《香港傭兵》: [Day 16－秘密情報] PART 06
交收已經完成，我哋三個又被解放軍士兵押住，沿住原路返上地面。
一出到銀色大閘門，班解放軍就連一句“Bye”都冇...
“咔！吱！”銀色大閘門就關上。
啲解放軍真係好冇禮貌...
「搞掂～」羅羅伸咗個懶腰～「又真係估唔到會咁順利～」
『吓？會咁順利？』交收咋喎...會有幾唔順利吖？
最多都係好似頭先咁，被解放軍押住嚟行，周身唔自在～
綽姿向住天橋嘅方向行：「佢就係怕會有乜意外，先搵埋我哋一齊嚟。班解放軍真係唔可信...」
怕會有乜意外...先搵埋我哋一齊嚟？
「嘻嘻～」羅羅伸伸條脷仔～跟住綽姿身邊行～「被發現咗添～」
吓？乜原來真係咁㗎咩？
『原來...你係想利用我哋...』我都跟住羅羅同綽姿身後行...
又係利用我哋...
「都預咗㗎啦...」綽姿點點頭，「咁先乎合佢嘅性格。」
「你又唔好咁講～」羅羅用膊頭撞一撞綽姿～「你哋都得到唔少情報啦～」
『吓？有咩？』得到啲咩情報吖？
我淨係覺得搞咗咁耐...好似咩特別都冇咁咋喎...
羅羅翹住我隻手臂：「起碼知道解放軍喺呢邊設咗個兵工廠吖～」
『真...真係兵工廠？！』頭先個神秘工廠...真係解放軍嘅兵工廠？！
「嗯。」綽姿點點頭，「的確係解放軍嘅兵工廠。」
連綽姿都咁講...咁應該就冇錯啦！
估唔到...估唔到香港真係會有解放軍嘅兵工廠...仲要喺荃灣呢個新工業區！
『之但係...佢哋要整乜武器吖？』喺頭先參觀兵工廠嘅一路上...都見唔到有生產武器嗰Part。
「整乜武器...」羅羅拎部電話出嚟睇睇，「地面有啲倉庫存放咗一箱箱嘢啦...遠少少有幾架裝甲車...坦克...一啲重型軍械同裝備組裝緊啦...落幾層都係啲槍械同裝甲啦...仲有...仲有...」
嘩...有咁多嘢睇到㗎咩？
綽姿又八八卦卦咁望住羅羅手上部電話。
羅羅立即冷眼望向綽姿：「喂～做乜偷睇？你自己夠有開掃瞄啦～」
綽姿繼續望：「你都拎咗喺手，睇你嗰個方便啲。」
羅羅冷冷一句：「乜你咁懶㗎...」
綽姿繼續望：「繼續啦。」
我哋三個就繼續邊行邊睇住羅羅手上部電話。
你唔好話...我就咁睇住羅羅掃吓掃吓...幅圖都幾複雜！
羅羅就一邊又掃又碌住幅立體地圖，一邊行：「落多幾層...好似全部都係啲...研究設備...」
『研究設備？係唔係好似科學園嘅地下研究所咁吖？』似係喇！似係喇！
頭先就咁行B66層都覺得勁似科學園嘅地下研究所！
「嗯...」羅羅點點頭，「都真係極相似...」
『點止極相似？！直頭係100%複製㗎啦！』我敢寫包單！一定係出自同一個設計師手筆！
「係唔係100%我就唔敢肯定...」羅羅諗一諗，「結構相似...但佢哋研究嘅嘢...又係唔係一樣㗎呢？」
佢哋研究嘅嘢...又係唔係一樣？
我唔係好明喎...
綽姿諗一諗：「雖然話我哋去到之前，科學園嘅地下研究所已經遭受嚴重破壞...但照我睇...佢哋唔係完全研究同一樣嘢...」
何出此言呢？
唔好話科學園嗰個遭受嚴重破壞嘅地下研究所...頭先嗰個完完整整仲有一大班研究人員做緊研究工作都唔知佢哋研究緊乜撚嘢啦～
「嗯...」羅羅都點點頭，「雖然話唔係完全研究同一樣嘢...之但係...應該都有啲關連...」
又何出此言呢？
羅羅又點樣睇得出兩邊研究嘅嘢係有啲關連呢？
其實係唔係淨係得我一個乜都睇唔到呢？
綽姿同羅羅都邊行邊諗...
然後諗到行上天橋...我哋三個都除返頂帽，拉返低個衫領之後，喺天橋上沿住原路行...
大家都再冇任何頭緒咁...都冇再有咩意見發表咁...
然後行到嚟開始有人嘅地方，羅羅就收返埋部電話：「好喇～我有嘢做要走先喇～」
「嗯。」綽姿都點點頭，「我哋都返入特殊區。」
嗯？要分道揚鑣喇？
「咁好啦～」羅羅同我哋揮揮手，「下次見啦～」
我都同羅羅揮揮手：『下次見...』
下次...
綽姿冷冷一句：「最好冇下次。」
「嘿嘿...」羅羅帶住微笑轉身離開。
望住羅羅嘅背影越行越遠...消失喺人群之中...
下次...會係幾時呢？
「我哋返去喇。」綽姿都轉身行。
『嗯...』我都跟住喺綽姿身邊行。
唔知點解...總係有少少唔捨得...
當望住羅羅嘅背影越行越遠...越行越遠...消失於人群之中...我嘅視線之中...
我個心...總係有點點可惜...有啲難過...
難離難捨想抱緊些...
屌我又喺度FF乜鳩呀？！
唔係吖...我哋做行者嘅...今次道別...可能係永別...
一句再見...以後都冇得見...
真係㗎...實在太危險喇...
「朱海羅太狡猾。」綽姿突然冷冷一句。
『嗯？點解咁講呢？』可能綽姿俾我了解羅羅得多。
始終...佢哋都交過幾次手...
「喺佢手上...一定有更多情報。」綽姿向住另一條天橋嘅方向行。
『你係指...兵工廠？』呢邊啲人都真係開始多。
「唔止...仲有科學園...仲有手提箱。佢一定隱瞞咗唔少...」綽姿一邊行，一邊留意住身邊嘅人。
『其實你都係...』身邊嘅人絕大多數都係大大隻隻嘅工人。
綽姿冇出到聲。
其實我都察覺到...綽姿手中有唔少情報...隱瞞咗唔少秘密情報。
繼續跟住綽姿身邊行...
都做咗咁多日行者，總有啲Sense。
情報係要嚟賣...
就算講得出口，都只係想拋磚引玉。
「聰明咗。不過聰明係唔應該表露出嚟。」綽姿冷冷放下一句。
『明喇知喇～我知楊修係點死嘅～』叻唔切吖嘛～
綽姿冇我咁好氣，向住落天橋嘅方向行落去。
跟住綽姿身邊行落橋，喺馬路旁邊行。
「搵車租。」綽姿拎部電話出嚟撳撳撳撳撳。
『哦。』我就左望望，右望望，留意四周。
「你哦完企喺度望又唔拎部電話出嚟搵？」綽姿皺住眉咁撳撳撳撳撳部電話。
『吓？唔係你搵緊咩？』我見你喺度撳緊電話，以為你搵緊喇嘛...
「我忙緊吖嘛...」綽姿皺晒眉咁撳撳撳撳撳部電話。
『有乜咁忙吖...』正當我想八八卦卦探頭望望綽姿手上部電話之時...
「忙咪忙囉！」綽姿一手撞開我塊面，「仲唔快啲搵車？我趕住返入去㗎。」
『哦...』搵咪搵囉...淨係得你一個最忙...最趕住返入去...
我拎部電話出嚟打返開個共享車App，開始搵搵邊度有車租。
睇住幅地圖，跟住紅點行，綽姿又撳撳撳撳撳住部電話跟喺我身邊行。
好彩唔使行得好遠，就俾我哋搵到架用得嘅私家車。
上到車...
“吱...吱！”雖然架車就唔算新淨，但總算開得著～
我同綽姿扣好安全帶就開車，向住深井方向出發！
一路上，綽姿都仲係撳緊電話。
而呢程車費唔使講都係我出㗎啦...
不過冇所謂啦～反正都差唔多仲有成九萬按金俾佢慢慢扣～
我估唔係我委託失敗灰飛煙滅都未扣晒，就係我返翻去過去～
一係死...一係返去...得兩個Ending...冇Secret Ending...
“吱！”一路都算順利，冇阻滯咁就駛到嚟深井。
隨便泊架車喺路邊，我同綽姿就行入深井...行過警察設置嘅閘口。
班Full Gear嘅警察都係冇理過我哋，佢哋有佢哋吹水...我哋有我哋行過。
然後，就同綽姿企喺路邊等...等紅Van...
綽姿一直拎住部電話撳撳撳撳撳都冇停過...
都唔知佢撳乜嘢...見咁無聊，我都拎部電話出嚟睇睇～
睇睇...頭先掃瞄過解放軍兵工廠。
打開幅地圖一睇...其實都同頭先睇羅羅部電話嗰幅差唔多～
都係唔識睇...
不過就咁睇...就咁碌...碌多幾碌...睇多幾眼...
『咦喂？點解好似...掃唔到？』我望到地圖裡面有幾個地方...都係斷開...黑咗...掃唔到咁...
「嗯...」綽姿點點頭，「的確係有啲地方掃唔到...就好似科學園個地下研究所一樣...」
『吓？科學園嗰個都係？』有啲咁嘅事咩？
「嗯...」綽姿點點頭，收返好部電話又冷眼望住我，「你自己冇睇過㗎咩？」
『我...冇吖...』無啦啦點會開嚟睇姐...
「咁你而家開嚟睇睇。」綽姿好似等緊我咁。
『哦...哦...』我就搵返前晚掃過嗰幅科學園個地下研究所...碌幾碌...又碌幾碌...『咦喂！真係喎！』
雖然我都唔係好識睇㗎喇...之但係地圖裡面又有幾個地方都係斷開...黑咗...掃唔到咁！
「嗯...」綽姿望住我手上部電話點點頭，「最明顯就係嗰道黑色大鐵閘。」
『黑色大鐵閘？』其實我唔知喺幅地圖嘅邊一個位置...
「嗯...」綽姿點點頭，喺我部電話個Mon上掃幾掃，碌幾碌，「黑色大鐵閘後面嘅所有嘢都係掃唔到...」
我望住幅地圖...又...又好似係喎...
某個位置嘅後面...全部都係黑色...
就好似真係...擋住咗...後面嘅所有...所有...乜都掃唔到...
「唔止呢兩個地下研究所，仲有頭先間兵工廠嘅地面...」綽姿再碌碌我部電話，「貨倉裡面...貨車...啲一箱箱嗰啲都係掃唔到。」
黑...黑色嗰啲...呢啲都係掃唔到？
「除咗呢兩個地方，仲有解放軍基地都係...都係有啲地方係掃唔到。」綽姿點點頭。
『解放軍基地都係？！』邊...邊個位置？
「嗯...」綽姿又點點頭，「當我哋落到地下室...一入到黑色鐵閘之後...你又冇睇過？」
『呃...冇吖...』都係嗰句啦...無啦啦點會開嚟睇姐...
「唉...」綽姿擰擰頭，「我一直都覺得奇怪...點解解放軍會有同我哋SPIRIT有關嘅設備？」
『吓？同我哋SPIRIT有關嘅設備？』咩設備吖？
「你又冇留意到吖？都成兩個幾禮拜啦...」綽姿冷眼打量住我。
『我...』我又要留意到啲乜吖...
「唉...」綽姿又擰擰頭，「我哋嘅電話同精神刀柄都係掃唔到。」
『吓？』係咁㗎咩？
「仲有長袍都係...你而家試試。」綽姿冇我咁好氣。
『哦...哦...』我就開個掃瞄掃一掃...
一掃到去我同綽姿身上...
『都係黑色！』真係黑咗...『我只係以為...以為係黑色...所以先顯示黑色...』
「連係黑色定掃唔到都唔識分...」綽姿又無奈咁擰擰頭，「其實只要係同我哋SPIRIT有關嘅物件，都係掃唔到。」
咩姐...咁真係差唔多咋嘛...
「我就好奇...點解解放軍會有我哋嘅材料...去整設備...」綽姿諗一諗...
『其實都唔出奇...而家我哋都知道...解放軍同國安局都同我哋SPIRIT有交易...話唔埋...呢樣就係佢哋嘅交易內容。』我呢個分析算有水準掛？
「嗯...的確...」綽姿點點頭，「呢啲材料好有可能係我哋SPIRIT俾佢哋...咁佢哋又俾咗啲乜嘢我哋？」
『錢囉～』我估～
「就係咁簡單？」綽姿一面困惑咁打量住我。
『我哋係僱兵吖嘛～唔係為錢...為乜～』唔係咩？
「唔...」綽姿諗一諗...
其實...我都覺得唔係咁簡單...