喺正我面前...帶住微笑望實我嘅...正正就係...梓翹...

「又會咁啱喺度撞到你嘅?」梓翹Keep住微笑望實我。

『係...係囉...又會咁...咁啱嘅?』係幾時...幾時企喺我背後?

仲要咁近...貼到咁近都...感覺唔到佢嘅存在...

「我...我咁啱行過呢頭,想睇睇有冇嘢啱買~」梓翹帶住尷尬嘅微笑,摸摸佢把白髮,「你呢?」



『我...我見冇乜嘢做...所以走過嚟行吓...睇吓...』我立即Lock返部機,袋返好。

唔可以俾梓翹發現...

「咁不如一齊行啦~」梓翹雙手插住褸袋,向住市集方向行。

『哦...好...好...』一齊行...

跟住梓翹身邊行,行入人頭湧湧嘅市集...



尋日同綽姿行過嘅市集...

梓翹左望望,右望望:「呢邊真係...熱鬧...」

『嗯...好熱鬧...好多人...』都係同尋日一樣...勁多人擺賣...勁多人搵嘢買...

「仲好似...好多黑社會...」梓翹望咗遠處...喺後巷旁邊嘅金毛仔一眼...

『嗯...都真係好多...』仲好似尋日一樣...啲金毛仔個個都鬼鬼祟祟咁...唔係企喺後巷旁邊...就係企喺暗角偷偷望出嚟...



「頭先入嚟嗰時...仲見到有十幾個企喺入口...」梓翹又行去望望地攤有乜嘢買。

『嗯...喺出面入嚟㗎嘛...』梓翹所指嘅...應該就係肥屍佢哋...

「嗯...咁睇嚟呢度真係越嚟越熱鬧...」梓翹踎低拎起個木製雕像睇睇。

『越嚟越熱鬧?你唔覺得好有問題㗎咩?』我覺得“熱鬧”唔係一個恰當嘅形容詞...

「嗯?問題?」梓翹拎住個木製雕像望咗我一眼,又拎起另一個睇睇。

『咁多黑社會入嚟...你估佢哋想搞乜?』一定唔會係好嘢啦...

「點知佢哋想搞乜~」梓翹放低木製雕像後,又起身繼續行。

『嘩...你好似唔理唔理咁喎...』我又跟上梓翹。



「做乜要理咁多?」梓翹帶住微笑打量我一眼,又望望另一個地攤。

『你唔擔心㗎咩?』越嚟越多黑社會聚集喎...

「我又唔係住呢頭~做乜要擔心咁多呢?」梓翹踎低拎個玻璃器皿喺手睇睇。

『說話就唔可以咁講喇...點知會唔會有乜影響㗎?』香港已經唔係大㗎啦...屯門就更加細...

或多或少都一定有影響㗎啦...

「你都幾杞人憂天㗎喎~」梓翹帶住微笑打量我一眼,又繼續睇睇地攤上嘅玻璃器皿。

『我呢啲叫杞人憂天?我呢啲叫危機意識!』所以話一樣米養百樣人!



我闊佬懶理就俾綽姿話我冇危機意識...我有危機意識就俾梓翹話我杞人憂天...

「危機意識?哈哈~」梓翹笑咗兩聲,「Sorry...Sorry...忍唔住~」

笑咩吖笑...好好笑咩...

「有啲嘢...」梓翹諗咗一諗,「冥冥中自有主宰...」

有啲嘢...冥冥中自有主宰?

「順其自然啦~」梓翹起一起身,又繼續行。

順其自然?

真係乜都可以順其自然㗎咩?



肉隨砧板上,要劏要殺,悉隨尊便?

好消極姐...

跟住梓翹身邊行,望望地攤有乜買。

不論係木製玻璃定塑膠...爛銅爛鐵爛雜物,梓翹都會拎喺手睇睇...但又好似睇極都睇唔啱咁。

『其實...你想買咩?』我都係忍唔住要開口問問。

「我?冇㗎~我都冇話想買咩~睇吓啱唔啱...有冇合眼緣啦~」梓翹又打量住幅油畫。

『合眼緣吖...』我又真係...冇呢種感覺...



一直以嚟...我都冇話合唔合眼緣...

不過阿月就成日都掛喺嘴邊...

阿月就係一個買嘢講合眼緣...做嘢又講即興嘅人...

所以呢...好多時都估佢唔到...

不過就係因為好多時都估佢唔到...先令我咁著迷...

「喂~諗緊咩吖?」梓翹眼尾望我一眼,然後又望住幅...“夜幕之下的黃金海岸的明月倒照”油畫。

『我...我...冇...係呢...呢幅油畫合眼緣?』我都望住幅“夜幕之下的黃金海岸的明月倒照”...

「OK咁啦~不過太大幅啦~冇位擺~」梓翹擰擰頭後,又繼續行。

『咁就真係可惜~不過俾著係阿月...只要係合眼緣,冇位都要買返去~』阿月就係咁㗎喇~鍾意嘅嘢就要得到~要做嘅嘢就要做到~

「阿月?」梓翹打量我一眼。

『嗯~我...我女朋友...』阿月...我又想起你了...

「哦~嗰個...小妹妹~」梓翹偷偷笑,又點點頭。

『小妹妹?』邊個小妹妹吖?

「雨姐話你帶過一個可愛嘅女朋友仔去Today Coffee嘛~」梓翹古古惑惑咁打量住我。

『女朋友...仔...唔係吖唔係吖!嗰個唔係我女朋友嚟㗎!』一定係講緊羅羅啦!

「哦?唔係?」梓翹又疑惑咁打量住我。

『嗰個...真係唔係...點講好呢...雖...總之就一言難盡啦...』要講都唔知點講好...點樣遇到羅羅就已經唔講得啦...

「哦~一言難盡~」梓翹諗一諗,又偷偷笑。

『你諗緊乜吖?唔係你諗咁㗎!』唔好諗衰嘢得唔得呢?

「哦~我冇諗緊乜吖~」梓翹仲係偷偷笑。

『仲話冇...』擺明就係諗衰嘢啦...

「我諗緊乜唔緊要...啦...」梓翹突然面有難色...眉頭一皺。

『你...你冇嘢嘛?』梓翹塊面好似仲有啲青青地咁...

「冇...冇~呼~」梓翹撳住胸口...深吸呼一口,「我哋行...嗰邊睇睇好唔好吖?」

『哦...好好...』真係冇嘢?唔舒服要講㗎喎...

同梓翹行多兩步...穿過人群...

「咦?靚仔?」突然有把...年老嘅女人聲...向我哋呢邊傳過嚟...

我望望聲音嘅來源...

喺人群之間...我望到...

『占...卜師?!』

望住喺人群之間...向我招手嘅...占卜師...

『係占卜師...係占卜師!』我立即穿過人群!跑向占卜師攤檔!

占卜師一見到我走到埋去:「點吖靚仔?尋晚總算有驚無險嘛?」

『係吖係吖!總算唔死得啦!』

「呵呵呵~我係唔係占得好準呢?」占卜師沾沾自喜。

『係吖係吖!你真係好準呀!』我立即拉一拉住啱啱行到過嚟嘅梓翹!『佢真係好準㗎!真係準到爆呀!』

梓翹帶住微笑望咗占卜師一眼:「佢符碌姐~」

「嘩...呢位靚仔咁講嘢吖?」占卜師又帶住微笑望咗梓翹一眼。

『係囉係囉!真係唔到你唔信㗎!好鬼準㗎!』尋晚就係有破釜沉舟之決心!而家先起死回生咋!

占卜師打量住梓翹:「唔啱我幫你占個卜吖~」

『係咯係咯!占個吖!占個吖!』咁有緣遇到占卜師,梗係要占返個卜啦!

「唔使喇~唔使喇~唔阻你做生意喇~」梓翹一路揮住手,一路背住占卜師走。

『喂...喂!Sorry...Sorry...喂梓翹...』我就追返上梓翹身邊!

梓翹一路行,一路再望望四周嘅攤檔。

『喂...你唔係話冥冥中自有主宰㗎咩?』頭先先講完...

「嗯...」梓翹點點頭,「咁又點呢?」

『咁你應該信占卜呢樣嘢㗎!』占卜就係可以話你聽冥冥中會有啲乜嘢等緊你囉!

「咁...」梓翹諗咗一諗,「占卜都係一個...媒介嚟姐~」

媒...介?

「即係...」梓翹又諗咗一諗,「佢睇到啲嘢...再轉述返俾你聽...」

睇到啲嘢...再轉述...

「咁如果我都親眼睇到...仲使乜人哋去轉述?我去轉述返俾佢聽都得啦~」梓翹帶住微笑點點頭,望望攤檔裡面張木凳。

『親眼睇到?咁你直頭係先知啦~』

「啱吖啱吖~未卜先知吖嘛~」

同梓翹邊行邊睇邊吹水~

梓翹都好似仲未遇到合眼緣嘅嘢。

我呢...仲未搵到目標人物...

冇錯...我並冇忘記今次過嚟黃金海岸嘅目的,係要搵出目標人物。

我一直都有留意...望望四周...望望身邊嘅人...不論係買...定係賣...

每一個面孔我都有留意...留意有冇一個係我要搵嘅人...

之但係都已經差唔多行勻晒成個市集,都遇唔到個似樣啲...

應該話搵個靚女睇睇都冇...

究竟目標人物喺邊呢?

又會唔會真係喺呢度呢?

跟住梓翹身邊繼續留意四周...留意身邊嘅每一個人...上樓梯,上到平台...

有唔少MK仔食住煙,望風景。

咁鬼多金毛MK古惑仔...可唔可以搵條MK妹嚟睇睇吖?

2035年嘅香港,MK妹係唔係已經絕晒種㗎喇?

梓翹邊行邊拎部電話出嚟睇睇邊問:「都三點幾...係呢你肚唔肚餓吖?食唔食啲嘢吖?」

『食...食啲嘢?都好~』餓又唔算太嘅...係有少少囉...

「咁不如...去嗰間睇睇有乜食~」梓翹指一指前面間...酒吧?

呢間門外掛住塊木牌...仲有支酒嘅圖案...咪就係尋日同綽姿路過但冇入到去嗰間酒吧?!

『哦...哦...好好...』係酒吧...梓翹竟然想喺酒吧裡面食嘢...

梓翹就一直行,行到去酒吧門面,兩個MK佬身旁...一塊坐地木牌...

木牌上就寫咗啲...餐...都係一啲小食名...

兩個MK佬又睥一睥我哋之後,行開少少繼續食煙。

「唔...啱唔啱食?」梓翹望住塊Menu問問我意見。

『我...OK嘅...』其實我對食真係冇乜要求...綽姿嗰啲墜毀嘅UFO都食得落肚啦!仲有乜嘢唔食得呀?

「好喇咁入去啦~」梓翹就拉開木門行入酒吧。

跟住梓翹身邊行入酒吧,裡面唔算太多客人。

燈光都有啲暗...擺設同裝修大多都係以木製...傳統式...

真係估唔到...呢度都有啲咁有品味嘅酒吧...

更估唔到嘅係...

『估唔到酒吧咁早開門...』我跟住梓翹行...行去搵咗張...細圓檯坐。

細圓檯好高...張圓木凳都好高...

「嗯?呢啲酒吧餐廳差唔多係由朝做到晚...你好少嚟?」梓翹帶住微笑問問我。

『我?我...我去酒吧多數都係傾生意...』多數都係放咗工先走去酒吧同客傾生意...

仲要邊飲邊傾...

好多時飲完都未必傾得成...傾唔傾得成都係我埋單...

有得同肥豬腦細Claim?佢又借頭借路遲啲俾唔記得俾就唔使俾~

結果咪即係我貼錢返工囉~

唉...我有份飲㗎嘛~唯有咁樣安慰自己啦~

「傾生意?」梓翹一頭問號咁打量住我。

『係吖傾...』仆街喇...講錯嘢添...

點好呢...點兜好呢?!

「你...」梓翹皺一皺眉,「之前喺日本要同人傾生意㗎?」

『呃...係吖係吖~我之前喺日本工作時不時都要走去同啲客傾生意㗎...仲要傾到夜一夜㗎~』你講開日本...我就只好打蛇隨棍上啦!

「哦...咁你都幾叻㗎喎...」梓翹打量住我點點頭。

『叻乜鬼吖...啲低下層先要出去傾生意㗎姐...日本社畜係咁㗎...』風繼續吹...

「哦...咁都同香港差唔多姐...」梓翹邊諗邊點點頭...

『係吖係吖...全個世界都差唔多㗎喇...』啱㗎喇啱㗎喇...大趨勢係咁吹㗎喇...

「之但係...你應該接埋你細妹過去日本...總好過你過嚟香港...仲要喺特殊區裡面...」梓翹邊拎起份Menu,邊提起綽姿...

『邊...邊有咁易吖...』我就望望四周...唔敢正視梓翹...

我講大話唔係好叻㗎咋...

就喺我尷尷尬尬逃避梓翹之時...我望到Bar檯嗰邊...Bar檯入面...企咗一個...

我再望清楚啲...喺陰暗嘅燈光之下...呢個企喺Bar檯入面...抹緊酒杯...黑...灰色頭髮...紮住條馬尾仔...面上仲有粒...楊丞琳痣?!