《香港傭兵》: [Day 13－愛港愛國] PART 09
望住個企喺Bar檯入面抹緊酒杯...面上有粒楊丞琳痣嘅靚女...
雖然紮住馬尾...著住Bartender衫...但我都認得出...佢就係今次委託嘅目標人物！
竟然喺呢個時候...喺呢度...
『呃...係呢...我仲以為你只會飲咖啡...』我一邊好專心咁留意住目標人物...一邊好唔專心咁同梓翹傾計...
「我？我先冇咁Dry～」梓翹繼續睇份Menu。
『哦？係吖係吖？』估唔到...竟然係做Bartender...
「雖然話我又唔係好好酒嘅～但久唔久都會落酒吧食啲嘢～又飲幾杯咁～點吖想食乜吖？」梓翹隊咗份Menu過嚟。
『呃...我...』我掃視份Menu一眼，『炸魚枊...』
「嗯...」梓翹再望望份Menu，「咁想飲咩？」
『呃...忌廉溝鮮奶...』目標人物就搵到喇...跟住應該點做呢...
「嗯！」梓翹忍一忍笑就舉一舉手，「嗯～好～唔該～」
一個Waiter好快就行到嚟我哋面前：「係？想要啲乜？」
俾個Waiter阻一阻視線...睇唔到目標人物添...
「一份炸魚枊～一份羊架～一杯忌廉溝鮮奶同一杯...黑啤～」梓翹忍住笑咁點菜。
「嗯！好～請等等～」Waiter就行過去Bar檯，同目標人物講兩句...
然後目標人物望咗過嚟一眼！撳住個嘴仔笑一笑...
我立即撳住自己塊面！擰一擰塊面埋一邊！
嘩！唔好俾目標人物發現我留意住佢！
「係呢...你唔係話之前都會同客落酒吧傾嘢㗎咩？落到去都係飲忌廉溝鮮奶㗎？」梓翹半帶恥笑咁望望我。
『我...我唔係好慣日光日白飲酒嘅...』係我仲有嘢要做...唔方便姐...
「睇嚟...」梓翹帶住微笑打量住我，「你係一個受規管嘅人喎...」
『我...都係嘅...』其實有邊個唔係...
梓翹諗一諗：「甘心咩？」
甘...心？
『唔甘心...又可以點？』唔甘心...都做唔到啲乜㗎...
「冇諗過要...」梓翹又諗咗一諗，「反抗咩？」
『反抗？』點反抗？
「又或者...」梓翹又諗咗一諗，「嘗試去改變...」
『嘗試去改變...改變到咩？你都唔係唔知...都唔使我多講...我哋大家都生活喺特殊區...』我咁講...大家都明啦...
西貢獻命又好...天門都好...
結果有目共睹...
「黑啤～忌廉溝鮮奶...」Waiter忍住笑咁放低兩杯飲品。
梓翹摸住杯黑啤：「Check Point嚟姐...」
『吓？』Check咩Point？賽車Game嗰啲？
「孫中山起革命...」梓翹飲啖啤酒，「都唔係一次成功啦～」
『但而家個走向...注定失敗囉...』各懷鬼胎都算...西貢獻命直頭係背道而馳添啦...
「你又知注定失敗？」梓翹帶住微笑打量住我。
『咁你又知一定會成功？』我帶住疑惑咁打量住梓翹。
「因為我係先知囉～」梓翹飲啖啤酒。
『哈～先知～』我都飲啖忌廉溝鮮奶...『咁先知吖先知～幾時先會有救世主打救世人？』
如果話人喺困境嘅時候，就會走去問占卜卦...
咁咩情況之下先會祈求救世主打救世人？
感到絕望？
唔係啦～
係自己無能為力嘅時候...
假手於人吖嘛～
「救世主...」梓翹好認真咁打量住我...
做...做咩姐...咁樣望住人...怕羞㗎...
「你真係相信...真係會有救世主？」梓翹仲係好認真咁打量住我...
『唔信...救世主最後都只會變成新一代魔王...』冇人能夠抗拒絕對力量嘅誘惑...
縱使係你親手打敗...你都會想借呢種力量...變得更強大...
「啱吖啱吖...所以呢個世上冇救世主～將來亦唔會出現～」梓翹帶住微笑擰擰頭。
『啱吖啱吖～所以呢個世界要收皮喇～我哋都係乖乖成為惡魔嘅奴隸啦先知～』我用杯忌廉溝鮮奶敲一敲梓翹杯黑啤～
喺現實世界之中唔會有飛雲...
勇者亦都唔會鬥惡龍...
不善交際嘅毒撚傭兵絕對打唔贏冷靜高傲嘅左撇子...
世界早就落喺惡魔手中...
「炸魚柳...羊架～」Waiter望住我手上杯忌廉溝鮮奶，忍住笑咁放低兩碟食物。
「食嘢先啦～不甘心也要做奴隸的奴隸～」梓翹就拎起羊架放入口。
不甘心也要做奴隸...
係吖～我係～
絕大部份嘅香港人都係～
唔係做主人...就係做奴隷...
我嗰個年代已經係咁～只係...廿年後呢個制度更加堅固。
『咦喂～又幾好味喎！真係魚嚟㗎？』
「唔係魚會係乜？」
『魚柳喎...仲要炸完嚟...變晒樣啦～仲點認得出係唔係魚吖？』
「咁我呢舊羊架都應該唔係羊啦～」
『你有見過呢頭有羊咩？』
「唔係真係見到有羊先有羊架食㗎嘛？」
『嘩你咁講就唔啱喇...漢堡扒都冇漢堡啦...』
「係冇牛吖～」
『你都識講啦～』
同梓翹邊食邊吹水，我都有留意住目標人物。
我當然唔會忘記委託要我做嘅任務...
目標人物我就搵到...之後應該點做？
而家有梓翹喺身邊...做乜都唔方便...
目標人物冇乜異樣...
都係抹抹酒杯...有客人叫嘢飲，就幫客人斟嘢飲...調調酒...
同一般嘅Bartender冇乜分別...
究竟點解要捉佢呢？
「急急地～去個廁所先～等等我～」梓翹起一起身。
『哦哦...你慢慢啦...』我就繼續留意住目標人物。
等到梓翹行到入廁所...
目標人物抹完手上隻酒杯，掛返好之後，抹抹手就行入廁所。
係同梓翹同一個廁所！
你都知㗎啦！酒吧啲廁所都係男女共用㗎啦！
即係男嘅喺出面個尿兜屙緊，女嘅就入廁格裡面屙嗰隻呢！
咁...咁我又係唔係要...跟埋入去？
喺呢個Moment...
都係開咗個SPIRIT App撳完成先！
頭先冇機會...而家就要把握機會！
我立即開返個SPIRIT App撳完成！
一撳完之後，立即就彈出下一步！
下一步要做嘅係...跟隨及留意目標人物...等瓦解前來？！
咁係唔係即係叫我都入埋去吖？
之但係...個廁所咁細...一陣俾梓翹察覺到我有乜唔對路咁點算呢？
不過而家目標人物喺入面喎...唔跟入去又點叫跟住呢？唔跟住又點留意呢？
點解啲任務咁鬼難搞㗎？！
當我諗到頭到爆之時，梓翹都由廁所行返出嚟。
「個廁所真係好鬼細～」梓翹擰擰頭，坐返喺我身邊。
『呃...係吖？我...』正當我想話“我都去個廁所先”之時...
目標人物都由廁所行返出嚟。
「嗯？你...咩吖？」梓翹拎起件羊架咬兩啖，等緊我繼續講。
『我...冇～我想話夠唔夠食？使唔使再嗌啲小食咋嘛～』本來仲想話走入去廁所睇睇...
享受一下同個靚女共處一個廁所...
就算睇唔到...聽聲FF一下都好吖...
估唔到咁快就行返出嚟...
唉...這些機會...從來都不是屬於我的...
「都好吖～叫啲薯條好嘛？」梓翹問問我意見。
『哦...好好～』我都係留意返目標人物...
「唔該～俾多份薯條～」
繼續好唔專心咁同梓翹邊食邊傾，又好專心咁留意住目標人物嘅一舉一動。
目標人物都係喺Bar檯入面抹杯...調酒...抹杯...調酒...抹檯...調酒...抹杯...抹杯...抹杯...
並冇異樣...
至於梓翹...叫多兩杯黑啤飲多兩杯...
「都差唔多喇...」梓翹拎部電話出嚟睇睇。
『嗯？』差唔多咩吖？
太留意目標人物...都冇聽到頭先梓翹講緊乜...
「我差唔多要走喇...差唔多係時候要返去～」梓翹袋返好部電話。
『哦...要返去喇？』而家幾點？其實我都唔係好知...
感覺好似...過咗兩個幾鐘...
「嗯～你呢？你走未吖？」梓翹問一問我。
『我...我仲想坐多陣先...呢餐等我請啦～』我仲要...留意住目標人物...
「喂咁多謝晒喇喎～」梓翹起身拍一拍我手臂。
『唔多謝...下次見啦～』
「嗯～下次見～」
一邊同梓翹揮手，一邊目送佢出門口。
又得返我一個...留意目標人物...
『唔該...俾多杯忌廉溝鮮奶～』
繼續留意住目標人物嘅一舉一動...拎部電話出嚟睇睇...都差唔多七點...
酒吧都開始多人...
之但係...綽姿仲未嚟...
究竟綽姿幾時先到㗎？
至於喺酒吧裡面嘅客人...差唔多全部都係金毛仔...MK仔...古惑仔...
個個都圍爐取暖咁...細細聲咁講...鬼鬼祟祟咁望...
我而家就唔理得佢哋咁多...繼續留意住目標人物...
就喺我仲被目標人物嘅美色吸引住之時...
電話震震...
我立即拎部電話出嚟睇睇...係綽姿！
『喂？你喺邊吖？幾時過嚟㗎？』我已經等到好心急喇！
「目標人物仲喺你附近？」綽姿把冷淡聲線就由電話傳嚟。
『係！我仲望住佢！』佢又喺度調緊酒！
「你聽住，八點嘅時候就精神化。我會喺正八點由正門入嚟。」
『八...點...你又知我喺邊？』
「你撳完成嘅時候就同時開啟追蹤功能...係唔係仲要問？」
『唔係...唔係...咁...』我都仲未講完...
「唔係就唔好咁啦。記得八點...係咁。」綽姿就Cut咗線。
我...我都係想問喺邊度精神化姐...
冇理由坐喺呢度就咁除褸笠帽拉起衫領咁揚㗎嘛？
八點...仲有唔夠一個鐘...
如果話目標人物突然走咗去咁點？
我應該跟住目標人物...綽姿自然會識得跟住個追蹤搵我...
呢啲嘢我就應該唔使擔心咁多嘅...
我而家應該要...繼續留意住目標人物...準備好八點嘅來臨...
時間一分一秒咁過...
目標人物都係冇乜異樣...酒吧裡面亦都冇乜異樣...
而我就再細心觀察...酒吧除咗正門...仲只有一個後門...
後門喺正廁所隔離...
如果話綽姿由正門入嚟...目標人物想由後門逃走...
我諗...差唔多喇...
我飲晒最後一啖忌廉溝鮮奶，起身行去廁所。
入到廁所確定廁格冇人，就鎖埋度廁所門。
喺褸袋拎返支Level 2精神液出嚟...除低件褸...
望一望鏡中嘅自己...
望一望左手中嘅Level 2精神液...
望一望右手中嘅電話...
差唔多喇...差唔多到約定時間...
差唔多喇...差唔多係時候喇！
我用力一捏支Level 2精神液！
我望住鏡中...左手中有如紅水晶般嘅Level 2精神液立即粉碎！分散成紅色嘅粒子！
無數發住紅光嘅紅色粒子就喺我左手手掌中飄出！飄到去手背！
手背上…倒轉咗嘅五角星！發出紅光！
寒意由手背傳遍手掌…傳到手臂…全身！
當道寒意游到上頭之時…
「救...救我出去...」我又聽到喇...
「救命...我唔想死...我唔想死喺呢度...」我又聽到女仔嘅...求救聲...
「點解會...好凍...係咩嚟㗎？我而家喺邊呀？」又係咁...每次用精神液...都會...
「係...係SPIRIT呀！！！」呢把聲...係由出面出嚟！
係...係綽姿...綽姿嚟咗？！