《香港傭兵》: [Day 19－神秘工廠] PART 10
夜幕之下，我哋三個黑色身影就喺棟廢棄嘅工業大廈之上行...
日倫行上瓦礫，拎住部電話喺手撳撳撳...
綽姿就跟喺日倫身後行...
我見綽姿都冇拎電話出嚟，即係我都唔使拎啦～
咁好啦～繼續跟喺佢哋身後行。
沿住瓦礫行...好小心咁行...
行到差唔多到盡頭之時，日倫除件大褸...
綽姿都除件大褸，同日倫一齊將件大褸放埋一邊後，笠起頂帽，拉起衫領。
我都快快手手咁跟住做...
當一切都準備好，我哋三個都企喺危樓邊...望住條馬路。
唔...有咩好望呢？
過咗一陣...食咗一陣冷風...
“吱～”我聽到遠處...
“吱～”係...
我回頭一望...就望到...
“吱～”遠處正正就有隊銀色巨型貨車車隊，向住呢邊駛緊過嚟...
“吱～”好幾架銀色巨型貨車喺我哋下面...面前經過之後...
日倫同綽姿一跳！就跳上其中一架銀色巨型貨車嘅車頂！
嘩屌又講都唔講聲！
我都立即跟住跳！好彩及時趕得切跳到落綽姿身邊！
“吱～”雖然話巨型貨車都開得幾快...之但係精神化之下嘅我，都仲可以企得好穩！
而日倫就企喺最前，拎住部電話撳撳撳...
『呃...係呢...我哋咁樣企喺貨車頂...唔怕會俾啲CCTV影到咩？』你又唔好話我柒撚懵懵咁乜都唔記得吖...我仲記得巨型貨車車隊駛經嘅路線都有CCTV影晒㗎！
「唔怕...」綽姿擰擰頭，「佢喺度入侵緊啲CCTV。」
『入...』入侵緊啲CCTV？
「嗯...」日倫邊撳撳撳撳部電話，「我而家正逐部入侵...因為入侵嘅時間唔可以太長...你果然係有睇過計劃。」
綽姿冇出聲...只係望望左右兩邊。
綽姿佢...係有睇過日倫嘅計劃？
睇過咪睇過囉～做乜唔認姐～
“吱～”巨型貨車車隊一直向住神秘工廠高速行駛！
望住神秘工廠越嚟越近...越嚟越近...越嚟越接近巨型銀色圍牆...
“吱...”就喺巨型貨車開始減速之時...日倫同綽姿就向住圍牆上一跳！
喂喂...又唔講聲！
我都立即跟住佢哋跳上圍牆！
望住就嚟跳到上圍牆頂...但就好似...差少少...唔係好夠力咁...
仆街喇！真係唔多夠力添！
我雙手捉實圍牆邊！日倫同綽姿就立即拉我上去！
『唔該...唔該...』好彩有幫拖姐...
喺高高厚厚嘅銀色圍牆之上...站穩陣腳...望一望...
巨型銀色圍牆之上...都係以金屬製造...
都真係幾...滑...
不過唔怕！精神化之下，平衡力非常好！
“咔！吱！”圍牆嘅大門正在打開！
而我哋三個都居高臨下咁，望住圍牆外嘅銀色巨型貨車車隊，以慢速駛入神秘工廠！
期間仲有幾盞大射燈由遠處射向巨型貨車...
一架又一架銀色巨型貨車駛入神秘工廠...日倫同綽姿就跳落下面條鐵製吊橋！
當然我都立即跟住跳落去！
『嘩！』不過就好似大力咗少少...
綽姿一手撳住我個嘴細細聲講：「殊！小心啲得唔得？」
『嗯嗯...』一時失手姐...
日倫一邊鬼鬼祟祟咁喺鐵製吊橋上行...一邊撳撳撳部電話...
我同綽姿又小心翼翼咁緊跟其後！
我偷偷望望吊橋下...都幾鬼高...
而四周都有唔少射燈射住...又或者照嚟照去..
然後當我哋行到嚟...被一盞定點射燈射住嘅位置...
突然！盞燈移一移開！
我哋三個又鬼鬼祟祟咁經過之後，射燈再照住我身後嘅位置！
唔止嗰一盞...仲有前面幾步嗰盞...仲有就嚟掃過嚟嗰盞...
總係啱啱好照唔到我哋...
『呃...都係日倫控制緊？』我就細細聲咁問一問。
「嗯...」日倫一邊撳撳撳部電話，一邊細細聲答，「我一路入侵緊路經會遇到嘅監控系統...仲有...叫我做黑影。」
『哦哦...Sor...』真係唔習慣...總係覺得叫返名會親切啲...
繼續跟住日倫身後喺鐵製吊橋上鬼鬼祟祟咁行...
然後就跳到落一座建築物頂...鬼鬼祟祟咁行到去樓邊偷偷望落樓下...
望到喺地面都有唔少...解放軍巡邏緊！
仲要個個都Full Gear...
日倫打量住喺下面嗰六個巡過嘅解放軍士兵：「睇嚟守衛森嚴...」
『嗯...仲好似...比之前...』我唔敢講落去...望一望綽姿...
唔好唔記得日倫係調查型行者嚟㗎！對佢嚟講所有資訊都係有用情報！
我有好好記住㗎！
「嗯...」綽姿點一點頭，「比起之前...裝備有顯著提升。」
嗱～綽姿自己講出嚟㗎～即係唔怕講啦～
「我都覺得...」日倫諗一諗，「佢哋嘅裝備有啲唔同...同平時見開嘅解放軍。」
『佢哋身上嘅裝甲...手上嘅長槍...明顯更先進...』雖然我都唔係同老解有過好多次接觸...
「會唔會係...」綽姿諗一諗，又望住遠處六個巡緊嘅Full Gear解放軍士兵，「會唔會係新成立嘅特種部隊？」
「係都唔出奇...」日倫又諗一諗，「我都收集過有關解放軍嘅情報...好似話...針對特殊情況...成立特種部隊...」
針對特殊情況？
綽姿雙眼發紅光咁睥住日倫：「你又唔早啲講？」
「唔記吖嘛～哈哈～」日倫摸住頭傻笑～
真係唔記得咩？
「不過呢樣都唔係重點...重點係...」日倫遞部電話俾我同綽姿睇...
我就望到日倫手上部電話...正正就顯示緊...一幅地圖...
係我哋而家身處嘅地圖...
而地圖上...仲有六個...黑色身影...移動緊？
嗰六個黑色身影...正正就係巡緊過嚟我哋腳下...六個Full Gear解放軍士兵...
有咩問題呢？
點解日倫會覺得呢六個Full Gear解放軍士兵係重點呢？
等到六個Full Gear解放軍士兵喺腳下巡過之後...
「真係估唔到...」綽姿細細聲講...又諗一諗...
估唔到？估唔到啲乜？可唔可以講清楚啲？
「嗯...」日倫點點頭，「係SPIRIT嘅物質...」
『吓？』係SPIRIT嘅物質...『係...係喎！』
差啲唔記得...黑影絕非黑影！
係...係掃唔到！掃唔到嘅SPIRIT物質！
日倫點點頭：「解放軍...竟然用我哋嘅物質...製造裝備...」
「嗯...」綽姿又望望橋下...四周，「有設施用上SPIRIT嘅物質就已經夠奇怪...估唔到...就連裝備...」
係咯...點會就連裝備...
『咁佢哋會唔會好似我哋咁，裝甲上會有好似光盾咁嘅紅色精神能量保護？槍射出嚟嘅唔係子彈...係好似激光咁嘅紅色精神能量？』如果係咁...就可怕喇...
「唔會...」日倫擰擰頭，「佢哋身上感覺唔到氣息。」
氣...氣息...
「嗯...」綽姿點點頭，「頭先佢哋喺正我哋腳下經過，就連半點氣息都感覺唔到。」
冇錯喇...係氣息...
冇氣息嘅話...即係...
「佢哋只係用咗SPIRIT嘅物質製造裝備同武器...冇用到精神能量...」日倫諗一諗，「至少而家仲係。」
至少而家仲係？
係咩意思？
「咁點解...」綽姿諗一諗，「佢哋用到SPIRIT嘅物質...唔止整設施...仲可以整到裝備...」
『唔通...解放軍同我哋...有啲咩交易？』我又諗返起...會展...
唔止解放軍...仲有國安局...
我哋三者之間都好似有...好重大嘅交易...
日倫都望望橋下...四周：「就算有乜交易...都冇可能...冇可能牽涉到SPIRIT嘅物質...要知道...冇幾多人知道SPIRIT物質嘅事。」
冇幾多人知道...即係邊個先知？
片翼？
「你所指嘅冇幾多人知道...」綽姿都未問完...
「我都唔清楚...」日倫擰擰頭，「唔敢亂講。」
連日倫都唔清楚？
日倫已經係...調查型行者...
日倫又拎住部電話撳撳撳：「睇嚟真係要再深入啲調查先得...」
深入啲...可以仲點深入呢？
「跟我嚟...」日倫繼續行動。
我同綽姿就跟住日倫身後，鬼鬼祟祟咁喺鐵製吊橋上行。
一路上，日倫都入侵監控系統。
好明顯，佈滿四周嘅黑色半圓球CCTV影唔到我哋。
所有射燈都照唔到我哋...避開我哋。
我哋三個行幾步...又跳一跳...跳向對面條鐵製吊橋...跟喺兩個Full Gear解放軍士兵背後行一段路...
嘩屌...又係蠢撚過啲NPC㗎喎！都跟得幾近，咁都察覺唔到？
然後跟到差唔多到盡頭...又一個轉身跳上隔離條鐵製吊橋！
繼續由日倫帶頭...我同綽姿緊隨其後！
而我都有細心留意橋下...
除咗有唔少Full Gear解放軍士兵巡緊...仲有唔少著白色長袍嘅...研究人員？
睇佢哋個Look...真係好似喎...
唔少著住白色長袍嘅研究人員喺大樓同貨倉出出入入咁...
仲有唔少工人坐住啲鏟車...又者係啲拖車拖住一箱箱貨...
唔知嗰啲...一箱箱黑色嘅箱...裡面又載住啲乜㗎呢？
我都邊跟住綽姿身後，邊拎部電話出嚟掃一掃...
掃唔到...
嗰啲黑色箱都係黑色...掃唔到裡面...
咁即係話...嗰啲黑色箱...都係以SPIRIT嘅物質製造...
日倫一跳！就跳上一個貨倉頂！
我同綽姿都立即跟上！一跳！
日倫撳住部電話，企就貨倉邊：「成個倉都係以SPIRIT物質製造...入侵唔到...」
『咁...咁點算？』其實跟住要點做？
日倫袋返好部電話：「入侵唔到就開唔到門...唯有等。」
等？
只見綽姿都冇出聲，同日倫靜靜咁等...
然後唔使幾耐...
“吱～”遠處就有架銀色巨型貨車駛緊埋嚟...
“吱...依...”正當銀色巨型貨車停定喺貨倉門前...
日倫同綽姿立即跳上車頂！
我都立即跟住跳！
今次我有反應喇！都跟咗咁耐仲估唔到你哋想做乜咩？
“咔！”貨倉大門打開！
“吱...”銀色巨型貨車就慢慢咁駛入去...
我哋三個就踎喺車頂...偷偷咁觀察貨倉裡面嘅情況...
“吱...依...”當銀色巨型貨車停定後...
「走啦走啦！快啲走啦！」
「梗係快啲走啦！呢度咁鬼危險！有乜都留返俾專業人員搞啦！」
「咪就係...我負責揸車㗎咋！」
「仲講...出去啦！」
偷偷望住兩個工人雞咁腳走出貨倉門外...
“咔！”貨倉大門亦都閂埋...
搞乜咁鬼驚吖？
「冇問題...」日倫又拎住部電話撳幾撳，「入咗嚟之後，呢度裡面嘅監控系統入侵到...我哋可以放心行動。」
綽姿就一跳！跳到落地面！
日倫都袋返好部電話，跳落地面！
真係...安全㗎嘛？
我都只好跳落綽姿身邊！再望望四周...
整個貨倉裡面...除咗架銀色巨型貨車之外...仲有好多...好多...電子儀器？
我真係...真係唔多識分...
我估...係電子儀器囉...
有唔少用玻璃幕牆間開嘅空間...裡面又有唔少電子儀器...
然後好似又有幾個黑色箱...
呢個...一啲都唔似係普通嘅貨倉...
咁究竟係...用嚟做乜㗎呢？