《香港傭兵》: [Day 20－遺址禁區] PART 07
望住眼前嘅影像...喺馬路嘅上空慢慢向前飛...
條路睇落好似真係闊咗...但都仲係幾窄...
睇嚟都只係啱啱好夠巨型貨車駛過...
而馬路兩旁都仲係有唔少Full Gear嘅解放軍士兵駐守。
兩三個又三四個...三四個又四五個...
有啲就企定定...有啲就行嚟行去咁...
雖然話我而家望住佢哋身上嘅時候，同時會顯示出佢哋身上裝備嘅資料...但我係一個軍事白痴嚟㗎嘛～平時都唔會睇軍事YouTube㗎啦～邊識咁多呢！
不過就咁睇...
『好似唔同...』我又眼定定咁望實一個Full Gear嘅解放軍士兵...跟住佢一直向前行...
「嗯？你係指...佢哋身上嘅裝備？」日倫一邊問，隻Drone就跟住個解放軍士兵，慢慢向前飛。
『係...而家眼前呢個...仲有身邊嗰幾個...頭先閘口嗰幾個...喺呢邊嘅解放軍士兵嘅裝備，都同喺神秘工廠嗰邊嘅唔同...』個分別都算...幾明顯...
「嗯...呢邊呢啲解放軍士兵嘅裝備，都冇神秘工廠嗰邊咁先進...」日倫一邊講，隻Drone都係沿住馬路一直慢慢向前飛。
『點解會咁？』我又唔明喇...唔係應該會同秘密工廠嗰邊一樣級數㗎咩？
我起初都真係咁諗...
喺我仲未由隻Drone見到呢邊嘅解放軍之前，真係諗住呢邊嘅解放軍裝備，會同秘密工廠嗰邊係一樣...
話晒講到呢邊又禁區又封鎖鬼咁嚴重...
「上次嚟都係咁...我頭先都以為今次過到嚟，呢邊會變到好似秘密工廠嗰邊咁，解放軍會用上我哋嘅物質製造嘅裝備...但點知...都仲未...」日倫一邊講，隻Drone就跟住個解放軍士兵停一停...停留喺空中...
原來...日倫都有咁嘅疑問...
「話唔定...佢哋都仲未可以大規模咁製造...所以呢邊嘅解放軍士兵仲未用上...又或者...」日倫諗一諗，「材料並唔多...」
『吓？唔多？佢哋一車車咁車過去秘密工廠㗎喎！尋晚聽佢哋講都知好多好多啦！定係...要用好多好多材料先整到一套裝？』好似打機咁，越勁嘅裝備就要用上越多珍貴材料！
「唔似...或者係...」日倫諗一諗，「或者係...佢哋所分得嘅...並唔係真係咁多...」
『分得？』咩意思？聽唔明喎...
「雖然仲未有足夠證據...但係以我估計...」日倫又諗一諗，「佢哋所運送嘅SPIRIT物質，並唔係全數歸解放軍所有...」
『吓？』越講越複雜咁嘅？
「總之而家先要睇清楚...做好準備...」隻Drone開始繼續向前飛。
『了解...』其實都唔係真係咁了解...
不過聽日倫講，跟住佢咁做就冇死啦～
隻Drone一直以慢速飛行，我都觀察四周...
除咗話馬路之外，仲有左右兩邊...
左右兩邊除咗有爛斜坡...爛樹爛草地...仲有一塊塊爛地...
爛地上都有...臨時軍營？
應該就係...
幾個臨時軍營設置喺爛空地上...然後喺不遠處又有塊焦土...
喺焦土上仲見到有㗎...爛咗嘅坦克車！
架坦克車明顯就係燒焦晒！被遺棄！
唔止一架...再遠少少又有一架...再遠多少少仲有架燒焦咗嘅裝甲運兵車！
竟然...有咁多...坦克車同裝甲車嘅殘骸...
係喺幾時？係喺...西貢攻防戰之時？！
我諗...應該係...係喺西貢攻防戰之時遺留落嚟...
反正呢邊都已經被解放軍封咗...唔急住清理...
而喺附近周圍嘅軍事設施雖然話好似都係臨時，但都已經算係齊全...
雖然話呢邊嘅空地都唔算多...但除咗軍營，仲有唔少大射燈...又有唔少健全嘅軍車停泊喺附近...
地方所限，睇起上嚟唔算係千軍萬馬咁，但都已經戒備森嚴。
我留意住幾個Full Gear嘅解放軍士兵，突然想問一條一直喺心中嘅問題：『喺佢哋當中...會唔會潛伏咗我哋嘅行者喺裡面？』
打從我哋喺將軍澳遇到可愛佢哋...心中就總係帶住呢個疑問...
「其實有都唔出奇...我哋SPIRIT會潛伏喺唔同嘅行業...唔同嘅機構...有唔少仲會潛伏喺政府機關...方便搜集情報...仲有行動...」日倫一邊講，隻Drone就向解放軍軍營飛過去。
『咁...咁咪好麻煩？』你話好似綽姿咁扮學生妹潛伏喺學校就話冇乜影響姐...
如果真係有行者潛伏喺解放軍入面...西貢又係禁查區...萬一遇到佢哋咁仲點查吖？
「而家就係要睇清楚...」隻Drone喺個解放軍軍營上停留...
『嗯？』睇清楚啲乜呢？
「我都有盤算過...會唔會有行者潛伏喺解放軍入面駐守...話唔定仲要係先行者...」隻Drone停留喺幾個Full Gear嘅解放軍士兵頭上。
『仲要係先行者？！』唔係咁棘手吖化？！
不過就算係都好正常吖...
頭先喺將軍澳都已經遇到四個先行者...
三個男嘅先行者係咩料我就真係唔知喇...但嗰個可愛就一啲都唔簡單！
上次喺科學園個地下研究所...佢賣鳩晒自己班隊員...一個人喺裡面走嚟走去...搵異常生命體嚟殺...
再講吖...而家嘅西貢又搞到咁神秘...唔單止係解放軍...唔係唔係...應該話SPIRIT比起解放軍更緊張而家嘅西貢...
話唔定真係...會有先行者潛伏喺解放軍之中...幫手駐守...
話唔定...仲會有好多...
隻Drone一直喺軍營與軍營之間盤旋...
跟住幾個Full Gear嘅解放軍士兵頭上飛一陣...又跟另一班飛一陣...
「雖然話有可能會係先行者...」日倫諗咗一諗，「不過假如佢哋身上或者身邊冇裝備同精神液嘅話，就唔使怕。」
『吓？』點解唔使怕？
「假如佢哋冇準備到裝備同精神液嘅話，就算遇到突發事都唔可以精神化。」日倫一邊講，隻Drone又喺幾個Full Gear嘅解放軍士兵頭上停留。
『突發事？』咩係突發事？
「即係萬一我哋潛入去調查期間，俾人發現，裡面嘅先行者都唔可以立即精神化追捕我哋。感知唔到我哋嘅氣息，我哋就可以安心逃走...亦唔怕秋後...」隻Drone又飛去另一班Full Gear嘅解放軍士兵頭上。
『哦...』原來係為咗潛入調查做準備...
真係要...潛入？
總係覺得...好似好危險喎...
就咁用隻Drone飛嚟飛去，我哋就離遠咁控制...調查裡面嘅情況唔係幾好咩？
「好彩嘅係佢哋仲未用上以我哋SPIRIT嘅物質製造嘅裝備...」隻Drone又跟住幾個Full Gear嘅解放軍士兵頭上飛。
『吓？』有乜咁好彩呢？
「雖然話隻Drone都唔可以偵測到SPIRIT嘅物質...」日倫又諗一諗，「之但係如果掃到有SPIRIT嘅物質，都會顯示出unknown。」
『哦！即係話如果喺解放軍士兵身上見到unknown嘅字眼，佢就有可能係行者！』一定係咁喇！
「嗯...呢個就係今次放Drone其中一個目的。」隻Drone飛近哨塔上嘅Full Gear解放軍士兵。
原來真係咁！
「仲有一點嘅就係...」日倫又諗一諗，「萬一真係有先行者以精神化駐守，隻Drone都會感測到精神能量...而且先行者都要進入深層睡眠...都要輪班休息...」
『所以而家我哋就係要睇睇有冇人配帶行者裝備...又或者精神化緊...』就係咁...而家我哋要做嘅事...
「嗯...」隻Drone就再飛去另一個哨塔。
影住哨塔上嘅Full Gear解放軍士兵一陣...見到指住佢身上有乜嘢裝備...槍械...
然後又飛去另一邊...
慢慢飛...逐個睇...
喺頭上又好，喺面前都好，冇一個留意到我哋隻Drone。
不過講真...做行者真係好多制肘...
其實都唔係而家先發現...
無錯！你話唔使用劍嘅～精神化期間赤手空拳都打得死Full Gear嘅解放軍士兵啦～
就算面對自動步槍又使乜驚呀？先行者嘅級數，唔好話避啦...徒手接子彈都得啦！
天下武功，無堅不摧，唯快不破。
之但係就算用上Level 3吖，都要深層睡眠㗎...
就算Level 3駁Level 3吖，生效時間都會遞減㗎...
最終都係要深層睡眠...
所以話行者都唔係無敵...
咁逆行者呢？
講開又講...以我所知逆行者嘅綠色能量唔似得我哋SPIRIT咁，透過精神液精神化...
咁佢哋又使唔使深層睡眠呢？
係喎...都冇諗過呢點...
如果真係唔使嘅話...又無時無刻何時何地都可以精神化...咁就真係無敵喇！！！
『呃...你估逆行者會唔會...都對而家嘅西貢有興趣？』一諗到呢度...就不得不驚驚會遇上逆行者！
「嗯？」日倫諗咗一諗，「點解會咁覺得？」
『冇吖...而家嘅西貢好似咁大鑊咁...又封鎖...又有咁多解放軍守住...我哋SPIRIT又咁重視...你知啦...逆行者係我哋最大嘅敵人嚟㗎嘛...會過嚟搞事都唔出奇吖...』我有冇講錯？
「唔...」日倫諗咗一陣...一陣...又一陣...
然後都冇出聲...冇回應...又冇反問...冇晒下文...
咁即係點？
我又唔好意思再問...只好...只好祈求天父唔好俾我哋遇到逆行者...
繼續留意住眼前...除咗話Full Gear嘅解放軍士兵身上嘅裝備...有冇出現“unknown”嘅字眼之外，仲有留意四周...
左望望...右望望...馬路都已經唔係闊...左右兩邊都唔係有好多空間...
有唔少斜坡...又有唔少樹林...仲有唔少西貢攻防戰遺留落嚟嘅坦克車殘骸...裝甲車殘骸...
就算唔係受戰火洗禮...變成焦土...好多地方都唔可以立足...
而家嘅解放軍都只係可以勉力建設設施...佈防...
真係唔怪之得當時嘅西貢獻命起得成義！
西貢真係一個易守難攻嘅好地方！
比起屯門、元朗及天水圍更好守！
話說...當時點解政府會選擇做鳩咗西貢獻命先？而唔係先搞掂屯門常開同天水圍城？
假如真係收咗屯門常開同天水圍城皮先嘅話，而家個局勢又會係點呢？
隻Drone一直飛...一直調查成條西貢公路一帶...
每個解放軍設施...每架軍車...每一個解放軍士兵都調查過...
飛咗好耐...用隻Drone花咗好幾個鐘去調查...
除咗話出出入入嘅銀色巨型貨車會顯示出“unknown”嘅字眼之外，再冇喺其他地方見到...
咁係唔係即係話...冇我哋SPIRIT嘅行者喺嗰邊？一個都冇？
再飛多一陣...向住西貢方向再飛入多少少...（嗱唔好問我點解我呢個路痴加方向白痴都知飛緊去邊！影像上嘅資料好撚齊全㗎真係！）
「唔...睇嚟差唔多...」隻Drone開始減速...停留喺空中，「唔可以再向前...」
『嗯？』唔可以再...向前？