《香港傭兵》: [Day 20－遺址禁區] PART 02
綽姿繼續唔出聲，靜待日倫繼續講。
日倫諗一諗又繼續：「解放軍有我哋嘅物質...仲要係大量...明顯係由我哋供應俾佢哋...當中仲應該會包括埋科技同技術。」
『等等先...你所指嘅科技同技術係？』我忍唔住要發問！
太多嘢唔明...唔清楚...一時之間我真係唔理解...
日倫點一點頭：「一啲令SPIRIT嘅物質...可以製造成設施同裝備嘅技術。」
可以令SPIRIT嘅物質...製造成設施同裝備嘅術？
日倫望住我：「你應該發現到嗰啲黑色物質好似液態咁。」
『嗯...』的確好似石油...
日倫又問一問：「點樣可以令佢...硬化？」
『點樣令佢硬化...攤凍佢掛...』我真係唔識㗎喎大佬...我再講多次，我係讀文科㗎！
日倫擰擰頭：「佢唔似受熱溶化...」
綽姿突然插嘴：「即係你都唔知？」
日倫又擰擰頭：「喺尋晚之前，我都唔清楚...只係聽聞過...但喺尋晚，我哋見到...親眼見到SPIRIT嘅物質...照推斷...有90%機會係最原本嘅面貌...未曾加工。」
『最原本就係咁？』即係開採返嚟嘅時候就係咁？
日倫點點頭：「就算唔係最原本嘅原材料，都唔會經過太多處理嘅程序。因為...尋晚嗰個驗證室似係用嚟做第一手驗證。」
『唔...』我打量住綽姿...想佢俾啲意見。
綽姿都認真咁點點頭：「我都有咁諗過...而家你都咁認為嘅話...咁就係喇。」
綽姿都認同日倫嘅話法...
日倫再點點頭：「解放軍冇理由可以話攞就攞...仲要咁大批...必定會係得同意...仲有嘅係...就算係尋晚見到嗰班驗證人員，都好似幾驚啲物質。」
『嗯...』又話咩唔穩定...又話咩吸人...
日倫繼續講：「雖然我唔清楚佢哋所講嘅穩定性同吸走人係咩一回事...之但係照推測...佢哋利用SPIRIT物質製造設施同裝備嘅工序，都係由我哋SPIRIT手上得到嘅。而且，仲係啱啱先叫做掌握得到。」
『咁點解我哋會將呢啲咁重要嘅嘢，交俾解放軍？會唔會係有咩交易？又會唔會係同片翼有關？』話晒片翼同解放軍...仲有國安局傾過“合作”嘅事...
唔通係片翼...
「唔似...」日倫擰擰頭又諗一諗，「片翼似係同我哋一樣...嚟查啲嘢...」
『吓？同我哋一樣？查啲嘢？佢都有嘢要查㗎咩？』以片翼嘅身份...應該係無所不知㗎啦！再唔係搵人查咪得囉...使乜自己出手吖？
「嗯...」綽姿都點點頭，「如果唔係，佢都唔使同我哋一樣，跳上橫梁。」
『呃...』真係咁簡單咩？
「嗯...」日倫都點點頭，諗一諗，「大家都係想查啲嘢...咁啱就撞見到對方...之但係...我估片翼知道嘅...比起我哋多...好多...」
『咁...咁我哋係唔係查錯方向？係唔係應該查其他地方？』我哋都未查到片翼知道嘅嘢...
「冇話對與錯...」日倫又諗一諗，「都係調查到啲乜就存起嚟...然後再喺呢啲零零碎碎嘅資料當中分析做有用嘅情報...之但係...而家間工廠都已經落咗禁查令...」
綽姿都點點頭：「唔好話調查，就算想得到有關嘅情報都再冇可能。」
綽姿係想話...喺其他人手中買有關工廠嘅情報？
係喎...我哋唔可以同其他人提起...唔可以賣...咁亦都唔會再喺其他人手中得到情報！
「所以...我哋而家要去另一個方向調查...」日倫望實綽姿，「西貢。」
「唔得。」綽姿就好似早有心理準備咁，第一時間Say NO，「西貢一早就已經係禁查區。」
係咯係咯...工廠係禁查區...西貢都係禁查區...咁仲點查？
日倫堅定不移：「西貢就係源頭！銀色嘅巨型貨車都係由西貢進出！只有喺西貢先可以查到真相。」
綽姿都堅定不移：「要查咩真相？禁查就禁查。」
「你唔想知點解西貢會有SPIRIT嘅物質㗎咩？」
「點解要知？」
「你唔想知SPIRIT嘅物質係點嚟㗎咩？」
「點解要知？」
「你唔想知西貢發生咗咩事㗎咩？」
「禁止調查。」
「你都係西貢攻防戰嘅倖存者，你唔想知當日究竟發生咩事㗎咩？」
「禁止調查。」
「話唔定ADAM就喺裡面！」
「裡面根本就冇乜嘢ADAM！」
日倫同綽姿就你一句又我一句咁...提起ADAM...
原核...有機會...帶我返去過去...返去阿月身邊嘅...ADAM...
綽姿繼續講：「冇參與過西貢攻防戰唔會知裡面發生咩事。」
日倫接住反駁：「就係唔知先要查，呢啲都係行者要做嘅事。」
綽姿又接住反駁：「我呢啲行動型嘅唔同你呢啲調查型嘅。」
「唔查清楚又點行動吖？」
「我哋而家又惹上片翼，再查落去會好麻煩。」
『呃...』
日倫同綽姿都望咗過嚟...望住我...
『呃...我...』我都未將想講嘅說話講出口...
綽姿立即截停我：「唔可以。」
『但...』我又未將想講嘅說話講出口...
綽姿怒視住我：「呢個係命令。」
命...命令...
呢個時候，日倫輕輕咁講咗一句：「命令係可唔唔聽。」
吓？命令喎...可以唔聽？！
日倫見我一面疑惑，就再加以解釋：「隨行者係可以唔聽佢嘅執行者所發出嘅命令...只要隨行者自己承擔返一切嘅後果。」
乜...乜原來係咁㗎咩？
只要自己承擔返一切後果...就可以唔聽自己嘅執行者所發出嘅命令...咁爽皮㗎咩？
我疑惑咁望住綽姿...
「冇你哋咁好氣。」綽姿起身孭返個袋仔，著埋對婆仔鞋，就出門口！
“咔！啪！”目送住綽姿離開...
咁...咁即係點？
日倫目送住綽姿離開後，打量住我：「你都想查ADAM嘅事㗎？」
『嗯...』想就梗係想啦...
ADAM...係以我所知...可以返翻去過去嘅唯一方法...
「咁就準備出發。」日倫拎部電話出嚟撳撳。
『之但係...綽姿佢...』唔係咁想我哋去...
「佢好快冇嘢㗎喇～」日倫帶住微笑擰擰頭。
吓？好快就冇嘢？綽姿真係似咁易冇嘢嘅人咩？
「放心啦～」日倫打量我一眼，「你又唔使咁悶悶不樂嘅～」
『嗯...』放心...真係放心到咩？
日倫話準備出發，咁我都去梳個洗先。
“灑！”喺梳洗嘅期間，我都喺度盤算...
西貢真係會有ADAM嘅線索？
又可以有幾多呢？
會唔會只係其中一個線索？
會唔會係下一個線索嘅線索？
咁仲有幾多線索等緊我哋去探索？
究竟係唔係真係可以搵到ADAM㗎？
“灑...”快快手手梳洗完之後，著返套緊身衫褲，行出廁所...
日倫好似喺度沉思緊咁...
『呃...唔好意思...要你等添...』我用條白色毛巾抹住把頭髮，行去拎把風筒吹吹。
「唔緊要～」日倫帶住微笑擰擰頭。
“飃！”
『呃係呢...點解你對西貢攻防戰咁...有興趣咁嘅？』我一邊吹頭，一邊大聲問問。
明眼嘅你都應該睇得出，日倫唔止係對ADAM同“西貢”呢個地方有興趣...仲有西貢攻防戰...
其實呢樣我都幾好奇...
可能你會話調查型行者就係鍾意乜都查。
話唔定會查到值錢嘅情報。
之但係...都過咗去啦...仲落埋禁查令...
你話走去調查禁查區嘅西貢，就話有可能查到有關ADAM嘅事姐...
但頭先日倫同綽姿爭辯嗰句“你都係西貢攻防戰嘅倖存者，你唔想知當日究竟發生咩事㗎咩？”好似...唔多實際喎...
「唔...」日倫皺住眉咁諗一諗，「喺SPIRIT要策劃進攻西貢之前，我係有幫手做搜集情報嘅工作。」
原來日倫都有...
「雖然唔係正式嘅調查工作...」日倫眉頭深鎖咁，「但總算賣過相關情報俾行者...俾綽姿...」
唔係正式嘅調查工作？
雖然唔知咩叫正式調查...之但係原來日倫都有賣相關情報俾綽姿...
「唔知查漏咗啲乜重要情報...搞到全滅咁制...」日倫點點頭，「好彩嘅係綽姿走得甩...」
『哦...我明喇...』原來係咁...
原來日倫係想去查清楚，當日查漏啲乜，搞到差啲害死綽姿...
咁嘅話，我都理解嘅...
始終自己都有責任吖嘛...
“飃...”吹乾個頭，放返好把風筒...
『我拎埋裝備就OK㗎喇...等多我一陣...好快...』我就快快手手去拎返把匕首。
「慢慢啦～唔急嘅～」
我快快手手咁綁返把匕首上大髀，著返件長袍，插返把刀柄喺腰間，再著埋件黑色毛毛大褸上身...
精神液...精神液...
我打開個櫃...裡面個暗格…
『拎精神液嘅話...綽姿會唔會殺咗我㗎...』我望住一支支精神液...
已經唔係得好多存貨...又大缺貨入唔到貨...而家仲話要走去調查綽姿反對調查嘅西貢...
「佢都冇話唔俾～冇事嘅～」日倫就成個騙徒口吻咁。
『係唔係真㗎...』我雖然天真...但唔係白痴喎...
「真㗎～信我啦～拎支Level 2啦～」日倫就喺暗格裡面，隨手拎咗支Level 2精神液俾我～
『哦...』我硬係覺得好似賊咁...
我心虛咁袋好支Level 2精神液，袋好埋銀包鎖匙著埋鞋就同日倫落樓。
“咔...咔...啪！”用武力打開壞壞地嘅鐵閘！
『係呢...我哋點過去好？』我望望街上...
街上都係多咗啲年輕人...
年輕嘅男男女女...仲要係女仔佔多數...
“吱～”等到一架輕型貨車駛過之後...
「都係要坐紅Van出咗去深井先㗎喇～」日倫橫過馬路，「由於西貢有好大範圍都封咗，所以都係去咗將軍澳先。」
『嗯...』我都跟住日倫橫過馬路，企喺馬路旁邊。
「仲係唔見西貢獻命班人...」日倫望望四周。
『嗯...』我都望過去輕鐵月台。
「多咗好多平民出嚟...」日倫又望住一班女仔橫過馬路。
『嗯...』我都望住班女仔行上輕鐵月台。
都真係多咗好多平民...
就咁睇而家喺輕鐵月台上等車嘅...都已經有十幾廿個年輕男女...
仲要係幾個幾個一班...幾個幾個圍埋一齊...
「希望唔好咁快出事就好...」日倫擰擰頭。
『吓？』唔好咁快出事？
「咦？又有車喇喎～」日倫望向遠處。
我都跟住日倫望向遠處...正正就係林雪架紅Van！
『又會咁快有車...同你一齊真係好運啲㗎喎～』尋日又係～今日又係～
「OK啦～」日倫望住紅Van揮揮手...
”吼...依！！！啪”紅Van就急停喺我哋面前！
我都跟住日倫一邊拎出五百蚊，一邊上車交到林雪手。
咁又冇咗五舊...唉...
我同日倫一坐定...
“啪！吼！依～吼～”林雪就閂門開車！
坐喺日倫身邊，望望車廂內...淨係得我同日倫兩個乘客...
“吼！吼～”紅Van一直飛住咁行駛！過咗三聖！過埋黃金海岸！都係再冇乘客上車！
「屌你老母個臭閪...啲人死鳩晒去邊撚度呀仆街...」林雪都開始喃喃自屌...
你唔係問緊我吖嘛？我唔使答㗎嘛？