《香港傭兵》: [Day 12－片翼光芒] PART 11
綽姿一刀格開精神刀刃，再揮刀擊退三名行者！
「不愧為西貢攻防戰嘅倖存者...」
綽姿係...西貢攻防戰嘅倖存者...
「西貢攻防戰死傷慘重...唔好話執行者...就連先行者都冇幾個存活...」
綽姿嘅實力...
「如今一見...能力同實力果然好接近先行者...就只差一點點...」
接近先行者...
「單憑在場十個執行者，根本就唔係瓦解嘅對手。」
十個執行者...都唔係綽姿嘅對手...
「要全身而退，必定綽綽有餘...要是消滅晒佢哋，都只係時間問題...」
綽姿可以一個...打十個...
「可惜...有個咁垃圾嘅隨行者佗手掕腳都算，仲要因為保住佢而拖累自己...哈～睇嚟今次...我可以抖抖～」
我係垃圾...
係我拖累綽姿...
我係綽姿嘅...負累...
負累...負累...我唔要...我唔要...
八個行者圍住綽姿嚟攻...
我唔要做...我唔要做...
另外兩個正準備向我再次發動攻擊...
我唔要...我唔要做綽姿嘅負累！！！
『喝呀！！！』我雙手握實精神刀，身上隨即散發出刺眼紅光！立即以忍步衝向兩個行者面前！
先發制人！
“嗡！”我向住兩個行者一砍！
兩個行者立即各自向左右跳開！
將佢哋兩個分開嘅一剎那，我立即向左邊嘅行者施以橫到一斬！
行者邊退邊用精神刀擋！
“吱！”我見個行者好似只係勉強擋住，就乘勝追擊！
“嗡 嗡！吱！嗡 嗡 吱！嗡 嗡！”我向住面前嘅行者施以亂刀狂斬！
面前個行者一邊擋，一邊後退！
我要斬！我要斬中！我要斬中要害！
就喺我連環揮刀，紅光刀影閃過不停之時，我感覺到背後有道氣息正急速接近！
接著！我感覺到有一道強大嘅能量由背後直砍落嚟！
係...精神刀嘅能量！
我立即用精神刀反手一擋！“吱！”正確無誤咁擋住從後以來嘅行者施以嘅偷襲！
我隨即用左腳向後一伸！順勢向前一砍！
後面嘅行者俾我一腳伸開！面前嘅行者就勉強擋住我嘅一砍，震到退後咗幾步！
眼見面前嘅行者借勢向後退多幾步，同我拉開距離。而我感覺到背後嗰個俾我伸開不遠，仲失緊重心...
我冇向前追擊，反而轉身向後一砍！
“嗡！”一刀直砍落行者身上！
呢一刀，雖然唔入肉，但行者身上件長袍同我手上把精神刀擦出大量紅色粒子！
可惡！能量唔夠大！砍唔開長袍嘅防禦！
不過唔緊要...只要繼續砍中...斬中...就睇吓邊個能量消耗得快！
我乘勝追擊！貼住行者施以連環斬！
“嗡！吱！嗡！嗡 嗡 吱！嗡 嗡 吱！！！”紅光刀刃與紅光刀刃之間不停互相撞擊！磨擦！飄出大量紅色粒子！
無數咁多紅色粒子喺氣空中飄散！消失！
行者俾我迫到跳上瓦頂！
我都立即跳上瓦頂，再順勢向住瓦頂揮咗幾刀！
本來已經爛爛地嘅瓦頂俾我再斬到瓦片都碎開！飛起！
行者見冇立足之地，立即跳返落地面！
我就向住行者一跳！由上至下喺正行者頭上直砍落去！
行者一個轉身用精神刀一擋！
“吱！”大量紅色粒子就由紅光刀刃之間飄出！
就喺呢個時候，另一個行者見我有空檔，就趁機過嚟送我橫刀一斬！
我就喺紅光刀刃仲未揮到埋嚟我身邊之時，快速一腳踢落佢個頭！食到應一應！三百六十度轉體三周半直飛落地！
同時我都轉身落地擺返個有型姿勢！
俾我踢到飛落地嗰個行者仲拐吓拐吓咁起身！另一個就立即走到佢身邊！
兩個都向我擺出防禦姿勢！
喺我都仲未諗到應該要點破之時，好自然咁踏前步！同時向佢哋兩個使出一閃！！！
“嗡！吱！！！”右邊嗰個及時用盡全力擋住！左邊嗰個見有空檔，就立即想向我揮刀一砍！
但都只係喺佢舉起把精神刀之時，我就已經舉起右手！托住佢刀柄！
同時，我向後抽刀，“吱！！！”紅光刀刃與紅光刀刃之間擦出大量紅色粒子！抽到最盡之時，再向左邊嗰個行者一刀刺埋去！
左邊嗰個行者及時反應得切，一手拉咗右邊嗰個行者埋佢面前擋！
刀尖直刺向行者胸前...刺進長袍...刺進體肉...
我感覺到...感覺得到...成把紅光刀刃刺入行者體內！
「嗚呀！」面前被人拎嚟做擋箭牌嘅行者口噴紅色粒子！
大量紅色粒子就由暗黑嘅面容飄出...喺空氣中消失！
同時，我感覺到腰間有被刺嘅感覺...
原來，有把紅光刀刃由面前個行者嘅肚穿出！刺入我腰間！
『吔！』我一腳就伸開佢哋兩個！退後兩步！
被刺兩刀嘅行者都俾佢身後嘅行者一腳伸開！跪喺地上！
我望望自己腰間嘅傷口...飄出紅色粒子...
我再望住跪喺地上....慢慢企返起身...胸口正中心同肚嘅傷口都飄出紅色粒子...
唔係要害...所以唔會立即煙消雲散...
之不過...
『竟然用隊友嘅身體擋刀都不單止...仲要借佢嘅身體向我施襲...』卑鄙到極。
「哈～隊友？你講咩吖？」中咗兩刀嘅行者口吐紅色粒子，單手撳住胸口，「今次我俾佢利用...下一刀可能係我送返俾佢...」
『又係咁...爾虞我詐...死不足惜...』
「邊個死都...好難講！」中咗兩刀嘅行者雙手持刀，傷口都飄出紅色粒子咁以忍步向我接近！
好快！受咗傷都仲可以跑得咁快？！
說時遲，那時快，行者已經跑到嚟我面前，雙手舉起精神刀，正要向我使出袈裟斬！
速度之快，我已經嚟唔切迴避...只好用紅光刀刃一擋！
“嗡！吱！”就喺紅光刀刃與紅光刀刃相格之時，我雙手舉起刀柄！刀背緊貼手臂...以刃引之形化解咗行者對我施以嘅袈裟斬！
當行者嘅紅光刀刃沿住我手上嘅紅光刀刃向斜下滑落...另一個行者見我有破綻...立即以忍步向我接近！
就喺另一個行者快要跑到嚟我面前，仲未向我揮刀之時，我順勢快速揮刀一斬！
“嗡！”紅光刀刃就喺行者肩膊上斬落去！
由上至下，由左至右，將行者一分為二！
「嗚呀！」行者隨即化成無數嘅紅色粒子，喺空氣中飄散...消失...
與此同時，啱啱被我格擋完嘅行者再次趁住我有空檔，立即向我施以橫一文字斬！
由於我嘅攻擊動作仲有間距，加上大家嘅距離太近，我只能勉強向後一跳！
但呢一跳始於都唔夠快...
“嗡！”我胸前就俾行者劃咗一刀！
而且呢一刀都幾深...大量嘅紅色粒子就由胸口飄出！
我向後彈多一步，同行者保持一段距離...
我望一望自己胸前...望住紅色粒子飄出：『你頭先嘅攻擊...就係為咗引我以刀格擋...藉此引你嘅同伴趁我有空檔嚟攻擊我...再借我擊殺佢之時...向我施以呢一刀？』
「仲使問咁多嘅？都話咗下一刀可能係我送返俾佢㗎啦～係估唔到...估唔到你反應都幾快～頭先都唔係咁...扮㗎？」行者攤開雙手...
『再快啲都仲得...』我就喺行者未嚟得切反應之時...踏前一步...一閃！
“嗡！”紅光刀刃由下至上，由左至右，劃過行者全身！
「點...點會...」行者隨即化成無數嘅紅色粒子，喺空氣中飄散...消失...
『係想問...點會...』咁快？
其實我都唔知...
其實...我冇諗過要點做...
就喺我踏前一步之時，迅雷不及掩耳之下，我就差唔多嚟到行者嘅面前...
同樣...喺我未諗到要點做之前，我隻左手就自動咁擺出一閃姿勢...揮刀一斬！
成個過程好自然...就好似反射動作...
點解...會咁？
我諗...而家唔係尋根究底嘅時候...
而家...應該要幫綽姿！
我回頭一望，只見四個紅光身影圍攻綽姿。
冇錯...就只剩返四個行者。
仲有四個呢？早喺我腰間中刀嗰一刻，就已經有兩道氣息消失。
然後當我胸前中刀嘅一刻，又有兩道氣息消失。
果然真係...果然冇我呢個負累...綽姿一個打十個...綽綽有餘...
至於呢四個行者嘅氣息...都比頭先交手嗰兩個強...強得多...
之但係...強又點？都要面對...我唔要再做綽姿嘅負累！！！
我一個忍步接近！再向其中一個行者背後揮刀！
行者離遠就感應到我嘅氣息正衝著佢而去，喺我嘅紅光刀刃都未接近佢身邊之時，佢就背住我一跳！跳上瓦頂！
呢一刀落空之後，我同綽姿對望一眼，然後我就追上瓦頂！
喺瓦頂上嘅行者見我追咗上嚟，立即向我施以亂刀斬！
“嗡！吱！嗡！嗡！吱！嗡 嗡！吱！嗡！”紅光刀影閃過不停！
我邊擋邊避！
好快！快過頭先嗰兩個好多...力量仲要好大！
紅光刀刃與紅光刀刃嘅碰撞同磨擦，都擦出大量紅色粒子！
可惡...點解有咁大差距...
點解遇親唔同嘅行者...同佢哋之間都有咁大嘅差距...
究竟天際有幾高？我係唔係永遠都只能夠喺地面爬？！
可惡呀！！！
當紅光刀刃正要砍向我左肩之際...我雙手舉起刀柄！刀背緊貼手臂...再一次以刃引之形化解行者對我施以嘅袈裟斬！
而行者嘅紅光刀刃沿住我手上嘅紅光刀刃向斜下滑落...我立即順勢快速揮刀一斬！
但行者嘅反應比我更加快！喺我未斬到落佢膊頭之時，佢雙手舉起刀柄...刀背緊貼手臂...同樣以刃引之形化解我嘅反擊！
我趁住紅光刀刃未向斜下滑落之前，用力一壓！
“砰啪啪！“瓦頂隨即崩塌！
我一邊壓住行者跌落地面！
喺行者雙腳落地之時，我就趁住佢未站穩陣腳...一腳踩落佢胸口上！
行者俾我大大力踩到向後退咗幾步！
我就一個後空翻...當左腳一落地嗰一瞬間...立即向仲失緊重心...向後退緊...踩到瓦片碎片嘅行者一閃！
“嗡！”紅光刀刃由下至上，由左至右，劃過行者全身！
「竟...然...」行者隨即化成無數嘅紅色粒子，喺漆黑嘅房間之中閃爍...飄散...消失...
喺紅色粒子都完全消失之後，外面最後一道陌生嘅氣息都消失咗。
綽姿將最後一個行者都解決埋...
果然...
“嗡！嗡 嗡！”我斬開破爛嘅牆身，由半倒塌嘅房間行返出嚟，望一望綽姿...再望一望仲坐喺瓦礫堆上...食住花生嘅散漫...
綽姿就行到嚟我身邊...同我一齊企定定望住散漫...
終於都到...打Boss嘅節奏？