《香港傭兵》: [Day 17－四出搜尋] PART 07
我收起精神刀，轉身一躍！
跳上上一層！
「嘩嘩嘩！」圍觀嘅戰地記者紛紛嘩然！
再借勢一跳！跳上上一層！
「嘩！嘩！」
然後我就再用力一跳！喺眾人頭上飛過！飛向大門方向！拔足狂奔！
無視身邊所有嘩然驚訝嘅旁人！以忍步跑出東薈城！
出到出面都仲係有好多人！
雖然佢哋好似唔知發生咩事，但見到有我呢個黑色身影跑得咁鬼快，總會驚訝！
我就向住冇人嘅方向跑...以忍步喪跑！
但邊個方向先冇人？
而家個個方向都係人頭湧湧！
邊度呢？應該向邊個方向跑呢？
唔好理喇...向山邊方向跑啦！
我向住山邊方向，以忍步全力跑！遠離建築物！
啱㗎喇...嗰邊應該冇乜人...除咗360之外...
我望住遠處嘅纜車，跳上燈柱！跳上巴士車頂！再跳上燈柱！
飛簷走壁咁盡量避開耳目！終於都跑到嚟山邊！跑入樹林！
再喺樹與樹之間又跑又跳！成個火影忍者咁再走得入啲！再入多少少...
『我諗...應該差唔多喇...』我企喺大樹旁邊，回頭一望...
已經離得都算遠...呢邊應該冇乜人會走入嚟...
最接近嘅...都應該係得360纜車...
不過我估...上面嘅遊客都留意唔到我...
咁我而家應該點做？
喺呢度等深層睡眠？
唔係咁慘吖化？唉...
我而家呢一身行者裝束，就算係揭返開頂帽，拉返個衫領落嚟，都比較異相...
況且頭先有咁多人見到...咁多戰地記者又拍片...又開Live咁...
唔係啦...上網睇睇先...
我拎部電話出嚟，上網搵搵...
應該搵咩呢？
應該...
『東薈城...槍...』我淨打咗呢四隻字，就幫我搵咗一堆相關新聞出嚟！
隨便咁睇睇...都係“剛剛”...“東薈城槍戰”...“東薈城發生械劫案”...“東薈城金舖械劫案”...“東薈城警匪槍戰”...“東薈城械劫案現場”...“東薈城械劫案影片”...“東薈城槍戰Live”...
有好多都係殘體字...我就直接無視...
我都係主要留意返...繁體...
碌多兩碌...然後唔使幾耐...就俾我見到...
『東薈城械劫Live驚現黑衣人！』搵到喇！
我立即撳入去睇！
影片一Load，就Load出影住頭先嗰四個持槍匪徒同警察對峙！
然後就係第五個持槍匪徒喺金舖拉咗個小妹妹出嚟！
嘩！段片又超級清！仲要冇手震！十足十睇緊電影咁！
唔係...香港電影都冇佢拍得咁有水準！真係戰地記者嚟㗎喎！
然後就係個爸爸喺金舖門前...又跪又拜個挾持緊個小妹妹嘅匪徒！
個鏡頭仲要Zoom過去個爸爸面上！
睇得好清楚！仲要真係震都唔震吓！
但點解...冇聲？
我一睇...先知原來靜撚咗音！
我屌...以為有畫冇聲咁撚柒...原來最柒嗰個係自己...
我一開返聲...
“砰砰砰砰！”班匪徒就亂開幾槍！
嘩屌！嚇撚死人咩？！
然後我就喺段片聽到...
「嘩！開槍呀又！」
「嘩屌！班警察做乜撚㗎？衝過去救人啦！」
「屌你老母班差佬唔係淆吖？俾支槍我！等我搞掂！」
「喂我話嗰個老豆死硬囉！」
「唔好話個老豆死硬，個細路女都死硬啦！」
果然...香港花生友係世界第一...
然後...畫面裡面出現一個黑色身影！紅光一閃之下，從後將挾持住小妹妹嘅持槍匪徒一分為二！
出場喇！睇咗咁撚耐，終於都輪到我呢個主角出場喇！
「嘩！咩嚟㗎？！」
「嘩！係人嚟㗎？！」
畫面Zoom返後少少，同時影到我用長袍遮掩住個小妹妹...再順勢一個轉身！將身後嗰兩個持槍匪徒都一分為二！
我定一定格...將段片停一停...
等等先...真係唔係講笑...拍得好清...
好清楚咁拍低我...笠起帽...塊面漆黑一片...全身黑色行者長袍...
雖然影唔到我身上有紅色粒子...但就連黑色嘅暗花都影得好清楚...
唔單止身上...就連手上...紅光刀刃...
真係估唔到...就連精神刀嘅紅光刀刃...都會被拍攝喺鏡頭之中...
接住落嚟就係...
“砰砰砰砰！”剩餘嗰兩個匪徒向我開槍...
畫面所見，喺我面前有一層薄薄嘅紅光...
然後嗰兩個匪徒頭顱就飛到半空中...
身體倒在地上...
頭顱都跌落地上...碌咗兩圈...
我再回返轉頭，逐格逐格咁重播...
雖然話仲未可以影到我揮刀擋子彈嘅情況...
之但係...都叫影到紅光刀刃嘅殘影...
仲有嘅係...原來係影唔到刀氣...
不過已經夠晒型啦～
仲唔夠型吖？拍到咁鬼清楚仔細...真係型過龍喇...
點算...拍得咁清楚...我而家就咁走返過去，實俾人認出啦...
淨係單單呢段片，都已經有五百幾萬個Views喇...
我唔知而家香港有幾多人啦...我諗最少都有過半香港人睇咗呢段片啦...
個View數仲要急速增加添吖...
唔止吖...仲要勁多留言吖...
啲留言講乜？
“嘩！係唔係真㗎？拍戲咋嘛？”...“嘩！香港都有咁大製作？”...“屌你堅㗎！有冇睇新聞㗎？”...“嘩！咩人嚟㗎？！”...“嗰把係唔係激光劍嚟㗎？！”...“Star War吖？Jedi？”...“把激光劍好似武士刀咁㗎喎！點會係Jedi吖？”...“好撚型棍呀屌你！”...
今次真係麻煩...
再睇返...有好多同類型影片...
有唔同角度唔同高度四方八面都有...
條條都好高質...好清楚...好細緻...
而當中仲有新聞頻道Live緊...
我就撳一撳入去睇睇...
畫面一轉，就影住個接受緊訪問嘅潮友：「係吖係吖！係有個黑衣人Fing Fing Fing Fing！班賊就散晒喇！」
個潮友仲要手舞足蹈咁...但講嘢就1999...
口手唔可以並用就咪撚郁手郁腳啦屌你個嘴...
另外一個大叔就爭住講：「緊係唔係咁啦！我睇住有個黑影由嗰層...」
鏡頭立即影住上一層...
係頭先...我同羅羅食嘢嗰間連鎖咖啡店...
「超一聲就飛到落個匪徒背後！」
鏡頭立即影返金舖門外...
「同時間個匪徒分開咗兩件！初時都唔知咩事㗎！係當個黑影一轉身！後面嗰兩個匪徒都分開兩件之時，我先見到原來係一個黑衣人拎住把紅色激光劍斬開佢哋！」
咦喂！呢個阿叔又講到有板有眼咁喎！
「跟住點？跟住我咪見仲有兩個匪徒向佢亂槍掃射！然後個黑衣人好快手咁揮刀！」個阿叔又手舞足蹈...
「係！我好肯定佢係揮刀擋子彈！雖然好快！快到肉眼都睇唔到！但我可以好肯定好肯定！」個阿叔一邊手舞足蹈...一邊點點頭...
「跟住嗰兩個匪徒個頭就飛到半空中！身體跌落地！個死人頭都跟住跌落地上！碌咗兩圈！雖然睇唔到有刀氣飛出嚟，但我可以好肯定係用刀氣砍甩嗰個兩匪徒個頭！係！我可以好肯定！個距離咁遠喎！」個阿叔又扮晒橫斬咁...
嘩我屌！真係唔可以低估啲阿叔！
呢個阿叔嘅觀察力同FF力都屬頂級喎！
「之後？之後佢交返個細路女俾個爸爸之後，就一跳！跳咗上去！再一跳！跳上上一層！跟住就唔知走咗去邊喇...」
鏡頭一轉，就影住對...父女！
係頭先...我救嗰對...
「我哋搵到剛才被救嗰對父女！我想問下當時情況係點㗎？」支咪就指向爸爸...
「當時...當時好危險吖...」爸爸抱住囡囡，面上仲帶住緊張，「我諗...嗰時我諗住死緊㗎喇...」
「不過好好彩...好好彩有個黑衣人突然出現救咗我哋！真係我哋嘅救世者！」
救世...者...
「阿囡阿囡～講多謝吖～」
「多謝哥哥～」
望住個小妹妹...仲有少少花容失色...但都帶住微笑講多謝...
畫面一轉，就轉咗去...影住一名警察...
個警察睇嚟都幾大粒咁...
個警察回應記者嘅提問：「剛發生嘅金舖械劫案係有...五死...五個都係匪徒...冇警員傷亡...亦都冇平民傷亡...」
當然記者根本就唔關心呢啲嘢...
記者關心嘅係...我係咩人...
記者們異口同聲都係問黑衣人係咩人？咩來歷？
個警察繼續回答：「我哋冇呢方面嘅資料...唔清楚...我哋唔清楚黑衣人係咩人...仲有待調查...唔屬於我哋警方任何一個部門...始終殺人係嚴重罪行，唔理佢因咩事殺咩人，我哋警方都一定會全力追查同緝拿。」
今次真係唔止麻煩...仲好撚煩...
先唔好理班廢柴警察根本就係講廢話...
我哋SPIRIT一直都同警方有合作，佢哋上頭一定唔使佢哋做啲乜...查啲乜...直頭乜都唔使理...
而真正麻煩嘅係，資訊嘅傳播速度真係相當驚人...
短短十分鐘左右，已經傳遍整個網絡...
就連記者都咁快趕到...仲已經做埋訪問...
真係好撚煩...已經唔使旨意可以就咁著住件行者長袍行出街...
唔止我一個...其他行者都係...
長袍上嘅黑色暗花都影得咁清楚...其他行者就咁著長袍行出街，實吸引途人目光！
仆街喇...會唔會有乜懲罰㗎？
就喺呢個時候...
“嘶...嘶...”我聽到好似有人由草叢之間行緊過嚟...
『邊個？』我立即提高警覺，望向草叢！
我就望到...有個嬌小嘅黑色身影...由草叢行出嚟！
呢個嬌小嘅黑色身影係...
『羅羅？！』
羅羅拎住...我件黑色大褸，行到嚟我面前：「唉～使唔使走到咁遠...仲要走嚟山邊...攰死我喇～」
『呃...你...你點知我會喺度㗎？』喂...我冇通知到羅羅㗎喎...
「間諜程式吖嘛～我用間諜程式追蹤你嘅位置嘅～上次梁綽姿都未將你電話裡面嘅間諜程式全部清除～」羅羅古古惑惑咁笑笑口～
『吓？』乜係咁㗎咩？
咁仲有幾多個間諜程式吖？
係唔係我去到邊，羅羅都可以搵到我㗎？
咁我電話裡面嘅所有嘢，又係唔係知得一清二楚吖？
「你呢個人真係好特別～係就係好有正義感喇～不過搞著自己...值得咩？」羅羅又古古惑惑咁打量住我...
正義感...搞著自己...
「我哋SPIRIT係要低調...你吸引咗全世界嘅目光都算喇～仲要用埋身上唯一一支精神液...話唔定係呢區唯一一支添吖～」羅羅仲係古古惑惑咁打量住我...
唯一一支...精神液...
「逞一時英雄...值得咩？」羅羅仲係古古惑惑咁打量住我...
逞一時...英雄...
『我唔知咩係值得...咩係唔值得...價值點樣定...我的確唔係一個稱職嘅行者...之但係...我總算做到自己想做嘅事...』
冇錯...無私奉獻拯救與自己無關冇利益冇得著嘅人...違背SPIRIT嘅方針...
之但係...總算做到自己想做嘅事...
「你真係一個好特別嘅人...」羅羅帶住微笑打量住我，再掉件大褸俾我，「著返佢啦～」
『哦...』
「我同你去酒店先～」
『吓？』
「我呢邊就真係冇落腳嘅地方喇～只好帶你去酒店啦～你好易又唔知幾時突然又進入深層睡眠㗎嘛～」
『嗯...』
「咁就跟住嚟啦～」
『哦...』