《香港傭兵》: [Day 14－紅色警戒] PART 15
喺雜亂嘅氣息之中戒備咗一陣...
『而家我哋應該...點做？』損失咗兩名成員...得返我哋三個...
羅羅拎部電話出嚟望一望：「繼續搜索～」
『繼續搜索？！』唔係吖化...得返我哋三個咋喎！
「嗯～」羅羅點點頭，「任務冇更新過～都係滅絕異常生命體～」
『但係得返我哋三個...好難搞喎！不如真係去搵搵其他Team先啦！』而家得返我哋三個，有乜事一定係搵我嚟擋㗎啦！
我唔想成為下一個犧牲品囉！
綽姿再望望四周：「先唔好話仲係感應唔到其他行者嘅氣息...你覺得我哋同其他Team匯合，唔會俾佢哋利用咩？」
同其他Team匯合...會俾佢哋利用？
係喎！其他行者...甚至先行者都會利用我...
「果然冇諗過...真係好弱。」綽姿冇我咁好氣。
「你唔好咁話佢啦～咁咪幾可愛～」
「可愛係好易冇命。」
「佢而家咪又係生勾勾～」
「而家同你一齊行動，應該唔會生勾勾得幾耐。」
「你講到我成個恐怖魔女咁㗎～」
「你係。」
點解我仲係咁天真...
點解我仲係咁相信人？！
明明就係互相利用...互相出賣！
喺呢個殘酷嘅社會生存咗咁多年都仲唔知咩？
人類呢種生物極醜惡！
點解我仲要對人類存有一絲絲希望？！
「損失兩條廢柴姐～」羅羅唔緊唔緊咁～「影響唔大嘅～吞噬～你睇地圖～」
『哦...哦...』我睇地圖...
我就拎部電話出嚟打返開個SPIRIT App...開個掃描出嚟睇睇...
點睇呢...應該留意啲乜呢？
只見個平面圖都唔係好大幅...之但係行過嘅地方就掃到...未行過嘅又唔係掃得好多...
「你旨意佢？」綽姿冷冷放下一句。
「冇所謂啦～都係亂行㗎啦～只要唔係兜圈圈～」羅羅又唔緊唔緊咁～
「你真係太低估佢嘅弱。」綽姿又冷冷放下一句。
綽姿呢句又真吖...
我呢啲路痴，睇住幅地圖行都可以迷路㗎啦～
「好啦～都差唔多喇～我哋應該向邊個方向行呢？」羅羅又真係問我㗎喎～
『呃...呢度行返出去...轉左先...』我就望住幅地圖...
啱㗎喇...啱㗎喇...嗰邊未行過嘅...
「嗯～好啦～」羅羅就跟住我講嘅方向行～
而家我哋嗰Team，得返我哋三個...
我一邊望住部電話...一邊行...一直掃出未行過嘅地方...
一路上都係以玻璃幕牆間開嘅研究室...
「然後呢？」羅羅邊行邊問～
『呃呃...再繼續直行...』其實我都唔係好知...直行應該冇錯掛...
行多兩步...
「嗚呀呀呀呀呀！！！」又聽到異常生命體大嗌！
我哋都停一停低...留意四周！
唔知喺邊個方向傳過嚟...不過應該都好遠...
停留咗一陣，再繼續行...穿過一道被爪爛嘅大閘門，行到過嚟另一個區域。
呢邊其實同頭先行過嘅都唔算有好大分別...都係以玻璃幕牆間開一間間研究室。
分別在於...呢邊有燈閃...仲有水由天花噴出...
喺淡淡嘅紅色空間之中，唔知係黃定紅色嘅燈閃燦閃燦...天花上嘅灑水系統不停噴水...
“㗳...㗳...㗳...”我哋三個一步一步...慢慢咁喺濕滑嘅地面上行...
行唔夠幾步，就見到有啲火光...
其中一間以玻璃幕牆間開嘅研究室仲著緊火...灑水系統未能完全將火撲滅。
唔止一間...仲有幾間...
“㗳...㗳...㗳...”再行得入啲...仲有好幾間仲著緊火...
隱若仲聞到...燒肉味？
呢種燒肉味既熟識...又陌生...
就好似...去牛角食燒肉...但仲要香啲...
喺邊度傳嚟㗎呢？邊個喺研究室食燒肉咁有品味？
“㗳...㗳...㗳...”當我哋再行入啲...沿住啲香味再行入啲...就見到其中一間研究室入面...有具著緊火嘅屍體趴喺檯上！
著緊火嘅屍體...啲燒肉香味...係由呢具著緊火嘅屍體發出嘅？！
『嘔！！！』諗諗都想嘔！！！
呢種比牛角更香嘅燒肉味...竟然係由燒著咗嘅人類屍體發出！！！
「你冇事嘛？」羅羅問問我。
『冇...冇...』話冇就假嘅...
「見到燒著嘅屍體都作嘔...真係好弱。」綽姿再望清楚具著住火嘅屍體。
嘩你真係講得輕鬆！
知唔知五觀六感之中，邊樣係最敏感？
唔係聽覺亦唔係視覺，係嗅覺呀！
嗅覺係最敏感！只要你聞過一次，下次再聞到就會立即記返起！
呢陣燒肉香味咁似牛角，以後再去食嘅話都會立即諗返起眼前具被火燒緊嘅屍體！
仲點食得落吖...
冇理到條屍仲要燒幾耐，綽姿再行前多兩步...我哋都再行前多幾步...
然後綽姿同羅羅都停低！
望住佢哋兩個嘅背影...都擺出戒備狀態！
我又八八卦卦咁探頭望一望...
我望到...有一間研究室入面...有個身影！
係一個著住染有血跡長袍...趴喺地上嘅異常生命體！
“嘶...嘶嘶...嘶嘶嘶...”異常生命體一邊震吓震吓...一邊發出“嘶嘶”聲！
喺度搞緊乜呢？究竟異常生命體喺度搞緊乜呢？
正所謂好奇害死貓～我又再八八卦卦探頭睇得再清楚啲...就發現異常生命體趴喺具屍體上...一啖咬落屍體條頸！
係...係食緊人？！
『嘔！』我又忍唔住想嘔！
就喺呢個時候，異常生命體望咗過嚟！
仆街喇！被發現添！
就喺綽姿同羅羅都拔出精神刀之時...我感覺到有股極強大嘅氣息喺附近！
我都未確定到正確嘅方向之前，就見到有一道極刺眼嘅紅光一閃！四十五度角打斜飛落異常生命體身上！
「嗚...呀...」異常生命體隨即化成無數紅色粒子！喺研究室中飛散！
然後...喺大量紅色粒子之中...隱約見到一個...手持刺眼紅光刀刃嘅身影...雙眼發出兩點紅光！
呢個身影...呢種強大壓迫嘅氣息...係先行者級數？！
身上被刺眼嘅紅色粒子包圍...手持刺眼紅光刀刃...同時散發出強大壓迫氣息嘅嬌小身影望住我哋...
氣息比起綽姿...甚至羅羅更霸道！
一定係...一定係先行者...
突然！紅光一閃！嬌小嘅身影閃咗去！
走...走咗...
動作快到...完全睇唔到佢走咗去邊！
「係可愛...」羅羅望住右邊通道。
『可愛？係先行者！』真係！冇估錯！
頭先睇委託嘅時候有留意過...可愛...係其中一Team嘅隊長...係先行者！
綽姿行近啱啱俾異常生命體食緊嗰具屍體：「你見過佢？」
羅羅又行近具屍體：「嗯～之前一齊執行過委託～都係強迫委託～仲要係佢帶隊～」
『喂喂喂！咁我哋都跟住佢行啦！！！』有大佬就跟大佬呀嘛！
就頭先所見，佢一閃就搞掂一隻異常生命體！
跟住佢嘅話，唔單止唔使出手...直頭未行到過去，啲異常生命體都已經變晒紅色粒子！
「你冇留意冇人跟住佢？」綽姿單膝半跪喺屍體前。
『吓？』冇人跟住佢？
「佢嘅隊員，應該已經死晒～」羅羅都觀察屍體。
吓？死晒？
係喎...又真係得返佢一個...
咁佢啲隊友...真係死晒？
冇理由㗎...頭先嗰個叫可愛嘅先行者咁勁...佢啲隊員點會死晒？
「嗰個人極危險～」羅羅拉住屍體個頭一睇...甩咗！「之前跟佢執行委託...專搵行者擋～」
『哦！好似你咁！』羅羅頭先都搵盛況嚟擋刀！
「我都係喺佢身上學返嚟㗎姐～仲有吖～佢好鍾意引人上前做餌～」羅羅拿住個死人頭睇清楚，「吖～點解佢哋要食人呢？」
又係呢啲賣隊友嘅手段...
唔單止執行者...連先行者都係咁...
行者真係冇一個信得過...
「睇嚟唔會係因為需要...」綽姿檢查屍體上嘅傷口。
望住羅羅手上個血肉模糊死人頭...同綽姿檢查緊瞓喺地上肉淋淋嘅屍體...
真係好鬼核突...
點解佢哋兩個小妹妹仲可以咁有興趣走去研究？我真係望多眼都唔願...
我再周圍望望（但唔敢行得太遠），呢個區域都有唔少屍體...
喺研究室入面有...喺走廊又有...
「好喇～」羅羅嚟手Dom個死人頭落地，「要繼續行～可愛行咗嗰邊...我哋就行呢邊～」
「嗯。」
『哦哦...』
我哋一行三人就向住同可愛唔同嘅方向探索。
穿過幾道被爪爛嘅大閘門，牆身亦爪痕滿佈。
行到過嚟呢邊，雖然已經冇水噴出，但警號燈仲係閃過不停。
有唔少血淋淋嘅屍體瞓喺地上...挨喺牆邊...
仲有唔少人體殘肢...血肉模糊嘅頭顱散到一地都係...
行唔夠兩步...
「嗚呀呀呀！！！」仲會聽到異常生命體嘅大叫！
仲係感應唔到...不論係行者...定係異常生命體...
四周都仲係飄散住雜亂嘅氣息...
我左望望...右望望...一個好似...飯堂嘅地方？
地下研究所都有飯堂？
都係嘅～肚餓起上嚟都唔使上返去幫襯大快樂～
定係其實喺呢度工作嘅...係唔會上返去㗎呢？
呢個地下研究所又有幾大呢？
總係覺得好大好大...行極都行唔晒...
突然！
“嗡！嗡！”綽姿同羅羅同時亮出刺眼嘅紅光刀刃！
我望返上前...遠處正正就企咗一個...著住染血白色長袍嘅異常生命體！
又係女仔...又係女嘅異常生命體！
“嗡！”我都立即拔出精神刀！亮出紅光刀刃！同綽姿羅羅一齊戒備！
只見異常生命體震吓震吓...全身抽搐...抽搐...
「嗚...嗚...呀呀呀！！！」異常生命體對眼嘅紅光越嚟越紅...越嚟越光！
唔單止雙眼...就連面上嘅裂紋都越嚟越多...越嚟越光！
「嗚...嗚呀...呀呀呀！！！」異常生命體失晒控咁全身勁抽勁搐！
大量紅色粒子由異常生命體身上裂紋之中噴出！
「呀呀呀！！！」
“轟隆！”一聲！異常生命體爆炸！炸成無數咁多紅色粒子喺空間中飄散...
「又係爆炸...」綽姿行近堆紅色粒子...
「嗯...雖然爆炸嘅威力唔大...但都算係爆炸...」羅羅都行近堆慢慢飄散緊...消失緊嘅紅色粒子...
『點會...爆炸？』又算唔算係...自爆？
綽姿同羅羅都冇出到聲，只係對望一眼...繼續向前行...
咁即係點？
點都好...我都係跟住綽姿同羅羅...唔敢離佢哋太遠...
我哋穿過飯堂...再穿過幾度被爪爛嘅大閘門...然後...然後就行到入一個...比較特別嘅地方...
我哋而家...行咗入一個...有好多好多...一個個大型玻璃管...
啲大型玻璃管有成個人咁高咁大...好整齊咁排列...一行行...一橫橫...
之但係...全部都爛晒...玻璃碎到一地都係...
而地上除咗散滿玻璃碎...仲有...水？
我唔知係唔係水...總之就有唔少液體...踩落去仲...滑滑地...
我哋三個再行入啲...行近啲大型玻璃管睇清楚...研究研究...
我唔知綽姿同羅羅研究到啲乜...我淨係覺得好似...存放容器？
仲要係有唔少...電子監察儀器嘅容器？
真係唔知...由細到大都冇爆過Biohazard...
係一集都冇爆過...
鬼咩...我真係好驚喪屍㗎...
次次淨係一Load個開頭都嚇到我掉手掣...仲點爆到機吖？
突然！
「你哋做過啲乜？」有微弱但強硬嘅聲音由遠處傳嚟！
我哋三個都望向聲音嘅來源...
望遠啲...就望到好似有...火光...
綽姿同羅羅都向住火光嘅方向行...
我都跟住佢哋兩個身後行...喺一碌碌破爛嘅大型玻璃管之間行...行到去一道大閘前...
大閘門已經打開，裡面係一間被火海包圍嘅...房間？
被火海包圍之下，唔知間房有幾大...但就好似好大好大...好大嘅一個大空間...
而裡面仲企咗個身影...
喺火海之中...個高高嘅身影左手拎住一把亮出長長...刺眼紅光刀刃嘅精神刀...右手就...捏住另一個身影條頸...仲秤到雙腳離地！
而我感覺到...呢個高高嘅身影...身上所散發住強大且霸道嘅氣息...
『係...片翼？！』