陪住喺羅羅身邊,睇佢揀衫...

羅羅拎起件紅色線衫睇睇...又拎起條紫色短裙仔睇睇...

『呃...係呢~你同綽姿識咗好耐㗎喇?』有機會都問問有關綽姿嘅事先~

同綽姿相處都有兩個禮拜,直接又好間接又好,有關佢嘅資料都係唔多...

唔知而家喺羅羅口中...又可以探到幾多口風呢...



「都幾耐㗎...」羅羅繼續一邊揀衫一邊答~

『你哋喺基地裡面已經認識?』繼續追問...

「又唔係...喺西貢攻防戰之前,大家都有一齊執行過委託...呢件靚唔靚吖?」羅羅拎起條紅綠色格仔短裙~

『靚...靚...即係西貢攻防戰之前...都係喺香港?』繼續追問...

「嗯嗯...都係喺香港...我由基地出嚟就係喺香港開始接委託...呢件呢?呢件好唔好睇吖?」羅羅拎起條牛仔熱褲~



『好睇...好睇...咁綽姿都係以執行者身份執行委託?』繼續追問...

「係吖...我第一次遇到佢嘅時候...我同佢都係執行者...自己接委託...呢件呢~呢件襯唔襯我吖?」羅羅又拎起咗件白色線衫~

『襯...好襯...咁你哋合作得多唔多?』繼續追問...

「合作又有...又交過幾次手...」羅羅行過去女性內衣褲嗰邊,拎幾個Bra喺手,「邊個靚啲吖?」

我望住羅羅手上幾個Bra...隨便指一指個白色有Lace邊:『呢個...幾靚吖...咁咩係交手吖?』



「交手咪交手囉...」羅羅拎住個白色有Lace邊Bra再睇多兩眼,「呢個都幾性感嘅...如果襯埋條有Lace邊嘅白色底褲...」

『咁...』我都未咁完...

「做乜問咁多有關梁綽姿嘅嘢姐?你鍾意咗佢吖?」羅羅谷起塊面豬登!

『唔係唔係!』一聽到羅羅咁問,我第一時間否認!

「仲話唔係?唔係又問咁多關於佢嘅嘢?」羅羅再谷一谷塊面豬登!

『好...好奇問吓姐...』咁我諗住你知㗎嘛...

「咁我呢?我嘅嘢你就唔好奇嘅?」羅羅又谷一谷塊面豬登!

『你嘅嘢...你之前所講你自己嘅事...全部都係呃我㗎嘛...』又好意思話我唔好奇你啲嘢...



一諗起我咁天真走去完完全全相信你...真係覺得自己好戇鳩囉...

「我冇呃你㗎...」羅羅扁扁地嘴...

『吓?』咁都叫唔係呃?

「細細個嘅時候,我真係曾經俾人捉過...喺嗰陣亦都真係有個SPIRIT嘅行者救過我...只係之後我又俾人捉...今次冇咁好彩...冇人再出嚟救我...我亦被捉去SPIRIT嘅基地受訓...咁SPIRIT都算係孤兒院啦~」羅羅眼神之中帶點委屈...

『呃...都算嘅...』係一間訓練兒童傭兵嘅孤兒院囉...

「仲有一樣...喺平台第一次遇到你嘅時候...我覺得你好有嗰個行者嘅Feel...救過我嗰個行者...」羅羅情意綿綿咁望實我...

吓?我?我喎?



「我當然知道當時嗰個行者唔係你啦~不過...喺你身上真係好有佢嘅感覺~」羅羅甜絲絲咁笑一笑~

『係吖?係吖?』梗係唔會係我啦~我咁廢~

而且...我都係做咗兩個禮拜行者咋嘛~

『呃...咁...咁你冇去搵返佢咩?話晒你都入咗SPIRIT...再加上...你咁厲害...』嗱~唔好話我對你嘅嘢冇性趣吖~我都真係想知㗎~

「哈哈~你真係覺得我厲害咩?」羅羅面上帶住天真笑容~

『厲害~好厲害~』淨係睇尋晚,喺科學園都知啦~

「厲唔厲害得過梁綽姿先?」羅羅又古古惑惑咁打量住我~

我細細聲喺羅羅耳邊講:『勁過多多聲...不過唔好話返俾佢聽...』



「哈哈哈~」羅羅撳住個嘴仔笑~「好好~我唔同佢講~不過講真一句...我係厲害...不過唔係情報方面...」

『吓?』即係點吖?

「我同梁綽姿都係屬於行動型...要我哋搶、保護、殺人、破壞的確係難唔到我哋~之但係...」羅羅諗一諗,「要搜集情報...始終都係調查型嘅行者比較出色...」

調查型嘅行者...

係專門搜集情報嘅行者?

我記得綽姿係有提過...

「起初我以為成為SPIRIT嘅一份子,要喺SPIRIT裡面搵一個行者唔係難事...開始時自己試過搵...之但係唔好話搵唔搵到個人...就連一啲線索都搵唔到...」羅羅擰擰頭,拎起幾條底褲睇睇。



一啲線索都搵唔到?

「我見原來比想像中難...就搵專門搜集情報嘅行者查查...但就算我出幾高報酬都好...都係一啲線索都冇...」羅羅放低幾條底褲之後繼續行...

『咁係唔係啲搜集情報嘅行者冇料到咋?』SPIRIT嘅行者...有料就真係好有料~但冇料都會扮四條...

「你太睇少佢哋喇~專門搜集情報嘅行者好唔簡單㗎~就連佢哋一啲線索都冇...就好似從來都冇存在過...」羅羅行出服裝店...

就好似...從來都冇存在過...

『唔會係...已經化為紅色粒子...』我突然之間諗起呢個可能性...

「唔知呢~或者係~或者唔係~始終仲有其他可能性嘅~」羅羅又雙手翹實我手臂,壓晒個小饅頭埋嚟~

始終...仲有其他可能性?

俾羅羅翹住嚟行...

喺人群之中穿插...

係唔係...真㗎呢?

羅羅所講嘅專門搜集情報嘅行者...係唔係真係咁厲害呢?

其實...我係有啲懷疑...對羅羅所講嘅所有...所有...

包括佢自己嘅事...

有幾多成係真?會唔會全部都係假?

係唔係真係有俾SPIRIT嘅行者救過?

又係唔係真係咁唔好彩救到一次...最後都係被SPIRIT捉去基地訓練成傭兵?

會救人嘅行者...純屬羅羅虛構...根本就唔存在...

我...始終都係覺得...羅羅唔係一個可信嘅人...

縱使佢嘅外表有幾咁天真爛漫無邪氣...

始終我都俾佢呃過...始終佢係一個比綽姿更厲害嘅行者...

「我哋不如去食啲嘢咯~」羅羅翹實我手臂~指指前面~

『哦...好好...』其實我就冇餓嘅感覺...

羅羅就翹實我咁行,帶我行入一間食Pizza嘅餐廳。

餐廳入面都唔算有好多人...女侍應就帶我哋去一個近窗邊嘅二人世界位坐。

「你想食啲咩呢~」羅羅拎起薄薄一塊平板撳撳撳撳~

『我...冇咩所謂~你想食乜我就食乜~』嚟到鬧市之中,都真係高科技啲...

「嗯~咁就我話事㗎喇~」羅羅就喺塊平板上又掃又撳~

其實我並唔係一個有主見嘅人...

不過好彩一直都有阿月喺我身邊~

其本上大大小小嘅決定都係由阿月揸主意~

最正嘅係,阿月每個決定都正合我心意~

“嘟叮~”一聲...

「好~搞掂~等等就有得食~」羅羅放返好塊平板,帶住甜絲絲嘅微笑望住我~

同時,我感覺到我隻小腿...被羅羅對絕對領域黑絲腳仔夾住!

我帶住有啲好奇...問問羅羅:『做咩夾住我隻腳?』

「嘿嘿...」羅羅帶點古惑咁甜絲絲笑,「有安全感囉~」

『哈哈~安全感?你驚我走咗去咩~』一聽到羅羅話“有安全感”就覺得好笑~

「你冇聽過女仔都好鍾意觸碰大哥哥隻腳㗎咩~」羅羅又甜絲絲咁望住我~

『冇吖~有啲咁嘅事㗎咩?點解嘅?』我一頭問號~

「因為細個嘅時候,想主動攬住爸爸,就只可以攬到爸爸隻腳~自然覺得腳係最容易得到安全感嘅部位喇~」羅羅好滿足咁點點頭~對腳仔就夾吓夾吓我隻小腿~

『哈哈哈~喺邊聽返嚟㗎?』聽落都覺得好奇怪~

「喺啲少女Post囉~」羅羅咬咬唇~

『少女Post?你會睇㗎咩?』我疑惑咁打量住羅羅~

「點解唔會吖~」羅羅又用佢對絕對領域黑絲腳仔夾夾我小腿~

『唔似囉~』雖然有條緊身褲隔住,但唔知點解...好似感覺到黑絲嘅...質感...

係唔係只係我FF得太多咋...

「我唔少女咩~」羅羅谷一谷起塊面豬登~對絕對領域黑絲腳仔又夾一夾我小腿~

『呃...少女...嘅...』不論外貌同身形...就連行為舉子...成個殼都好少女...

之但係一諗起羅羅嘅強大精神能量...手起刀落...隨手拎隊友擋攻擊...

冇咩嘅...地獄少女咁囉...

「返學嘅時候,我都會同啲女同學傾女仔嘢㗎~」羅羅再谷一谷塊面豬登~

『哈~乜你成日返學㗎咩?你唔係話返學好悶㗎咩?』我恥笑一下羅羅~

「我有聽你話㗎~返多咗喇~而且之前我都唔係成日唔返嘅~仲成日都同啲朋友仔行街街~」羅羅又甜絲絲咁點點頭~

『咁你之前又講到自己鬼咁寂寞咁~』又話冇人陪~又話入嚟特殊區搵我觀光~

「嘻嘻~咁都記得...原來你都幾在意我㗎喎~」羅羅又甜絲絲咁帶住微笑打量住我~

『呃...你識朋友仔...同朋友仔行街街打好關係係為咗掩飾行者嘅身份嘛...我明嘅...』我承認我真係幾在意羅羅...

喺尋日之前...

我真係好天真咁覺得羅羅係一個需要人關心保護愛錫嘅小妹妹...

之但係經過尋日...

唔係話完全否定嘅...只係有少少保留囉~

「梗係唔係啦~」羅羅又谷一谷塊面豬登,「我係真心同佢哋Friend㗎~」

真...心?

「行者還行者~正常生活還正常生活~我分得好開㗎~」羅羅扮晒認真咁點點頭~

『吓?點分得開吖?』精神分裂吖?

「要做行者嘅事嘅時候做行者要做嘅事~平時咪做返自己囉~」羅羅繼續點頭~

『吓?咁喺平時都有機會要做行者嘅事...做行者嘅事嘅時候又有可能遇上平時嘅事...』點分得開吖?

「心態上係可以㗎喎~」羅羅又點點頭~

心態上吖嘛~明顯就真係精神分裂啦~

『好喇好喇好喇~最簡單一樣嘢喇~萬一俾你啲同學仔吖朋友仔吖發現你行者嘅身份,你會點做?』呢個問題真係最簡單直接~

而綽姿都有答過...

當然...我又唔覺得綽姿真係會咁心狠手辣...

「我唔會俾呢件事發生~」羅羅充滿信心~

『咁萬一喇!萬一真係喇!意外嘅嘢講唔埋㗎嘛!』我就係都要迫你答!

「萬一真係有咁嘅意外...」羅羅咬住唇咁諗一諗,「我會離開呢區~去第二度執行委託囉~」

離開呢區...去第二度執行委託...

「呢個世界咁大~又唔一定真係要留喺度嘅~」

呢個世界咁大...又唔一定真係要留喺度...

「雖然話呢區真係好好搵...之但係唔可以困死自己㗎~」

唔可以困死自己...

「放開你嘅思想~選擇做自己認為啱嘅事~行最好嘅路~」

認為啱嘅事...最好嘅...路?