《香港傭兵》: [Day 20－遺址禁區] PART 08
我哋隻Drone嘅位置...距離西貢都有成...1.5公里遠喎...（影像上係咁顯示...實際有幾遠我係唔清楚嘅...）
總之就係仲有一大段好長嘅距離先去到西貢...
唔再飛入啲？調查清楚啲？
「已經係最盡...再前多少少就已經有干擾...」隻Drone完全停留喺空中...影住遠處...
『干擾？有乜可以干擾到我哋隻Drone？』話晒我哋SPIRIT嘅科技應該係宇宙最強...
「我都唔知...淨係知隻Drone偵察到前面有干擾...唔可以再飛過去...」隻Drone繼續影住前方遠處...
『竟然係咁...』唔可以再飛上前...最盡都只可以喺呢度...
喺呢個位置...望過去西貢嗰邊...好似乜都睇唔到咁...
係因為太遠？
我嘗試“Zoom”過去...但都係Zoom唔到...好似乜都睇唔到咁...
咁搞法...
「冇辦法...而家我哋只可以繼續調查外圍...裡面就要等今晚...」隻Drone開始調頭。
『今晚？』我擰轉頭，仲係對西貢依依不捨...
「嗯...我打算而家再喺外圍調查得清楚啲...再搜集多啲資料...評估過風險之後，再決定今晚潛入西貢調查...」隻Drone繼續以慢速飛行。
『哦...』今晚...潛入西貢...
會唔會好危險？
話晒都有唔少解放軍駐守...
我諗呢層其實都問題不大...
尋日都已經領教過日倫嘅實力...
尋晚有日倫搜集返嚟嘅情報（再加埋我喺神秘工廠嗰啲），計劃埋潛入路線同方式...好順利咁潛入神秘工廠調查！（只係遇到片翼...先要迫住離開...）
我相信日倫嘅實力...調查型行者嘅實力...
只係...我係擔心...喺西貢入面...
西貢入面...會有啲乜呢？會唔會真係俾我哋搵到ADAM呢？
有啲乜喺入面，同ADAM喺唔喺入面，都係我哋調查嘅目的...
但最怕都係...會唔會有行者喺入面駐守...
萬一真係有...以我控制氣息嘅能力...必定喺我未察覺到佢哋之前，就俾佢哋察覺到我先...
到時我又會連累日倫...
真係越諗就越覺得自己阻手阻腳...
假如係日倫一個人嘅話...應該容易好多...唔使顧累咁多...
係咯...喺日倫嘅角度嚟睇...佢自己一個人行動...一定比帶住我呢個行外人方便得多...
咁點解...日倫要搵埋我呢？
『呃...係呢...其實我係唔係阻住你呢？』我越諗就越唔好意思...越係唔好意思就越想問清楚...
「嗯？點解咁問呢？」隻Drone並冇停落嚟，繼續邊慢速飛行，邊搜集資料。
『其實我又幫唔到你啲咩...仲好似阻住你添...』係咯...幫唔到手都唔緊要啦...仲要阻住人...
「哈～你又唔好咁諗～」日倫諗咗一諗，「我從來都唔會做錯誤嘅決定...我總係覺得...你係好有關連...」
『吓？』我會有咩關連吖？
「係直覺...」日倫再諗一諗，「直覺話俾我聽...要調查西貢...就要借助你...」
『借助我？』我有乜可以俾你借助吖？我真係乜都唔識㗎喎...
「一環一環扣住...」日倫再諗一諗，「我總係覺得...你係其中一環...仲要係好重要...」
『嘩...你會唔會高估咗我吖？』我好重要？
從來我都係一粒細小嘅齒輪...
細小到可能冇咗我，都影響唔到成個運作...
「哈哈～」日倫輕輕鬆鬆，「我嘅直覺從來都冇錯過～」
『哦...』從來都冇...今次咪係第一次囉...
難求緣份至～難求全合意～始終都有第一次～
雖然聽日倫講完，都唔係好明點解會搵埋我一齊去調查已被列為禁查區嘅西貢遺址...
之但係算啦～日倫覺得冇問題，我就只好盡力配合啦～
隻Drone繼續喺西貢外圍盤旋...偵察...搜集資料...
我都盡量咁留意...觀察...分析...
不過講真一句...睇住唔同嘅軍營...睇住爛草地...睇住一塊塊焦土...睇住啲Full Gear嘅解放軍士兵行嚟行去...又睇住一隊隊銀色巨型貨車同軍車駛出駛入...駛嚟駛去...真係有啲悶...
呆呆滯滯悶悶咁又過咗一兩個鐘...隻Drone都終於返嚟...
「好啦～資料都搜集好喇～而家就要做風險評估同潛入Planning先～」隻Drone慢慢咁飛向日倫面前...降落喺佢掌上...
而眼鏡上嘅影像都變返面前所見嘅景象。
然後我就望到喺日倫手上隻Drone...
“吱！”四支螺旋槳同時收返埋！好似Transformer咁變返塊黑色長方塊！
日倫收返好隻Drone落黑色盒之後，就喺個黑色盒拎埋塊平板電腦出嚟：「咁你都抖抖先啦～」
『哦...好好...』原來個黑色盒裡面仲有塊平板電腦...
我就左望望...右望望...
日倫就坐喺平台邊，開始喺塊平板電腦上面撳撳掃掃...
我都跟住日倫坐喺平台邊...又偷偷望望佢手上塊平板電腦...
有好多圖...又有幾幅地圖...仲好多數據咁...
然後日倫又撳撳掃掃部電話...又喺塊平板電腦撳兩撳...掃兩掃...
嘩...又係啲我睇唔明嘅嘢...睇嚟都冇我嘅事㗎喇...都係吹住冷風睇風景啦～
“飃！飃～”吹住冷風坐喺平台邊等...
日倫一邊掃平板電腦...一邊撳電話...
左右開弓咁...好勤力...
我呢我呢...真係無所事事...乜都幫唔到手...
我真係有用咩？完全幫唔到手喎...陪坐咋喎...
唉...真係覺得自己係多鳩餘...
都係唔好理～繼續睇風景～
靜靜咁睇風景...靜靜咁等...
然後就差唔多日落...黃昏...
天色由黃...漸漸變橙...漸漸變暗...
快要進入夜晚...
呢邊可以話冇燈光...就只有日倫手上塊平板電腦同電話嘅光...
然後就要望向遠處...西貢公路嘅街燈...
好似一條火龍咁...
究竟仲有幾耐...日倫先搞掂呢？
我哋又會喺幾時...開始行動呢？
突然！
「搞掂喇～」日倫伸咗個懶腰～
『搞掂喇？搞掂喇？係唔係行動喇？』突然話搞掂，搞到我好緊張添！
「未行動住～未行動住～」日倫帶住微笑擰擰頭，「唔使咁心急嘅～講解埋先～」
『哦哦...好好...』係唔係要“高呼”吖？
「首先係我已經評估過，喺西貢遺址外圍一帶，應該就唔會有行者...就只係解放軍...」日倫諗一諗，「所以我哋可以以精神化潛入...」
『哦哦...真係唔會有咩？會唔會夜晚先有㗎？』小心啲好喎...
萬一真係有行者喺裡面...仲要係先行者嘅話...我嘅氣息實俾佢哋發現到㗎喎...
到時俾人捉到...有乜後果㗎？
係咯係咯...都未知俾人捉到去禁查區做調查係會有乜後果...
「唔會唔會...以我所知有90%係唔會有呢種情況發生...」日倫認真咁點點頭...
『90%...即係仲有10%...』10%唔算少㗎喇喎...
不嬲都係㗎啦...係好嘢嘅話，90%都唔會中...係衰嘢嘅話，0.1%都會中到應...
「放心啦～呢個都唔係值得擔心嘅地方...」日倫盤算住...
『吓？』咁咩先係值得擔心吖？
「值得擔心嘅係...」日倫又諗一諗，「西貢遺址...」
西貢遺址...要擔心嘅...
「我哋頭先入唔到去西貢遺址偵察...亦都偵察唔到裡面有冇行者嘅氣息...有冇精神能量...我哋完全唔知裡面嘅情況...」日倫好認真咁點點頭...
『嗯...』的確係咁...
我哋完全冇有關裡面嘅資料...
「我哋唔可以肯定到裡面有冇行者...」日倫諗一諗...
『嗯...咁即係話...最壞情況就係有行者喺裡面駐守...話唔定仲要係先行者...』就等我大膽鳩估...
「嗯...我哋的確要有最壞嘅準備。」日倫又好認真咁點點頭...
『咁嘅話...我哋仲要入去查？好危險喎...』根本就係送頭咋喎...
「之但係又唔可以話完全冇資料...」日倫再諗一諗，「雖然話我哋偵察唔到入面...之但係今日全日喺呢邊外圍都偵察唔到有行者出現過...更唔好話有行者入過去...」
『係...之但係...唔俾佢哋一直都喺入面？唔出嚟都得㗎...仲有另一邊呢？馬鞍山嗰邊呢...話唔埋佢哋喺馬鞍山嗰邊出入西貢遺址呢...』突然覺得自己又清醒～又有腦～
「唔會唔會...」日倫擰擰頭，「我哋SPIRIT習慣上唔會...先行者就更加唔會...點計而家西貢遺址都係屬於解放軍...」
而家西貢遺址係屬於解放軍？
「首先而家西貢遺址唔屬於我哋SPIRIT，我哋唔會駐守喺裡面。另外就係就算我哋潛伏喺解放軍入面，都唔會一直喺同一個位置...」日倫諗一諗，「因為咁太危險。」
唔會一直喺同一個位置...因為咁太危險？
「你真係唔識㗎喎...」日倫冷眼打量住我...
『唔係唔係...我識我識...』死喇...又表露咗自己嘅無知添...
「雖然話係隨行者...」日倫打量住我，「不過你又真係有太多嘢唔知...」
『呃...』唉...日倫都覺得我廢喇...
「你真係...好特別...」日倫點點頭...
吓？我好特別？特咩別？特別廢？
「我就覺得你係與眾不同...」日倫再打量住我...點點頭...
『呃...』日倫咁講...我又有啲唔係咁好意思...
都係話我特別廢算啦...
「至於馬鞍山嗰邊...」日倫又諗一諗，「其實我之前有調查過...嗰邊係有好多行者...仲有唔少係先行者...不過佢哋係唔會入去西貢遺址。」
『咁佢哋喺嗰邊做乜吖？』咁多人...開P咩？
「唔清楚...我唔敢調查得太深入...唔敢惹起先行者嘅注意...」日倫諗一諗...
連日倫都唔敢調查得太深入...
「話唔定真係同西貢遺址有關...不過睇佢哋唔會輕舉妄動...除非...」日倫又諗一諗，「有大事發生...」
『有大事發生？』會係咩大事？
「唔知喇～總之唔搞大鑊嘢，班先行者都唔似會進入西貢遺址～」日倫帶住微笑擰擰頭～
『咁樣...嗯...了解...』總之唔搞鑊嘢...
「地圖同潛入路線都已經Send咗俾你...」日倫行去放返好塊平板電腦落黑色盒，「你可以睇睇先...」
『哦哦...』我就拎部電話出嚟...
「呃...其實都唔使點睇嘅...都係跟住我就得㗎喇...」
『哦哦...』跟住日倫...
就喺呢個時候，手上部電話一震...
我就見到畫面顯示住...
『綽姿？』係綽姿打俾我？！