《香港傭兵》: [Day 08－破壞能源] PART 05
呆望住眼前呢個突然出現...著住灰色大褸嘅白髮少女...
究竟係幾時...企得咁近...我完全察覺唔到？！
我察覺唔到都唔出奇...奇就奇在就連綽姿都好似察覺唔到！
只見白髮少女雙手插住褸袋行近一步...
綽姿帶住尷尬嘅笑容摸住頭咁轉身：「我哋迷路吖～」
白髮少女帶住疑惑嘅眼神打量住綽姿：「迷路？」
睇嚟好似...唔係好信咁...
『呃...係吖係吖...頭先行過嚟嘅時候有狗吠...嚇到我哋一直跑入嚟...然後就迷路喇...所以想睇睇有冇人…可以問路…』咁嘅藉口會唔會太過牽強？
白髮少女繼續疑惑咁打量住我哋...
死喇...係唔係真係唔信我哋呢？
鬼叫我平時老實開，從來都唔講大話...
白髮少女再諗一諗：「沿住條路一直向左行，就行返出大路。不過又會遇到狗。唔使理佢哋，直行就得。」
『哦哦...好好...唔該唔該...』我同綽姿都向白髮少女點點頭後，就急急腳離開。
聽白髮少女講，沿住條路一直向左行...睇得出綽姿嘅警覺性比起頭先更加高！
『頭先...』我只係講咗“頭先”兩隻字...
「殊...」綽姿立即就打斷咗我！
睇嚟而家唔係時候...
“汪！汪汪！”同綽姿行返出馬路！
再急急腳咁向住沙灘嘅方向行多幾步！
「真係唔簡單...」綽姿緊張咁偷偷望望四周。
『唔簡單？你係指...頭先...』我都未將“嗰個白髮少女”講出口...
「嗯。」就被綽姿打斷！
『連你都察覺唔到？』
「嗯...當我察覺到嘅時候...佢已經喺我身後唔夠兩個身位嘅距離。」
真係...連綽姿都...咁遲先察覺到...
『佢都係天門嘅人？』
「唔可以肯定，不過應該都係...你有冇發現呢度從來都冇見過西貢獻命嘅人？」綽姿減慢步速...但仍然提高警覺！
『嗯！由入嚟到而家都冇見過！』呢點我之前都已經留意到！
「呢度應該真係天門喺元朗同天水圍以外嘅據點...」綽姿再諗諗，「範圍應該係由發電廠附近開始到頭先嗰堆獨立屋一帶。」
『但點解要係天門？我睇佢哋好似都唔係好願留喺度...』喺呢一區...總係好似有一種...被孤立嘅感覺。
「呢一點我都諗唔明...」綽姿一邊留意四周，一邊再諗諗，「我睇過嘅情報都係話西貢獻命接收屯門後，就由佢哋管理。冇留意到呢邊有天門嘅據點...仲要連發電廠都係由天門看守。」
『種種跡象顯示，呢種做法對天門嚟講都唔係好事...』一邊行一邊諗，差唔多返過嚟沙灘。
「嗯...你講得冇錯。先唔好諗駐守喺度嘅人員嘅心理狀況...物資嘅運送都唔會方便...」綽姿回頭望一望。
『運送物資嘅路線...應該係流浮山嗰邊，沿住下白泥一直過嚟...』如果嗰邊條路仲通嘅話...
「我都係咁諗...嗰條路應該係最直接。」綽姿點點頭。
我又同綽姿嘅想法一致喇！
咁講法我係唔係有進步喇？
喂喂～讚吓我先啦～讚吓我先啦～
「不過呢樣同我哋今次個委託無關...我哋都係將焦點放返喺今次個委託上。」綽姿拎部電話出嚟睇睇。
『哦哦...』想領吓賞都唔得添...『咁跟住我哋要點做？』
“飃～沙！飃～沙！”我哋已經返到嚟沙灘附近...
而四周都冇人...
「跟我嚟。」綽姿再望望四周，就拉咗我入草叢！
喂喂做咩呀？我唔好野戰㗎！
穿過一小塊腰間咁上下高嘅草叢，行到一塊爛地。
爛地有起過獨立屋嘅痕跡...不過而家爛地上就只有爛磚爛瓦。
被拆？似係...
再望遠少少，就發現原來有一個工地！
圍住工地嘅圍板又穿又爛！
工地裡面仲有兩三座起到一半冇再起落去嘅高樓！
高樓最高嗰楝都有八九層！全部都係未起外牆！
係發展商打算喺呢邊發展中密度住宅嘛？
睇起上嚟就似...
不過應該係起到一半...遇上屯門常開起革命，所以中途擱置。
之但係...點解綽姿會帶我過嚟呢邊呢？
只見綽姿再謹慎留意四周，然後行入工地！
工地...工地又算唔算係野戰嘅一種吖？
我見之前網上有唔少情侶話鍾意半夜三更走入工地啪啪啪...刺激過上山車震咁話！
唔係真係咁刺激吖化？
我而家做乜諗埋啲咁嘅嘢㗎？！
綽姿話要將焦點放返喺今次個委託上㗎嘛！
入嚟廢棄嘅工地...一定係同今次嘅委託有關！
我就進入返狀態，跟住綽姿入工地！
入到嚟工地，綽姿冇再翹實我...
我嘅內心總係有一種...莫名嘅失落感...
繼續跟住雙手插褸袋嘅綽姿行，進入起到一半嘅危樓...
四周嘅環境都好暗...地上都有唔少雜物...仲有唔少工具...
睇起上嚟...啲工人好似走得好急...好突然…
跟住綽姿行上梯級...
“啪！啪！啪！”幾下跌嘢聲！
咩事？！係唔係有人？！
「喵～」幾隻貓影走過...
哦...原來我哋誤闖貓嘅領地...嚇得我吖～
之但係...點解綽姿要入嚟呢？我哋又要上到去邊層呢？
“飃！飃！”越上得高風越大！
我哋徒步都上咗三四層，中間仲有幾級樓梯鋼筋外露...
綽姿踩住鋼筋行上去，仲未有停落嚟嘅跡象...
直至到再上多兩層...
背光之下，我見到有個身影...企喺樓邊...
“咯 咯”跟住綽姿...行近呢個...背住我哋...望出樓外嘅背影...
呢個背影係...邊個？
“咯 咯”跟住綽姿身後再行近多兩步...睇清楚啲...
係一個著住黑色大褸...留有長長...金到差唔多白色嘅長髮...
「嚟咗喇？」係一把女仔聲！
仲要好似帶有...外國口音？
「嗯。你就係...仁慈？」綽姿行到去...距離仁慈兩三個身位。
仁慈？係今次委託嘅成員之一？
係喎！都唔記得咗睇有咩隊員添！
一道聖光正好照射到落仁慈身上...
好似識發光嘅仁慈轉身：「嗯。你係...瓦解？仲有...吞噬...」
望清楚...雪一樣咁白嘅肌膚...帶住點點哀愁嘅藍色眼睛...係外國人？！
「嗯。」綽姿點點頭，行近多兩步，「你嗰邊嘅情況點吖？」
我都行近兩步，再睇清楚啲...
同我差唔多高嘅仁慈...對眼好大...鼻好直...面尖尖...勁靚女！！！
仁慈拎出手機：「頭先我用過微型Drone飛入去發電廠Scan過同偵察過。已經Upload咗上去。」
綽姿都拎出手機。
拎手機...拎手機！
我拎部手機出嚟撳返開個SPIRIT App再撳返現有委託再撳...撳...撳返仁慈Upload上嚟嘅...地圖？
一打開就彈咗幅平面地圖...唔止唔止！仲可以變做立體圖！！！
嘩！好似好堅咁喎！
2D變3D～3D變2D～2D又變返3D～3D又變返2D～幾好玩喎～
2D又好3D又好，成幅地圖都好仔細。
咩嘢微型Drone咁厲害？
之但係...地圖上啲紅色交叉...綠色圓圈...黃色虛線...三角...仲有其他三尖八角，五顏六色嘅圖案又係代表乜呢？
仁慈開始講解：「發電廠有AB兩廠，共有八台機組。亦即係我哋今次委託嘅目標。」
即係話...我哋要破壞呢八台機組？
仁慈繼續講：「全個發電廠佔地六十二公頃。而地圖所見，AB兩廠距離唔算太遠，不過都幾大。以我哋三人破壞兩廠有一定困難。」
我哋三人？
原來今次委託...就只有我哋三人？！
咁嘅話...
『我哋可以分頭行動！』綽姿破壞A廠！仁慈破壞B廠！我喺門口睇水！完美！
「唔得。」綽姿立即否決我嘅提議，「有天門嘅人守...分頭行動會好危險。仲要唔止發電廠...呢度一帶都有天門嘅人。」
『危險？危險極都係機槍同RPG～』你話我哋冇用精神液就怕姐～
用咗精神液？一刀一件啦～
仁慈接住講：「有機會遇到逆行者。」
有...有機會遇到逆行者？！
點...點會...
仁慈疑惑咁望望綽姿：「佢好似乜都唔知...」
係吖係吖...我真係乜都唔知㗎！！！
綽姿冷眼望望我：「呢啲嘢應該由佢自己查。」
又我自己查？
我已經查過好多！但有更多我係查唔到㗎喎！
話晒我都係你嘅隨行者吖！講多少少俾我聽，等我唔使死咗都唔知咩事都好呀！
「根據情報顯示...」仁慈諗咗諗，「天門同逆行者有關係。估唔到...呢度一帶都係屬於天門...」
天門同逆行者有關係？
『等等先...即係話...天門係逆行者？』我有冇理解錯？
「唔可以咁講...」仁慈擰擰頭，「根據已知嘅情報，只係顯示天門同逆行者有關係。但係咩關係就冇詳細資料。可能係成員...可能係合作...又可能好似我哋咁，收錢辦事。」
咁講法...就算邊種關係都好...逆行者都算係...天門嘅人？！
啱吖啱吖...照咁睇...只要我哋以天門為敵...都會有機會遇到逆行者...同逆行者交手！
等等先...咁講法...
國安局嘅鄭局長話...宋伯伯係天門嘅重要人物...
即係話捉宋伯伯嗰晚...有機會好似青衣嗰晚咁...突然殺出逆行者？！
唔怪之得尋晚綽姿話諗緊其他嘢...應該就係諗呢樣！！！
點解我而家先諗到㗎？！
我應該一早就諗到先係！
一早就應該諗到...我應該一早死咗幾次！
只要喺天門範圍...宋伯伯間迷離大宅...搭西鐵返屯門期間...是旦一個地方遇到逆行者...我都必死無疑！
而我覺得綽姿一直有所隱瞞嘅...唔通就係天門同逆行者有關係？
綽姿諗一諗：「我同過逆行者交過幾次手，佢哋出現嘅習慣...我都好有感覺。」
『你講呀？你咪又係俾嗰個叫必然嘅逆行者斬斷隻手！！！』仲要我帶返你返屋企添呀！
綽姿怒視住我：「唔係因為你，我會俾佢有機可乘？！」
『呃...』又好似係我...累事嘅...
「必然...」仁慈諗咗諗...再打量住綽姿，「你好似係...西貢攻防戰嘅...倖存者？」
吓吓？無啦啦又提乜嘢西貢攻防戰？
而家唔係講緊逆行者咩？
綽姿冇出聲，只係點一點頭。
仁慈又點點頭：「我都明嘅...情報係要嚟賣。」
吓吓？無啦啦又講乜嘢情報係要嚟賣？
同逆行者又有乜關連？
我總係覺得...綽姿仲有嘢隱瞞緊...
仁慈繼續講：「今次嘅委託我打算以潛入嘅方式進行。」
係喎係喎...今次委託先係重點喎...
仁慈繼續講：「我哋三人一齊行動。首先潛入A廠設置定時炸彈，然後到B廠。炸彈設置好就盡快撤離。行動期間，盡量唔好俾人發現...唔好傷人。有冇異議？」
呢種玩法咁似...Metal Gear？！
『贊成贊成！』正呀喂！我玩Metal Gear Rising Revengeance關關都S㗎！
綽姿都點點頭。
嗱！我就唔信綽姿識玩潛入喇～
佢單刀直入就叻！
仁慈撳撳部電話：「咁我哋等到入夜先行動。呢段期間，我會設計埋路線同計算定時炸彈嘅時間。搞掂會Upload上去。」
一手包辦喎～我係唔係乜都唔使做喇？
「咁好啦。」綽姿轉身行，「我而家向下巡一巡...吞噬巡上面。」
『哦...哦...』巡上面？有乜好巡吖？