《香港傭兵》: [Day 06－護送委託] PART 10
綽姿叫我一陣有機會嘅話就立即逃走...咁綽姿佢自己點吖？
單睇綽姿嘅背影...就知已經進入作戰Mode！
同樣...對面嘅必然都係一樣！
兩般強大嘅氣息充斥住整條青衣大橋！
點解會咁？
明明大家都係行者...點會形成而家呢個翻雲覆雨...如箭在弦...蓄勢待發嘅對立局面？！
正喺我滿頭問號之時...
綽姿以忍步一踏！迅雷不及掩耳之勢向住必然橫刀一斬！
同時，必然隨便舉起閃亮住綠光刀刃嘅精神刀一擋！背後隨即閃出...
『天使翼？！』我見到...必然背後突然閃出一對散發住綠色粒子嘅天使翼！
天使翼就好似曇花一現...瞬間消失...
“吱！！！”一紅一綠嘅精神刀刃互相磨擦，擦出刺眼光芒！
太...太太太衝動喇！
綽姿打算先發制人...但咁樣被人輕易瓦解攻勢...同時露出破綻！
打交唔係咁㗎！應該企喺度鬥耐性！企返兩三個鐘睇吓邊個忍唔住！
話口未完，必然輕輕震動手中嘅精神刀，將綽姿整個彈開！
嗱！都話㗎啦！
你用咁大幅度同力度斬向對方，對方利用反作用力就可以將你輕易彈開！
唔單止咁...
綽姿俾必然彈開後失去重心...必然趁機追擊！
嗱！呢啲咪就係我頭先所講嘅破綻囉！
必然一步就跑到綽姿面前...橫斬！
仲失緊重心嘅綽姿及時用精神刀一擋！彈後一步！
必然再乘勝追擊！貼近綽姿橫斬直砍轉身半月斬！！！
綽姿邊退邊用精神刀一擋再擋！再以一個單手後空翻避開必然嘅半月斬！！！
好唔容易，綽姿先拉得開個距離！
之但係...單憑頭先嗰幾下攻防可以睇得見...綽姿係捱打嗰方！
話口未完，必然又以忍步貼近綽姿！
橫斬！直砍！橫斬！直砍！橫斬！橫斬！半月斬！
綽姿就只有一邊後退一邊用精神刀擋擋擋！再用解放軍嘅裝甲車擋！
但架裝甲車就被必然嘅半月斬輕鬆一刀兩斷！
綽姿食住個勢，一腳踢架裝甲車半邊車身！半邊車身就飛向必然面前！
必然輕輕一跳！跳上車身！
綽姿趁住必然踩上車身嘅空檔，一躍以上！向必然交叉斬兩刀！
必然一個半車身避開一刀，再以精神刀擋住另一刀！
綽姿今次未喺必然用精神刀震開自己之前，就順勢斬開半邊裝甲車車身！
半邊裝甲車車身正要再一分為二之時，綽姿同必然同時一躍！就喺空中展開一連串攻防戰！
“嗡！嗡！吱！嗡！嗡 嗡 嗡！吱！”喺夜幕下，刺眼嘅紅綠光芒劃破黑空！
喺橋上面嘅隊友個個都仲係拎住把精神刀呆望天空！
『喂！唔好望喇！幫拖啦！』我Fing晒手咁向班隊友大叫！
但班隊友個個都食晒花生咁！冇一個願郁！當我鳩嗚！
屌！成班都係廢柴！冇撚用！
“嗡！吱！嗡 嗡 嗡！吱！吱！嗡！吱！嗡！吱！”綽姿同必然你砍我擋！我擋你斬！斬斷幾支燈柱！
喺幾支燈柱快要倒下之時，綽姿同必然一人企喺一支燈柱上，互有攻守！
每當必然身上嘅綠光一暗，就會巧妙咁避開綽姿嘅攻擊！
到必然見到綽姿有空檔之時，左手手上把精神刀發出刺眼嘅綠光，斬向綽姿！
一光一暗...一強一弱...每當一暗就避...一光就攻擊或者係擋！
而全個過程，綽姿明顯都係陷於劣勢嗰方！
而在場嘅隊友...冇一個願意出手！
屌！點解雷友總是在自己嗰邊？！
“嗡！吱！”就喺必然由上直砍！綽姿被壓之下由天空橫擋，直壓落地之時...
機會嚟喇～飛揚！
我以忍步跑近！以拔刀姿勢向必然施以突襲！
但我把刀都未拔出，就被必然凌空一腳踩住刀柄底部！
郁...郁唔到...
必然再以一個半車身窩利踢落我個頭！同時順勢向綽姿揮動精神刀！
『哎呀！』我就成個人凌空三百六轉體三周半直飛埋防撞欄！
“砰嘭！”
嘩痴撚線！一腳咋喎...撞到個防撞欄都變晒形...
我個頭有冇穿？
綽姿喺地上碌咗兩個圈都仲可以喺我身邊擺返個有型姿勢：「我叫咗你一有機會就走！」
『我...』我都未將“想幫你”講出口...
「小心！」綽姿一手推開我之後，就正面擋住必然嘅一文字斬！
“吱！”好刺眼！淨係啲綠光都搞到睇唔到嘢！
之但係見綽姿擋住必然嘅一文字斬，我就想趁住呢個空檔再以拔刀姿勢向必然發動攻擊...
必然又一個踩開我！
「哎呀！」我失晒重心咁向後退！
與此同時，必然將綽姿震開再轉身以忍步跑到我面前快速橫斬！
仆...仆街！
當我正要向後仆，順勢拔刀一擋！
“吱！”好成功！我手上把精神刀所發出嘅紅光刀刃，好成功咁擋住必然手上把精神刀所發出嘅刺眼綠光刀刃！
之但係一瞬間...
『嗚呀！！！』我整個人又凌空三百六轉體九周半直飛九丈遠！
“啪...”成個人撻落地...
“沙...”滑行幾米...
“啪啪...”又碌咗幾圈...
“沙沙沙...”再滑行十幾米...
我成個人就瞓咗喺青衣大橋上！
『痴...』痴撚線㗎...
只係擋一刀...我成個人就唔知飛咗去邊...
我隻手...仲要震晒...
唔止隻手...係由隻手...震到上膊頭...全身都震震吓！
呢種力量...根本就係兩個級數...
唔止力量...戰鬥方面...刀術方面...完全係兩個境界...
我...只係新手村裡面嘅菜鳥...
必然...就係滿等神裝走嚟新手村虐菜嘅Faker！
當我仲坐喺地上天旋地轉，唔知方向之時...我感覺到必然嘅強大氣息迫近...已經喺我身旁！
我回個神，但必然已經喺正我面前...正準備向我使出袈裟斬！
『仆...』仆街喇呢次...
我根本就冇反應更冇本事去招架...
就喺我呆晒咁...等綠光刀刃由上至下...右至左砍落嚟之時...
綽姿一手拉開我，再背住必然...用精神刀檔住必然嘅袈裟斬！
我成個人貼住塊地滑行咗幾米...望住必然順勢揮動精神刀...
刺眼嘅綠光刀刃就沿住紅光刀刃轉動兩下...斬斷綽姿左臂！
綽姿隻左臂連同精神刀飛上空中...轉咗兩圈...化成紅色粒子...飛散...
“噹...噹...”跌返落地嘅...就只淨返精神刀柄...
同時...綽姿單膝半跪...跪喺地上...右手撳實...飄散住紅色粒子嘅左邊膊頭...
“咯...咯...”必然手持精神刀...發出刺眼綠光刀刃...行到去綽姿面前...
綽姿背住我：「走...快啲...走...」
必然企喺綽姿面前...“嗡！”舉起精神刀！
唔好...唔好...唔好呀！
電光圍住刺眼嘅綠光刀刃一閃...一閃...
必然就企正喺單膝半跪嘅綽姿面前...
準備再次使出袈裟斬...
唔好...
綠光刀刃由上至下...右至左向住綽姿身上砍落去...
唔好...唔好呀！
正當綠光刀刃快要砍到綽姿身上之時...必然手上嘅綠光刀刃化成無數嘅綠色粒子...喺空氣中閃著閃著...飄散...消失...
唔單止必然手上...就連佢嘅身上...身上閃著綠光嘅綠色粒子都飄散到空中...消失...
必然全身乏力咁...隨即跪咗喺綽姿面前...
咩...咩事？而家又係...咩情況？
綽姿撳住自己膊頭...向後退...退後兩步...坐咗喺地上再退後多幾步...
「機會嚟喇！」身後傳嚟幾把聲...仲有...
十幾道行者氣息一擁而上！
係...係班花生隊友！
十幾個隊友手握精神刀，個個都亮出刺眼嘅紅光刀刃，喺我身邊跑過...向住跪喺地上嘅必然飛撲埋去！
呢班仆街...想執雞？！
正當十幾個仆街隊友快要飛撲到必然身上之時...我又感覺到有另一道超強嘅氣息...喺正必然面前！
突然綠光一閃！
“嗡！”仲喺半空中...十幾個行者瞬間化為紅色粒子！喺空氣中飄散...消失！
而喺綽姿同必然之間...企咗個著住黑色長袍...笠住頂帽...塊面漆黑一片...但雙眼嘅位置有兩點綠光嘅身影！
呢個身影...左手手持亮出刺眼綠光刀刃...刀刃仲有電光閃著嘅精神刀...直指左邊！
係...係幾時...
突然！呢個身影背後閃出一對散發住綠色粒子嘅...天使翼！
同時！身影嘅全身...長袍上嘅暗花...都發出綠色光芒！
然後！天使翼就好似曇花一現...瞬間消失...
頭先又...發生咗咩事？
等我諗諗...等我再重組一下...
根據而家眼前呢個閃亮住綠光嘅身影嘅姿勢...加上剛才一道刺眼綠光後...所有仆街隊友化成紅色粒子...應該係...一閃？！
綠光身影使出Freedom嘅一閃...將所有仆街隊友一刀兩斷！化成紅色粒子！
一定係...一定係出手太快...快到我睇唔到！
“嗡！”綠光身影用刺眼綠光刀刃指住綽姿！
綽姿撳住自己手臂...望住綠光刀刃...
『唔好...唔好呀！』今次...今次冇咁好彩㗎喇...
就喺呢個時候...
「呵呵～偶然都嚟埋...」宋伯伯起身，「你嚟救我唔得嘅？！係都要必然出手！搞到我呢副老骨頭差啲散喇！」
偶然...佢就係...偶然？！
偶然用刺眼綠光刀刃指向我...扶起跪喺地上嘅必然...
「唉～快啲返去沖個涼先～解放軍基地啲水臭㗎！」宋伯伯就行去...停泊喺遠處嘅...白色私家車。
偶然扶起必然後...一邊用刺眼綠光刀刃指向我...一邊向後退...
退到去差唔多到白色私家車之時...
“嗡！嗡！”偶然向住橋身揮動精神刀！
“轟轟隆隆！“條青衣大橋就俾偶然斬斷！跌落藍巴勒海峽！
呆望住宋伯伯、必然同偶然都上咗車...“依！吱～”開走...
『綽姿！綽姿！你點呀？』我立即跑到綽姿身邊！扶起佢！
「叫我...叫我瓦解...呀！」綽姿冇氣冇力咁啪啪我塊面！
『咩都好啦！你點呀？有冇事呀？』呢啲時候就唔好執著埋啲無謂嘢啦！
「快啲帶我返去...嗄...精神...流失得好快...嗄...」綽姿軟弱無力...
『帶你返去...帶你返去...』點...點帶你返去呀？！
我扶住綽姿，左望望...右望望...
青衣大橋被斬斷...只好回頭...回頭...
扶住綽姿回身喺青衣大橋上行...
裝甲車...屌唔撚係叫我揸裝甲車呀化？！
識閪揸咩？！
再行多幾步...
“吱！”我聽到...有車聲！
我望到遠處...有燈...有車頭燈駛緊過喇！
啱晒喇！
“嗡！”我亮出紅光刀刃！
等架車駛到嚟我哋面前...
“依！”急停！
『落車！』我用紅光刀刃指住架碳纖色嘅...超級跑車？！
極貼地...超誇張流線擾流設計...睇個外型超級型...車頭仲有一塊...蠻牛Logo？！
係我最愛嘅...林寶？！
「咩事吖大佬？拍戲呀？碌嘢識發光㗎喎～」一個杜汶澤咁款嘅男人揭起車門，舉晒手咁落車！
『拍你老母...我叫你落車呀！』我就扶住綽姿，行到去另一邊想揭開車門！但鎖咗...『開門呀！』
「你又叫我落車...又叫我開門...咁落車定開門吖大佬？」杜汶澤皺晒眉...
『開咗門先落車囉咁多嘢講！』我用精神刀指杜汶澤！
「開咪開囉...」
『仲講？！』
揭開車門，放綽姿上車之後...
我行到去杜汶澤身邊：『行撚開啦！』
「喂喂大佬...架車啱啱落地...錫住揸...錫住揸...」杜汶澤仲死纏爛打咁...
『我叫你...我叫你...妖！我叫你行撚開呀仆街！』一手推鳩開杜汶澤之後，我就上車閂返車門...
超貼地...好似坐咗喺地下咁...
成個車廂都係碳纖同黑色真皮包圍...
個軚盤仲要...好似F1軚盤咁，採用非圓形設計！
仲要係用緊Dual-clutch transmission！
WOW...林寶...仲要係未來林寶...都仲用緊雙離合器波箱！
咁先係超級跑車㗎嘛！
唔知有幾多速呢？
六前速？七前速？睇睇先...嘩有成十二前速㗎！！！
「喂喂喂...真係小心啲...」杜汶澤仲繼續喺出面煩膠住晒！
“依！依！吱！”一俾油扭軚...成架林寶就片住去！！！
「小心甩尾呀！！！」
“吱！吱～～～”踩行油！
話晒都係未來...
『喂～Siri！而家仲係唔係叫Siri吖？有冇導航系統㗎？』都2035年啦！導航應該係基本嘢啦！
“噹”「請講出想前往嘅地點。」
咦喂！真係有㗎喎！仲要仍然叫Siri？！
『我想去...屯門幸福樓！』直接返到屋企！
“噹”「對唔住。並無相關路徑。」
乜料呀？！係唔係太偏僻呀？！
唔係...唔係太偏僻...
唔通...去唔到特殊區？
『我想去深井！』深井得喇掛？
“噹”「立即顯示前往深井路線。」
擋風玻璃立即顯示出好似玩賽車Game咁嘅紅色...漸變黃色...漸變綠色...又漸變黃色...又漸變返紅色嘅箭嘴...貼住喺路面！
屌！我唔係要呢種導航呀：『我係想自動駕駛呀！』
都2035年啦！啲AI都仲係咁撚蠢？！
“噹”「由於前往深井屬危險路段，無法使用自動駕駛系統。」
乜撚柒呀？危險唔係唔應該人手駕駛先係㗎咩？
人類同AI嘅認知係唔係剛好相反㗎？！
唉...算鳩數！反正自己揸可能會快啲！
“吱！吱～～～”我就踩行油！六七八九十波！跟住路上嘅導航箭嘴飛馳！
“依！吱！吱～依！吱～”左穿右插！爬的士頭！
偷偷望望綽姿...
「嗄...呀！嗄...」好似好辛苦咁...
『喂...你點呀？』我一邊好唔專心咁揸車，一邊好專心咁問候綽姿。
「嗄...快啲...能量流失好快...我...好快會進入深層....嗄...」綽姿撳到膊頭實一實...但都仲係有好多紅色粒子飄出！
『咁咪進入深層睡眠囉！』瞓醒一覺就到㗎啦！
「唔得...萬一又遇到...遇到逆行...」
『遇到都做唔到啲乜㗎啦！』你而家咁嘅樣...仲打到咩？
「唔好講咁多...提高警覺...感應...嗄...」
提高警覺？感應？
感應到都做唔到啲乜㗎啦！
『不如...你用埋支Level 1頂住先啦！』係喎！都唔記得綽姿頭先俾咗支Level 1我！
「唔得...我左手斷咗...吸唔到...」
左手斷咗吸唔到？
又好似...係喎...綽姿係用左手㗎呵？
乜咁麻煩㗎！
「你...你都係自己用咗先...你...你都應該差唔多...夠鐘...」
我...又係喎...我應該都差唔多夠鐘...
我插隻左手入袍袋...用力一捏支Level 1精神液！
當道寒意由手背傳遍手掌…傳到手臂…全身...
「咩液體嚟㗎？！」我又聽到喇！
「救命呀！救我出去呀！！！」我又聽到女仔聲喇！
“BI！BI！”「危險！與前車太接近！」
『哦？嘩呀呀呀！』當我意識到之時，差啲就隊咗落前車車尾！
”依！依！依！！！吱！！！”好撚危險！好撚危險！我都係專心啲揸車先！
“吱！吱～～～”踩行油喺快線衝！
“嗶！嗶！嗶！！！”『屌你老母開得嗰百幾就咪撚騎住快線阻鳩住晒啦死人仆街快線撚！』
邊屌邊跟住路上嘅導航箭嘴風馳電掣！好似識飛咁！
好唔容易先由荃灣路轉到落青山公路！
“依！吱～～～”再踩行油！劈多幾個彎！好唔容易先嚟到深井！
嚟到深井...見到班Full Gear手持長槍嘅香港警察先醒起...
『仆街喇！點過去呀？！』一時唔記得只有紅Van先可以...
我減慢車速...班警察見到我哋...好似好驚訝咁！
就喺我快要停喺警察路障前之時...
有個好似高級啲嘅警員望一望入嚟...望住我對眼...
「讓開！讓開！俾佢哋過！」個警員立即命令班伙記立刻拉開路障！
咁好死？
咁我就唔客氣喇！！！
當班警察拉開路障之後...
“依！！！吱～～～”立即加速衝過路障！
我望望倒後監視器...望住個警員越嚟越遠...
應該係...同我哋有聯係...
就算唔係同我哋有聯係...都應該係知道我哋嘅存在...
仲記得中午嘅時候...嗰幾個警察講過...
“吱！吱～～～”繼續揸住架林寶有彎劈彎！直路飛馳！
林寶真係好好揸！人一生真係要擁有一架林寶～
喺漆黑嘅公路上...明月都被樹影遮擋...就只能靠車頭大燈作照明...
我亦只好輕微提升視力...
“吱～吱！”當我飛到過嚟青山公路大欖段...正想一下衝上青山公路新大欖段之時...
“依！依！！！”我踩brake都踩唔切！！！
『嘩嘩嘩！』條...橋呢？
眼前條青山公路新大欖段架空橋...唔見咗！成條斷晒！
嘩我屌...差啲就飛輪海...
唔怪之得啦...唔怪之得今朝紅Van唔行呢邊...原來條橋已經冧咗...
咁冇計喇...只好兜入小欖嗰邊...
“依！吱～”當我兜入小欖嗰邊...我又盤算緊一樣嘢...西貢獻命...
當我駛到差唔多到西貢獻命嘅路障...西貢獻命一望到坐喺車入面嘅我...
「快啲快啲！快啲拉開路障俾佢哋過呀！」西貢獻命嘅人立即拉開路障！
點解會咁㗎呢？
等我頭先仲諗...會唔會要同佢哋開戰...
話晒...西貢攻防戰都係同佢哋打...
照計...我哋係敵人...
點解...而家又會咁順攤俾我哋過？！
或者...傭兵冇永遠嘅敵人...
“依！吱～”衝過西貢獻命路障，繼續揸住架林寶，喺青山公路有彎劈彎！直路飛馳！
偷偷望望綽姿...好虛...仲有少量微弱嘅紅色粒子由膊頭飄出...
逆行者...究竟係咩人？
可以同綽姿爭一日長短...唔係...
係壓住綽姿嚟砌！
仲要一刀就將十幾個執行者解決...
兩個逆行者...宋伯伯...
“吱！吱～～～”好快就衝到嚟三聖！
“依！吱！”好快又過咗市中心！
“吱～依！”衝到返屋企樓下，我就隨便泊架林寶喺路邊！
落車抱綽姿上樓！
快...快...快快快快快！！！
『返到嚟喇！返到屋企喇！！！』一入到屋，我就將綽姿放上床！
「嗄...嗄！呃...」綽姿抖咗兩啖大氣...放鬆晒成個人...進入...深層睡眠？！
係唔係...冇事㗎喇？
就喺我幫綽姿揭開頂帽...拉低衫領...望住好似睡公主咁嘅綽姿之時...
『隻...隻手！』我望到綽姿左邊膊頭...有幾條紅光...紅線...伸出...
越嚟越多...越嚟越密...十幾...百幾...數之不盡咁多條紅線伸展...交織返隻...手臂出嚟！
全隻手臂...由紅光...變返隻雪白幼嫩...纖幼嘅左臂！
『究竟...係...』
意識開始模糊…
『咩...』
四肢乏力…
『科...』
開始…
『技...』
失去…
…
..
.
TO BE CONTINUED