《香港傭兵》: [Day 12－片翼光芒] PART 01
喺學校嘅操場上，著住整齊校服嘅學生越嚟越多。
今日係...開學嘅第一日...
我同賣藝都好早就入到嚟...
新學校...新環境...第一日上中學...
咁早就返到嚟，唔係因為緊張...唔係因為我哋係乖乖學生...
為嘅係...
「喂～嗰個女仔好靚女呀呵～」賣藝喺我後面指住前面遠遠嘅同學講。
𥄫女...
冇錯～我哋咁早返嚟，就係想𥄫𥄫有冇靚靚師姐～靚靚同級或同班同學～
𥄫咗咁耐，除咗話有個年輕貌美嘅靚靚Miss之外，就真係冇一個睇得上眼。
估唔到而家終於都...
『超靚女囉～』我亦望上前，望住一個同班女同學既背影。
嬌滴滴嘅身段啱啱開始發育...
校裙總係唔及膝...
露出一對幼白美腿...
真係估唔到...估唔到𥄫咗咁耐終於俾我𥄫到...
仲要係同班...
更估唔到嘅係...
「喂～我地由小三就Friend到嚟中一，你唔好同我爭吖～」賣藝搭一搭我膊頭。
『痴線嘅！你唔好同我爭就真！我會愛佢一世㗎喇～』我望住呢個女同學嘅背影，好似著咗迷一樣。
一個散發住光芒嘅女仔...
我第一次見...
就好似天使一樣，光芒不斷吸引住我嘅視線...我嘅靈魂...
更估唔到嘅就係...咁快就俾我...遇上一生中要遇上嘅命中注定嗰一個...
望住呢個企喺遠處嘅同班女同學...一轉身...笑面裡帶著點點哀愁咁望住我...
整個空間漸漸變成灰色…分裂…
分裂到同班女同學笑面裡...點點哀愁裡...粉碎...飄散...
當我再次有意識之時...再次睜開眼之時…
『阿...月...阿月...月...天...花...』天花板…
我...我返咗...返咗...
「你醒喇？」係綽姿把冷淡聲...
綽姿...綽姿！
我一彈起身，就見到著上整齊校服嘅綽姿企喺床邊！望實我！
『綽姿...綽姿！』我立即跳落床！攬實綽姿！『太好喇！你冇事實在太好喇！』
冇事喇...冇事喇！平安冇事返到嚟...實在太好喇！
我攬到綽姿實一實...然後就感覺到自己上半身...好似...咁空虛咁㗎呢？
我鬆一鬆開...望一望自己上半身...
冇著衫...
『嗚呀！』我立即跳返上床！用張被包住自己！『點解淨係得條緊身褲...冇著衫㗎？！』
「我就梗係冇事啦...但你好似好大件事喎...」綽姿冷眼打量住我...
『我...我？』我有乜咁大件事？
唔係唔係...我日日都好大件事㗎啦！
「你尋晚...進入深層睡眠之前，左手就已經斷咗。身上仲有好多傷痕...而且...我仲喺富泰個貨倉裡面。究竟發生咗咩事？」綽姿翹起雙手，挨喺梳妝檯邊，打量住我。
『我...我吖...』我尋晚...尋晚發生過咩事呢？
我好努力咁回憶...回憶...嘗試回憶尋晚...
我記得尋日：『你俾人捉咗...然後真係有個要幫西貢獻命護送嘅委託...我接咗...』
「嗯嗯...」綽姿點點頭，等我繼續匯報。
『然後...我接咗委託...仲有三個空位...』我再諗諗...『跟住就有多三個成員加入...三個都係執行者...』
「嗯..」綽姿點點頭，諗一諗...
『到咗夜晚...委託時間...我就精神化之後趕過去貨倉...』我再諗諗，『然後...差唔多去到貨倉之時，我感覺到兩股陌生嘅氣息...仲有一股...係逆行者！』
「係逆行者？你遇到逆行者？」綽姿有點緊張！
『係！個逆行者仲要係必然！』我記得...我記得喇！
「仲要係...必然？」綽姿有啲驚訝！
『係！然後好快就有一股陌生嘅氣息消失咗...應該係俾必然解決...得返一個執行者同必然交手！』尋晚嘅影像...
「嗯...」綽姿邊諗邊點頭。
『我閃埋一邊...偷偷觀察佢哋兩個大戰...但唔使幾耐，執行者都俾必然解決！』化成無數嘅紅色粒子...
「嗯...」綽姿皺一皺眉...
『然後...必然發現咗我！仲向我展開攻擊！』冇錯喇！我係有同必然打起上嚟！！！
「點解你仲未死？」綽姿皺住眉咁打量住我...
『我...你而家好想我死咩？！』我頂你個肺吖！枉我咁緊張你！你就好似好想我死咁！
「唔係話想唔想你死...你無可能捱到必然三招...更唔好話只係斷咗隻左手...身上幾十處刀傷...仲可以有命走嚟搵返我...你唔好成個女人咁得唔得？」綽姿冷眼打量住我。
『我！我...』係咯...點解我仲未死㗎呢？
「點解佢冇殺你？」
點解佢冇殺我？係咯...點解...
『我...我唔記得...』我真係...真係冇印象...
「嗯？」綽姿疑惑咁打量住我。
『我真係...冇印象...我只係記得...我真係好似捱唔到三招...然後...然後就...唔記得...』然後...沒然後一樣...
「唔...算啦...」綽姿行去著返件大褸，「你進入深層睡眠之後，我出過去睇過...西貢獻命班人全滅...仲有...執到四把精神刀柄。」
四...四把精神刀柄？
「有一把應該係你嘅...其餘三把就...」綽姿諗一諗，「應該係其餘三個執行者。」
咁即係話...仲有一個...喺我去到之前就已經俾必然解決...
果然...
『咁...咁喺貨倉裡面嘅女仔呢？有冇見到有個白色長髮...廿歲左右㗎...』係子茵！
的確！我擔心子茵！
「白色長髮...」綽姿諗咗諗...「邊有咁多時間理咁多？！」
『呃...』又好似...真係...
「不過你又唔使咁擔心...我估...搞到咁大鑊，西貢獻命唔會再用嗰個倉...就算過去睇睇都未必會...班女仔...應該醒返之後就走晒。」綽姿拎起個袋仔。
『嗯...』望就咁望啦...
之不過...有一點我唔係唔記得...就係同羅羅一齊嘅事。
我冇講出嚟係因為唔想俾綽姿誤會我掛住溝女...
「帶你返到嚟，我見你件緊身衫都爛晒穿晒窿...所以就幫你除咗佢。」綽姿著埋對婆仔鞋。
『哦...哦...』我條緊身褲夠爛晒穿晒窿啦...又唔見你幫我除埋...
「你今日抖抖。我會再諗辦法再追查...」
『哦哦...小心啲喇...拜...』
「拜。」
當綽姿行到去大門...當綽姿打開大門...綽姿呆咗咁企喺度...
因為門前就正正企咗個...著住黑色毛毛大褸...好高...大約有190cm高...留有長長嘅中分白髮...前陰長到落胸前...後面長到落大髀...就連對眉都係白色...面色蒼白...帶滄桑嘅...男子！
呢個長白髮男子係...
「片翼？！」
綽姿帶住極度驚訝嘅聲線...噏咗“片翼”呢兩隻字出嚟...
冇錯...呢個型到核爆嘅長白髮男子就係先行者No.2—片翼！
我立即跳落床！企到個人直一直！！！
綽姿講過㗎嘛！SPIRIT係一個階級觀念好重嘅組織嚟㗎嘛！禮儀呢啲嘢都一定會睇得好重！
之不過...而家嘅我冇著上身衫...又係唔係唔多尊重呢？
「今次唔係正式探訪，叫我中村凜得喇。我可以入嚟嘛？」片翼望一望入嚟。
中村凜？原來片翼係日本人？！
唔怪之得咁鬼型啦～
「當然可以！」綽姿立即退開！俾中村凜行入嚟！
中村凜雙手插褸袋，一步步行入嚟：「你準備返學？」
「係！啱啱正要出門...」綽姿企直完個人之後，又小心翼翼咁閂返埋道大門！
「唔阻你吖嘛？」中村凜企喺梳化前，橫視整間屋。
「唔阻！唔阻！」綽姿又企喺中村凜身邊！企到直一直！
中村凜行多兩步，望住我：「唔使咁緊張。」
我今次醒喇！淨係點點頭！
咩今次唔係正式探訪我都唔知咩意思...
都唔知有冇啲乜規矩要守嘅...
中村凜再橫視多兩眼，就行到埋梳妝檯摸一摸：「呢度嘅環境都唔錯。」
綽姿又跟住中村凜身後：「托賴...托賴...」
原來咁都叫唔錯？真係托賴囉...
中村凜行到去窗邊，望住窗外嘅街景：「聽講...你哋近期嘅委託都係失敗。」
嗱！入正題喇！
我就知好似你呢啲大人物大駕光臨一定唔簡單㗎喇！
原來係為咗...委託失敗...
「好對唔住！因為...因為遇上逆行者...」綽姿都未將要講嘅說話講完...
「唔好...」中村凜諗咗諗，「唔好接啲能力以外嘅委託...萬一覺得隊員唔足以應付...嘗試尋求其他行者支援...報酬固然重要，但安全完成委託先係最重要。我唔想...再失去人材...」
人材？我呀？
嗱！果然大人物講嘢係有見地得多呀！
呢啲先係做大事㗎嘛！
不過講開又講...乜原來除咗委託嘅隊員之外，仲可以搵人其他行者幫拖？
咁...點搵？增加隊員數目？
得㗎咩？唔知喎...係唔係隊長先可以更改設定？
「係！」綽姿向中村凜鞠個躬，「以後我知道應該要點做。」
啱吖啱吖～我唔知唔緊要吖～最緊要係綽姿知吖嘛～
「你哋失敗咗咁多次，收入應該唔多好。所以我幫你哋安排咗個委託。」就喺中村凜一講完...
放喺茶几上部電話震咗兩震！
係...係我部電話？
同時，綽姿都喺褸袋拎出電話一睇...
呃...我係唔係都要去拎部電話睇睇？
唔好理喇...都係拎起睇睇先啦。
我就喺茶几上拎返起部電話，開返個SPIRIT Spp...
畫面就彈咗個...“緊急委託”嘅方塊...
我再撳入方塊睇睇...裡面就寫咗...“緊急委託：消滅所有變節行者”！
同時...“咕嘟”我聽到綽姿吞咗一大淡口水...
乜嘢係...變節行者？
「好好準備。委託嘅時間同集合地點，會喺稍後傳俾你哋。」中村凜一轉身，就向住大門方向行。
「係...」綽姿點一點頭，「我送你...」
「唔使送。」中村凜就打開大門。
「係...慢行。」綽姿再點一點頭。
等到中村凜行出大門...離開...綽姿先再閂返埋道大門。
我就行近綽姿身邊：『咩係...』
我都未問晒成句，綽姿就一手撳住我個嘴！
做...做咩姐...唔想我問咁多嘅話，講句咪得囉...
綽姿一邊一手撳住我個嘴，一邊好留心咁留意...門外...
呢個姿勢都維持咗好一段時間...
「今次真係弊...」綽姿鬆返開隻手，行去窗邊偷偷望出窗外。
『嗯？弊乜呢？』當我想行近綽姿身邊，佢又Fing Fing隻手...向我示意唔好行近佢。
搞咩吖？
「個委託係要我哋...殺死正要轉投逆行者嘅行者。」綽姿再望出窗外多兩眼。
『吓？！啱啱先話唔好接啲能力以外嘅委託...又話唔想再失去人材...而家又俾個咁危險嘅委託我哋？』真係唔使睇內容都知極危險啦！
「你唔係信佢講嘛？先行者上得嚟...即係代表覺得我哋存有異心...呢啲委託都係用嚟考驗我哋...」綽姿望出窗外多兩眼，就拉埋窗簾。
『你有異心咩？』我睜大對眼，望實綽姿！
「你吖。」綽姿冷眼打量住我。
『我...我邊有吖...喂唔係喇唔係喇...反正都係喇...不如一齊去做逆行者啦！』呢個可能真係一個求生嘅機會！
「都話你有異心㗎啦。」綽姿無奈咁擰擰頭。
『唔係呢...唔係呢...』我都未講完...
「唔好再諗喇。我哋而家要做嘅...就係做好準備。」綽姿除返對婆仔鞋...放返好個袋。
『吓？做...好準備？』點做吖？要做啲乜吖？
「同你去買返啲裝備先。唔單止你件緊身衣，就連件長袍都爛到唔可以再著。」綽姿拎住部電話撳撳撳撳撳。
『哦...』同我買...裝備先...『咁你...唔返學喇？』
「嗯...啱啱同茵婷講咗...」綽姿放部電話喺梳妝檯上，就除埋身上件毛毛大褸。
『哦...』睇嚟...真係好緊張...
呢個緊急委託...係對我哋忠誠嘅考驗...
咁我哋完成到嘅話...又係唔係代表我哋夠忠心？