《香港傭兵》: [Day 14－紅色警戒] PART 05
望住鏡中嘅我同綽姿...好似情侶一樣...
NO！！！！！！頂多都係叫兄妹！！！
打死我都唔認...打死我都唔認我同綽姿有情侶Feel...
我有月月㗎喇嘛！點可能同其他女仔有情侶Feel呀？！
思想出軌都係出軌呀！！！
「點吖你？OK喇嘛？OK就俾錢喇。」綽姿冷眼望一望鏡中嘅我之後，就行去櫃檯前，搵返大肥婆老闆娘，「呢兩件褸幾錢？」
「呢兩件吖...」大肥婆老闆娘望一望綽姿身上件黑色毛毛大褸，又望一望我身上件黑色毛毛大褸...
OK？真係OK？
O唔OK都好，綽姿都已經俾完錢...「行。」向住門口方向行過去。
『哦哦...』我都不敢怠慢，跟喺綽姿身後。
「多啲嚟幫襯喇～唔死得嘅話...嗚呀～～～」
同綽姿落返樓，街上多返啲人。
幾個男男女女喺面前行過...都係同我差唔多年紀，廿幾歲嘅年青人。
睇嚟唔似係返工，似係嚟行街街。
然後又有啲貨車駛過...泊埋一邊落貨。
運輸呢行真係冇得輸...咩年代咩時候都總有工開...
『呃...多謝喎...』我望住綽姿指指身上件黑色毛毛大褸。
禮貌上都要講聲多謝～
「多咩謝？」綽姿冷眼望住我，「喺生活費扣返㗎。」
『吓？』生活費？生咩活費吖？
「你唔係以為白飲白食白住白著嘛？」綽姿再冷眼打量我一眼，然後雙手插住褸袋向前行。
吓？唔係一直都係白飲白食白住白著㗎咩？
咪住先...咁即係話...平時扣起嘅報酬...係生活費？！
『嘩...咁啲生活費都幾甘喎...』我都跟住喺綽姿身邊行。
「甘？計平咗你啦。」綽姿邊行邊冷眼打量住我。
『哦...咁就係多謝晒喇...』咁都叫計平咗...
食好多咩？飲好多咩？唔係炭就係過期...
住又住舊唐樓...
底褲都唔見你買條俾我啦...
仲話計平咗...
『係呢...跟住我哋應該點做？』都係唔好理咁多喇...Focus返落今次個委託好過啦。
「老闆娘都話早幾日喺呢邊有黃傘出現嘅情報...仲要話好似好大件事...就喺呢頭行陣，睇睇有乜情報收集。」綽姿眼仔碌碌咁左望望，右望望。
『哦哦...好好...』早幾日...好似好大件事...
都真係幾大件事...
情報所指嘅早幾日...應該就係我過咗嚟呢頭嗰日...
黃傘出現...就係馬尾黃傘女...
大件事就係咁啱目標人物被黃傘捉走...仲要死咗三個...國安局嘅人...
黃傘...國安局...目標人物...
目標人物應該係國安局嘅人...但俾黃傘捉走咗...
好衰唔衰俾我遇到...國安局救唔返人都唔止，仲要死咗三個人...
咁成件事算唔算係因我而起？！
就算唔係因我而起...都算係同我有莫大關係...
同我有莫大關係...咁又點呢？
車～其實都冇乜所謂啦～
而家又唔係國安局要嚟追討賠償～
而家都係...委託我哋去搵返目標人物咋嘛～
係咯～係國安局委託我哋...由黃傘手中救返目標人物出嚟...
又要幫政府部門辦事...
又要打壓義士...
雖然我唔清楚黃傘力量嘅背景...唔知佢哋係唔係真心為民主...為香港...
之但係又要幫政府部門辦事就係唔撚甘心情願！！！
「點吖？你諗咁耐，係唔係有乜頭緒？」綽姿邊行邊打量住我。
『我？我...我...我冇吖～冇冇...邊會有頭緒呢？』我都係唔可以俾綽姿知道...知道啲我知而佢唔知嘅情報...
我唔想綽姿大開殺戒...我唔想有太多無辜嘅人死...
「哦...係吖...」綽姿又望望四周，留意周圍嘅情況。
『呃...不如去嗰邊睇睇～』我就指指對面街！企圖打消綽姿想行入後巷嘅念頭。
唔好入後巷...千萬唔好入後巷...
一陣入後巷行幾轉，唔覺意行咗去事發現場...話唔定會俾綽姿發現到啲乜...
「嗯。」綽姿點點頭，望住我指住嘅方向行。
喂又估唔到喎～估唔到會咁聽我講～咁順利喎～
我就同綽姿喺大街上行！視察大街上嘅舖頭！
『呃...不如行入去睇睇...』我又指指女人街...
「嗯。」綽姿又點點頭，行入有唔少檔主正開緊檔嘅女人街。
女人街嘅變化都幾大...
啲檔口新穎咗但細咗...條路都闊咗...
不過賣啲嘢都係立立雜雜...
綽姿一邊行，一邊留意左右兩邊嘅檔口...
女人街...應該就冇乜異樣嘅...
然後就風平浪靜咁行完成條女人街...
『呃...好似冇乜發現...不如我哋行去嗰邊睇睇...』我又指去另一邊...
「嗯。」綽姿又點點頭，望住我指住嘅方向行。
又會咁聽話嘅？
我就唔理得咁多，繼續跟住綽姿行！
『呃...不如去嗰邊睇睇...』又指東指西...
「嗯。」綽姿又聽聽話話咁跟住我指嘅方向遊花園。
一直遊...喺旺角...太子...兩邊四圍遊...
一直都係離遠九龍寨城方向咁遊...
唔可以向九龍寨城方向行過去...指都唔可以指嗰邊！
一定唔可以俾綽姿發現...九龍寨城有黃傘嘅基地！
同綽姿繼續遊旺角...太子...不停咁遊咗好多轉...
之但係...咁遊法都唔係辦法...
可以阻止到綽姿姐...阻止唔到其他行者㗎嘛！
冇錯呀！個委託仲有咁多行者參與...萬一俾佢哋捷足先登...
「再咁搵落去都唔係辦法...行咗咁耐都冇頭緒...一定會俾其他人捷足先登...」連綽姿都諗到...
佢梗係諗到啦！我都諗到綽姿又點會諗唔到先得㗎？！
『咁...咁點好呢？』點先可以...單獨過去九龍寨城呢？
冇錯！其實我一直都搵緊機會使開綽姿，單獨過去黃傘基地！
我一個去嘅話...就可以減少無辜嘅死傷...
只要唔遇上逆行者...
「咁啦...我哋分頭行動。」綽姿突然講出...最利我嘅方法！
分頭行動...估唔到綽姿會主動提出最利我嘅方法...
「我哋分頭行動，或者仲有機會快過其他行者搵到目標人物...」綽姿企定定，左望望，右望望，望望街上越嚟越多人。
快過其他行者...
如果其他行者唔知道黃傘力量嘅基地喺邊嘅話...
又或者黃傘力量唔只得一個基地...而目標人物仲喺九龍寨城嗰個基地...而其他行者又唔知有嗰個基地...
咁分頭行動...我就一定快過其他行者...快過綽姿搵到目標人物！
『好！一於分頭行動！』最利我嘅方法！
「你真係掂㗎嘛？」綽姿打量住我。
『掂！咩唔掂？你要相信我先得㗎嘛！』你要相信我！
「嗯...咁你要自己小心。」綽姿搭一搭我膊頭，「萬一真係遇到逆行者嘅話，第一時間逃走。」
『嗯嗯...一定...一定...』放心啦...遇過逆行者幾次都知咩料啦...
俾我再遇到，老閪都第一時間走！
「咁好喇，我行呢邊。」綽姿指指佐敦方向。
『嗯嗯...你都小心...』綽姿向佐敦方向...
「我使你教？記得逃走。」綽姿就轉身邊行邊背住我揮揮手。
『嗯...』望住綽姿越行越遠...
望住綽姿嘅背影行入人群之中...消失於人群之中...
綽姿走咗...我都要盡快趕過去九龍寨城...趕過去黃傘力量嘅基地！
我立即行近馬路邊，隨手Fing幾Fing！睇睇有冇的士駛埋嚟！
馬路上唔算多車，但有幾架紅的駛過！
我再Fing多幾Fing，就有架紅的打住死火燈咁駛埋嚟！
我都未等到架的士停定，就趕住開門衝上車：『九龍寨城！』
「九龍寨城咁大，邊度先得㗎？」的士司機邊落旗邊問。
『你一去到九龍寨城就停俾我落車啦！』醒少少啦死人的士佬！
「而家啲西客真係惡過馬撚...」的士佬一邊口噏噏，一邊開車。
嘩...講西又點夠你哋啲的士佬西？講惡又點夠你哋啲的士佬惡？
“吱！”的士佬踩盡油咁衝過幾個街口！
見就快轉燈就再踩得盡啲！
見前面架私家車開得慢又爬佢頭！
“吱！吱～”一路風馳電掣！喺馬路上左穿右插！
好快就嚟到九龍寨城！
“依！”的士停定喺路邊...
「齊頭八十蚊啦！」的士佬隊咗部機仔過嚟！
『齊頭八十？七十五個幾咋喎！點齊頭呀？』唔好話齊頭八十，旺角搭程的士過嚟都要成七十幾蚊咁撚貴㗎咩？！
「四捨五入呀嘛！第一次搭的士呀？」的士佬仲要唔好老脾咁望住我！好似要我快啲俾錢唔好阻鳩住佢做生意。
『係吖...第一次搭咁貴嘅的士呀...』我就拎部電話出嚟...
“嘟叮～”
「搭唔起就咪撚搭啦...而家啲客真係西...」我落緊車嘅同時，個的士佬仲要口噏噏...
我一個反手大大力咁車落度門！
“啪！”成架的士都震幾震！
的士佬立即擰轉頭望過嚟！
屌你老母死人的士佬...望咩吖望？望吖...再望吖喇...你再望吖喇...再望我就將你架的士斬成碎件！
“吱！”的士佬舉住中指咁開車離開！
『屌你老母走遲兩步睇吓我斬唔斬撚死你！』死人的士佬！
好好好！唔好再俾無聊嘢影響！
而家要...走過去黃傘力量個基地！
我左望望！右望望！係...嗰邊！
我認得㗎！我認得路㗎！我認得座工業大廈喺邊㗎！！！
我立即向住座工業大廈方向跑過上！
跑過幾個街口！無視紅公仔橫過幾條馬路！
『嗄...嗄...』我跑到嚟工業大廈面前...抖兩啖大氣...
點呢？應該點做好呢？
黃傘嘅基地就喺我面前...
我應該點做先啱呢？
現實就係同RPG Game唔同...
唔係話去到某個地方同某個NPC對話完就有下一步指示...
或者去到某個情節就俾你揀潛入定武力突入...
現實係...當中並冇任何選擇方塊...
而家我...應該就咁行入去？
以普通人...血肉之軀...就咁行入去查探？
咁樣會唔會太危險？
雖然話唔知黃傘班人有乜武器...但至少佢哋有槍...
馬尾黃傘女係用槍脅持目標人物...
就算係手槍...以我呢種平凡人嚟講，已經搞佢唔掂...
咁好唔好用精神液...精神化咗先？
但萬一目標人物唔喺裡面...又或者裡面有逆行者？
萬一目標人物唔喺裡面，我就一定冇辦法完成到委託...
因為一個鐘後，我就會進入深層睡眠...
而如果裡面已經有逆行者駐守...我直頭會俾佢哋感應到我嘅存在！
精神化期間嘅氣息...
莫講話偶然或者必然...我相信求其一個逆行者都可以離遠感應到我嘅氣息...
我仲未識得...好好控制氣息...
真係越做行者得耐，越覺得好多制肘...
衡量過之後...好似都係唔好用精神液住會比較冇咁易死...
最多我而家雙手插定褸袋，揸住支精神液...
萬一真係遇到黃傘力量嘅人用槍指住我，我就立即捏支精神液，精神化！
好啦！計劃好就行動啦！
我就橫過馬路，行入工業大廈！
一入到去就睇睇水牌...都有唔少公司。
啲公司睇落都唔係做工業生意...全部都係做零售賣嘢...War Game場...密室逃脫...又或者...Party Room？
當然就唔會有“黃傘基地”咁明目張膽啦～
咁點搵呀？成座工業大廈咁鬼大！
就喺我望住個水牌頭都大埋都唔知由邊度搵起好之時...我眼眉見到身邊...有個好似鬼鬼祟祟咁嘅身影企喺身邊...
我望清楚...呢個戴住頂帽...紮住馬尾...斯斯縮縮咁嘅...女仔...之唔係就係...黃傘馬尾女？！