《香港傭兵》: [Day 08－破壞能源] PART 11
當我仲喺度諗緊，點解綽姿會話“真係認為得佢一個”之時...
突然！我感覺到右上方有兩道氣息...唔止！
左上方又突然出現兩道氣息！
我抬頭望望左右兩邊...喺斷橋同管道之上，企咗四個身上散發住綠色光芒嘅身影！
原來...已經被包圍...
睇嚟我未夠天真...仲可以更天真！
二對五...
仲要每一個都同綽姿差唔多強...
睇嚟今次...真係死硬！
當我仲盤算緊自己點死之時...
面前嘅逆行者再次向我哋展開攻擊！
綽姿立即上前一擋！
頭上就有另一個逆行者一刀砍落嚟！
我立即舉刀一擋！但逆行者嘅力量之大，將我壓低！
點解...點解會...
我單膝半跪咁跪喺吊橋上！
嘩痴線！根本就招架唔住！
呢種氣息...呢種能量...
綽姿擋開面前嘅逆行者，再揮刀斬向壓住我嘅逆行者！
壓住我嘅逆行者巧妙咁側身避開！再順勢彈後一步！
其餘三個逆行者都跳埋落嚟！
我就同綽姿背對背！
呢個算唔算係打Boss嘅節奏？！
有睇過浪客劍心都知，喺敵眾我寡嘅情況之下，最好都係走入狹窄嘅後巷！
因為空間少，唔容易俾人圍，盡量以一對一嘅方式逐一擊破！
而家呢條吊橋都算狹窄，但先決條件係你要有一定嘅實力！
最起碼...一對一都唔會打輸先啦...
面前兩個逆行者踏前一步，向我展開攻擊！
我背住綽姿，左擋右擋！
力量好大！只係擋咗兩三刀，我對手都震埋！
「自己執生。」綽姿簡單講完四隻字之後，就背住我衝上前！
『自...』自己執生？點執呀？！
我牽制住兩個逆行者！（其實係被兩個逆行者撳住嚟砌...）
同時綽姿亦被三個逆行者撳住嚟砌！（希望係綽姿牽制住佢哋...）
我一路擋又一路避！一路避又一路退！
退到去身邊嘅管道，逆行者一砍！綠光刀刃砍開管道！砍向我身上！
“吱！”白色蒸氣由管身噴出，我強行用精神刀一擋！
成把綠光刀刃就壓喺我頸邊！
另一個逆行者又向我使出一閃！
我立即轉身一避！但右肩同腰間同時被片中！
痛...痛！
真係好似被片中兩刀！！！
紅色嘅粒子由“傷口”中飄出！
唔掂...再咁落去真係唔掂！
綽姿呢...綽姿呢？
我回頭一望，只見綽姿仲被三個逆行者圍攻緊！
睇嚟綽姿都自身難保...唔可以靠佢喇！
話口未完，兩個逆行者又衝住我而來！
左一刀！右一刀！
我左擋右擋！右擋左擋！左右亂咁擋！
“吱！吱！吱！”同時又砍中左右兩邊嘅管道！管身噴出白色蒸氣！
喺蒸氣遮掩之下，我隱約只見到幾道綠光一閃一閃！
我身上又中多幾刀！
睇唔到！喺白色蒸氣之間，我睇唔到啲刀由邊度嚟！
“吱！吱！吱！”再中多兩刀！再被刺中幾刀！
身上已經有幾處傷口...飄出紅色粒子！
唔得喇...雖然話處於精神化...但受到傷害都係會痛...都係會冇力...體力會下降！
再加上...視線受阻...
視線受阻...對方都係一樣...但點解...點解可以...
當我仲諗緊點解之時，我左右兩臂又中多兩刀！
感應...一定係感應！
感應住行者身上所散發嘅氣息！
我感應到...兩支強大嘅氣息...
係精神刀！好清楚...兩把充滿住逆行者能量嘅刀刃...正要穿過蒸氣...向我條頸橫斬過嚟！
望住兩把發出刺眼綠光刀刃斬開蒸氣...我退後一步，巧妙咁避開之後，再踏前一步揮刀一斬！
“嗡！”中咗！我斬中咗佢哋條腰！
但點解...好似斬唔開？
明明好實在咁斬中...但就好似...喺塊鐵板上劃咗一下...
兩個逆行者穿過白色蒸氣，身上冇穿冇爛咁繼續向我施展十字斬！袈裟斬！橫一文字斬！
真係斬唔入！
但點解...唔通係？！
係佢哋件長袍嘅防禦力比起我把精神刀嘅攻擊力更強！
咁就死啦！就算話件長袍有防禦值，斬多幾嘢就入肉...我仲有機會斬得中咩？！
唔好話要再斬中...我而家擋都擋唔住喇！
我已經中咗好多刀...身上有無數嘅紅色粒子，由多處傷口之中飄出！
就喺我對大髀再中多兩刀，跪喺地上...兩個逆行者企正喺我面前...同時向我使出袈裟斬之時...
冇喇...冇喇...阿...月...
突然！面前有個身影出現！手持雙紅光刀刃，一左一右咁幫我擋住逆行者嘅致命一擊！
眼前呢個背影係...係仁慈？！
仁慈擋開兩個逆行者：「我幫你哋開咗個缺口！快啲走！」
開咗缺口？
原來...原來仁慈唔係賣甩我哋...係去咗...
「仲等咩呀？走呀！」仁慈一個轉身，衝去幫綽姿解圍！
綽姿見有機會，立即跑過嚟扶起我！再拉住我衝向剛才嗰兩個被仁慈彈開，仲坐喺吊橋上未起到身嘅逆行者！
“嗡！嗡！”綽姿隨意揮兩刀！
逆行者擋住咁左右彈開！
綽姿就拉住我狂衝！
講真...我已經冇乜力再跑...只係俾綽姿夾硬拉住...
喺吊橋上跑咗一段路，再轉個彎就見到牆邊有個大缺口！
就係呢個...係仁慈開嘅缺口！
綽姿一手就拋咗我出去！再自己好型咁跳出嚟！
我就喺雪花紛飛之間...跌落地面！
『哎呀！』仲要喺地上碌咗幾個圈！
綽姿一落地就擺個有型姿勢！再一手拉起我狂奔！
『喂！喂！仁慈未出嚟呀！』我一邊俾綽姿拉住，一邊回頭望！
「你仲得閒理人咁多？顧掂自己先啦！」綽姿冇停落嚟嘅打算！
就喺呢個時候，我望到持雙紅光刀刃嘅仁慈被三個逆行者打到由缺口飛落地面！
雖然仁慈一個後空翻落地，好似冇乜事...之但係五個手持綠光刀刃嘅逆行者都由缺口跳出嚟！包圍住仁慈！
『係仁慈呀！仁慈出咗嚟喇！快啲去救佢呀！』我企圖掙脫綽姿！
「走啦！放棄佢！」綽姿仲係頭也不回！
『唔得...唔得呀！』我一手Fing開綽姿！回身衝返轉頭！
放棄佢？你叫我點做得出？！
仁慈啱啱先幫我哋打開缺口！而家又為咗掩護我哋逃走而被逆行者圍！我又點能夠見死不救？！
我拔刀一閃！兩個逆行者轉身一擋！我就跑到去仁慈背後！
仁慈背對住我：「做乜返轉頭呀？！」
『我唔會賴低你！』我雙手握實精神刀！
同時我見到綽姿都跑咗過嚟！
而家我哋三個就被五個逆行者包圍住！
仁慈緊握雙刀：「瓦解...你應該好清楚...未必再有下一次逃走嘅機會...」
綽姿冇出到聲...
「我再幫你哋打開缺口...一有機會就帶吞噬走！」仁慈一講完，就衝向逆行者面前！
帶我走？點解唔係一齊呀？！
綽姿都二話不說，立即向逆行者展開攻擊！
我都不敢怠慢，手持精神刀！跟上綽姿！
雪花紛飛之間，三個逆行者向我同綽姿迎擊！
其中一個嘅氣息明顯強大！一個橫斬埋嚟，就算俾我反應得切擋住，手上都有三分之一嘅紅光刀刃被刺眼嘅綠光刀刃切斷！
點會…擋唔住？！
綽姿見狀，立即橫斬幫我解圍！
逆行者用刀刃將我彈開後，自己再巧妙咁向後避開！
我完全失去平衡！向後半退半跌！
與此同時，另外兩個逆行者立即補上，向綽姿一左一右橫斬直砍！
綽姿左閃右擋！再一跳跳上鐵橋！
兩個逆行者隨即同時跳上鐵橋！追擊綽姿！
當我穩住腳步之後，都立即跳上鐵橋！從後偷襲其中一個氣息較弱嘅逆行者！
當我差唔多砍中逆行者之時，逆行者一個轉身用刀刃一擋！
喺紅光刀刃與綠光刀刃相格之時，逆行者雙手舉起刀柄！刀背緊貼手臂...以刃引之形化解咗我嘅直砍！
當紅光刀刃沿住綠光刀刃向斜下滑落...我仲未意識到接住要點做之時...逆行者快速揮刀一斬！
我已經失咗身位...只可以勉強咁後退一步...綠光刀刃就喺我肩膊上斬咗一刀！
『嗚呀！』呢刀都幾深！大量紅色粒子噴出！！！
喺狹窄嘅鐵橋上，逆行者就繼續向我進攻！
我就只好向後退！退到向後一跌！繼續向後爬住退！
綠光刀刃左右揮舞！兩邊鐵欄都俾逆行者斬斷！
再斬多兩斬...退多兩退...就連橋身都俾逆行者斬斷！
『嗚呀！』我瞬間跌返落地面！
趴喺地面嘅我，喺雪花之間就見到仁慈被三個逆行者圍攻！
仁慈雙刀亂舞！刺眼嘅紅光刀刃就圍住佢身邊嚟轉！
但三個逆行者都唔弱！一直牽制住仁慈嘅活動範圍！
仁慈就只可以好似個爆旋陀螺咁，被三個逆行者圍住嚟轉！
與此同時，綽姿同兩個逆行者都打到落返嚟！
綽姿一手拉起我：「起身！」
我哋退後兩步，向兩個步步進逼嘅逆行者擺出迎戰姿勢！
好難走...
佢哋兩個一直都守住我哋逃走嘅方向...而慈仁又被三個逆行者牽制住...
究竟我哋...有冇可能走得甩？
我都仲未回過氣，兩個逆行者又再向我哋攻擊！
我就同綽姿邊擋邊退！（事實上係得綽姿一個擋...拉住我後退...）
我已經冇力...精神刀都就快發動唔到...就只可勉強保持住暗淡紅光...
當我哋退到差唔多同背後兩個逆行者相差三個身位之時...
綽姿一個轉身！與此同時，我感覺到背後嘅仁慈散發出極強大嘅氣息！
綽姿向住背後右邊逆行者揮刀橫斬！同時仁慈就向左邊逆行者施展旋風斬！
一左一右，殺出缺口！
仁慈立即擦過我身邊，左一斬！右一斬！將兩個喺我哋面前嘅逆行者彈開！
仁慈回頭大喊：「瓦解！」
綽姿立即拉住我：「走！」
當綽姿拉住我同仁慈擦身而過之時，五個逆行者立即重整旗鼓！包圍仁慈！
『仁慈！返去幫佢呀！』我嘗試鬆開綽姿！但今次已經冇力...
只見仁慈以一敵五！
『快啲返去...』我就俾綽姿拉住跑...越跑越遠...
就喺呢個時候...突然感覺到有一股極強大嘅氣息...由天上！
我望上仁慈嘅上空...有一對...散發住綠色粒子嘅...天使翼！
天使翼從天而降！慢慢飄散後，我見到有個身影...雙手緊握精神刀...發出刺眼綠光刀刃...向住仁慈直砍落去！
我感覺到呢股極強大嘅氣息...係偶然！
仁慈以雙手交叉擋格姿勢，迎接偶然嘅攻擊！
喺刺眼綠光刀刃與兩把紅光刀刃接觸嘅一瞬間...我只見有一隻握住紅光刀刃嘅手臂拋到天上...轉咗兩圈...化成紅色粒子...飛散...
仁慈跪咗喺偶然面前...再被五個逆行者包圍住...
偶然向住仁慈...雙手舉起綠光刀刃...
突然...我好似聽到...聽到仁慈把聲...
「終於...可以與你...再相見...」
越嚟越遠...越嚟越遠...
『仁慈！！！』
綽姿拉住我跑出發電廠...拉住我跑到好遠好遠...
穿過一大片草叢...去到一塊鋪有一層薄薄白雪嘅爛地...
綿綿頭上飛花...
「嗄...嗄...」綽姿放低我...除低頂帽...拉低衫領...回氣...
我就軟弱無力咁跪喺雪面上...爛地上：『點解...點解唔返去救仁慈...』
綽姿一手拉起我：「救？點救呀？就算你再遲鈍，都應該感應到，嗰個係偶然呀！如果我哋再返轉頭...我哋三個都要死！仁慈嘅犧牲就白費㗎喇！」
被綽姿緊緊拉住嘅我...我望到...綽姿面上都有傷痕...有紅色粒子飄出...仲有...係淚痕...
綽姿嘅面上...有兩條淚痕...
「你唔好再咁天真得唔得呀？！」綽姿一手Dom我落地！
我仲見到...原來綽姿身上都有唔少傷痕...飄出紅色粒子...
我...我天真...
我一直都係...咁天真...
坐喺爛地上嘅我...意識開始模糊…
「喂！你唔好呢個時候先嚟...」
四肢乏力…
「唉...趕唔切再補精神液...」
開始…失去…
「又要我帶你…真係好弱...」
…
..
.
TO BE CONTINUED