「有得食喇~」阿月將兩碟早餐都放喺餐檯上~

『好似好正咁喎~』我都行近餐檯,一邊坐低~一邊欣賞住餐檯上,阿月親手煮嘅西式早餐~

「梗係正啦~阿月出品~必屬精品~」阿月再拎埋包牛奶放喺餐檯上~對住我嚟坐~

『哈哈~或者係...太耐冇食過你親手煮嘅嘢...』或者...太耐冇食過人食嘅嘢...

「你咁講即係咩意思吖?」阿月對我莞爾一笑,「即係想話我平時少煮嘢食啦?」



『唔係唔係~』我立即向阿月揮晒手~擰晒頭~『我嘅說話之中,邊會有意思喺裡面吖~你唔好咁敏感啦~』

「哈~係咩係咩?」阿月冇我咁好氣~拎起刀叉準備開餐~

我都拎起刀叉...但又唔捨得落手...一直只係痴痴迷迷咁欣賞住餐檯上...煎雙蛋...腸仔...火腿...

好似一個笑面咁...

真係好...真係太好...



「點吖你~煮個早餐你食姐~使唔使咁感動吖?」阿月含住條腸仔,對我莞爾一笑~

『有你真係好...只有你喺我身邊嘅日子...先係最幸福嘅人生...如果沒有你...日子好難過...』我含著淚水...望實對我莞爾一笑嘅阿月...

「嘩~口甜舌滑都唔止~仲要雙眼水汪汪咁~溝死晒啲𡃁妹仔啦~」阿月又古古惑惑咁莞爾一笑~

『邊...邊有姐...』我總係覺得阿月心中充滿住陰謀...

好似又唔知想恥笑我啲乜咁...



「嘿嘿...仲話冇仲話冇~睇你個尷尬樣~嘿嘿...」阿月仲係古古惑惑咁對我莞爾一笑~

『冇吖冇吖冇吖...食嘢食嘢食嘢...』唔好再俾阿月咁樣望住...明明冇做過虧心事...但都真係俾佢望到心都虛埋...

「冇囉冇囉冇囉~食嘢囉~」阿月又莞爾一笑咁繼續食腸仔~

我都一邊品嚐住阿月嘅廚藝...一邊欣賞住阿月嘅美麗...

「喂點吖你~又話食嘢~又眼都唔眨咁望住人~」阿月又莞爾一笑咁打量住我~

『望住你同食嘢係冇衝突㗎喎~對眼望住你同時個口食嘢係Work㗎喎~』我一邊咬條腸仔~一邊望到阿月實一實咁~

「嘩~一心二用喎~勁喎~」阿月一邊含住條腸仔嚟咬~一邊俾個叻叻我~

『梗係~今時唔同往日吖~』我又扮晒叻叻豬咁~



「係喇係喇係喇~難得今日有假放...想去邊吖?」阿月又冇我咁好氣咁~轉移個話題~

『想去邊吖...梗係你話事啦~你想去邊,我就陪你去邊~』難得今日放假~難得又可以陪阿月...

「我想...」就喺阿月含住隻叉,眼仔碌碌咁諗諗之時...

“And you don't seem to understand”

電話響…

我望望身後張茶几...望到自己部電話響緊...

“A shame you seemed an honest man”



咁早邊鬼個...

我就行去茶几拎起部電話一睇...

“And all the fears you hold so dear”

『係肥豬...』我立即滑動解鎖接聽,『老細?』

「喂飛揚你而家得唔得閒?」肥豬腦細急住咁問。

『我而家?得嘅...』又做乜鳩?

「得就啱喇吖葉總話今日得閒傾你去搵佢啦。」肥豬腦細一輪嘴咁。

『今日?唔得喎...』傾乜春吖搵佢老母咩...



「你又話得閒?」肥豬腦細反問返我。

『放假吖嘛...梗係得閒㗎...』屌你我都開咗成個月星期六OT啦...難得有得放返假...你又要我去見客?!

「但葉總話今日得喎...」肥豬腦細仲要扭。

『佢今日得係佢嘅事啦...我今日放假嘅...』我就打死都唔撚妥協!

「咁...咁...」我冇等肥豬腦細繼續咁落去...

『再唔係你自己見囉...啲文件喺我檯面咋嘛...』屌你間公司係你嘅...我就打工㗎姐...同你賣命吖?

「唉咁算啦...你遲幾日先再同佢傾啦...」肥豬腦細冇我辦法...



『嗯...冇嘢喇嘛?』冇嘢就唔好阻鳩住我放假...

老老柒柒我肯聽你電話都算係咁...

「仲有仲有...你星期一早少少返公司開門喎!有人送電腦嚟...」肥豬腦細冇嘢搵嘢嚟提...

『送電腦嚟...』送咩電腦嚟?

「係吖...俾我個世姪女用㗎...你記唔得我尋日同你講過佢星期一會嚟返工喇吖?」肥豬腦細再提一提我...

『記得...記得...』其實我已經唔撚記得...

好似係...喺我忙到成隻狗咁嗰時...肥豬腦細臨走同我講咩下星期有個世侄女嚟返工...跟我嘅...人地喺咩咩大大老闆最錫嘅孫女...咩掌上明珠諸如此類咁啦...

「部電腦嚟到你就搞掂佢先啦~到我個世姪女上到嚟再介紹~」肥豬腦細再講多兩句...

『嗯...得喇...』冇嘢喇嘛?冇嘢就收皮啦...

「好啦...係咁啦...」

『嗯...拜...』

Cut鳩肥豬腦細電話後,就放返低部電話,坐返喺阿月面前...

「你唔同咗喎~」阿月含住隻叉~古古惑惑咁打量住我~

『吓?』有咩唔同咗吖?

「你一向唔識得Say No㗎~」

我一向...唔識得Say No?

「你一向...老細打嚟要你做乜就做乜㗎喎~」

腦細打嚟要我做乜就做乜...

『哈...呃...或者真係...真係唔同咗喇...』真係...真係有啲唔同...

「哦?」阿月一頭問號咁...

『或...者...』我都未將要講嘅說話講出口...

我嘅聲音...變得越嚟越慢...慢慢停落嚟...定格一樣...

整個空間都停頓落嚟…整個空間都變成灰色...分裂...

分裂到阿月一頭問號...望住我...期待嘅眼神之中...粉碎...飄散...

當我再次有意識之時...再次睜開眼之時…

『或...者...天...』天花板?

我...我又...夢醒...

「醒咗喇?」係姿綽把冷淡聲。

『嗯...醒咗喇...』我坐起身,望一望...開放式廚房...

淨係著住白色吊帶背心同白色底褲嘅綽姿就背住我...煮緊早餐...

我瞓咗幾耐?

好似又...瞓咗好耐咁...

「你去梳洗先。梳洗完有得食。」姿綽一邊背住我煮早餐,一邊講。

『哦...好好...』我都去拎返啲乾淨衫行入廁所。

“灑!”一邊梳洗...一邊諗返尋晚...

尋晚趕過去Today Coffee還返張通行證俾梓翹之後...再傾多陣...

然後都夜喇...梓翹話係時候返去...雨姐都差唔多收好舖...

然後...我就拎住啲精神液返到嚟...

然後...綽姿睇過啲精神液...好似都幾滿意...問我幾多錢...

我又真係老老柒柒咁同佢講因為我救咗神秘商人,所以佢送咗啲精神液俾我...

綽姿只係皺咗一下眉...然後就話都夜喇...瞓醒先再講...

尋晚大致上...就係咁...

梳洗完出到嚟...就見到綽姿已經著好校服...對住梳妝檯上塊鏡仔梳頭。

『換咗衫喇?』我望住綽姿嘅背影...望住佢對已經著上灰色學生襪嘅腳仔...

「嗯。今日要早少少出門...所以要爭取時間。」綽姿梳好頭之後,就行返埋餐檯...坐一坐低。

『哦...』我都坐喺綽姿面前...

冇得幫綽姿著校服...有啲失落添...

望住餐檯上...面前碟綽姿為我煮嘅早餐...總係有種...溫馨...窩心嘅感覺...

總係搞到我...有啲眼濕濕...

「做咩吖你?」綽姿冷眼咁望住我。

『冇...冇...有啲感動咋嘛...』真係...真係好感動...

呢種感動係由外到內...又由內向返外散發出嚟...

「唔好搞到咁感動好唔好...」綽姿冇我咁好氣,開餐,「尋晚你咪話...救咗神秘商人...係咩一回事?」

『係吖係吖...我去搵神秘商人嘅時候,咁啱遇到有行者同逆行者大戰緊!我咪出手幫佢囉!點知原來係神秘商人!不過佢就趁機逃走...留返我一個同逆行者打...』我都未講完...

「你咁都死唔去?」就被綽姿打斷。

『喂你係唔係真係咁想我死姐?』次次都係咁㗎喎...

「唔係...只係咁多次你都死唔去,我有啲好奇姐...你唔好成個女人咁啦...」綽姿切舊腸仔放入口,含住隻叉。

又話我成個女人咁...

『其實我都唔知吖...總之最後...我係被神秘商人帶到去賓館深層睡眠...』完全唔似係我救咗神秘商人...

「嗯?唔使講又係不知不覺又突然進入深層睡眠啦...」綽姿冷眼望住我,「咁又話你救咗神秘商人嘅?」

『我真係唔知...只係知醒返之後,神秘商人話我出手救咗佢...佢就送啲精神液俾我做回禮咁囉...』係吖...係神秘商人話我救咗佢咋...

「唔...」綽姿又含住隻叉,冷眼打量住我。

『做咩姐?唔信吖?咁係咁吖嘛...』我都係將我所知嘅嘢講出嚟姐...

「唔緊要啦。反正都唔重要。啲精神液質素唔錯。」綽姿飲杯奶,點點頭。

『係吖?咁今日...你要我做啲乜?』我都係唔好咁多廢話...

「今日...」綽姿諗咗一諗,「本來諗住有精神液喺手,就接啲委託做,賺返啲Sil。之但係...冇啲貴嘅委託。」

『貴嘅委託?』即係危險性高啲嘅委託?

「嗯...淨係得返啲愛港愛國捉拿黃傘嘅平價委託冇人肯接...好唔化算...」綽姿擰擰頭,又切塊火腿放入口。

愛港愛國捉拿黃傘嘅...都係平價委託?

之但係...黃傘同逆行者...好似都有啲關連...都應該危險㗎喎...

「而特殊區呢邊...就連一個委託都冇...」綽姿又諗一諗...

『會唔會係因為...同精神液大缺貨有關?』由於精神液大缺貨...所以冇咁多委託放出嚟俾我哋接...

「唔會。」綽姿又飲啖奶擰擰頭,「SPIRIT本身係唔會理會精神液嘅貨量...之前都有試過精神液大缺貨...維持咗差唔多一個禮拜。嗰次就喺頭一兩日就開始...啲委託多到冇人接。仲有好多都係啲貴價委託。」

原來...之前都已經試過精神液大缺貨...

「與其話SPIRIT唔會理會精神液嘅貨量...」綽姿又邊食邊諗,「不如話佢哋要行者自行判斷邊啲委託係喺能力範圍以內...又值一得接。」

『嗯...都啱嘅...我哋SPIRIT一向都係咁...要喺能力同價值之間搵個平衡...再加上利用其他行者...確保能夠全身而退...又可以獲得最大利益...』我已經深明呢個行者之道...

「嗯...你總算有進步。」綽姿望住我點點頭。

『不過我唔認同。』我都眼定定咁望實綽姿。

「哦?」綽姿帶點困惑。

『我始終都係覺得...認為我哋應該可以做得更多...有能力做正確嘅事。』我始終都係咁認為...

我哋有能力...應該向正確嘅方向做更多...改變更多...

我哋係正義!

「雖然有進步,但仲係咁天真。」綽姿帶住微笑擰擰頭。

笑...綽姿佢...笑...

今次係第幾次?

雖然唔係第一次見到綽姿笑...但真係唔多...

「你做乜又咁樣望住我?!」綽姿用把餐刀指住我!

『冇...冇...我冇點樣望住你吖...』我冇吖...我冇吖...我冇非份之想㗎...

「唔...」綽姿一邊半信半疑咁打量住我,一邊切隻煎蛋,「我覺得而家嘅情況係...暴風雨前夕...」

暴...風雨前夕?