《香港傭兵》: [Day 14－紅色警戒] PART 12

係片翼...片翼嘅氣息...喺車頭...

頭先睇過咁多隊...裡面都冇片翼個名...

唔通...今次帶隊嘅...又係片翼？！

點解又係片翼...

係片翼嘅話...強迫委託唔係特殊就係極危險！



而家有咁多人參與...仲要有咁多先行者做隊長...好明顯又特殊又極危險啦！！！

何必偏偏又選中我吖？

我只係一個隨行者...

仲要係唔稱職㗎屌你老母！！！

成車人裡面，有唔少都面青青咁...



應該係因為...感覺到片翼既強大且霸道嘅氣息而畏懼...

就好似我身邊嗰兩個枯竭同盛況咁...就連個身都震埋！

而仲可以保持冷靜嘅...應該就係先行者...又或者曾經見過片翼...

就好似身邊嘅綽姿...仲有羅羅...

綽姿就唔使講啦...羅羅都有見過片翼？



係幾時？又喺咩情況之下？

“吱～”貨車繼續向住未知方向行駛...

驚訝嘅人都開始冷靜落嚟...而本來已經冷靜嘅人就繼續冷靜...

再過多一陣，大家都將身上件大褸除落嚟...

有過經驗嘅我都跟住大家除褸...笠起頂帽...拉高衫領...

究竟我哋要去邊呢？

究竟要做啲乜呢？

“吱～吱...依！”貨車開始停落嚟...停低...



到喇...到咗喇...究竟係邊度？！

“咔！”車尾大門隨即揭開！

我就跟住成車人落車！

一踏出貨車外...呢度係...

喺夜幕之下...馬路之上...冇其他車輛...就只停泊屬於我哋SPIRIT嘅黑色巨型貨車...

街燈都好光猛...仲有唔少交通燈...

就係冇車又冇人...



而望遠多少少...有唔少建築物...

而其中一座建築物牆身仲有幾粒字寫住...Hong...Kong...Sci...

『香港科學園？！』竟然係...

點會係...香港科學園？！

咁大班人嚟科學園做乜吖？參觀呀？！

咪撚玩啦！

定係嚟...搶劫高科技產品呀？！

都咪撚玩啦！香港有高科技產品研究到出嚟㗎咩？！



咁究竟我哋咁大班人嚟呢度做咩吖？

只見一大班著住黑色行者長袍...笠住頂帽...面容暗黑...散發住紅色粒子嘅身影...向住同一個方向行...行前幾步...望住同一個方向...

我都跟住綽姿同羅羅身後...行前幾步...望住科學園入口方向...望住企喺前面嘅高大背影...

呢個身上散發住鮮紅色粒子...強大且極霸道氣息嘅高大背影...係片翼！

片翼充滿霸氣咁企喺科學園入口視察...

我都偷偷望...望向科學園...裡面好似...黑漆漆咁...

的確...就連建築物裡面都冇一間房著燈...



係唔係收晒工喇？定係放假冇人返吖？

一定係環保撚作怪啦！非上班時間冇人工作就全面熄燈！

慳電又慳錢吖嘛～

「今次嘅委託...」片翼突然開口！「係要調查科學園...」

調查...科學園？

咁要調查啲乜呢？

片翼繼續背住我哋講：「將你哋調查到嘅異常情況...上載到今次嘅委託之中...」

異常情況？點為之異常？

我聽到咁講都覺得好異常喇喎～咁係唔係都要上載到委託之中吖？

片翼再繼續講：「再有下步指示會發送更新任務俾你哋...開始行動。」

片翼一講完，在場嘅行者都以五個五個咁進入科學園！四散！

等到差唔多所有人都入晒科學園...背影都見唔到...羅羅都開始向住科學園入口行過去...與片翼擦身而過...

我同綽姿...仲有枯竭同盛況都擦過片翼身邊...

片翼係唔係留守喺呢度？

我哋入去又要調查啲乜？

冇目標冇方向淨係話異常情況...好難搞㗎喎...

就喺呢個時候，綽姿拎部電話出嚟撳：「開掃描。」

開掃描？

枯竭同盛況都立即拎部電話出嚟邊撳邊行。

哦哦...開掃描...開掃描...

開完掃描之後，繼續跟住羅羅...留意四周咁行入科學園...

的確...有啲奇怪...

入到嚟...真係連一盞燈都冇著！

我哋只可以靠月亮嘅光...同提升視力觀察四周...

而家係唔係真係要咁環保吖？

沿住條路一直行...黑漆漆嘅建築物...黑漆漆嘅街道...

黑漆漆...所有都係黑漆漆...就好似置身喺死寂嘅空間之中...真係周身唔自在...

但除咗話黑漆漆...一個人都冇...又冇其他異樣...

而其他行者又去咗邊？

佢哋又調查到啲乜呢？

就喺呢個時候...

「枯竭，睇其他隊伍有冇發現到啲乜。」行喺前面嘅羅羅向枯竭發出命令！

「係。」枯竭立即拎出電話，「冇。冇任何更新。」

「嗯。繼續留意。」羅羅繼續行。

「係。」枯竭就繼續留意電話。

嘩嘩嘩...呢個簡單嘅舉動，都令我覺得羅羅比起綽姿更有領導能力！（綽姿淨係識殺人㗎姐～）

真係估唔到...充滿少女Feel嘅羅羅...原來係咁...

突然！羅羅停一停低！

同時！綽姿同羅羅擰個頭...望住右邊方向！

右...右邊？有啲乜呢？

我都跟住佢哋兩個望向右邊...係通去...

羅羅同綽姿向住右邊方向行...繼續行...

我哋一行五人繼續行...差唔多行到嚟科學園嘅“金蛋”附近...

“嗡！嗡！”羅羅同綽姿突然喺腰間拔出精神刀...亮出刺眼嘅紅光刀刃！

做...做咩吖？做咩咁突然吖？

只見羅羅同綽姿慢慢行近“金蛋”...

再跟住羅羅同綽姿行近啲...睇清楚啲...

好似見到...隱約見到...金蛋下面...好似有個...身影...趴...趴咗喺度？

我哋一行五人再行近啲...向住金蛋方向再行得近啲...

“嘶...嘶...”向住趴喺度...邊震...邊發出“嘶嘶”聲嘅身影...接近...

搞乜吖？係咩...人吖？

當我哋再行近啲...我就望到...喺金蛋嘅黑影之間...有個著住...白色...好似仲染有...紅色...血紅色長袍嘅身影...趴喺地上...趴喺...

“嘶...嘶...嘶嘶...”呢個身影仲係邊震...個頭又Fing兩Fing...

當我哋都差唔多行到埋去舊金蛋之時...羅羅同綽姿都停下腳步！

羅羅同綽姿都緊握住精神刀！

喺刺眼嘅紅光刀刃照射之下...我再探頭睇清楚啲...我見到係一個...背影...趴喺...

我再踏前一步：『請問...』

同時！羅羅同綽姿攔住我！

背影慢慢咁擰個頭過嚟...回望我哋...

我就見到...披頭散髮...一張呆呆滯滯嘅少女面孔...滿嘴...鮮血？！

我再望清楚...望清楚地上...個少女係趴喺一件...屍體上？！

雖然睇得唔算太清楚...但的確係一具冇咗雙手...對腳仲要斷斷地...著住裝甲嘅屍體！！！

滿口鮮血少女呆望住我哋...隻手就捉住屍體個頭...Chok兩Chok...擰兩擰...一手就扯甩個死人頭！！！

大量鮮血由頸骨流出！

滿口鮮血少女仲要咬死人頭塊面...咬甩個鼻！

好撚血腥...點解會...咁撚血腥？！

滿口鮮血少女突然全身震震...頭擰擰...

「嗚...嗚...」滿口鮮血少女全身上上下下都震...震...抽搐！

呢種...呢種情況...

「嗚...嗚...呀...」滿口鮮血少女全身上上下下不停抽搐... 抽搐！

呢種情況...咁似...

「嗚...嗚！呀！呀！嗚呀！！！」突然滿口鮮血少女一聲大嗌！雙眼發出刺眼紅光！同時身上爆出大量紅色粒子！

係！係爆出！又係爆出！就好似今日下午...感覺到有極大嘅衝擊力不斷衝埋嚟！

係氣息...好強大嘅氣息！！！

「呀！呀！嗚呀！！！」少女雙手亮出刺眼紅光利爪...雙眼發出紅光就衝埋嚟！

好...好快！

話都冇咁快，一步就衝到埋嚟！

羅羅同綽姿立即用精神刀刃一擋！

“吱！！！”大量紅色粒子就由紅光雙爪與紅光刀刃之間擦出！

好似今日下午...好似下午嘅目標人物！

枯竭同盛況立即跑到少女身後...

“嗡！嗡！”以拔刀姿態從後斬落少女後頸！

“吱！吱！”但亦都係一樣斬唔入...就只有大量紅色粒子飄出！

又斬唔入...

我都唔可以再食花生...

“嗡！”我立即拔出精神刀！亮出紅光精神刀刃！以牙突姿態直刺向少女胸口！！！

“吱！”紅光刀刃一刺埋去...少女胸口就有個...紅色嘅...六角形...好似絕對領域咁嘅力場擋住咗！！！

刺唔入...仲...仲有好大...好大阻力！

刀震震...手震震...我好似揸唔穩...控制唔到把精神刀！

「嗚...嗚...嗚呀！！！」突然少女大叫一聲！

大量紅色粒子由少女身上散出！同時有股極大衝擊力將我哋五個彈開！

羅羅同綽姿左右彈開！同時站穩陣腳！

枯竭同盛況都同時喺地上碌咗個圈！企返起身擺返個防禦姿勢！

而我就躺喺地上滑行幾米！

痴線...痴線㗎！

係點樣做到？

點解可以由身體爆發出咁強大嘅衝擊力？！

正當我想企返起身之時，原來少女已經衝到埋嚟我面前！

「嗚呀！」少女右手一爪！

我立即用精神刀刃擋住！

“吱！！！”之但係...好似唔係好擋得住！紅光刀刃頓時被刺眼紅光利爪截斷三分之二！

痴線...能量大到...

「嗚呀！」少女正想用左手一爪之時...

我立即向後退幾步！嘗試拉開距離！

「嗚...嗚！」但少女立即追上！

好快...好敏捷！

就喺少女快要向我再施以紅光利爪之時...

“吱！”羅羅及時喺我面前幫我擋住！再向少女斬咗幾刀！

但呢幾刀都係斬唔入！最多只可以令少女退後幾步！

綽姿見有空檔，就從少女背後斬咗幾刀！

只見少女背後閃出絕對領域！將綽姿嘅攻擊完全擋住！

咩料吖...使徒呀？！

綽姿見斬唔入，就同少女保持一定距離！擺出防禦姿勢！

而家我哋五個人...就以五角星咁...圍住少女...

「嗄...嗚...嗚...嗄...」全身散發住紅色粒子嘅少女雙手垂低...震吓震吓...好似...喪屍咁...

真係...佢而家個款...同俾人嘅感覺...真係十足十成隻喪屍咁...

點解會咁㗎...

點解科學園會有喪屍㗎？！

少女對紅光雙眼又望住我...

點解吖...點解又係盯住我㗎...

話口未完...

「嗄...嗚...嗚...嗚呀！」少女又發晒癲咁衝埋嚟！

點解又係我呀？！

羅羅同綽姿立即一左一右咁夾擊少女！

羅羅左一刀...綽姿右一刀...

“嗡！嗡！吱吱！嗡！吱！嗡！吱！吱！”少女左擋右爪左右亂爪亂擋！

紅光閃過不停！紅色粒子不斷散出！

我、枯竭同盛況亦都向住少女身上亂斬亂砍！！！

“嗡！吱吱！嗡 嗡！！吱！嗡！吱！吱！”但點斬點砍都係唔入肉！

我砍唔入唔出奇...之但係連羅羅都...

“嗡！吱吱！嗡嗡！”羅羅再斬多兩刀...

唔係喎...好似...

“吱！嗡！吱！嗡嗡！”綽姿再砍多兩刀...

好似...少女嘅身上...染滿鮮血嘅白色長袍好似...被斬破！

“嗡！嗡！吱！吱！嗡嗡！”冇錯！羅羅把紅光刀刃...同綽姿把紅光刀刃都...都斬得入！

圍住少女身上又斬又砍...開始入到肉！

少女身上開始出現刀傷...飄出大量紅色粒子！

唔止...少女面上...仲出現...裂紋！

「嗚...嗚呀...嗚呀呀呀！」裂紋越嚟越多...透出紅光...飄出紅色粒子！

少女雙爪向我一揮！我立即用刀刃一擋！羅羅同綽姿同時斬落少女雙手！

「嗚... 嗚... 嗚呀呀呀！」少女一對前臂隨即斷開！化為無數紅色粒子喺空氣中飄散！

羅羅同綽姿乘勝追擊！一左一右斬斷少女條頸！

少女嘅頭顱飛到半空中...化為無數嘅紅色粒子...飄散...

而少女嘅身體就抽搐...抽搐...亦慢慢化為無數嘅紅色粒子...飄散...

整個空間都被無數紅色粒子包圍...慢慢飄散...漸漸消失...