答:「型~仲好揚添~對眼發紅光喎!真係一眼就認得出啦~之不過...一切都係傳聞~根本就無人見過~」

好揚咩?我坐正喺你哋面前,你哋咪又係唔知我係SPIRIT~

軍裝B又接住講:「唔係喎...聽講大粒啲嘅都知㗎喎...」

大粒啲?粒春大粒啲吖?

便裝又接住講:「咁就唔知啦~我哋膊頭都冇花~都係俾人點㗎姐~」

哦~膊頭有花...就同我哋有聯繫?

軍裝A繼續問:「呢啲嘢唔知唔緊要啦~點姐?無啦啦多咗一晚假,去咗邊度玩姐?」

便裝又陰陰嘴笑:「冇咩邊吖~咪近近地去咗青衣咋嘛~」

青衣?

我今日要去嘅地方?

有咩玩?

喺我認識嘅青衣同惡魔島一鳩樣,係一個與世隔絕嘅魔鬼監獄嚟㗎喎!

喂!你睇吓嗰座屹立喺山邊嘅IVE Campus!明明就係監獄啦!

你話喇!邊個咁有腦,幫Campus選址喺座小島上咁有味道~

你入過去讀就知咩叫坐監㗎喇~

「喂~係唔係真係咁好玩㗎?」

「喂~係唔係咩都有得玩㗎?」

「你哋冇去過咩?」

「冇啦...邊敢過去吖?」

「有咩問題吖?好多師兄一放假就走過去㗎啦~」

「唔方便吖嘛...」

「有咩唔方便姐?」

「呢樣我明!I Know That Feel Bro...」

「屌~兩條都係廢柴!」

跟住落嚟,嗰三隻警犬嘅對話都已經唔係好關我事。

雖然話都係唔知點解前晚帶宋伯伯過嚟嘅時候,呢度冇晒警察...換嚟嘅係解放軍接走宋伯伯...

之但係總括嚟講,我哋SPIRIT的確同警察係有聯繫...應該話有生意來往...

警察有特別部隊傭用我哋...去幫佢哋做一啲...佢哋唔方便出手做嘅事...

好似話...殺死啲“滋事份子”...

而喺警隊裡面...都唔係有好多人認識我哋...

就連見都未見過...更莫講話精神液...精神武器...甚至精神化...

同我哋有生意來往嘅警隊,都要有返咁上下階級先可能對我哋有少少認識...

咁講法...普通市民對我哋SPIRIT應該係...一無所知...

「快啲飲晒杯嘢繼續開工!」

「我都返去沖返個涼準備返工!」

「放完假又要當夜更喎~驚唔驚吖?」

「屌!驚都要做㗎啦!求神拜佛...今晚平平安安冇事冇幹...」

三隻警犬飲埋杯嘢就起身離開...

我都快快手手爬埋個頹飯再飲埋杯凍撚茶...

『嘩屌!真係衰過食屎...』就拎埋張單起身走去俾錢。

我一隊張單埋去,個收銀阿叔就講:「二百吖。」

『咩話?!』我有冇聽錯?二百蚊?你俾我呀?!

我食咗啲乜吖?頹飯加杯凍飲咋喎...

「二百蚊吖咩話!」收銀阿叔勁大聲咁!

嗯...佢講得咁大聲...睇嚟我係冇聽錯...

『轉帳得唔得?』頭先搭紅Van過嚟已經用咗五舊...冇現金喺身真係少咗份安全感...

「轉帳?得~梗得㗎~你有得轉咪得囉~」收銀阿叔指指檯面部機仔。

『哦...』我就拎部電話出嚟放上去...

“啫叮~”咁就冇撚咗兩舊...

食埋啲咁嘅辣殺都要兩舊水真係好唔抵....

不過算!反正都真係收到唔少料~當係情報費就好抵喇~

講起情報...

『吖~係呢...想問問呢度點去青衣㗎?』反正都俾咗兩舊,打探吓都好~

「青衣?」收銀阿叔古古惑惑咁打量住我,「你喺特殊區嚟㗎?」

『呃...係吖係吖...』咩都話係啦...

「睇你嘅衣著就知啦~」收銀阿叔又古古惑惑咁,「做咩吖?裡面冇得玩㗎咩?」

『吓?呃...冇吖...冇吖...』冇嘢玩?可以有乜玩?

頭先嗰三隻警犬都話青衣有嘢玩...

但我就冇聽到玩啲乜添...

「我仲以為特殊區會更加多嘢玩添~」收銀阿叔陰陰嘴笑,「嗱~你呢就行返出大馬路~喺警察嘅封鎖線冇幾遠有小巴站嘅~有架去青衣嘅紅Van㗎喇~」

『哦...哦...』又係紅Van...

「不過班次又唔多...仲要都幾貴吓㗎!睇你夠唔夠錢啦~」

又係幾貴吓...

『咁大約幾錢吖?』我諗唔會貴得過由屯門過嚟嗰程掛...

「唔定㗎喎...海鮮價嚟嘅...」收銀阿叔皺住眉咁諗諗,「你預大約...一百至二百啦~」

『嘩!咁貴㗎?!』咁都要一百至二百?

而家揸紅Van真心好過去搶喎...

「唉~喺呢邊差唔多啦~又唔穩定又危險又唔知幾時打到嚟~冇乜人敢過嚟㗎~過得嚟搵食嘅都係搵命搏!」收銀阿叔無奈咁擰擰頭。

『哦哦...唔該晒...』

「玩得開心啲喇~」

行出茶記望一望...

搵命搏?

我呢幾日就真係搵命搏喇...

一直安逸打份牛工嘅我終於明白...咩叫做趁火打劫...

天下太平嘅時候,就俾無良腦細榨乾榨淨...

天下大亂嘅時候,又有仆街強盜趁火打勢...

所以話香港幾時都唔適合人住!

究竟...香港幾時變成咁?

我諗...唔係喺呢十幾年內轉變...

我諗...應該係香港回歸之後...

沿住街道行,同幾個住喺度嘅街坊對望幾眼...又同幾個著住避彈衣嘅警察擦身而過...

望住啲貓貓仲係懶洋洋咁曬住太陽瞓覺覺...不問世事...真係幸福。

不問世事...我不問世事,世事走嚟問候我呢...

沿住條路行返出馬路邊...

“沙...沙...”路上都係咁多碎沙石...

離遠就見到有一班人企喺路邊,好似等緊車。

我諗...應該係...

我就向住班人行,行過去,六七個男人企咗喺度等。

“颼!”風仲要好大!吹起地上嘅沙石!

『嘩屌!』有沙入眼!有沙入眼!

我就企埋喺班男人身邊...搵佢哋擋住風咁等車。

偷偷望吓班男人...個個都係三十幾四十歲嘅中年阿叔...

仲要個個都樣撚衰衰...成個變態佬咁...

點解我嘅生命中總係充滿住呢啲變態佬喺我身邊徘徊㗎?!

點解唔可以係靚女呀?

天呀!!!

“吱!依!”企咗唔使一陣,就有架紅Van駛咗過嚟。

仲要係行電...新型嘅紅Van!

睇起上嚟...大架啲...坐得多人啲...不過一樣咁殘舊...

一班麻甩佬落完車之後,就到我哋呢邊麻甩佬上車。

「二百~二百~位位二百吖喇!」成個李璨琛咁嘅紅Van司機就攤大手等收錢。

嘩...又二百...一出一入唔見千四?!

「喂!俾錢啦仲等乜鳩吖?」李璨琛又攤大隻手叫我快啲科水!

『係係係...唔好意思吖DJ Becareful...』一陣真係要撳返啲錢先得...

坐喺紅Van裡面等多陣,等到全車坐滿乘客...

「好~起飛~」李璨琛一閂埋車門立即俾油!

“吱!”紅Van就起飛!

沿路我都望望車窗外...外面嘅風景其實都冇乜大變化...

只係...啲路牌都用上LED顯示牌。

對面海(應該係青衣嗰邊)啲樓都好似...比較高...比較密。

而最大分別嘅係...車!

望望馬路上...雖然唔可以話多車,但總算終於見到有未見過嘅車款!

就算喺元朗嘅時候都未見過!

未來...真真正正嘅未來...

身邊嘅大肥佬Un吓Un吓咁...

Un到人哋個心都煩埋!

本來真係好想開口屌!之但係...唔係呀...冇必要成日得罪人啦...

我就毒住咁唔出聲坐到嚟青衣橋...坐到過咗青衣。

“依!吱~依!吱吱~依!!!”李璨琛片咗幾個靚彎之後,就鏟埋小巴站!

「好~到站~祝各位玩得開心啲~」李璨琛咁講,我都仲未知有咩咁好玩...

但當我跟住班麻甩佬落車之時...

「靚仔~八百啱唔啱~」有個廿幾歲嘅女仔向我拋眉弄眼!

嘩!咩料呀?!

仲要唔止佢一個...

「揀我吖~揀我吖~我都係八百~」仲有另一個都係廿幾歲嘅女仔...

「我呢~我又啱啱吖?都係八百~」又有另一個廿幾歲嘅女仔...

「我啦~我啦~今日仲未開齋㗎~都係八百咋~」又有好幾個廿歲左右嘅女仔湧埋嚟!

好多個...好多個年輕貌美嘅妙齡少女湧埋嚟我哋班麻甩佬身邊!

咩料呀?咁多囡嘅?

「你睇吓我對波~玩埋夾腸都係八百咋~」

究竟而家咁多囡湧埋嚟係...咩玩法呀?!