《香港傭兵》: [Day 13－愛港愛國] PART 04
“吼！吼～”紅Van高速行駛！
尋日喺黃金撞到林雪，佢對綽姿嘅態度都唔係咁差...
果然變態佬都係會對小妹妹友善啲！
我再望望車上...冇乜乘客...就只有四五個年輕男女...
係因為太早，所以仲未有人出去？
唔知啦～
不過坐過幾次紅Van出市區，身邊嘅乘客都係啲好似我咁嘅年紀嘅年輕人。
都好正常嘅～
再細個啲嘅就返緊學～老啲嘅就冇體力去咁遠（屯門出市區好遠咩？！）～
最大問題都係錢！
屌你成五舊水一程！仲要唔知幾時先有折！冇乜事我都唔想出去啦！
你話我自己邊緣化自己都係咁話！
“吼～吼！”紅Van衝過紅燈，好快又嚟到善慶洞...
剎那間望入善慶洞...隱約仲見到...尋晚打鬥嘅痕跡...
就喺尋晚...喺呢度同變節嘅行者打鬥過...
仲有片翼同逆行者...散漫...
片翼嘅綠色光芒...一閃即逝...
戰鬥咁激烈，但就好似冇人知咁...
所以話...有好多嘢冇人知，唔代表冇發生...
“吼！吼～依！”紅Van劈個靚彎，又駛過三聖。
望住車窗外...爛長廊...
尋日同綽姿吹住海風慢步...
其實都幾浪漫...
我仲記得...冷風一吹...吹起綽姿把秀髮...見到佢眉頭上...一條疤痕...
就係呢條疤痕...本來已經冷艷嘅綽姿顯得更加冷艷...
其實綽姿...真係一個大美人...
可惜...成為咗傭兵...
你話如果綽姿唔係生於呢個年代...或者係生於我嗰個年代...會係一個點樣嘅女仔？
我估...應該大把人追...
個個月都有幾十人同佢表白...
自己間學校又好...隔嚟間學校又好...第二個區嘅學校都總會有人慕名而來...一睹芳容...
而綽姿都保持住冷漠無情嘅性格～就算收到花，都嚟手Dom佢落垃圾桶！
你話幾咁吸引～點解？得不到的永遠在騷動吖嘛～
其實講咁多...我都係想講...綽姿係一個值得遇到幸福嘅女仔...
我真係好希望佢唔好再喺殺戮之中徘徊...希望佢可以得到真正嘅幸福...
“吼...吼...”紅Van開得有啲慢...
「屌你老味...仆街貨車...阻閪住晒...」林雪都喃喃自屌...
望望路上，的確有唔少貨車。
大大小小嘅貨車來來回回，出出入入。
應該係...黃金海岸。
“吼...吼！”駛過黃金海岸之後，紅Van又可以加速飛馳！
真係咁...眼見黃金海岸入口有唔少貨車出出入入...
睇嚟今日都有唔少貨由水路進出。
經過尋日，我總算對呢頭有返少少了解。
都係多得...綽姿...
“吼～吼...”話咁快就嚟到大欖，西貢獻命嘅路障...
望出車窗外，終於俾我再見到呢班光頭佬...
等我仲以為你哋死晒添～
講真嗰句...仆街仔又邊有咁易死？
“吼～依！依！吼！”紅Van駛過西貢獻命嘅路障後，繼續逢彎劈彎！直路直衝咁喺鋪滿楛葉嘅青山公路上飛馳！
唔使幾耐...離遠就見到啲...建築物...
離遠嘅山頭有一棟棟木屋...鐵皮屋...
海邊又有幾棟舊樓...
又嚟到深井...
“依！吼...吼...“紅Van開始減慢車速...幾個Full Gear嘅警察喺路邊巡邏。
與幾架停泊喺路邊嘅警車同鐵馬擦身而過。
再喺幾塊藍色紅色LED路牌之間駛過。
“依！依...啪！”紅Van停定後，隨即打開車門。
跟住幾個年輕男女一齊落車之後，穿過警察設置嘅閘口...
“沙 沙 沙”喺鋪滿碎沙石嘅路面行多兩步，行上行人路...慢慢停落嚟...企定定...
而家應該要...Download返個租車App先！
我就企喺路邊拎部電話出嚟...
『都仲未到十點～仲有時間～』講真嗰句，林雪手車真心堅！
唔知佢係唔係由後生揸到而家？
好～唔好理～而家都係Download咗個租車App先～
我就打開個App Store搵搵...應該點搵...
『唔...應該搵...租車App...租車...共享...車！』咦喂！真係有喎！
不過呢...殘體字嘅？
屌信唔信得過㗎...
唉...信唔過都要信㗎啦...Down咗落嚟試試先講啦～
我都係快快手手Download個共享車App！
真係唔使幾耐就Download完～
打開一睇...又係殘體字...
唔好理咁多啦！仲要登記㗎！
睇住啲殘體字登記，除咗唔放心，仲打得好鬼慢！
就係因為唔放心所以每打一隻字都總有戒心！咁咪慢囉！
而所有個人資料，我都係跟返SPIRIT俾我嘅身份識別卡去入。
又真係Work㗎喎！
其實點解會Work㗎呢？
我又真係唔係好明...
明明就係假㗎嘛...
點解假嘅都過到架呢？
所以話呢...殘體嘢又邊信得過吖...真假都唔識分...
成個過程除咗話我輸入得慢啲之外，都好順利～（最柒嘅係到我輸入晒先發現原來只要拍張身份識別卡落電話就會自動輸入...屌你老母又唔早啲講？！）
只係去到最後一Part...
『要...個...十...百千...要成十萬蚊按金？！』會唔會貴咗啲呀？！
十萬喎！大拿拿十萬喎！要俾成十萬蚊按金先可以租車？
我唔好去買架二手？！（不過我係唔知呢個年代嘅二手車係要幾多錢...）
唔係唔係...按金姐...會拎得返㗎嘛...吓話？
不過殘體字喎...大陸嘢喎...真係拎得返？
我望住個“十萬港幣按金”...
拎唔拎得返...都要俾㗎啦...
唔俾嘅話又點租車吖？
十萬...唉...開個SPIRIT App轉咗錢先！
我就開返個SPIRIT App...
『轉...幾多好呢...而家仲有...』789 Sil...
轉十萬零一千出嚟？
唔好喇...而家啲嘢咁鬼貴...都係轉定多啲啦...
就轉十萬零九千啦～
快快手手轉好錢，Balance就得返680 Sil。
然後又快快手手咁開返個共享車App，俾十萬蚊按金...
“嘟 叮”一聲，登記成功！
好喇好喇...搞咗咁耐終於有得用喇！
點用㗎點用㗎？等我睇睇先...
『應該係尋找最近的私家車...』然後畫面就出咗幅地圖...
地圖上示顯有一點藍點...係我嘅位...
然後附近就有幾點綠點...應該就係可以租用嘅共享車...
屌！一講“共享車”呢三隻字總係好唔對路！
要俾錢㗎！共咩享姐？租就租啦！
係喎...講開要俾錢...點計法㗎呢？
唉～唔好理住！搵咗架車先啦！
“沙 沙 沙”我就跟住幅地圖，喺鋪咗唔少碎沙石嘅行人路上行...
沿住條馬路邊一直行...都行咗一段路...再向住粒綠色點行多幾步...我就見到...有架白色嘅...私家車停泊喺路邊...
我再望望幅地圖...望望架車...應該係呢架...
都幾好喎～咁快就俾我搵到～
共享車呢個概念真係唔錯吖吓～
睇清楚啲...架白色私家車又幾靚仔～幾型咁添喎～
新款車都有得共享？
新款？新乜鬼款吖～呢度未來嚟㗎嘛～我眼中嘅新其實都係舊～
新定舊都好啦～最重要都係俾我搵到～
當我行到埋架白色私家車之時，個共享車App就喺粒綠色點上彈咗個問我“是否要使用此車輛？”嘅對話方塊出嚟！
嘩...又幾貼心喎衰鬼～
不過粒點可唔可以唔係綠色呢？而家見到綠色都驚驚地...
好喇好喇...都係快啲上車先！
我喺個對話方塊撳咗“是”之後...
『此車輛...無法使用？！』唔撚係吖化？！
唔用得你又Show粒點出嚟？！
屌真係戇鳩鳩...
咁即係點吖？即係要再搵啦？
好啦好啦...再搵啦...
睇睇幅地圖，好彩唔係好遠又有一架～
我就急急腳咁向住前面粒綠點行過去～
今次呢架係藍色嘅私家車～
行近啲睇清楚啲，呢架好似仲新淨過頭先嗰架～
但當我又喺個對話方塊上撳“是”之時...
『又無法使用？！』點撚解呀？！
有乜問題呀？點解唔用得呀？又唔講清楚！
屌！麻鳩煩！又要行！
我又望住幅地圖行！向住再遠啲嗰粒綠點行！
今次呢架係...灰色嘅私家車！
我冇理佢新唔新淨！立即跑過去喺個對話方塊上撳“是”！
之但係...
『又無法使用？！』屌你係唔係玩嘢呀？！
我仲要搵到幾時呀？！
仆你個街我已經行到出咗深井...行咗好柒遠喇！
仲要玩尋寶遊戲玩到幾時呀？！
我繼續心急咁跟住電話上幅地圖搵車！
再行遠啲！搵多一兩粒...黃點...係使用中...
再行遠啲...有一粒紅點...待修！
『仆你個街！』我只好繼續行！再行遠啲！
都行咗真係幾遠...行咗唔少路...
“嘟 叮”終於俾我搵到架用得嘅！
而個App仲寫住...
『現在開始收費...每小時...一百蚊？！』仲有個Timer計緊！
仲有嘅就係...由按金扣數...到唔用架車嘅時候就撳停止使用...
哦～即係唔撳停止使用就一直扣錢啦～
咁就唔好理咁多！快啲上車揸過去先！
我拉一拉車門...再用力拉一拉車門...
『妖...妖...妖妖屌屌屌！』勁大力咁拉咗幾下先俾我拉開！
屌咩！度門壞壞地嘅又唔講！
架車係唔係真係用得㗎？！
我就快快手手上車！跟住就...車匙...車匙呢？冇車匙㗎？！
唔...冇車匙...
我就放部電話喺...側邊...一個凹位...
架車立即著咗！
咦喂！真係咁㗎喎！
我部電話就係車匙！
咁又真係幾方便喎！
唔同嘅人租唔同嘅車...只要Send條Key去個戶口就用得！
又真係估唔到...可以諗得咁全面！
假如真係俾我返到去過去...真係要問銀行借錢搞搞佢！
最好就唔止共享私家車...共享埋超跑！我最愛嘅林寶！！！
人人有林寶揸～幾咁開心～
當然前題係要俾十萬按金～
然後我又可以拎一大筆按金去投資～
嘩～發達啦～～～
屌你醒啦柒頭！有命返去先再講啦...
而家要做嘅，都係泊架車去目的地！
好！試試撻唔撻得著先！
我踩住個Brake...撳個Engine Start...
“依...依...依依依...吼...”好彩都仲著到...
我幾撚驚又要再搵過...
好喇好喇...已經嘥咗好多時間喇...好彩而家都係十點鬆啲～仲有大把時間～不過都係快啲揸去目的地先啦～無謂夜長夢多～
『喂Siri～Siri～有冇Siri㗎？』冇反應...
睇嚟都係要靠自己...
我開返架車嘅導航系統...Set返好目的地...扣好安全帶，俾俾油...
“吱...”就喺路面上行駛。
又要無牌駕駛...呢頭咁鬼多警犬都唔知會唔會截停我添㗎...
不過好彩嘅係，自動波～好易揸～
當我駛到上嚟荃灣路之時，路面都開始多車...
我就小心啲...睇住條路...又睇住個導航慢慢揸...
唔喺精神化之下，真係唔敢揸咁快...啲反應...真係差好多...
唔緊要啦～安全第一吖嘛～
就喺我小心翼翼咁喺條直路俾多少少油...
“轟隆！轟隆！轟轟隆隆！”幾聲巨響由前面傳嚟！
前車突然急煞！
“依！！！”我都立即踩Brake！
『嘩嘩嘩！咩事咩事？！』好彩踩得切！
身邊啲車都全部停低晒！
做咩吖？前面...炒咗呀？