身邊全部車都停低晒!

我就八八卦卦咁望前面...望得遠啲...再遠多少少...

我望到兩三架私家車前...隔遠少少嘅位置...瞓咗架銀色...巨型貨車!

成架銀色巨型貨車就打斜咁瞓咗喺公路上!

唔係咁大鑊呀化?!



炒巨型貨車都算...仲要打斜咁瞓?封晒成條路!

大佬你點揸車㗎?!直路嚟㗎喎!

就喺呢個時候,再前啲嘅位置停咗幾架同色同款嘅銀色巨型貨車,有幾個...士兵打開車門跳落嚟!

係...解...解放軍?!

望清楚啲,幾個...十幾個...幾十個手持長槍,Full Gear嘅解放軍士兵由幾架銀色巨型貨車嘅車尾跳出嚟!



嘩!咩事咁大笨象?!

點解又係...解放軍?!

望清楚啲...銀色巨型貨車車身...印有紅色嘅...解放軍軍徽!

銀色嘅巨型貨車...解放軍軍徽...冇錯喇!呢種貨車...喺荃灣入面見過!

只見班Full Gear嘅解放軍士兵大為緊張拎住支長槍周圍指!



我再望清楚啲...瞓低喺公路上嘅銀色巨型貨車車尾...好似有啲黑色嘅...

深黑...深淵一樣黑嘅...液體?

「不准看!不准看!」幾個Full Gear嘅解放軍士兵用槍指住前面幾架私家車大喝!

我再八八卦卦睇清楚啲...雖然有啲遠...之但係我都可以睇到...有唔少黑色嘅物質...由瞓低咗喺公路上嘅銀色巨型貨車車尾道門漏出!

「不准看!伏在方向盤上!」一個Full Gear嘅解放軍士兵行到埋嚟,喺車外用槍指住我!

『哦哦...對不起...對不起...』我乖乖趴喺軚盤...

使唔使咁緊張吖...

炒車姐...唔俾得人知咩?



柒得滯吖?

之不過...啲巨型貨車係載啲咩㗎呢?

「伏在方向盤上!不准看!不准看!!!」

等幾個拎住支長槍指嚟指去嘅Full Gear解放軍士兵行過...

我又八八卦卦咁偷偷望上前...

呢個角度...真係唔係好睇到啲乜...

只係見到...已經有唔少...黑色嘅物質...由打斜瞓喺公路上嘅銀色巨型貨車車尾漏出...漏喺公路上...



究竟係...咩嚟呢?

只見又有幾個著晒生化衣嘅人...好緊張咁拎住幾碌...黑色柱圍住架巨型貨車...

放好晒之後...突然!

『唔...唔見咗?!』巨型貨車嘅位置空空如也!只係得返幾個手持長槍嘅Full Gear解放軍士兵喺度把守!

嘩!係咩科技吖?移形換影呀?!

唔係唔係...應該係...影像!

照咁睇應該係...嗰幾碌黑色柱...可以投射出影像!

只係影像太高像素...太真實...就好似實景一樣!



未來嘅科技...呢啲先叫做未來科技㗎嘛!

「看甚麼?!把面伏在方向盤上!」一個Full Gear嘅解放軍士兵企喺側邊,用長槍隊埋我塊車窗玻璃!

『對不起...對不起...』我又乖乖趴喺軚盤...

點吖...八卦又唔得吖?

唉...都唔明...點解啲解放軍可以咁撚惡...

公路嚟㗎!都可以拎住支槍隨便指平民!

香港真係淪陷喇!



之但係...嗰啲黑色物質...究竟係乜嚟呢?

係油?石油?

又唔係...好似...

就頭先所見...個質感比起石油好似...好似更加杰...

我唔係讀理科...物理呢方面我真係識鐵㗎咋...

點解解放軍咁緊張㗎呢?

啲嘢好值錢?

值唔值錢都唔係好關我事...最關我事都係幾時先搞掂㗎?!

我仲要趕住揸架車去碼頭㗎!

本來諗住仲有時間~而家仆街啦!都唔知要搞幾耐!

解放軍班仆街可唔可以爽手啲㗎?!

可唔可以半個鐘之內清場呀?!

解放軍呀嘛!清場最拿手啦!

我趴喺軚盤等...等咗都幾耐...等到條頸都有啲梗...

其實我好想抬頭鬆一鬆~但車外企咗幾個身影...應該係被手持長槍嘅Full Gear解放軍士兵包圍...我就唔敢輕舉妄動...

一陣變蜜蜂竇都唔知咩事吖!

所以我都只好乖乖咁趴喺軚盤等...一等再等...等了又等...

等咗唔知幾耐...等咗都好似幾耐...等咗好耐...等到好似幾個身影喺車外行過...

我再偷偷眼尾望一望...望到車外有幾個身影向住前方行...

走喇?搞掂喇?

我再偷偷望上前...只見幾個著晒生化衣嘅人...拎住幾碌黑柱...行上遠處...遠處嘅銀色巨型貨車...

咦喂!架失事嘅巨型貨車呢?清理咗喇?成架唔見咗喎!係唔係咁乾手淨腳吖?

嗱!我都話㗎啦!解放軍毀屍滅跡最耍家~

至於啲解放軍士兵呢?我諗應該上晒車啦~仲有幾架開走緊~

犀厲犀厲~厲害厲害~

睇睇個鐘...

『嘩!原來都成十一點㗎喇?!』都搞咗成個鐘!

嘩要快啲快啲!

雖然話呢度距離碼頭唔算遠,都算近...

之但係再有乜意外...就真係仆街喇!

“吱!”見前車都開始起動...我都跟住俾油去。

繼續跟返個導航行,總算順順利利揸到嚟碼頭。

“吱...依...”停泊喺指定嘅地點之後熄匙落車。

『架車就繼續租?』個委託又冇講泊架車嚟呢度做乜...

都係開個SPIRIT App撳個完成,睇睇下一步有乜指示先啦~

我挨住車身,拎部電話出嚟,打返開個SPIRIT App撳“完成”...立即就有下一步指示!

『去黃金海岸...』搵出目標人物?!

接住落嚟要做嘅係...去黃金海岸搵出目標人物...仲有幅相!

相中係一個...女仔!

相中嘅女仔白白淨淨...一頭黑黑...灰灰嘅頭髮...斜瀏海...髮長啱啱到肩...

眼大大嘴細細面尖尖...面上仲有粒楊丞琳痣!

今次要捉嘅目標...係一個靚女嚟㗎喎...

究竟邊個要捉呢個靚女呢?

捉嚟做啲乜呢?

會唔會捉嚟做...玩具?

嘩...諗諗都心動吖...

屌唔好一有機會就變態啦!

之但係...今次嘅委託人...又會係邊個?邊路人馬?

心中有好多疑問,不過都係一如既往...唔需要知嘅嘢就唔會知...

唉~算啦~既然我而家嘅任務係要去黃金海岸搵呢個靚女,就過返去先啦~

唔係...係要撳咗錢先!得返二百二喺身咋!

開返個地圖App出嚟搵櫃員機...

『附近係...冇嘅...最近都要行...好遠...好遠...』真係好鬼死遠...

鬼咩...呢邊而家咁僻...

望望條馬路...又回望個碼頭...呢度...第一次執行強迫委託嘅集合點...第一次見到片翼嘅地方...

真係好僻...中午都係咁僻...

好啦~都要行㗎啦~行去撳機先啦~

我就望住幅地圖,跟住條導引線行。

行過啲大型商場,裡面都係冇商舖。

住宅?應該都有人住嘅,不過就咁睇就應該唔多囉。

一直行,喺人跡罕至嘅街道上行,行咗十幾分鐘...總於見返啲人。

有啲公公婆婆執緊紙皮...推緊車仔...

又有啲街舖係收買雜物...

我一邊留意住街上嘅人同舖,一邊跟住導引線行...

個個人嘅面上都冇笑容...

個個都好似...苦瓜乾...

喺呢度生活嘅人...真係同屯門裡面差唔多...

行咗差唔多成半個鐘,先俾我行到嚟櫃員機!

『行到腳都軟...』好啦!應該撳幾錢好呢?

五百?一千?千五?

望住個螢幕諗咗陣...

都係撳夠二千啦!

呢個年代啲錢真係好唔見使!

食得嘅又貴,唔食得嘅又貴,搭程車都五舊啦!

仲諗住執行委託賺Sil可以發達?

係喎...講開又講...執行而家呢個委託期間...淨係俾按金租車都十萬...

好啦我當你拎得返啦...

咁租車呢?

每小時都一百...

而家都差唔多唔見咗四百...

仲要唔知租到幾時!

又唔知租嚟做乜!

今個委託報酬又只係得30 Sil...

就算今次綽姿大仁大義真係同我平分...都係得15 Sil...

15 Sil...萬五蚊...

咁搞法...我會唔會貼錢做委託㗎?!

嗚呀!行者生活真艱難!

其實...我係唔係唔應該...租車呢?

我應該走去偷架返嚟啦!

真㗎...用合法途徑係唔得㗎!

而家諗咁多都冇用㗎啦...都係快啲返去先啦...

返去...點返去?搭車去深井...搭咩車?

我係唔係應該要搵...小巴?

我諗應該都係靠紅Van㗎啦...

之但係...呢頭邊度有紅Van?

我行出馬路邊,左望望...右望望...搵㗎車睇吓都冇...

再行出少少...行遠少少...

“飃!”就只有貨車...

兩三架大大細細嘅貨車駛過...

唔見有紅Van嘅蹤影喎...咁點搵吖?

我嘗試問問路人...

『請問...』但我條問題都未問完...

「唔得閒吖...唔得閒吖...」路人就耍手兼擰頭,雞咁腳走...

唉...都預咗㗎喇...

都係開地圖搵啦...(真係唔怪得人咩事都靠手機...唔靠手機靠得邊個?)

唔係喎...定係租架車揸返過去深井呢?

又租車?每小時一百㗎喎!

一百咪一百囉~總好過唔知喺邊搵紅Van吖~(仲好有可能搭一程唔止一百...)

好啦~都係開返個App租架車先~(呢頭覺得搵笨柒,嗰頭又柒住俾人搵笨...)

但當我想搵附近有冇車可以租之時...

『同一個戶口無法同時租用多於一架車?!』咁㗎咩?!

喂搞錯呀?咩規矩嚟㗎?我有錢唔可以租多幾架㗎?!

知唔知咩叫資本主義㗎?!

資本主義就係有資本就可以主宰一切!

屌真係激死人!而家應該點呢?

而家應該...有共享車...又有冇得Call車?

係喎!共享車App都有...應該有Call的士App嘅!

我記得...輝哥有提過...Call車...

好!等我又試試搵搵...Call車...

好快真係彈咗個Call車App出嚟!

咦喂~真係有㗎喎~

秓科為人類帶來方便是真的~

我就快快手手Download落嚟睇睇點用~

一打開個App...就要輸入目的地...

咦喂~唔使開戶口又唔使俾按金~咁咪好囉~

呢啲先係良心App嚟㗎嘛~(不過都係殘體字介面...)

可能香港已經赤化啦...

好~唔理咁多~目的地...一定入唔到特殊區㗎喇...去深井啦~

我就喺輸入欄輸入“深井”...

然後,畫面出現“請等候...”...

請等候...請等候...請等候...請等候...請等候...請等候...

都等候咗好耐...好耐...好鬼死耐...

『等乜鳩呀?Loop死咗吖?定收唔到吖?』我望望個接收訊號...滿晒㗎喎...

喂...Work唔Work㗎?

好唔耐心咁等候多一陣...終於有反應!

畫面一彈,就彈咗...一條選項...

選項上面寫住...司機...Edward Wong...車牌...EdWong...車種...七人車?!

呢啲資料都唔算太奇怪...最奇怪嘅係...

『車資...二百?!』