《香港傭兵》: [Day 19－神秘工廠] PART 12
黑色...深淵一樣黑嘅黑色物質...
似係液體...好似石油...但表面並無光澤...
呢啲就係...就係SPIRIT嘅物質？
同上次...喺意外所見到嘅...一模一樣...
就係呢啲...呢啲黑色物質...
“吱！吱！吱！”幾間玻璃室都同時打開幾個黑色箱...
然後又有啲電子儀器...器材喺黑色物質上掃嚟掃去...
佢哋喺度...搞緊乜呢？
研究人員B一路望住塊平板電腦，一邊擰擰頭：「係吖係吖...遲啲啦...遲啲三個大型驗證室整好...就唔使再用呢啲臨時檢驗室㗎喇...」
大型驗證室？
研究人員D突然一問：「好似話仲有其他工程做緊喎...」
其他工程？
研究人員B繼續望住塊平板電腦擰擰頭：「唔知吖...都唔係我哋嘅工作範圍...邊知咁多吖...只係知道...好似所有工序都喺晒呢邊搞...咁咪唔使再運過去嗰邊咁煩囉...」
運去嗰邊？即係邊邊？
喂屌！講嘢可唔可以講得清楚啲㗎？
叫我哋呢啲收集情報嘅人情何以堪吖？
研究人員E又一邊撳撳塊平板，一邊留意住儀器掃住黑色箱裡面嘅黑色物質：「即係話最後檢測都想喺呢邊做埋？」
研究人員B點一點頭：「嗯...唔想再發生上次嘅事...都係唔好運嚟運去，一個地方搞掂晒好...點都好啦～反正呢度就係越做越大啦。」
越做越大？仲可以有幾大？
研究人員C又望實塊平板電腦：「係吖係吖...越做越大吖...入嚟嘅又多又密...出嘅自然都係又多又密㗎啦...唔係嘅話咪過量積存囉...過量積存咪危險囉...」
研究人員A又望實塊平板電腦：「唔好話其他部門做唔做得切...我哋就係驗都驗唔切啦...」
研究人員B撳一撳塊平板擰擰頭：「驗唔切都要驗㗎...仲要好認真呀！驗清楚吖！」
研究人員E又碌一碌塊平板電腦：「梗係啦...我哋就好認真嘅...係唔知其他部門認唔認真姐...」
研究人員B又碌一碌塊平板電腦：「唔好理人哋咁多啦...做好自己先啦...」
望住啲電子儀器同設備喺啲黑色箱上面掃...掃嚟掃去咁...掃啲黑色物質...
「嗯...」研究人員B望實塊平板電腦沉思一陣，「奇怪...唔係咁穩定...」
研究人員A都望住塊平板電腦：「係喎...一直都唔穩定...」
研究人員C又望住塊平板電腦講：「我呢邊都係...都已經一段時間...」
研究人員D都係望住塊平板電腦講：「我呢邊都係一樣...由一開始到而家...」
全部唔穩定？咁即係點？安唔安全㗎？又會唔會咩咩好似黑洞咁吸走㗎？
研究人員B又諗一諗，撳一撳塊平板電腦：「呢批係同A倉嗰邊同批㗎喎...嗰邊好穩定...但呢邊就未到穩定水平...」
咁即係危唔危險姐？都未答...
研究人員F突然開聲：「咁我哋仲使唔使驗埋其他？」
研究人員B撳幾撳，又碌兩碌塊平板電腦：「唔使住...都係放返上車，再運落去SP先啦。」
SP？又係點解吖？
只見幾個玻璃室裡面嘅研究人員都撳撳塊平板電腦...
“吱！”黑色箱隨即閂返埋！
幾隻機械臂都好快手咁將啲黑色箱都夾返上巨型貨車！
當幾個黑色箱都放返好上貨車之後...
“吱...咔！”銀色巨型貨車嘅車箱隨即閂返好！
研究人員A放返好塊平板電腦：「都唔知算係好彩定唔好彩...」
研究人員F又行返落去銀色巨型貨車附近：「有咩好唔好彩吖？遲啲咪又要再驗過。」
研究人員C都行埋落嚟：「喂唔係吖～請多啲人好喎...」
研究人員B坐返上拖車：「請緊㗎喇...收到風話上頭請緊人㗎喇...不過你知啦...邊有咁易請到吖...」
研究人員D都坐返上車卡：「請啲低級啲嘅幫手得唔得吖？」
研究人員E都坐返上車卡：「係咯係咯～請啲Under我哋嘅幫手驗都好吖～」
研究人員B接住講：「我話事吖？睇上面㗎嘛！記得等陣叫司機嚟揸架車落去SP吖！」
研究人員A走去開返道貨倉門：「得喇得喇...班司機都唔知肯唔肯過嚟揸...仲怕死過我哋...」
研究人員B接住講：「佢哋乜都唔知係咁上下㗎啦...點吖？得未吖？爽手啲啦！」
研究人員A搞多兩搞：「就得喇就得喇！好鬼難Scan吖！唉得喇！」
“咔！”貨倉大門隨即打開！
研究人員A都上埋車之後...
“吱...依...”八個研究人員就坐住拖車離開。
“吱...咔！”等到貨倉大門再次關上之後...
我、綽姿同日倫都望望片翼...片翼又同我哋對望咗一陣...
佢哋三人同時跳返落地面！
嘩又咁突然唔講聲先吖？！
我都只好立即跳返落地面！
片翼左望右望，再望住我哋：「而家呢度成為禁查區...而喺呢度所有見到聽到嘅嘢都唔可以向外公開...同任何人提及...所有情報都係保密。而你哋都要立即離開呢度。」
禁查區？所有嘢都唔可以向外公開...同任何人提及...都係保密？
咁...咁即係...
綽姿同日倫異口同聲：「了解。」
當然我都係唔會出聲啦！級數唔同吖嘛！層次唔同吖嘛！
片翼一轉身，向住貨倉大門行過去...打開大門...
“咔！”貨倉大門隨即打開！
貨倉大門只係打開咗少少...片翼就行咗去出...
當片翼嘅身影消失之後...
“吱...咔！”貨倉大門再次關上！
走咗喇...咁就走咗喇...
日倫望一望綽姿之後，就行去大門前：「都係盡快離開先。」
都啱嘅...片翼都落咗Order...應該要聽嘅...
日倫喺大門前拎住部電話對住部機...唔知搞乜咁...
我同綽姿都行近日倫身邊...再睇清楚啲...
只見日倫用部電話對住...應該係電子門禁系統？
應該係掛...
等多一陣...
“咔！吱...”貨倉大門再次打開！
我同綽姿就跟住日倫快速跑出貨倉！
日倫再喺外面用電話掃一掃個電子門禁！
綽姿一跳！就跳上貨倉頂！
我當然就不敢怠慢！立即跟住跳上貨倉頂！
日倫都跟住跳上嚟我同綽姿身邊！
“吱...咔！”貨倉大門亦隨即關上！
日倫再望清楚四周環境之後，就帶頭跳上鐵造吊橋！
我同綽姿都緊跟日倫身後！沿路逃離神秘工廠！
今次我哋比起頭先入嚟嘅時候更快速！更順暢！
又跑又跳咁！完全唔使停落嚟之下，就已經嚟到銀色圍牆！
我哋三人一齊跳上銀色圍牆！再接住一跳！就跳上街燈！
三個黑影就喺暗黃色嘅街燈上跳嚟跳去！再跳入廢棄嘅工業大廈！喺漆黑嘅危樓之間以忍步極速前進！
三個黑影就喺危樓與危樓之間又跑又跳！
再跳上街燈！再跳入對面嘅危樓！再跑！再喺一盞又一盞街燈上跳嚟跳去！再跳入對面棟危樓再跑！
好快就跑到嚟樓頂已倒塌...樓層佈滿瓦礫嘅危樓...
我跟住綽姿同日倫揭返開頂帽...拉返低衫領...拎返起地上...屬於自己件黑色大褸...著返上身...
日倫拎住部電話撳一撳：「估唔到...會遇到片翼呢啲大人物...」
『係囉係囉！又遇到...』我都仲未將“片翼”呢兩隻字講出口...
「殊！」綽姿就唔俾我講落去！
做咩姐...我又講錯嘢咩？
日倫眼尾望一望我同綽姿，就繼續帶路：「有冇留意到片翼？」
今次我就唔出聲喇！
一來免得講多錯多～二來我都唔知留意到啲乜～
綽姿跟住日倫身邊：「你係指佢嘅氣息？」
氣...息？
我都跟喺日倫同綽姿身後行...跳過去另一棟危樓...
日倫繼續帶住我哋，點點頭：「時強時弱...」
哦...原來係呢樣...
「嗯...」綽姿點點頭，又諗一諗，「之前見都係咁。」
「係吖...」日倫又諗一諗，「但我之前見佢唔係咁...」
之前見片翼...唔係咁？
唔係喎...我見片翼嗰幾次...都係咁㗎喎...
日倫繼續帶住我同綽姿行，喺陰暗嘅危樓之間...荒廢嘅工業大廈之間...好快就行返上天橋...
沿住天橋繼續行，日倫又諗一諗：「只係上面禮拜嘅事...上個禮拜片翼都唔係咁...」
綽姿眼眉望一望日倫：「咁係點？」
日倫又眼眉望一望綽姿：「一直Keep住極強嘅氣息...」
係囉係囉！以片翼嘅級數...應該係一直都Keep住極強氣息先啱㗎嘛！
我就奇怪點解每次見到片翼...佢都係時強時弱咁...
「係吖...」綽姿都諗一諗，「都係唔好理咁多...又惹上片翼...真係好麻煩...」
「咁又唔使咁擔心嘅～」日倫輕輕鬆鬆咁，「佢都係同我哋講間工廠屬於禁查區姐～」
綽姿就冷眼望住日倫：「你仲好講？唔係你我哋使又惹上片翼？！」
「哈哈哈...」日倫扮晒傻咁，「唔好咁緊張啦～冇嘢㗎喎～做調查工作係咁㗎啦～」
綽姿怒視住日倫：「你仲講？！快啲將你頭先所有資料都Send晒俾我哋！」
「好好～」日倫又撳撳部電話，「當然～當然～」
嗯？原來有得分咁好㗎？
之但係...分到又點？片翼話唔可以對外公開㗎嘛！所有情報都係保密㗎嘛！咁即係唔賣得啦！
咁又係入不敷支㗎喎...
跟住日倫行返落天橋...搵咗架黑色嘅共享車...（又係一搵就搵到架用得嘅...調查型行者真係好運啲㗎？）
“吱！吱～”日倫負責揸車...我同綽姿就睇睇部電話...
真係唔講得笑...日倫Share出嚟嘅資料...好多好多！
多到...乜真係有查過咁多嘢咩我哋頭先？
咩貨倉視網膜門禁系統？咩身份識別？
仲有好多好多...
綽姿一路睇住部電話：「你打算去邊？」
日倫就揸住架車：「同你哋一齊返入特殊區先。」
吓？一齊返？
綽姿點點頭：「嗯。」
哦...綽姿都冇疑問...咁我都唔問咁多啦...
“吱～”日倫手車又定又快...好快就駛到過嚟深井。
“吱...依...”泊架車喺路旁之後，我哋就喺鋪滿碎沙石嘅路旁，行過去警察設置嘅閘口...
幾個Full Gear嘅警察又無視我哋三個...任我哋直行直過...穿過閘口...
然後就已經見到...林雪企喺紅Van旁邊食緊煙...
林雪一邊扯住飛煙，一邊望住我哋三個行到去佢面前：「五舊...五舊...位位五舊...」
我哋三個就好爽手咁俾張五百蚊紙林雪...
林雪袋啲錢落衫袋：「上車坐住先啦...」
我哋三個上車坐...車廂裡就只得我哋三個...冇其他乘客...
而我...就好似...有啲呆...呆呆滯滯...
林雪一上返車：「屌你個閪吖...全日都係小貓兩三隻咁...啲人死撚晒去邊柒度吖...油錢都蝕鳩埋...」
“啪！吼！吼～”紅Van開始向住特殊區出發...
一路上...我哋三個都冇出聲...
我唔知綽姿同日倫咁多啦...我淨係知...有啲攰...
我自己...好似有啲攰攰地...
“吼～吼！吼...”全程車程...我都呆呆滯滯咁...
然後...
「幸福樓有落。」
“吼...依！！！啪！”
然後...我好似俾綽姿推一推...
然後...我又痴痴呆呆咁跟住日倫落車...
然後...我哋三個都落咗車之後...
“啪！吼！吼～”係迷糊之中...望住架紅Van越飛...越遠...
然後...
「佢好似...要進入深層睡眠？」
然後…覺得好攰…
「嗯...佢係咁㗎...」
好眼瞓…
「我頭先喺車上面就…留意到...」
四肢乏力…
「今次算好咗…」
…
..
.
TO BE CONTINUED