《香港傭兵》: [Day 16－秘密情報] PART 05
羅羅同綽姿同一時間拉高衫領，笠返頂帽。
我都跟住佢哋，好快手咁拉高衫領笠返頂帽。
「唔好話我收收埋埋～」羅羅拎部電話出嚟撳撳撳撳，「開定掃描有著數～」
開定掃描有著數？
「我係唔會多謝你。」綽姿都拎部電話出嚟撳撳撳撳撳。
綽姿都開...咁我都開定就冇死啦～
我都快快手手咁拎部電話出嚟開返個掃描App。
「好～行得～」準備好一切，羅羅就行落天橋。
我同綽姿都跟喺羅羅身邊。
落到嚟馬路旁邊，同上次過嚟一樣...唔好話人影...想喺附近四周搵隻鬼影睇吓都冇...
一路行...身邊嘅建築物都仲係空置...仲係圍晒鐵絲網未拆...
而被鐵絲網圍住嘅空地，枯黃色野草好似長得更加高...
真係好奇怪...呢啲咁空置嘅建築物同長滿野草嘅空地，竟然想搵隻貓貓狗狗睇吓都冇...
見到最多嘅生物應該都係得...麻雀...
“飃！”幾架印有解放軍軍徽嘅銀色巨型貨車擦身而過...駛向不遠處嘅...銀灰色圍牆...
望住巨型金屬閘門打開，五架銀色巨型貨車隨即駛入...
等到五架銀色巨型貨車都駛入神秘工廠後，金屬閘門隨即關上...
至於我哋...
我同綽姿都跟住喺羅羅身邊行...向住銀灰色圍牆行過去...
我哋嘅目的地...唔通就係...神秘工廠？
過咗幾條大馬路，喺幾棟廢棄嘅建築物旁邊行...唔使幾耐，我哋三個就行到嚟圍牆面前...
沿住銀灰色嘅金屬圍牆行...行到嚟巨型金屬閘門前...
“咔！吱！”巨型金屬閘門隨即打開！
我見到...由閘門之間我可以見到...左右兩邊各企咗一排手持長槍...著上一身銀色裝甲嘅...解放軍士兵？
望清楚...佢哋胸口同手臂都印有解放軍軍徽！
的確係解放軍士兵...呢間神秘工廠...的確係同解放軍有關！
咁咁大間工廠...又會係整乜㗎呢？
唔係真係兵工廠呀化？！
喺香港設兵工廠好咩？
等等先...我哋嚟得呢個解放軍嘅兵工廠...即係話...羅羅嘅委託人...係解放軍？！
又係解放軍？
我同綽姿都接過佢哋嘅委託幾次㗎喇喎...
而家羅羅又係接佢哋嘅委託...
點吖？我哋SPIRIT最大嘅客仔係唔係就係解放軍吖？
其實又唔係好難理解嘅...
邊個出得起錢...我哋就接邊個嘅委託～
而家呢度邊個最有錢？一定係中共啦～
唉屌...咁講法我咪又係做中共嘅走狗...
一個著晒軍服嘅軍人行到嚟我哋面前。
睇個軍人都好似幾大粒咁喎...
個軍人望咗羅羅手上個黑色手提箱幾眼，就帶住唔鹹唔淡嘅廣東話講：「跟我嚟。」
吓？跟佢去？去邊吖？唔係喺度交收就得喇咩？都送到嚟門口㗎喇喎...
只見羅羅跟住個軍人行...
我同綽姿都跟喺羅羅身邊行...
我哋三個就一路跟住個軍人身後行，左右兩邊各有一排為數五人，手持長槍，著上一身銀色裝甲嘅解放軍士兵帶住我哋。
其實係帶定係押，我都傻傻分不清...
總之個感覺就唔多好...好壓迫...
而我而家終於知道點解羅羅會叫我哋開掃描...
我一邊行...一邊偷偷望望...
幾架銀色巨型貨車停泊喺銀色嘅貨倉外面...好似等緊駛入去...
又有幾個巨型銀色貨櫃由地下升起...升上地面...
又有幾個著住全身白色長袍...帶晒生化裝備咁嘅工人打開貨櫃...好似入去檢查唔知啲乜嘢咁...
我呢個角度同距離都唔係好睇得清楚...
除咗有唔少著住全身白色長袍，帶晒生化裝備咁嘅工人行嚟行去，出入貨倉同貨櫃之外，就係有唔少手持長槍，著上一身銀色裝甲嘅解放軍士兵巡邏...
佢哋好似都係以五個...或者十個作單位...
建築物嘅牆身...較高嘅位置都有唔少黑色半圓球體...
應該就係CCTV...
天空上仲有唔少細細架...三角形...銀光閃閃嘅...Drone...
睇嚟呢度嘅保安同解放軍基地有過之而無不及...
呢間神秘工廠...係唔係真係解放軍嘅兵工廠呢？
我哋三個一直被押住行...好快就行到入一座大廈入面。
入到嚟繼續直行，面前就有部𨋢打開咗。
門都係為我哋打開？
只見軍人押住我哋入𨋢...我就連想睇睇個大堂都冇機會...
一入到𨋢...我哋三個都被班解放軍包圍住...
呢種感覺真係好差...周身唔自在...好似押緊我哋去刑場咁...
係囉...究竟我哋係要去邊㗎？
只見𨋢門關上...我哋就以極速向下降！
好快...部𨋢真係落得好快！
我望住個樓層顯示板...一下子就已經去到B66！
係...地底六十六層？
唔係咁深吖化？！
𨋢門一打開，我哋都跟住解放軍行出大堂。
大堂都係以灰黑色為主...
燈光方面...都係冷色調...
行過咗大堂...喺灰黑色牆身，冷色調嘅通道內行咗一陣...就已經見到...一塊塊落地大玻璃...一間間玻璃幕牆間開嘅房間！
一間間以玻璃幕牆間開嘅房間！一間間又一間間！有好多間！
呢種...呢種格局...咁似...咁似前晚...科學園嘅地下研究所嘅？！
我哋三個被解放軍押住咁行...
經過一間又一間，以玻璃幕牆間開嘅房間...
裡面都有唔少電腦同電子儀器...仲有唔少著住白色長袍嘅人員做緊嘢...
成個格局...都真係好似...前晚喺科學園嘅地下研究所...
點會咁㗎？
呢個年代啲地下研究所都興以Umbrella嘅地下研究所做藍本㗎？
型啲？潮啲？科幻啲？
真係唔知～
或者設計嗰個唔使諗咁多掛～
Whatever啦～
而呢個地下研究所...又係研究啲乜㗎呢？
我偷偷望入玻璃房...
啲電子儀器唔知喺度整緊乜...電腦個螢光幕又唔知顯示緊乜...就連啲工作人員都唔知喺度做緊乜...
只係知好似好精密...好複雜...好高科技...
科研呢家嘢我真係識條鐵咩～
我又唔係讀理科...我文科仔嚟咋嘛～
咁呢個地下研究所又同科學園嗰個地下研究所...有冇關係呢？
一路被解放軍押住行...都行咗幾耐...經過唔少玻璃房...
綽姿同羅羅都好似唔在意呢度嘅一切...
係真係唔在意？定係都同我一樣，偷偷觀察...內心盤算住...
咩都好...我總係覺得...呢度有極高嘅情報價值！
我繼續偷偷觀察四周...行過嘅每一個地方...
望望啲LED顯示板...寫住咩東翼...南翼...西翼...北翼...
又有啲寫住咩研究室A1-A10...B11-B20...
雖然唔知係啲咩地方...不過就真係好大...
又係好大...好似科學園嗰個地下研究所...行極都行唔完咁...
經過一間間玻璃幕牆研究房間...穿過幾條灰黑色通道...再上幾級樓梯...又落幾級樓梯...又經過一個勁大嘅迴旋處...
行咗好耐...都唔知已經行咗幾耐...行到嚟一度...黑色嘅大閘門前！
呢度大閘門...深黑色...睇起上嚟好似...金屬造...
黑色大閘門有個圓形...大鎖！
呢個圓形大鎖...
只見一直帶住我哋行嗰個著住軍服大粒軍人右手放喺個圓形大鎖上...
“咔！吱！”圓形大鎖轉咗幾圈！黑色大閘門隨即打開！
指紋識別系統？！
唔...唔會咁簡單...
我諗...應該仲隱藏咗其他生物科技技術喺裡面...
繼續被解放軍押入大閘門...
當我哋都行入大閘門後...
“吱！咔！”身後嘅大閘門隨即關上...
使唔使咁快手吖？
呢種感覺真係好差囉...
我唔知綽姿同羅羅係唔係同我一樣感覺，只係見佢哋都繼續跟住解放軍行。
咁我只可以繼續扮冇嘢...但一路都提高警覺...偷偷觀察四周咁行...
行到入嚟，都係有一間間以玻璃幕牆間開嘅房間。
而有啲唔同嘅係...大多數玻璃幕牆都係磨沙面...
已經見到有唔少用磨沙玻璃幕牆間開嘅房間...
又有啲係透明玻璃...不過裡面冇人工作...只係得啲電子儀器同電腦喺裡面...
原來係咁...
啲磨沙玻璃唔係真係磨沙玻璃...睇起上嚟普通嘅玻璃都唔普通...
我喺度噏乜鳩？係唔係又想拖字數？
唔撚係啦～
我係想講...其實所有玻璃幕牆...都係可變式玻璃幕牆...
即係有需要嘅時候，就可以將佢變成磨沙或者透明...
其實之前上個客間公司都已經見過...
嗰陣時都覺得好高科技好型棍！
實唔實用就真係唔知...（就算變成磨沙玻璃，同個秘書扑嘢都見到個影㗎啦～）
之但係而家身處喺呢個神秘嘅地下研究室...更添神秘感...
被解放軍押住咁行多幾步...就行到嚟一間磨沙玻璃房。
企喺磨沙玻璃面前，磨沙玻璃隨即變成透明玻璃！
果然！我嘅分析係冇錯！！！
而玻璃房入面就企咗三個著住白色長袍嘅工作人員！
“吱！”玻璃門打開！
手持長槍，著上一身銀色裝甲嘅解放軍士兵就左右各五人一字排開咁企喺門外。
著軍服嘅軍人就帶我哋入去！
我哋四個人一入到去...
“吱！”身後嘅玻璃門隨即關上！全間房嘅玻璃幕牆都變晒做磨沙！
真係好型～
三個著住白色長袍嘅工作人員都行到嚟我哋面前...羅羅面前...打量住羅羅手上個黑色手提箱！
其中一個比較年長嘅工作人員就指一指羅羅手上個手提箱：「我要驗貨。」
驗...驗貨？
羅羅單手拎起個手提箱，遞向年長嘅工作人員面前：「冇問題。」
年長嘅工作人員接過手提箱，就放個手提箱上工作檯。
另外兩個工作人員就拎住塊...平板電腦...撳撳撳撳撳...
然後有啲藍光掃一掃個黑色手提箱...年長嘅工作人員又同兩個工作人員細細聲講...
唔係好聽到佢哋講乜...淨係聽到“嗯嗯哦哦”咁...
點吖？使唔使等我哋話你聽裡面有啲乜同要注意啲乜吖？
三個工作人員搞咗一大輪又點點頭之後，年長嘅工作人員就拎住部電話，行到嚟羅羅面前：「OK喇。」
羅羅都拎部電話出嚟，對住年長嘅工作人員手上部電話：「多謝惠顧～」
咦喂～咁就驗完㗎喇？交收完成㗎喇？
唔使打開嚟睇吓先？