《香港傭兵》: [Day 06－護送委託] PART 09
「你都冇講過話要！」軍官聽到宋伯伯嘅無理要求，明顯條氣頂住頂住！
係咯...你頭先淨係話要支鹽水同Parlux 2800風筒咋嘛...怪得邊個？
「喂...整得頭就一定要有髮蠟同Spray㗎啦...基本嘢唔使講啦吓話？」宋伯伯皺晒眉咁！
「你唔好得寸...」軍官都未將“進尺”兩隻字講埋出口...
「你哋～～～想喺我身上得到啲乜秘密嘅話...盡量滿足我嘅要求...」宋伯伯特別強調個“哋”字，「你哋～～～都知道...你哋～～～冇任何方法可以迫使我講出任何秘密...除非我想講...最起碼而家係...」
軍官聽完宋伯伯一句，忍氣吞聲咁：「同我拎髮蠟同Spray嚟...」
「記得係髮蠟唔係髮油喎！髮油係老土怪先用㗎咋！」宋伯伯Keep住好有要求！
秘密？
解放軍喺宋伯伯身上...想得到啲乜嘢秘密？
又會係關於啲咩㗎呢？
講返轉頭，面對此情此刻，偷生叔叔同綽姿都冇乜異樣...都係企定定咁望住宋伯伯搞個頭。
你話偷生叔叔未見過宋伯伯都算...
但前晚係我同綽姿一齊親手由元朗捉走宋伯伯...
仲要遇到...成間大宅瞬間消失！
而家又喺解放軍基地遇返對解放軍指指點點多多要求嘅宋伯伯...
可能綽姿一早就預料到今次嘅護送目標係宋伯伯...（係我先咁蠢乜都諗唔到㗎姐...）
之但係應該點都冇諗過，宋伯伯可以對囚禁佢嘅解放軍隨意使喚掛...
真係唔多明...究竟而家係乜嘢情況...
解放軍士兵拎咗盒髮蠟同支Spray俾宋伯伯後...
「啦啦啦啦～啦啦啦～啦啦啦啦～啦啦啦啦～」宋伯伯繼續一邊搞個頭，又一邊哼住歌...
解放軍軍官用上最大容忍咁等...
偷生叔叔同綽姿又好似木頭人咁郁都唔郁吓企喺度等...
我就滿頭問號又周身唔自在咁望實宋伯伯搞個頭咁等...
仲要搞幾耐㗎？我時間有限㗎！（係喎...突然諗起就算用咗Level 2精神液，精神化狀態大約都只可以維持一個鐘！）
快手啲得唔得吖？老人家唔使咁姿整啦！
再焦急咁等多一陣...
「啦啦啦～啦啦啦啦～好～搞掂～」宋伯伯終於搞掂佢個頭！
好喇好喇...終於搞掂喇...靚仔晒喇...行得喇！
解放軍軍官就幫宋伯伯鎖上手扣：「行！」
個手扣睇起上嚟應該係用電磁鎖...仲要好似好硬淨添...
未來科技～但都係嗰句...對個手無寸鐵嘅老人家又使唔使咁大笨象呀？
「溫柔啲～溫柔啲～」宋伯伯雍容不迫咁被解放軍軍官推住行。
偷生叔叔都跟住宋伯伯後邊...我同綽姿都跟住佢哋身後行。
行出兩道黑色大鐵門之後，前前後後都有十幾個Full Gear，手持長槍嘅解放軍士兵護送住咁行！
沿路行返去搭𨋢...上返地面...轉咗幾個圈...又上上落落...
行咗一段時間，終於行返出嚟！
仆街喇呢次...淨係過嚟解放軍基地帶宋伯伯出嚟都用咗差唔多半個鐘...
仲要唔知目的地喺邊...遠唔遠...又要花幾多時間過去...
咁搞法...喺路途中就應該要用埋支Level 1...
一行到出嚟，就見到喺我哋架GMC Van，前前後後都停泊咗幾架解放軍嘅裝甲車。
「瓦解...吞噬...你哋兩個跟目標架車。」偷生叔叔又向我同綽姿發出指令！
吓？跟目標架車？即係要我同綽姿同宋伯伯同車？
點解又係我哋呢？
我哋係唔係多報酬啲㗎呢？
只見綽姿又好似唔覺有乜問題咁點點頭。
吓？其實係唔係由頭到尾都係得我一個覺得有問題...覺得唔公平呢？
好啦好啦～綽姿都唔覺得有問題就冇嘢有問題㗎喇～
我同綽姿就同四個解放軍士兵押宋伯伯上裝甲車。
一坐上裝甲車，我就同宋伯伯面對面咁坐。
宋伯伯總係帶住慈祥和藹親切嘅笑容望實我...
喂...唔好咁啦...搞到我好鬼尷尬㗎...
“啪！啪！”閂好車門之後...坐定定咁等咗一陣...
我真係好唔習慣俾人咁樣望住...只好好唔自然咁左望望...右望望...望吓裝甲車內...
“吱！吱～”裝甲車終於起動！
但宋伯伯仲係帶住微笑望實我...
唔好望啦...唔好再望住我啦...
“吱！吱～～～”裝甲車一直以均速行駛....
由於車廂都係冇窗，以全密封式設計...所以我都睇唔到出面...唔知向緊邊個方向行駛。
坐喺裝甲車裡，所有人都好靜...
越靜我就越唔自然...
我真係好唔習慣沉默裡嘅寂靜...
突然！
「你點睇喺香港搞烏托邦？」宋伯伯帶住微笑望實我嚟問。
我點睇...喺香港搞烏托邦？
「隨便講吓你嘅意見～」宋伯伯仲係一面慈祥。
隨便講吓...我嘅意見...
烏...烏托邦...
『我唔覺得喺香港搞到烏托邦...』其實...唔止係香港...
喺世界各地...都冇可能建立到烏托邦...
烏托邦...係一個理想嘅國度...
但過於理想...
由始至今...我都唔相信“人”可以咁理想...
「哦？點解呢？」宋伯伯好好奇咁等我講出一個出人意表嘅答案。
『貪婪喔...七罪宗...』冇錯...因為“人”都係貪婪...
喺一個被城牆圍住嘅小國...裡面冇貨幣觀念...冇階級觀念...冇政治觀念...
整個國家只須用幾條法律規管...
所有人都係平等...所有貨物都係平等...
人們只需要做自己想做嘅事...發揮自己嘅所長...才華...貢獻呢個社會...自然得到呢個社會嘅成果...
人民都和諧和睦和平咁生活...
本來真係好美好...好完美...
可惜...人係貪婪...貪婪會毀滅一切...
「呵呵～有意思...少年。」宋伯伯帶住憐憫嘅笑容望住我點點頭...
有...有意思？
我...我鳩噏㗎咋喎...
就喺呢個時候...突然！
「逆行者！」久久冇出過一粒聲，坐喺我右邊嘅綽姿突然噏咗“逆行者”三個字！
逆...逆行者？！
我唔係好理解“逆行者”呢三隻字係代表乜...
我只係知道...綽姿好緊張咁...用左手大大力咁壓我向後...貼實裝甲車車身...
同時...我感應到有道氣息...喺裝甲車外面...有好強大嘅氣息！
好強大...極強大！而且仲越嚟越近...已經好近...接近到就喺...
“吱！！！”就喺呢個時候，一道超強綠光由車頂...上至下...垂直斬開裝甲車！！！
我望住道超強綠光...望住宋伯伯帶住慈祥嘅笑容...望實我...
超強綠光將我同宋伯伯嘅視線分隔開...將裝甲車左右兩邊一分為二！
『嘩嘩嘩嘩嘩！！！』我哋坐緊呢邊車身完全失控咁瞓住喺馬路上鏟住去！！！
嘩嘩嘩！咩事呀？！咩情況呀？！
“依！！！”仲要瞓住喺地三百六咁打晒轉！
“啪！砰！啪啪！”撞埋防撞欄！
嘩嘩嘩！暈喇！暈喇！！！
“啪啪！依！依...”再轉多幾圈...終於慢慢停落嚟...
我被綽姿左手壓實...望住個夜空...
咩...咩事？啱啱發生咗...咩事？
再望望身邊...兩個解放軍士兵已經唔知飛咗去邊...
好彩...好彩有綽姿撳住...唔係嘅話我都應該唔知飛咗去邊㗎喇...
綽姿一跳！就跳出車外！
我就扶住架被一刀兩斷嘅裝甲車車身...望清楚切口...
切口好齊...仲有點點...散發住微弱綠光嘅...綠色粒子？
呢種好似螢火蟲咁嘅...綠色粒子...
我爬出車外...望一望...見到綽姿已經拔出精神刀！亮出刺眼嘅紅光刀刃！
而喺地上...有兩個Full Gear嘅解放軍士兵好痛苦咁爬吓爬吓...
係頭先...坐喺我哋身邊嗰兩個...
我再望遠啲...
宋...宋伯伯呢？
再望遠一啲...我望到有一個著住黑色長袍...瘦削嘅身材...笠住頂帽...塊面漆黑一片...但雙眼嘅位置有兩點綠光嘅身影！
唔止...唔止對眼嘅位置...呢個身影嘅全身...長袍上嘅暗花...仲有佢左手手上把精神刀嘅刀刃...都係發出綠色光芒！
一閃...一閃...身上都都被綠色粒子包圍住...一閃一閃...好似被螢火蟲包圍住咁...一閃...一閃...
一光...一暗...氣息就跟住一強...一弱...
就係呢種氣息...呢種帶點親切嘅氣息...頭先將架裝甲車一刀兩斷嘅氣息！！！
咩人...究竟係...咩人？點解佢身上嘅粒子唔係紅色...係綠色？！
「果然...果然係同逆行者有關...仲再次...遇到你...」綽姿口都震埋...又手震震咁...
逆行者？
頭先...喺裝甲車被一刀兩斷之前...綽姿都有提過...逆行者...
眼前呢個被一閃一閃嘅綠色粒子包圍...手握發出刺眼綠光刀刃精神刀嘅秘密身影...就係...逆行者？
咁逆行者...又係咩人？！都係我哋SPIRIT嘅人？
「係...係逆行者...係逆行者吖！」一眾喺GMC Van上嘅執行者都落晒車！
「點會...點會喺呢區...」個個都拔出精神刀...亮出刺眼嘅紅光刀刃！但個個都手震震咁...
其中一個...係偷生叔叔！偷生叔叔仲背住我哋拼命咁跑！走咗去！
走？喂...喂你呢個時候走去邊呀？！
解放軍都相繼走出裝甲車！離遠用槍指向逆行者！
「哎呀...哎呀...」宋伯伯由逆行者身後嘅裝甲車半邊車身爬出，「係必然你吖？唉...如果係偶然嘅話...會溫柔好多囉...」
必然？偶然？係...稱號？
眼前呢個...逆行者嘅稱號係...必然？
必然轉身行埋去宋伯伯身邊...
“嗡！”一刀就砍開鎖住宋伯伯雙手嘅電池鎖！
「嘩嘩嘩！睇睇睇睇準啲先嘛！」宋伯伯驚到手都震晒！腳都軟埋！
必然冇理宋伯伯咁多，一手就扶起佢！
「喂喂喂！」宋伯伯嗌晒救命咁！「溫柔啲！溫柔啲！對老人家要溫柔啲...我呢副老骨頭散喇！！！俾我坐低抖抖...坐低抖抖...」
必然扶住宋伯伯行去防撞欄...
正當宋伯伯一坐喺防撞欄...
“啪啪啪啪啪！”幾下槍聲...子彈就由四方八面，向住宋伯伯同必然嘅身處位置射過去！
同時！
“嗡！嗡！嗡嗡嗡嗡嗡！”必然揮動手中嘅精神刀！
刺眼嘅綠光閃著閃著！將所有子彈都擋晒！
仲用槍？古老嘅武器...
「怪...怪物呀...怪物呀！！！」在場所有Full Gear嘅解放軍士兵走都走唔切咁四散！
又走？咁...咁我哋...
必然安頓好宋伯伯之後，就轉身望住我...望住我面前嘅綽姿...行近兩步...
「哎吖...唔記得叫解放軍班人俾定包花生我添...」宋伯伯坐喺防撞欄上擰擰頭...
“嗡！”雙眼發住綠光嘅必然...手上把精神刀嘅綠光刀刃比起頭先更光更亮！而且刀刃嘅周圍仲有...電光閃吓閃！
做...做咩姐？想...想點吖？
大...大家都係行者...Friend嚟㗎嘛吓話？
只見必然再靠近一步...
呢一步散發出極強大嘅壓迫感！
我被呢種壓迫感迫到...抖唔到氣咁...
呢啲係唔係傳說中嘅霸王色霸氣？！
唔係...唔係啲乜鬼嘢霸氣...
係氣息...每個行者身上獨有嘅氣息！
必然再靠近一步...
綽姿退後一步…背住我：「一陣有機會嘅話...立即走。」
一陣有機會嘅話...立即...走？！
綽姿係叫我...逃走？！