小櫻去咗搵知世...

又得返我一個...

真係估唔到...綽姿都會著短裙...仲要絕對領域黑絲...

其實綽姿都真係好少女嘅...只係...睇慣咗佢冷血嘅一面...

少女嘅...綽姿...



好喇好喇!唔好再諗咁多喇!一陣又走火...入魔!

都係入廁所梳洗先~

一邊梳洗,一邊諗諗...逆行者...擁有極強大嘅綠光能量...SPIRIT嘅叛徒...最大嘅敵人...

我而家開始明白...點解東叔會話我唔慌長命得去邊...

強如綽姿...都招架不住...更何況我?



萬一真係俾我再遇到逆行者...必死無疑...

簡單咁梳洗完,著返緊身衫褲綁埋把匕首喺大髀著埋行者長袍再插返把精神刀柄喺腰間...

話就話再遇到逆行者就必死無疑姐,點都要有返啲準備...反抗吓都要啦~

唔通真係“既然冇辦法反抗就只好閉起兩眼好好享受”咩?!

再摷返件...黑色毛毛大褸!



『好彩仲有件~』原本著開嗰件,仲喺架GMC Van度...

有時間係唔係應該去買返啲衫呢?

反正今日綽姿唔接委託...自由活動...去睇吓邊度有衫買都好~

不過而家就要完成綽姿嘅命令先!

袋埋銀包鎖匙電話拎埋支Level 1精神液再著埋對鞋我就咬住塊麵包出門口!

一落到街,尋晚揸返嚟架林寶就喺正我面前。

朝早望清楚啲...極貼地...勁扁身...超誇張流線擾流設計...每一“條”LED燈...每一塊擾流板...都係型嘅表現!

『真係型撚到...』唔捨得將你交俾人囉...



喺我有生之年,真係冇乜機會擁有一架林寶...

而家有...又要交到別人手...

唉...

我單手揭開車門...坐喺跑車座椅上...摸摸個非圓形設計軚盤...摸摸中間隻狂牛:『唉...你知道嘛...除咗阿月,我生命中第二最愛就係林寶㗎喇...』

雖然你唔係我真金白銀買返嚟...但總算係我親手搶返嚟...仲要經歷過生死...

難道只好淌淚心痛告別你?

『唉...』



“啪”我閂返車門...

“吱!” 撳落Engine Start...

“依!吱~”一俾油架林寶就衝住去!

你睇吓你睇吓!一俾油就有反應!仲勁過啲淫閪出水!

咬地又夠實!劈彎唔會甩尾!幾咁爽皮!

踩到盡都唔怕!呢啲咪就係超級跑車囉~

之但係踩到盡...好快就到目的地...

“依!”泊架車喺路邊...



拎埋條車匙...

落車再圍住架林寶依依不捨咁摸勻全個碳纖(應該係)車身...

再跪喺車頭,攬住架車錫錫個狂牛Logo:『我真係好愛你㗎!!!嗚呀!!!』

唉...賣仔莫摸頭...都係唔好再逗留...

我頭也不回咁轉身,望住Double”S糖果店行過去。

“叮叮”我拉開木門...行入兩步...

「我想要呢隻~」



我聽到有把小妹妹聲...

「好啦好啦~一陣我分啲俾你啦~」

我又聽到另一把小妹妹聲...

我再行多兩步...

「咁我都份啲呢隻俾你吖~好好味㗎~」

我望到...有幾個天真無邪嘅小妹妹夾緊糖...

「喂~嚟咗喇?咁快嘅?」突然!東叔把聲由櫃檯傳過嚟!

我回身一望:『嗯...係吖係吖...冇嘢做咪快啲嚟囉...今日多咗咁多小朋友嚟幫襯嘅?』

真係多咗...比前日多咗唔少小朋友...

望住成班天真無邪嘅小朋友,帶住歡欣嘅笑容夾糖...真係心都甜埋~

講真其實我都幾鍾意小朋友~

尤其係小妹妹~

之前都有同阿月傾過,如果生小朋友會想生個囡囡先~

但阿月話打死都唔肯幫我生個囡囡...仲話以我呢啲性格幫我生咗個囡囡就錫晒個囡囡唔錫佢咁話...

我認~我係一個慈父~

「係吖~今日星期六嘛~好多小朋友都唔使返學,就嚟買糖食囉~等多陣啦~」東叔帶住一面慈祥望住班小朋友夾糖。

『哦...好...』係唔係每個男人一見到小朋友就會父愛泛濫㗎呢?

尤其係過咗某個年紀嘅男人...一見到可愛嘅小朋友就心都軟埋...

其實都係...出過嚟社會做嘢...受過折磨...見得太多帶住面具嘅人...好難再笑得咁純真...

曾幾何時...我都好似眼前呢班天真無邪嘅小朋友咁,只係夾到自己鍾意食嘅糖...都可以笑得咁歡欣...咁純真...

「東叔叔~俾錢~俾錢~」一大班小朋友拎住一包二包糖走埋嚟櫃檯。

「好好好~逐個嚟~逐個嚟~慢慢唔使急~」東叔就逐包糖放上磅,「呢包...一蚊~呢包...都係一蚊~呢包呢...都係一蚊喎~」

睇住東叔逐包磅...又係包包都係一蚊...

「拜拜東叔叔~」班小朋友俾晒錢之後,就好幸福咁拎住包糖行出門口。

「拜拜~小心啲喇~」東叔送咗班小朋友出門後,就將掛喺木門上嘅木牌擰一擰轉,「綽姿叫你揸架車嚟嘅?車匙呢?」

『嗯...係吖...喺...喺度...』我就拎住條車匙,行到東叔身邊。

東叔望出窗外...望住泊喺街邊嘅林寶...拎住我手中條車匙...

我又唔捨得咁揸到實一實...死人都唔肯放...

「喂...喂...點呀你?」東叔一邊望住架林寶...一邊搶我手中條車匙...

『無法讓我甘心替代你呀呀呀呀~~~』我仲係勁唔捨得咁揸實唔放!

「喂...喂...妖!」東叔一手搶走我手中條林寶車匙!「都唔知你噏乜柒!」

『林寶吖...林寶吖...』我喊晒口咁...

「有乜咁唔捨得呀?叫綽姿接多啲委託!賺多啲Sil!自己買過架囉!」東叔行去密室嗰邊...

我就跟住東叔身後行...

『你就講得輕鬆...』我尋晚先差啲冇命...

要執行委託賺Sil一啲都唔容易...仲係極危險!

仲話想買ADAM嘅情報...根本就冇可能...

未賺夠Sil我都唔知死咗幾多次...

咁搞法...我仲點返翻去過去搵返我最愛嘅月月呀?

“咔”東叔好隨意咁打開密室木門,開一開燈:「睇嚟你有所覺悟喇喎~哈哈哈~點吖?今日有乜想買吖?」

『唔...我仲要幫綽姿買長袍...同精神刀柄...』覺悟吖...啱吖~死嘅覺悟吖嘛~

「哦?估唔到你唔死得,但綽姿出事喎~」東叔行埋去櫃檯,摸住下巴打量住我。

『咩唔死得呀?真係差啲收皮呀!』我望望掛喺架上嘅長袍。

一件又一件...黑色嘅行者長袍...

「係?咩事咁大鑊吖?」東叔半信半疑咁打量住我。

『尋晚遇到逆行者呀!你話大唔大鑊喇?!』死喇...應該買咩碼呢?

「遇到逆行者?咪吹水喎~」東叔仲係唔係好信咁嘅死人樣。

『咩吹水呀?尋晚接咗個護送委託!喺青衣遇到逆行者攔途截劫!班仆街隊友唔幫拖都算!隊長仲要做逃兵!搞到綽姿獨力迎戰!仲俾逆行者斬斷手臂!班仆街隊友食完花生想執雞!呢個時候仲殺出多一個逆行者!一刀就將班仆街執雞隊友化成紅色粒子!係兩個呀!加埋有兩個逆行者呀!死喇死喇...諗住今次死撚梗啦!點知我大喝一聲!就嚇退咗佢哋!嘩!你都咪話唔驚險!』而家講起都驚驚呀真係!

「喺...青衣吖...」東叔皺住眉咁諗諗...

『係吖!咪臭係喺青...』我立即撳住個嘴!

仆街喇!好似講多咗...講多咗啲情報俾東叔知添...

『俾錢!』我攤大隻手!

「俾咩錢吖?」東叔一副“乜撚嘢”樣!

『講咗咁多情報俾你聽唔使俾錢呀?!』咁我咪好撚蝕?!

「許~係你自己講到興高采烈咁嘅~怪我呀?怪你自己蠢啦~」東叔一副關人柒事嘅嘴臉!

嘩我屌...咁撚鳩嘅...

「不過你話青衣出現逆行者...」東叔摸住下巴諗吓諗吓...

『嗯...』我等緊東叔繼續講...

「點會...佢哋點會...」東叔仲係摸不著頭腦咁...

『嗯?』我都摸不著頭腦咁望住摸不著頭腦嘅東叔...

叔東立即撳住自己個嘴,擰擰頭:「冇!冇...冇...」

冇...古古惑惑神神秘秘咁...冇啲乜嘢吖?

「你係唔係要幫綽姿買行者長袍吖?」東叔轉個話題。

『吖~係吖係吖係吖...』我仲要幫綽姿買嘢㗎!

「點吖?買邊件吖?」東叔又問。

『呃...我都唔係好知佢著咩碼...』頭先都唔記得問綽姿添...

「細碼囉~佢咁細粒~咁Level幾吖?」東叔又再問。

『啱吖啱吖...佢咁細粒...童裝細碼啱佢㗎喇...但Level幾呢?』我又冇問到綽姿要買Level幾添...

「綽姿著開執行者Level 5㗎嘛~咁都唔記得!你個腦載咩㗎?點做行者呀?點解你仲未死㗎?」東叔一輪嘴咁問問問問問...

係咯...究竟我個腦載咩㗎呢?

點解總係好似...有好多嘢都唔記得㗎呢?

你永遠都不知道自己忘記了甚麼...

鬼咩!出嚟社會工作咁多年,個腦日日淨係載住公司嘢!搞到提早腦退化!

你唔好俾我返到去過去!我一鳩定要肥豬腦細賠償!

唔賠嘅話咁點?

一刀斬佢個豬頭落嚟!

東叔由櫃檯行出嚟,喺架上搵咗兩搵,拎件長袍出嚟:「嗱!呢件啱㗎喇!」

『哦哦...』我拎件長袍喺手...睇真啲...

Size應該啱啦...成件童裝細碼咁...

長袍上嘅黑色暗花...都似似地...應該係綽姿著開嗰隻啦...

唔...再Check Check有冇穿有冇爛...

我再上上下下左左右右裡裡外外咁Check一次...

「喂...喂...喂點呀你?成個驗屍官咁...唔好做行者喇...去做驗屍官罷啦你...」東叔冷眼望住我...

『嘩...唔Check真啲點得?一陣有乜甩漏...綽姿斬我都似...』你鋪話法真係要戒...

「唔...咁又係...啱嘅啱嘅...」東叔都摸住下巴點點頭。

我就確保成件長袍冇穿冇爛冇爆線啲暗花冇甩漏:『好!就呢件啦!』

「咁仲有冇嘢要買吖?」東叔又問問。

『仲有冇...唔...呀!精神刀呀!』差啲唔記得添!

「連精神刀柄都...」東叔摸住下巴口噏噏,「睇嚟...對手真係唔普通...」

『唔?』唔普通...

咪講咗係逆行者囉...梗係唔普通啦!

「係唔係仲有精神刀柄吖?自己揀啦!」東叔指一指啲精神刀柄,行返入櫃檯。

我打量住一把把黑色嘅精神刀柄:『唔...有冇Level分㗎?』

把把都好似一樣樣...

「精神刀柄邊有分Level㗎?你真係仲好似乜都唔知咁㗎喎...」東叔冷眼望住我...

『吓?我又要知啲乜吖?』我一頭問號望住啲精神刀柄...

「精神刀柄完全係因應你供幾多精神能量俾佢,佢就發動幾強精神能量嘅精神刀刃。」

『哦哦...』呢層我知吖...試過幾次唔知都變知啦...

「你精神能量夠強大,一下谷晒落去都得!不過我睇你都唔係好谷得起...仲係啱啱好發動到精神刀刃出嚟嗰隻...」東叔鄙視我咁擰擰頭...

屌...講到我好似半硬微軟扯唔起咁...

「至於行者長袍...佢本身會吸行者嘅精神能量,自動發動防禦功能...即係嗰啲呢~圍住喺身上嗰啲紅色粒子呢~」

『嗯嗯...』知吖知吖...唔使再提喇...

「所以先要分Level,等唔同級數嘅行者選購唔同Level嘅長袍~免得一下子就吸乾行者嘅能量~」

『嗯嗯...』真係貼心喇...

講到尾咪又係做生意嘅手法...呃我唔到嘅!

「之不過...」東叔好認真咁諗咗一諗,「唔好諗住長袍可以擋得住逆行者...你應該...見過佢哋嘅...能量...」

佢哋嘅...能量...綠光嘅能量...

唔止見過...仲領教過...

嗰一刀...綽姿仲話我應該已經煙消魂散...

『究竟佢哋...』我都仲未將“嘅綠光能量喺邊度嚟”講出口...

「唔講喇~唔講喇~再講就要收錢㗎喇~」東叔合埋對眼揮揮手,擰擰頭。

『嗯...』

情報...係要買...

一係...自己搵!