《香港傭兵》: [Day 16－秘密情報] PART 09
望住梓翹一邊帶住微笑望住我，一邊行去櫃檯放低錢：「咁啱吖？」
『嗯～咁啱～』都真係幾...啱...
「連梓翹都嚟埋...」雨姐收好櫃檯上嘅錢，「今日真係熱鬧～」
梓翹就帶住微笑行到嚟我哋身邊，打量住日倫：「唔介意一齊坐吖嘛？」
日倫都帶住微笑：「唔介意～一齊坐。」
當梓翹一坐低...
『呃...呢位係...』我都未將梓翹介紹俾日倫識...
「梓翹？你好～我叫日倫。」日倫就自我介紹。
真係好～唔使我開口～
其實我都幾怕介紹嚟介紹去～
總係覺得好鬼麻煩又好鬼尷尬㗎嘛～
「你好吖～」梓翹又帶住微笑向日倫點點頭，「飛揚嘅朋友？」
日倫又帶住微笑：「正確嚟講係飛揚細妹個朋友～」
「哦～飛揚細妹嘅朋友...」梓翹帶住微笑點點頭...
就喺呢個時候...
「Espresso～凍嘅Latte～熱嘅Latte～」雨姐就將三杯咖啡放喺我哋面前，「嘢食要等多陣吖～Owner吖！快手啲得唔得㗎？！」
「快緊啦...快緊啦...」Owner就喺櫃位入面嗌出嚟，「慢工出細貨吖嘛...」
「手腳慢就手腳慢啦...你哋再等等吖～」雨姐唔好意思咁笑笑口，點點頭。
『哦哦...慢慢～唔急～』飲住咖啡先都應該OK嘅...
等雨姐行返入櫃位之後，梓翹拎起杯Latte飲一啖：「你唔似係呢區嘅人喎...」
「我？」日倫都拎起杯Espresso飲一啖：「我喺市區入嚟嘅～乜我真係咁唔似呢區嘅人咩？」
梓翹諗一諗：「喺呢區生活嘅人...總係有呢區嘅氣味...」
氣味？
我聞一聞自己身上...
有咩氣味？
「咁你呢？」日倫打量住梓翹，「你係喺呢區生活嘅人？睇你同呢間咖啡店都好熟喎。」
『係吖係吖～』我都插吓嘴先，『梓翹同呢間咖啡店都真係幾熟㗎～我都係佢先有機會喺呢度返Part Time咋～』
「都係㗎～」梓翹點點頭，「你睇人好準㗎？」
日倫帶住微笑擰擰頭：「五十五十啦～」
「咁...」梓翹打量住日倫，「你仲睇到啲乜嘢？」
日倫眼定定咁望住梓翹...
梓翹又眼定定咁望住日倫...
「嘢食到～嘢食到～」雨姐就拎啲嘢食放喺我哋面前，「甜品後上～甜品後上～」
『唔該雨姐～』有嘢食～有嘢食～
「慢用喇～慢用喇～」雨姐後退兩步再轉身，「輝哥你抹完嗰張檯未吖？抹到穿喇！抹第二張啦！」
「係係係...」輝哥就行去角落抹另一張檯。
『梓翹～你食咗嘢未吖？餓唔餓吖？食啲吖～』我見份份都有兩件～仲幾大件～真係幾抵食～
員工價就扺食姐～正價就真係唔知喇～
「唔使喇～」梓翹帶住微笑擰擰頭，「我唔餓～你哋慢用啦～」
『咁我哋開餐喇～開餐喇日倫～』我唔客氣喇～～～
「嗯～我唔客氣喇。」日倫細味一口火腿芝士脆多，「嘩～好好味喎～」
『嗯嗯～』我都大大啖咁咬一口火腿芝士脆多，『超正吖～～～』
「係吖～」梓翹帶住微笑點點頭，「呢度啲嘢食...係特殊區最有質素...係唯一綠洲。」
『啱吖啱吖！話係避世嘅好地方都冇誇張吖！』出面實在太過險惡喇！
「嗯～」日倫邊食邊點點頭，「雖然我唔係成日入嚟...不過都未遇過一個好似呢度咁舒服嘅地方。」
「舒服...」梓翹諗一諗，點一點頭，「的確...成個特殊區都係地獄。」
『啱吖啱吖！根本就係地獄！』個火腿芝士脆多真係好火腿～好芝士～仲要好脆～
梓翹打量住日倫：「有乜驅使一個身為市區人嘅你...久唔久都入嚟地獄？」
「冇㗎～」日倫帶住微笑擰擰頭，「都係入嚟探吓飛揚個細妹啦～」
梓翹飲啖Latte：「咁你哋嘅感情都幾好喎～」
感情都幾好...
嗱！唔止雨姐同我㗎！就連梓翹都係咁覺得㗎！
「OK咁啦～」日倫諗咗一諗，「話唔定我同你都可以好好感情～」
嘩...好似講到咁HeHe咁嘅？
「或者啦...」梓翹飲多啖Latte...
嘩...講到咁隱晦咁嘅？
唔得吖...唔得吖...個氣氛充斥住HeHe吖...
『吖～係呢梓翹～又會咁啱喺度撞到你嘅？』都係隨便搵啲嘢講吓...
「係吖～」梓翹又帶住微笑望住我，「咁啱咖啡癮起～就想走過嚟飲杯咖啡～然後又咁啱遇到你哋～真係咁啱囉～」
『哈哈...真係咁啱喇...哈哈...』突然諗起古天樂一句名言...“咁多意外就唔係意外...”...
日倫飲啖Espresso，帶住微笑打量住梓翹：「偶然之必然...」
梓翹眼定定望實日倫...
偶然之...必然？
「偶然之必然...」梓翹帶住微笑點點頭，「好有意思～」
「哈哈～」日倫尷尬一笑，「邊係有意思呢～我都係隨口噏咋～」
「隨口噏都咁有意思...」梓翹帶住微笑打量住日倫，「你呢個人...相當有意思～」
日倫打量住梓翹：「識到你咪仲有意思。」
梓翹同日倫互相對望...然後...
「嘿嘿～哈哈～」大家都輕輕一笑～
梓翹再飲埋最後一口Latte：「我都差唔多要走喇～」
『哦...要走喇...』真係嚟飲杯Latte咋喎...
「嗯～」梓放低杯咖啡就起身...
日倫帶住微笑望住梓翹：「下次見～」
梓翹都帶住微笑望住日倫點點頭：「下次有機會再見～」
『拜拜喇...』我望梓翹揮揮手...
「拜～」梓翹揮揮手～
「走喇？」喺檯位入面嘅雨姐都同梓翹揮揮手～
「嗯～差唔多時候～要走喇～拜～」
「慢行喇～拜～」
大家都目送住梓翹拉開木門...
“叮 叮”
離開咖啡店。
「梓翹呢個人...真係好特別。」日倫一邊飲啖Espresso，一邊諗諗...
『嗯...都真係好特別...我都係因為佢...先有機會生存落嚟...』唔係遇到梓翹嘅話...我諗我已經死咗喇...
「嗯？」日倫疑惑咁打量住我。
『嗯？哦！喺我嚟到呢個絕望嘅地獄...俾我遇到識發光...好似救世主嘅佢...』講到好似Gay Gay地咁添...
「嗯...」日倫諗一諗，點點頭，「又會真係咁...橋...」
『係咯...又會真係咁橋～』有好多嘢真係好難講...
好多嘢都好似..冥冥中自有主宰...
行過嘅路...遇過嘅人...發生過嘅事...
好似係偶然...但其實係...必然...
呢啲就係...偶然之必然？
同日倫邊食邊飲邊傾...
“叮 叮”
越嚟越多人...
“叮 叮”
越嚟越多人客入嚟...
“叮 叮”
仲要大部份都係女仔...
“叮 叮”
絕大部份都係年輕貌美...
又可以大飽眼福～
而Owner、雨姐同輝哥都做到冇停手。
「黑森林同Blueberry Cheesecake～」雨姐放低兩件甜品。
『唔該雨姐～今日好好生意喎～』我都橫視身邊幾張檯...個個都係靚女～
「係吖係吖～呢兩日都好好生意～一到下午就座無虛席～仲諗住放假先多人姐～點知今日星期一都係咁多人～」雨姐無奈咁笑笑口～
『係吖...原來呢兩日都係咁多人吖...』之前聽啲女仔講知道西貢獻命會捉女仔...都係少啲出街...
而家又大安旨意咁...
唔通自從嗰晚...逆行者掃咗西貢獻命個貨倉之後...
「唔講住喇～要去做嘢先喇～嚟緊嚟緊～」雨姐急急腳咁行返入檯位收錢。
『真係估唔到...』真係咁？
「嗯？」日倫食住黑森林打量住我。
『哦...冇～估唔到今日咁多人咋嘛...』真係關事？
「嗯...呢度啲嘢好食有水準～自然就吸引唔少人嚟幫襯。」日倫邊食黑森林邊點點頭。
『嗯...都係...』或者真係關事...
話時話，自從片翼搵過我哋...親自交個強迫委託俾我哋之後...綽姿就話唔好再理西貢獻命嘅事咁多...
呢幾日仲要喺市區出面執行委託...
真係唔多清楚特殊區呢邊嘅情況...
只係幾日...變化有咁大？
唔知啦～
喺動盪不安嘅年代...日日都可以有極大改變...
追少一日...都跟唔上劇情發展...
同日倫坐多陣，享用埋件美味蛋糕之後...
「都差唔多喇～呢度越嚟越多人，應該要交返個位出嚟。」日倫飲埋最後一啖Espresso。
『嗯嗯...都係吖～我哋都坐咗好耐～』不知不覺又坐咗兩個幾鐘～『跟住你想去邊？』
「跟住吖...」日倫諗一諗，起身，「出到去再諗～」
『嗯～都好～』我都起身，同Owner佢哋揮揮手，『我哋走喇～』
「慢行喇～」Owner佢哋都同我哋揮揮手～
“叮 叮”
行到出嚟，再行前多幾步，日倫回頭望一望Today Coffee：「真係一間好特別嘅咖啡店。」
『係吖係吖～冇介紹錯呢？』我呢個嚮導都算稱職掛～
「嗯～」日倫帶住微笑點點頭，繼續向前行。
『係呢～跟住落嚟你想去邊呢？』我都跟喺日倫身邊行。
「跟住落嚟...我諗都應該差唔多...」日倫諗一諗，點點頭，「接綽姿放學。」
『接綽姿放學？』原來...日倫係想...
「嗯～」日倫帶住微笑點點頭，「而家行過去...應該差唔多。」
『哦...好～』話時話...同綽姿一齊生活咗咁多日，我都未試過接佢放學...
我呢個做哥哥嘅...係唔係唔係咁稱職呢？
跟住日倫身邊行...
橫過冇車嘅馬路...
行上樓梯...
途經破爛嘅大會堂...圖書館...
行落滿牆都係塗鴉嘅行人隧道...
然後一直行...喺接近荒廢嘅行人小路一直向住綽姿間學校行...
唔使幾耐...就行到嚟綽姿間學校門前...
『係呢...你又知綽姿讀呢間嘅？』其實我又有啲好奇...
其實一路上，都係由日倫帶路。
我只係跟喺日倫身邊行。
就係想睇吓佢係唔係真係知綽姿讀邊間。
又真係估唔到...冇任何疑問就行到嚟綽姿間學校門前...
係之前已經嚟過搵綽姿？
「今日嚟搵你哋之前，行過呢頭睇過～見綽姿校服個校章同呢間學校一樣，就知係呢間。」日倫指指掛喺學校牆身嘅校章。
『哦...』嘩真係眼利...
唔好話我有冇留意過綽姿件校服個校章（我淨係留意佢著校服㗎姐）...同綽姿生活咗成個禮拜先留意到佢讀呢間...
仲要係因為我一直都喺屯門生活...先認得綽姿套校服係呢間中學...
而日倫只係喺嚟搵我哋之前，行過呢頭睇過...又望咗綽姿個校章一眼...就認得係呢間學校...
真係犀利...
呢啲就係調查型行者嘅能力？
我同日倫就企喺學校門前等...
見到有唔少學生都由校門行出...離開學校...
學生妹吖...好多學生妹吖...
企喺學校門外𥄫學生妹吖...真係好似變態佬吖...
唔好咁變態啦屌...接細妹放學姐...
之但係一個又一個純情學生妹喺我面前行過...擦身而過...好難控制到對眼唔𥄫囉...
過咗一陣...又過咗一陣...我望到有兩個嬌小嘅身影...由校門行出嚟...
呢兩個熟識嘅嬌小身影係...綽姿同茵婷...