《香港傭兵》: [Day 08－破壞能源] PART 03

“吱...”揸住架Land Rover喺滿佈裂紋嘅馬路上慢慢再駛入啲。

搵搵有冇啱嘅位置...空位...

駛到去接近沙灘嘅位置，見到路邊有一小塊沙地。

「就泊喺嗰度。」綽姿指指塊沙地。

『好。』我都正有此意。



呢次係唔係第一次...同綽姿有相同睇法？

“吱...沙！咯...沙...咯！”泊好架Land Rover喺沙地上，我哋就落車睇睇。

“飃！”呢邊啲風大到吹得起人！

而且仲...好撚凍！！！

屌你呢邊零度未呀？啲風吹埋塊面真係要損喇！



『而家點做？我哋係唔係...行返過去發電廠嗰邊睇吓？』我諗住行近綽姿身邊會暖啲...

但當我行到去綽姿身邊就覺得更加凍...

冰山真係冰山...總係散發出陣陣寒氣...

「唔得...」綽姿拎部電話出嚟撳撳，「我哋冇器材，過到去都做唔到啲乜...」

『咁...咁而家我哋...』唔係企喺度食風嘛？



「我哋喺呢頭行吓...調查吓。」綽姿袋返好部電話，就雙手插住褸袋行。

『哦哦...』喺呢頭調查？有乜好查？

我雙手攬實自己，震住咁跟住綽姿身邊行...

行過對面馬路...行到沙灘邊望望...

沙灘都被海風吹到一層層咁...

睇起上嚟好平滑...又有層次感...

綽姿單手撳住殘舊嘅欄杆側身一跳！就跳咗落沙灘！

嘩...使唔使咁型吖？隔離咪有樓梯囉...



我就唔會好似綽姿咁咁型喇～過咗廿歲要好好保養身體～咁樣跳落去喎...未到四十個膝頭就冇力啦！

我行過去石級嗰邊，雖然又崩又裂唔完整，但總算行到落沙灘。

呢個沙灘啲沙都真係幾幼...

同綽姿會合返之後，佢就望望個沙灘，又望望遠處兩碌又粗又長又直嘅煙囪。

有乜好望呢？

成個沙灘一眼望晒，得隻爛咗嘅三板之外，就只有沙同海。

發電廠嗰邊就唔使講啦！咁鬼遠...除咗兩碌煙囪就乜都睇唔到！



綽姿再望多兩眼後，就背住發電廠嘅方向行。

我又繼續跟住綽姿身邊...

“沙！沙！”聽住海浪聲...

“飃！飃！”食住海風慢步沙灘...

綽姿都係粒聲唔出留意四周咁一步步行。

回頭一望，沙灘上都留有我同綽姿行過嘅足印...

綽姿嘅足印淺啲...我嘅足印深啲...

“飃！飃！”海風再用力吹多幾吹...



綽姿嘅足印就慢慢消失...

咁樣跟喺綽姿身邊行...行咗一大段路...個感覺總係怪怪地...

點怪法呢？

總係好似...好似拍拖？！

情侶慢步沙灘拍拖情節？！

嘩屌！唔撚係呀化？！同綽姿拍拖？！

雖然話...綽姿細細粒粒又白嫩幼滑...係幾gfable...



之但係...佢冷血㗎喎！

唔好諗唔好諗！諗起都毛管戙！

點會有情侶嘅錯覺㗎？！

都係唔好同綽姿企咁埋...行開啲...離遠啲...

正當我想偷偷行開啲...同綽姿保持距離之時...

「唔好行開。」綽姿突然開口！

『吓？』做...做咩吖？

俾綽姿察覺到我想偷偷行開並唔出奇，但點解佢唔想我行開呢？

「貼近啲。」綽姿靠近我身邊！

仲要貼近啲？！

做咩吖？唔係綽姿都想同我拍吓拖嘛？！

綽姿輕輕靠近，膊頭輕輕碰撞...

呢種輕輕嘅碰撞...身體接觸...好清澀吖...

就好似兩小無猜...互相試探對方嘅心意...

點解吖？點解會咁初戀㗎？點解綽姿要咁做呀？

綽姿唔係對我...對我...

我都仲未肯去面對...

綽姿就雙手翹住我手臂！！！

嘩呀！！！點解綽姿會咁主動㗎？！？！？！

我成身僵硬！除咗因為好撚凍之外，最主要係我唔敢有多餘嘅動作！

因為...因為淨係被綽姿翹住行...我都感覺到...佢嘅...小饅頭...

綽姿對小饅頭都壓晒埋嚟...壓晒落我隻手臂度...

好軟熟...好有彈性...

好吸引...綽姿對小饅頭...好...好...

唔好再諗喇！！！唔可以對小妹妹有性幻想㗎！！！

「自然啲。」綽姿細細聲講。

『吓？』仲要自然啲？

我困惑咁望望綽姿...

綽姿面帶天真嘅微笑令我更加困惑！！！

做咩吖？做咩又咁少女情懷呀？

你搞到我好撚亂呀！！！

就喺我哋再行多幾步，我好似聽到...

“咯 咯”腳步聲？

“咯！”喺上面...停低咗！

我望返上馬路，正正就有兩個著住灰白色大褸嘅男人，挨喺欄邊望實我！

呢兩個男人係...

綽姿突然拉住我行近海邊：「哥哥～你睇你睇～好大浪吖～」

一時之間我都嚟唔切反應...只係傻傻咁跟住綽姿喺海邊行上行落...

呢一刻嘅綽姿...好似...兩個人...

「嘩嘩嘩！快啲快啲！唔好整濕！」綽姿仲嗲聲嗲氣咁！

同平時嘅綽姿...判若兩人...

『哈哈...小心啲吖...啲水好凍㗎...』我都盡量配合...（不過好生硬囉...）

「哈哈哈～差啲整濕喇～～～」

一邊同綽姿玩住浪咁行...

『上嚟上嚟上嚟...』

一邊偷偷留意住欄杆...

除咗頭先嗰兩個...仲有好幾個著住灰白色大褸嘅身影挨喺欄杆...食煙...

佢哋究竟係...

「唔好望。」綽姿帶住微笑細細聲講。

『哦...哦...』綽姿叫得我唔好望...應該唔係自己人啦...

「我哋上返去咯～」綽姿又雙手翹實我隻手臂，情意綿綿咁望實我。

『哦...好吖好吖...』成隻手臂就好似碌卡咁攝喺綽姿對小饅頭之間...

綽姿仲係成個天真無邪嘅小妹妹咁，翹實我隻手臂，行上破爛嘅石級。

行返上路邊，幾個著住灰白色大褸嘅灰髮女子仲係望實我哋...

「我哋去嗰邊睇吓咯～」綽姿嗲聲嗲氣咁指住前路。

『哦...好好～』

無視其他人，繼續扮晒自然咁行...

行到遠離嗰班人...行到附近都應該冇人...我先再細細聲問：『嗰班人...會唔會係天門嘅人？』

「嗯...我估應該係。」綽姿點點頭。

果然...

同綽姿留意住四周，繼續喺路邊行。

「估唔到...連呢邊都有天門嘅人...」雖然綽姿仲係翹實我手臂，但把聲就變返冷淡。

『除咗發電廠...呢邊仲有設施要守？』除咗發電廠...呢邊仲會有啲乜呢？

「未必係設施...」綽姿盤算住啲嘢。

『未必係設施？咁仲會係啲乜？』呢邊咁荒蕪...

「再調查吓先。」

『嗯...』

再調查...喺呢個荒蕪之地...

被綽姿翹住手臂咁行多幾步，就見到有幾個用貨櫃改建而成嘅...房屋？

喺外面望多幾眼，綽姿就翹實我行入去...

行到入以貨櫃搭建嘅小村落...雖然貨櫃嘅數量都唔少，但路都好闊，又冇乜雜物。

一路行一路睇清楚啲貨櫃，真係改建到好似房屋咁。

有窗有門，不過就唔係好睇到屋入面喺咩情況...

因為全部都落晒簾...睇唔到裡面...

喺縱橫交錯路上行，頭頂都掛滿晒衫。

有Tee有長褲...就連內衣褲都有！全部都係黑白灰色...

好有生活嘅氣氛...

估唔到...貨櫃都真係可以築成生活圈...

同綽姿扮成情侶...兄妹先啱！喺呢個用貨櫃築成嘅生活圈探索，不時都仲會有著住灰或白大褸嘅男男女女擦身而過。

佢哋都總會望住我哋...望實我哋...

綽姿一路上都帶住天真又好奇嘅面容翹實我...

我又扮晒友善咁向住途人點點頭。

擦身而過嘅途人...住喺呢度嘅居民...會唔會又係...

當我哋再行得入啲...就見到有...

『茶記？』一大塊空地上放咗幾張檯...幾張凳...仲有幾個食客坐喺度食緊嘢。

係一個露天茶記...

然後幾個坐咗喺度食緊嘢嘅食客都停咗口，望晒過嚟...

「哥哥～我有啲餓喇～不如食啲嘢咯～」綽姿第一時間帶住燦爛嘅笑容，拉我埋去空檯坐。

『嗯嗯...都...餓喇呵？』我仲係好唔自然...

幾個食客仲係一直望實我哋...

而家嘅氣氛...總係怪怪地...

所有目光都注視住我哋呢邊...

「唔知呢度有咩食呢～」綽姿充滿好奇心，八八卦卦咁左望右望。

『唔知呢...唔知呢...』我都八八卦卦咁望望四周。

只見圍住我哋坐嘅食客都好似對我哋充滿疑心...仲好似想...有啲...舉動...

仆街喇...唔通見我哋生面口...想過嚟逗我哋？！

如果係嘅話...應該點應對？

就喺幾個食客放低筷子...

「咦？好生面口喎？喺出面嚟㗎？」一個肥胖嘅姨姨就喺用貨櫃改建而成嘅店舖行出嚟。

係...老闆娘？

我諗...應該係...

店舖唔覺仲有其他人...呢間露天茶記應該淨係得老闆娘一手一腳打理...

「係吖～」綽姿立即捉住我隻手，「我哋住何福堂嗰邊嘅～見今日放假，就同哥哥入嚟散心囉～」

「哈哈～」老闆娘行到嚟我哋面前，「嚟呢頭散心又真係唔錯嘅～你同你哥哥嘅感情都幾好喎～」

「嗯～吹吓海風～聽吓浪聲～真係好舒服～係唔係吖？哥哥～」綽姿甜絲絲咁望實我。

『係吖...係吖...真係好耐都未試過咁舒服...』我都仲係有啲緊張...

但周圍嘅食客都好似放下疑心，繼續食嘢吹水。

「哈哈～你哥哥好似有啲緊張咁喎～」老闆娘帶住微笑打量住我。

吓？乜我真係咁易俾人睇穿咩？！

一聽到老闆娘咁講，四周嘅食客又望晒過嚟...

「佢係咁㗎～每次要佢帶我出街，佢都係緊緊張張咁嘅～」綽姿再笑得甜啲。

望住綽姿呢個甜樣...除咗好gfable...仲好有...細妹Feel...

其實一直以嚟...我都好恨有個細妹俾我錫...俾我照顧...俾我愛護...

但因為屋企窮...父母一直都冇打算要生多個...（其實連我都只不過係一個意外...）

估唔到而家...真係俾我有一個...好gfable嘅...細妹...

「哈哈～」老闆娘望住我倆笑一笑，「啲阿哥係咁㗎喇～特別緊張自己個妹嘅～不過咁先係好哥哥～」

好...哥哥？

我真係一個好哥哥？

或者...假如我真係有個好似綽姿咁...細我差唔多十年嘅細妹...我一定會好錫佢！盡我所能照顧佢！保護佢！

食客聽到老闆娘話我係好哥哥之後，又繼續食嘢吹水。

「係呢？想食啲咩呢？」老闆娘帶住微笑問問。

「唔...」綽姿眼仔碌碌咁諗諗，「有冇餐蛋麵吖？」

「有～梗係有啦～」老闆娘點點頭，「出前一丁啱唔啱？」

「啱吖啱丫～我哥哥最鍾意食出前一丁㗎喇～」綽姿勁雀躍咁點晒頭！

「哈哈～你都好錫你哥哥喎～咁兩碗餐蛋麵？」

「嗯嗯～要多兩杯熱檸茶～」

「好～等等我～好快有得食～」老闆娘就轉身行入舖頭整嘢食。

綽姿仲係捉住我隻手，摸摸...

「哥哥～我哋好耐都冇食過出前一丁喇～」綽姿一邊嗲聲嗲氣咁講，一邊偷偷觀察四周。

『係吖係吖...都真係好耐都冇食過喇...』我都偷偷觀察四周...

主要都係觀察啲食客...

「遲啲我哋都買返啲返屋企咯～」繼續閒話家常...

『嗯...出去一次過買多啲...』繼續留意啲食客...

「屋企邊有咁大地方擺喎...」綽姿講得細聲啲...

『攬住啲麵嚟瞓囉...』我又講得細聲啲...

「唔要...我要攬住你嚟瞓...」綽姿再講得細聲啲...

『仲成個細路女咁...』我再講得細聲啲...

然後...唔出聲...

然後...偷偷聽吓...班食客...講啲乜...

「究竟仲要留守喺度到幾時呀？」其中一個食客噏咗一句！

出現喇！我哋想要嘅情報！