《香港傭兵》: [Day 07－緊急委託] PART 03
「點吖？揀好未吖？」東叔有啲唔耐煩咁。
『呃...等等...等等...』把把都一樣...點揀好...
「喂...你有選擇困難症㗎？都把把一樣㗎喇...仲有乜好揀呢？」東叔黑人問號。
『呃...就係把把一樣先難揀吖嘛！』點揀好呢...揀把冇花冇崩冇甩油嘅！
「唉...真係有選擇困難症...咁都做到隨行者...SPIRIT真係青黃不接...」
我就唔理東叔咁多，繼續揀把最好最完美嘅精神刀柄俾綽姿！
一揀又揀咗一段時間...
『好啦！就呢把啦！』好唔容易先俾我揀到把最完美嘅精神刀柄！
「吓吓？揀好喇？嗚呀～」東叔打咗個大喊露！
『係吖係吖...咪鬼扮瞓著啦！』我將長袍同精神刀柄都放喺櫃檯上。
「咩扮吖？老人家，容易攰呀！」東叔就睇睇櫃檯上嘅貨物，「執行者長袍Level 5...500 Sil...精神刀柄...500 Sil...合共1,000 Sil。」
『嘩...咁貴㗎？！』我拎部電話出嚟開返個SPIRIT App睇睇...『我...冇咁多喎...』
結餘得返...761 Sil...
「哦？唔緊要啦～我喺架林寶度扣返先再過數俾綽姿囉。」東叔都拎部電話出嚟撳撳。
『係喎...架林寶啲錢...俾綽姿㗎？』我都諗唔起呢個問題...
「係吖...」東叔拎住部電話撳撳撳...
『吓？架車我搶返嚟㗎喎...』
「咁又點呢？」東叔冷眼望一望我，再撳撳撳撳撳...
『吓？咁唔係應該過俾我先啱㗎咩？』
『你係綽姿嘅隨行者吖嘛...」
『咁又點呢？』
「咁咪你嘅嘢都係屬於佢㗎囉...識唔識規矩㗎…」
『係咁㗎咩？』
「唔係咁㗎咩？」
『公平咩？！』
「痴線嘅～無啦啦講咩公平～」
點解呀？點解無啦啦唔講得公平呀？
公平呢樣嘢，無時無刻都要講㗎啦！
喂！架林寶我搶嘅！又係我揸住佢車身負重傷嘅綽姿返嚟嘅！
點解啲錢係過俾綽姿唔係過俾我呀？！？！？！？！？！？！
「搞掂～」東叔收返好部電話，幫我將件長袍同精神刀柄都放入紙袋，交到我手，「拎住喇～」
『哦...』我接過紙袋...
從來...話事權都唔喺冇權嘅人手上...
從來...冇權嘅人都要被當權者剝削...
拎住載有長袍同精神刀柄嘅紙袋，跟住東叔行出糖果店...
「好～試試架林寶先～」東叔鎖好店舖門，雀躍不已咁跳過去架林寶身邊。
『試試架林寶...小心撞L死你呀！』我認！我係詛鳩咒東叔！
但人亡好喇～唔好車毀！
「睇小我吖？我以前係大帽山車神嚟㗎！」東叔摸摸車頂...
大帽山車神？
神其實都係人呀？只係食到人食唔到嘅女神呀？
鍾震圖就有你份！
「嘩～滑手到呢...真心正...」東叔圍住架林寶...摸到愛不釋手咁...摸勻全車身...
點解我總係覺得東叔好似個變態怪叔叔摸緊個小妹妹嘅嫩滑胴體咁嘅？
望住東叔瀟灑咁揭開車門，坐上跑車座椅，摸住非圓形設計軚盤：「你吖...再遇到逆行者嘅話...小心啲喇...」
『哦...』小心到先得㗎...
「希望仲有機會...見到你啦...」東叔好型咁揮揮手，閂返車門...
“吱！依！！！吱～”碳纖色嘅林寶就喺條爛公路上絕塵而去！
希望仲有機會...見到...
你都驚你會撞車死呢？
年紀大就咪揸超跑啦！壽星公吊頸...
唉...再唔忍心，都將個囡交咗俾個變態怪叔叔帶走埋咯...都係時候返去喇...
正當我攬住個紙袋轉身...
『電...電話震？』我拎部電話出嚟睇睇，『係...Today Coffee？喂？』
「喂飛揚～早晨吖～」我一接聽，Owner把聲就傳入我耳裡。
『早晨吖Owner...』
「喂你...而家得唔得閒？」
我...而家得唔得閒？
『而家都...OK得閒嘅...』又有PT益我？
「得閒就啱喇！過嚟咖啡店幫幫手！」
『哦...好吖好吖...幫咩手呢？』今次係做外賣仔定係侍應仔？
「過咗嚟先講啦～快喎～係咁～」Owner好以趕住收線咁！
『哦哦...好好...』過咗去先講？
「嗯～一陣見～」
『一陣見...』
收咗線之後，睇睇部電話...都原來已經十點幾...
過咗去先講...鬼鬼地咁嘅...
唉～是旦啦～
一間咖啡店可以鬼得去邊？
好啦～返去放好啲嘢就過去Today Coffee啦～
袋返好部電話，我就行上去殘破嘅輕鐵站，等架殘破嘅輕鐵送我返屋企。
返到屋企放低袋長袍同精神刀柄之後，就趕過去Today Coffee。
行到嚟Today Coffee門前...
『Closed？』都差唔多成十一點…仲未開門做生意？
星期六休上晝㗎？
“叮 叮”拉開木門行入咖啡店，我就見到...已經著上制服嘅雨姐...翹埋對手...仲翹住對腳坐喺梳化上！
塊面仲黑黑地咁...望住坐喺佢面前嘅Owner同輝哥...
而Owner同輝哥呢...一聽到拉門“叮 叮”聲就立即擰個頭過嚟！
『早...早晨...』嘩...搞乜個氣氛咁鬼緊張呀？
「你嚟喇你嚟喇？」Owner立即拉住我埋去坐坐，「就咁嘅...我哋部咖啡機就壞咗...想搵人幫手拎去整...」
『哦...』原來係部咖啡機壞咗...
「但部咖啡機有啲大部...要兩個人先抬到...」Owner都未講完...
「講明我係唔會抬㗎！」雨姐就黑住塊面咁！
哦...原來雨姐唔肯抬...
「哎呀哎呀...我隻手...又發作...」輝哥又七情上面咁撳住自己隻左手手臂！
「你...你唔好又扮嘢呀！」雨姐谷行塊面豬登！「邊個整壞部咖啡機㗎？唔使負責呀？！」
哦...睇嚟部咖啡機係輝哥整壞嘅...
「邊關我事姐...我今朝一開就唔著喇...」輝哥扮晒無辜咁...
哦...唔好兜啦～女人話係你錯，錯嘅就係你㗎喇～
「唔壞都壞咗咯...都要搵人拎去整㗎...最衰我又風濕發作...」Owner摸住自己對膝頭哥...皺晒眉咁...
哦...冇落雨都會風濕發作嘅？
「夠冇理由要我呢個女人仔抬...我唔理吖！你哋兩個男人諗掂佢！」雨姐對手用力一翹...件白色恤衫就快俾對豐乳迫爆！
哦...真係好大...
望住兩個男人都好苦惱咁...
不如...猜包剪揼啦...
『不如...我自己一個...去啦...』猜包剪揼就講笑嘅...
傾唔掂數...咪我自己去囉～
「唔得㗎...」輝哥擰擰頭，「都幾重幾大部㗎...咁啦...都係等我同飛揚去啦！話晒我都真係有責任...」
嘩...突然責任感爆燈係咩玩法？
「你自己...小心隻手啦...」雨姐好似懶得望輝哥...但又好似好關心輝哥咁。
「嗯嗯...」輝哥又好似心很甜咁...
唔...我總係覺得輝哥同雨姐...係有啲嘢嘅～
「好～咁就輝哥同飛揚去啦～嚟嚟嚟～入嚟睇睇部機先～」Owner立即快刀斬亂麻！帶我同輝哥入去望部機！
一入到去，就見到前日喺度做侍應嘅時候，用嚟沖咖啡嘅咖啡機。
老老實實...都真係幾大部...
「嚟！放佢落車仔先！」輝哥摺晒衫袖！
『哦...好好...』我就同輝哥一齊抬...
「一...二...三！」我同輝哥用力一抬！
嘩屌！真係重到呢...差啲都抬唔起！
「慢慢吖...慢慢放...好！搞掂！」放好部咖啡機落手推車，輝哥拍拍手！
『嘩...嘩...』一個人真係搞唔掂！
「飛揚～咁你就跟輝哥出去喇～人工方面呢...」Owner喺我耳邊細細聲講，「一百O唔OK？」
『哦...OK...OK...』做乜要講到咁鬼祟呢？仲要偷偷望住仲翹實對手翹住對腳坐喺出面嘅雨姐...
「咁就好喇～」Owner拍拍我膊頭，「都話後生仔夠爽快㗎啦～」
OK咁啦...做後生唔可以斤斤計較嘛...
『係呢...部咖啡機壞咗...咁你哋咪開唔到舖囉？』咖啡店冇咖啡飲，唔怪得Closed啦。
「我哋上面仲有部細啲嘅做士啤嘅～」Owner指指樓上，「一陣等你同輝哥出咗去，我就同雨姐拎落嚟。」
『哦～』果然做生意嘅係要有兩手準備吖吓～我就真係冇諗過喇～
所以我唔係做生意嘅材料呢～
「咁我哋行喇喎。」輝哥就推住架手推車。
『哦哦...』我就同輝哥一齊推架手推車出門。
「呀係吖！阿輝～出去幫我買兩盒綠豬返嚟～」Owner一邊送我哋，一邊拍拍輝哥膊頭。
綠...豬？
「你自己唔去買？」輝哥冷眼望望Owner...
「你出開去嘛～出面平啲㗎～」Owner再拍多兩拍～
「你早兩日唔係有出過去咩？你嗰時唔買？」輝哥同我一邊推住架手推車，一邊冷眼望住Owner...
「嗰日忙吖嘛...」Owner再大大力拍多兩嘢輝哥膊頭，「你都差唔多用晒㗎啦～都要入貨㗎啦～順手姐～～～」
「你會俾返錢我㗎嘛？」輝哥停喺門前，冷眼望實Owner...
「梗係會啦～幾時走過你數？」Owner成個騙徒口吻...
老細...係全宇宙最大嘅騙子...你唔係信佢吖化？
「好啦...好啦...」輝哥就好似一般香港打工仔一樣...每日都甘心命抵咁俾老細呃...
真係...受騙的那個比騙徒更混帳...
當Owner同雨姐送到我哋出門...
「小心喇...」雨姐細細聲講...
「嗯～我會㗎喇～」輝哥又甜絲絲～嘴角含晒春咁～
「同你講咩...我同飛揚講咋嘛...」雨姐一個轉身就行返入櫃檯。
唔...我總係覺得輝哥同雨姐...係有啲嘢嘅～
「咁好喇～速去速回喇～」Owner同我哋揮揮手～
「嗯～拜～」我同揮哥都一齊向Owner揮揮手後，就出發！
“咔！咔！啪！咯！咔咔！啪！咯咯咔咔咔！”同輝哥推住架放咗咖啡機喺上面嘅手推車，喺凹凸不平日久失修嘅爛行人路上行...
震到隻手都痺埋...
「呼～終於可以出嚟蛇吓喇～」輝哥抖一啖大氣～
『哦？你唔係話舊患復發，唔想出去㗎咩？』而家又好似咁輕鬆咁？
「我扮㗎咋～唔係咁又點呃到雨姐佢以為我唔想出，仲邊有機會出嚟抖吓氣～成日屈喺咖啡店裡面好悶㗎嘛～」輝哥舉起雙手，伸個懶腰～
『哦～』原來又係扮嘅...『係呢...你同雨姐好好感情㗎？』
呢啲時候...順個靚勢打聽一下先～
「我同佢吖...」輝哥情深深諗諗吓，「都唔知算唔算係好感情...」
『嗯？但你好似好了解佢咁喎～通常男人了解一個女人...都係因為在意佢...留意佢...』等我又扮吓情性先～
「我吖...哈～」輝哥含住千言萬語咁笑一笑，「都唔算好了解佢姐...」
『唔係好了解？點都有少少掛～好似話...雨姐份人好謹慎啦～』我又拋拋磚～
「你又真係唔好睇佢平時好似好謹慎呀！有事起上嚟好衝動㗎佢！唔撳住佢...真係會出事...」輝哥帶住含春嘅嘴角擰擰頭。
『嗱～都話你了解佢！在意佢！留意佢！著緊佢㗎啦！』Chok一Chok就咩都爆晒出嚟～
「有鬼用咩... 襄王有心，神女無夢...」輝哥無奈咁擰擰頭。
『唔係吖～我睇佢都幾關心你㗎～』
「有咩？成日話我就有...」
『女人嘛～口不對心是常識吧～況且...唔關心你又點會成日話你吖？』
「唉...真係一齊到嘅話，一早就一齊咗喇...邊使咁多年都仲係單單打打...」
『你哋識咗幾耐先？』
「唔...」輝哥諗一諗，「都十幾年喇...」
『哦～又係呢啲十幾年都守住喺身邊嘅愛情故事～』正吖喂～呢啲故仔最多人睇～
「唉...我都想係愛情故事...點吖你？講到你好似成個愛情專家咁，有拖拍咩？」輝哥打量住我。
『我？有就有...仲要係好愛添～可惜...我哋分隔得好遠...』遠到...冇機會接觸...
「Sorry！」輝哥立即Say Sor！
『唔？唔係！唔係～佢唔係死咗～只係...唔知仲有冇機會再見姐...』一日查唔到有關ADAM嘅資料...一日都唔使旨意可以返去見返阿月...
「哦...咁一日唔死，一日都仲有機會嘅～唔好灰心！」輝哥拍拍我膊頭！
『嗯嗯...』希望啦...
我都好希望...喺我死之前...搵到ADAM...返去我嘅時空...與我最愛嘅阿月重聚...