我再睇清楚啲...喺有限嘅光線之間...睇清楚啲呢個頭髮凌亂...滿面鬍鬚...烏眉瞌睡嘅男人...

仲有...仲有佢身上件黑色長袍...

長袍之上,繡有不少黑色暗花...

呢個露宿嘅男人...呢個行者...唔通就係...

「散漫,先行者。」露宿男人打完個喊露再捽捽眼。



果然就係佢!

係今次委託嘅隊長!

好彩頭先冇出到聲!唔係嘅話又俾人話唔識規矩!

之但係...點解好似...

「瓦解,執行者。佢係我嘅隨行者,吞噬。」綽姿指一指我。



我就企到直一直!

唔出聲...但要企直...

「嗯...得喇...人齊就行喇。」散漫邊講邊摸住個頭轉身行。

人...人齊喇?

就...就只得我哋三個?!



真係冇其他人喇?!

頭先喺黃金海岸睇到隊員名單只有我哋三個名...仲以為會其他行者加入...

唔好話有先行者...多幾個執行者都好吖...

而家就只有...我哋三個?!

個先行者仲要...懶洋洋咁...一啲都唔可靠!

相比起片翼...真係差天共地...天壤之別!

今次真係...仆得街...

綽姿跟住散漫身後行...我又跟住綽姿身邊行...



望住散漫嘅背影...點睇都只係一個冇撚用嘅露宿者...社會嘅辣殺...屎都有價值過佢...

點可能...點可能咁嘅人都可以成為先行者?

究竟要成為先行者有乜條件㗎?!

唔重要...要有乜條件先成為到先行者對而家嚟講一啲都唔重要...

最重要嘅係...我哋可以依賴佢咩?

要對付變節嘅行者喎...

仲要唔知人地有幾多人喎...



我睇佢個款...殺雞都冇力啦...

今次真係...真係...

我偷偷望望綽姿...綽姿都係木無表情咁...一如既往...

係唔覺得有問題?定係考慮緊有幾大問題?

我真係睇唔透...

跟住散漫身後行,轉咗幾個彎,喺紙皮搭建嘅圍牆之間穿梭...

然後推開壞壞地嘅門...再喺黑暗嘅後樓梯行...行上一層...再上多層...

再拉開壞壞地嘅門...就行到出嚟...停車場?



冇錯...呢度係商場嘅停車場。

當然而家呢度一架車都冇。

“颼!颼!”亦都可能係食風嘅關係,呢度都冇露宿者聚居。

散漫一直行,向住...爛咗嘅石屎圍牆邊行過去...

當我哋都行到過嚟圍牆邊之時,大家都企喺樓層邊...望出去...望住遠處嘅...寺廟?

嗰間寺廟...平時久唔久都會路過...好似係叫做...善慶...洞?

好似係...但唔記得...



每次路過都唔會留意叫咩名...

之但係...而家又有乜好望?

我努力咁望真啲...聚精會神再睇得仔細點...

都好似...冇乜異樣...

都係好似尋日同羅羅去青松觀,好多建築物都受破壞...日久失修...

再仔細就真係睇唔到...(黑麻麻又大近視睇鬼到咩?!)

「唉...都係精神化咗先...唔使咁傷神...」散漫一講完,雙眼紅一紅!

話口未完,身邊嘅綽姿對眼都紅咗一紅!

精...精神化...用精神液!

我都插隻手入褸袋...用力一捏支Level 3精神液!

當道寒意由手背傳遍手掌…傳到手臂…全身...

「邊度?呢度係邊度?點解我會喺...液...」我又聽到喇...

「嗚嗚...好驚吖嗚嗚...」我又聽到女仔聲...

「媽咪...嗚嗚...媽咪呢...」我仲要聽到有...小妹妹聲...

「好凍吖...凍冰冰咁...咩嚟㗎?」又係咁...每次用精神液...都會...

「哦~好好多~」呢把係散漫把聲。

好好多?有幾好吖?

我再次聚精會神...提高視力!

喺精神化之下,我睇到善慶洞...唔少屋頂倒塌...又有唔少外牆倒塌...

除咗有唔少破損嘅建築物外,仲有唔少枯樹...地上仲舖咗唔少枯葉...

喺枯葉之間...仲見到塊地...有唔少裂縫...

簡單啲嚟講,又係一片頹垣敗瓦...

有乜咁特別?冇乜異樣吖~

「唔...應該差唔多...」散漫摸住鬍鬚,望實善慶洞。

差唔多?差唔多咩吖?

我再偷偷望一眼綽姿...佢都係冇乜反應,只係同散漫一樣,注視住善慶洞。

點解永遠都好似只有我一個唔知發生緊咩事咁㗎呢?

就喺呢個時候...

「嗯...到喇...」散漫摸住鬍鬚點點頭。

到?到咩吖?

我再望返去善慶洞...望向破爛嘅大門...正正就有...幾個身影行咗入去!

呢幾個身影...

我再望清楚啲...望清楚呢幾個行入善慶洞嘅身影...

一...二...三四...八九...十個...十個著住黑色長袍嘅身影!

呢十個著住黑色長袍...笠起帽嘅...就係我哋要消滅嘅行者?

再仔細望清楚...佢哋十個...身上都散發住陣陣紅光...

的確...的確係佢哋...佢哋十個...十個咁多?!

我哋呢度...得三個人咋喎...

「好喇...準備好...」散漫拉起衫領,笠起頂帽。

準...準備?

綽姿都除件大褸,掉喺地上。再拉起衫領,笠起頂帽。

我都跟住綽姿除件大褸,掉喺地。再拉起衫領,笠起頂帽。

「準備好...上!」散漫行前一步,企喺樓邊,再向外一躍!就跳咗出去!

綽姿好快咁跟住一躍!

話跳就跳?

跟住要點做呀?

唔好理喇!佢哋都跳咗出去...就跳過去殺過措手不及!(應該係!)

我都立即向外一躍!

嘩嘩嘩!好高呀!!!

跳到出嚟先察覺高!

我就只好喺空中勉強跟住綽姿跳落瓦頂上!再一躍!跳上另一間建築物嘅瓦頂!然後再跳多幾跳,就跳到落散漫身後!

而喺散漫面前...正正就係嗰十個行者!!!

企喺面前嘅散漫冇郁手...面前嗰十個行者都冇舉動...

等我仲一心諗住...殺過措手不及...

但點解...而家好似...

散漫向住嗰十個行者行近兩步:「你哋都嚟咗喇?」

有啲...

散漫再向住嗰十個行者行近多一步:「好準時。」

呢個情況...

「同我哋約嘅時間...」

呢種氣氛...

「啱啱好。」

有啲唔妥...

「你哋十個...想成為逆行者?」散漫繼續背住我同綽姿,問問面前十個行者。

好唔妥...有一種極危險嘅感覺!

「首先...要過咗佢哋嗰關...」散漫以背住我同綽姿嘅姿態,向後指指我哋。

“嗡!”一聲響,綽姿拔出精神刀柄!亮出刺眼嘅紅光刀刃!

當然!我亦都立即跟住綽姿拔出精神刀柄!亮出紅光刀刃!

綽姿堅定不移咁企定定:「估唔到...身為先行者...都要做叛徒。」

「先行者?」散漫轉個身,兩點紅光對住綽姿,「咪只係一個名!」

只係...一個名?

散漫繼續講:「先行者又點吖?你估唔使做吖?咪又係今日唔知聽日事...日日搵命搏!」

日日搵命搏...

散漫繼續講:「我哋個個都用盡方法賺多啲Sil!賺到又點?買裝備買精神液買情報都入不敷支啦!」

啱吖啱吖...啲情報好撚貴㗎!

散漫繼續呻:「唔死得俾你好似我咁上到先行者喇,咁又點?咪就係啲強迫委託更危險!」

強迫委託...更危險?

原來上到先行者嘅級數,都仲要做強迫委託...而且更危險...

又係喎...強迫委託都係先行者帶隊㗎嘛!

散漫繼續呻:「會遇到逆行者嘅機會就越大!有得避吖,都想避開佢哋啦!你哋都唔係唔知㗎啦!」

啱吖啱吖!又講得啱吖!

次次遇到逆行者,綽姿都叫逃走㗎啦!

明顯就係遇上逆行者嘅策略啦!大家都有共識㗎啦!

散漫滔滔不絕咁呻:「你想上進?又上唔到預行者!本來十二個預行者,而家只係得返恐怖一個話晒事!想頹廢咩?你又唔可以落返去做執行者,就只有死先係唯一出路!」

十二...預行者?

而家只係得返...恐怖一個話晒事?

咁講法...即係話本來有十二個預行者做決策?

等等先...有啲複雜...照散漫所講嘅推斷...呢個牽涉到SPIRIT嘅權力最頂端!

假如成個SPIRIT都係得一個稱號為“恐怖”嘅預行者話事嘅話...獨攬大權...公平咩?!

不過講返轉頭,嗰十一個預行者去晒邊?

跳晒船吖?

牽涉嘅層面太高...好難推測...

再加上而家嘅處境...

散漫攤開雙手:「有機會幫逆行者做事,咪當係俾自己一個生存嘅機會囉~」

啱吖啱吖!我都係咁諗㗎!!!

形勢比人強,有得揀梗係揀勁啲嗰邊㗎啦!

綽姿正氣凜然:「呢個唔係背叛嘅藉口。」

嘩...說話就唔係咁講喇...

我哋做啲嘢都唔係大仁大義吖...冇必要同自己條命仔作對吖...

呢啲都係喺你身上學返嚟㗎咋...

散漫擰擰頭:「我就知道你哋唔會認同。」

咪住先...咪住先...唔認同嗰個係佢咋...我好認同㗎!我好認同㗎!

散漫擰轉身:「殺咗佢兩個,你哋就可以加入逆行者。」

喂喂...咪住先...咪住先...仲有商量㗎嘛?

“嗡!”十個將要成為逆行者嘅行者同時拔出精神刀柄!亮出刺眼嘅紅光刀刃!

喂喂喂喂...咪住先...咪住先...仲有位俾我哋加入㗎嘛?

散漫一邊行去瓦礫堆,一邊講:「你哋最好小心啲...話晒瓦解都係西貢攻防戰嘅倖存者...雖然...我冇參與嗰次委託,並唔清楚有乜咁特別。始終消息都被禁...不過冇所謂啦~我都唔在乎~」

當散漫坐喺瓦礫堆之上之時...

十個變節嘅行者立即向我哋作出攻擊!

呢次弊!正前方一百八十度同時受攻擊...點擋?!

只見綽姿踏前一步,同時招架五個行者嘅攻勢!

其餘五人亦都同時向我展開攻擊!

“嗡!嗡嗡!吱!嗡嗡嗡!”刀來刀往!紅光閃過不停!

雖然話佢哋十個嘅氣息唔算特別強...但求其一個都喺我之上!

我只能用精神刀不停擋擋擋擋擋!邊退邊擋!

“嗡!吱!嗡嗡!吱!嗡嗡嗡!”邊退邊擋之下,我同綽姿就俾佢分隔開!

以一敵五...我邊可能...

“嗡!”話口未完,我右手手臂就中咗一刀!

不過好消息係,呢一刀斬唔入!

冇錯...的確唔入肉...就好似只係喺隻袖劃咗一下!

呢啲就係...Level 6嘅威力?

就連精神刀都...擋得到...

五個行者並冇因為斬唔入我而停手,反而攻勢更猛烈!

“嗡!吱!嗡嗡!吱!嗡嗡!吱!!!”接二連三嘅攻勢,我盡量以精神刀擋!

紅光刀刃與紅光刀刃之間嘅互擊同摩擦,紅光閃過不停!紅色粒子不斷飄出!

但正所謂雙拳難敵十手!佢哋嘅實力...仲要個個都喺我之上!

“嗡!嗡!嗡!”話口未完,我雙臂同腰間又中刀!

不過都係一樣,只係輕輕劃過一樣...飄出一點點紅色粒子!

就喺呢個時候,綽姿見我陷於苦戰,立即突圍趕過嚟,為我解圍!

本來圍攻緊我嗰五個行者,一感應到綽姿嘅殺氣就立即退避三步!

綽姿同我背對背:「唔好依賴長袍嘅防禦力。你好快會耗盡能量。」

『嗯...』我夠知啦...唔係嘅話...我又點會咁努力用精神刀擋吖?

之但係都要我夠打先得㗎!

十個行者手持發出刺眼紅光刀刃嘅精神刀包圍住我同綽姿!

弊...唔好話再被斬中...就算俾我用精神刀擋得住...避得開...淨係磨都會耗盡能量...

話口未完,十個行者再次同時向我哋展開攻擊!

“嗡!吱!!!”我用精神刀擋住面前嗰個,然後左右兩邊同時各有一把紅光刀刃兜頭砍落嚟!

今次弊!

喺電光火石之間,綽姿一邊用精神刀刃幫我擋,另一邊就直接用右手接住另一把紅光刀刃!

大量嘅紅色粒子由綽姿右手掌心中飄出!

綽...綽姿...

此時,坐喺瓦礫堆上嘅散漫就食住花生講:「真係估唔到,西貢攻防戰嘅倖存者都會顧及隨行者...成為自己嘅負累...」

成為...負累...

我係綽姿嘅...負累?!