《香港傭兵》: [Day 20－遺址禁區] PART 10
我哋三個同時一捏精神液！
手中嘅精神液同時粉碎！分散成紅色嘅粒子！
無數發住紅光嘅紅色粒子就喺我哋嘅左手手掌中飄出！飄到去手背！
手背上出現…五角星！
一個倒轉咗嘅五角星！發出紅光！
就喺道寒意由手背傳遍手掌…傳到手臂…全身！
「嘩特斯啊...特茄嗲...」係...係日文？！
「斯Lee大姑拉...嘩特斯...斯Lee大姑拉！」係日本妹？！
點會...點會聽到日本妹...
「飛揚...你冇嘢吖嘛？」呢把係日倫變咗嘅聲！
『我...我冇嘢...』點解...點解會係...日本妹...
「佢係咁...唔使理佢。」呢把係綽姿變咗嘅聲...
我望清楚...先發現日倫同綽姿都已經笠起頂帽...拉高衫領...
要行動喇...要行動喇...我都不敢怠慢！立即拉高衫領！笠起頂帽！
日倫見我都已經準備好...就立即跳上街燈！
綽姿都立即跟上！
原來係要利用街燈？好啦！
我都跟住綽姿跳上街燈！再跟住佢身後跳去前面嗰盞！再跳去前面嗰盞！
一直有日倫帶住！喺一盞又一盞街燈上跳嚟跳去！向前進！
我哋嘅前進速度都好快！極高速！
綽姿一邊跟住日倫身後跳，一邊講：「提升聽力。」
提...提升聽力？
『哦...』綽姿叫到...就跟住做！
當我一提升聽力嘅一瞬間，就聽到日倫把聲：「呢度一帶嘅燈柱都有監控系統...而且仲要直接連去駐守西貢遺址嘅解放軍軍營...所以我哋嘅行動要快...唔可以俾監控系統偵察到。」
原來呢一帶嘅燈柱有監控系統！
就係嗰啲...喺燈柱之上...一個個黑色半圓球體？
唔止...仲有幾塊黑色...好似飛碟咁嘅物體...
呢啲都係監控系統嘅一部份？
咁佢哋係點運作？
影像監控？聲納？紅外線？
我都唔知...不過應該只要我哋行動夠快...就唔會被監控系統偵察到...
我諗...日倫應該比較清楚...
究竟日倫仲知道啲乜？
日倫繼續講：「繼續保持最高聽力...我會以極細聲去提醒你哋...你哋都係...要講嘅話就盡量細聲...我會聽到。」
『了解...』我都細細聲咁答...
其實要我一邊提高聽力，一邊跟住綽姿身後喺街燈上跳嚟跳去就唔難...
話晒我都做咗兩個幾禮拜行者喇嘛！唔好真係當我流先得㗎！
之但係...而家嘅我...仲係唔多舒服...
我唔係搵藉口呀嗱！我真係仲有頭暈暈！呼吸困難！心口壓住壓住咁！
點解會咁㗎呢...我仲以為...精神化之後就會冇事...
但而家...唔好話冇事...連好轉都冇...
可惡吖...身體可唔可以唔好咁差呀？！
到我哋差唔多嚟到解放軍設置嘅閘口...日倫同綽姿都停低！踎喺街燈上！
我都跟住踎低！留意住閘口...
幾支射燈喺閘口後面遠處射向閘口...
射燈射到光燦燦嘅閘口，又有幾個Full Gear嘅解放軍士兵守住...
而喺日倫同綽姿各自企喺左右兩邊嘅燈柱，距離閘口後面最近嗰支射燈又有啲遠...
呢個距離...好似真係太遠...
中間又好似...冇一個好嘅踏腳點...
咁我哋點入去呢？
就喺呢個時候，幾支射燈突然向後一照！照住一隊銀色巨型貨車車隊！
被幾支射燈照住嘅銀色巨型貨車就銀光閃閃咁！
與此同時，日倫同綽姿向住閘口跳落去！
我都立即跟住綽姿身後一跳！
幾個Full Gear嘅解放軍仲係望住銀光閃閃嘅巨型貨車駛埋嚟！我哋就喺其中一個身後擦身而過！
真係完全察覺唔到我哋...我哋三個就喺個Full Gear嘅解放軍士兵身後進入禁區！
射燈射到啲銀色巨型貨車，搞到成個環境銀光閃閃咁...勁燦眼！
我哋三個就趁機避開射燈！避開車隊！閃入草叢！
喺草叢裡面移動一段距離，就立即跳上街燈！繼續前進！
一連串嘅行動都冇停過落嚟！跟住綽姿跳過嘅街燈前進！
日倫又細細聲講：「利用街燈係最近，同時係最安全嘅路線。」
乜真係咩？
最近就應該係嘅...但就覺得都好揚喎...
狹窄嘅馬路上，左右兩邊嘅街燈冇遮冇掩咁...
都有嘅...當嚟到有大樹喺旁邊嘅時候囉...
之但係好大部份都係草叢同焦土...再遠少少就係軍營同解放軍嘅軍事設施喇...
真係安全咩？
日倫繼續邊喺街燈上向前跳，邊講：「要知道入到嚟禁區後，除咗街燈上嘅監控系統，仲有地面...」
地面？
日倫繼續講：「地面佈咗唔少感應器...可以感應到有物體移動。我唔清楚知道啲感應器分佈嘅確實位置...所以盡可能都唔好落地面。」
原來係...感應器！
係唔係即係好似...51區咁？
之前睇過National Geographic Channel，話51區嘅馬路上設有感應器...一有車輛駛過就會傳去基地...然後就會有專人嚟招呼你...
我諗呢度都係大同小異啦...
之但係又可唔可以咁順利...經由街燈進入西貢遺址？
話口未完，當我哋望到不遠處有架燒焦嘅坦克車之時...
綽姿突然放慢咗腳步！
我未能及時作出反應...一跣腳！就向住地面跌落去！
都係唔好賴綽姿啦...明明就係自己唔舒服...手腳唔協調...笨手笨腳...先搞到今次...仆街喇！
我一落地之時就立即一個轉身碌半個圈！
同時我見到面前...有兩個喺焦土上行緊嘅Full Gear解放軍士兵正要擰轉身望過嚟！
仆街喇呢次！
我立即一個轉身！以忍步極速向燒焦嘅坦克車殘骸跑過去！匿埋！
我匿埋坦克車殘骸後面...但就聽到...嗰兩個Full Gear解放軍士兵...
「唔？」好似行緊...過嚟？
我繼續匿埋喺坦克車殘骸後面...留心聽...聽住...
“沙 沙 咯 咯 咯”幾下腳步聲...向住呢邊行緊過嚟！
仆街喇...俾嗰兩個Full Gear嘅解放軍士兵察覺到...
“咯 咯 咯”仲要行緊過嚟...
點算呢？點好呢？！
我左手握住腰間嘅精神刀柄...
萬一...萬一真係行到過嚟...我就一刀砍甩佢哋個頭！
之但係...會唔會打草驚蛇呢？
“咯 咯 咯”
唔理得咁多喇...
“咯 咯 咯”
唔理得咁多...殺人都要...
只係解放軍...抵死嘅解放軍...
“咯 咯 咯”就喺腳步聲越嚟越近...快要行到嚟坦克車殘骸後面...
“喵！”突然坦克車殘骸裡跳出一隻黑貓！
「啊？原來是隻黑貓？」
“喵！喵！”黑貓一跳一跑！就跑走咗！
「這裡貓多了。」
「對喔！幫忙捉老鼠！」
“咯 咯 咯”腳步聲越行越遠...
「還好吧～還有大鷹...」說話嘅聲音都越嚟越遠...
我就探頭望一望出去...望住兩個背影越行越遠...行返去焦土嗰邊...
我望望仲踎喺燈柱上嘅日倫同綽姿...就立即跑返出馬路！再跳上燈柱！
「小心啲。」綽姿冷言冷語。
『哦...』雖然話唔好賴你姐...都唔係入晒我數㗎嘛？
「繼續前進。」日倫就繼續向前面嘅街燈上跳！
我同綽姿都緊隨其後！
小心啲...小心啲...之但係越接近西貢遺址...就越係唔舒服...
喺咁唔舒服嘅情況之下...仲要小心啲...又要跟實跑得鬼咁快嘅日倫同綽姿身後，喺街燈與街燈之間跳嚟跳去...
好辛苦...真係好辛苦...
不過總算再冇意外...差唔多嚟到西貢遺址！
已經見到...差唔多喺遺址嘅入口...有大量Full Gear嘅解放軍士駐守！
離遠觀察...裡面仲好光！好多射燈！
仲有唔少軍車出出入入咁...
我哋再行得近啲...喺街燈上邊接近...邊觀察...
已經可以見到...有唔少...帳篷？！
當我哋再好小心咁進入入口...跳上一個冇人看守嘅哨塔上...留心觀察...
四周都有唔少哨塔...又有唔少射燈射住...四周都架設咗唔少吊橋...又有唔少帳篷圍住...空地？！
冇錯喇...咁多嘢圍住嘅...都係一大塊...超大塊嘅空地！
呢度就係西貢遺址？乜都冇咁咋喎...
只見除咗Full Gear嘅解放軍士兵巡邏之外，仲有唔少著晒生化衣咁嘅研究人員行嚟行去...出入帳篷...
然後除咗軍車外，仲有好幾十架銀色巨型貨車...泊喺一邊...上緊貨！
一箱箱黑色箱...由帳篷...運上貨車...
點解會...
日倫留意住塊空地：「提升視力。」
提升視力？
我就聽日倫講...望住塊空地...提升視力...
我望到大大塊空地之外...好似有一層...紅色粒子...
再睇清楚啲...成個西貢遺址...都被一大層薄薄嘅紅色粒子...包圍？！
「係光學迷彩...」日倫細細聲講，「仲要係附上精神能量嘅光學迷彩...」
附上精神能量嘅光學迷彩？！
係咩玩法？我哋SPIRIT嘅科技？
即係...有咩用？
日倫繼續留意住四周：「除咗光學迷彩嘅精神能量...就感應唔到其他氣息...唔通真係冇行者喺呢邊...」
就喺我都仲未搞清楚現況之時...
綽姿一躍而起！轉住身咁拔刀飛落下面條吊橋！將吊橋上兩個Full Gear解放軍士兵分屍之後...再跳到落地面！
綽姿以迅雷不及掩耳嘅速度...地面上紅光亂飛亂閃！在場所有解放軍同研究人員仲未有任何反應之前，瞬間被綽姿分屍！人體殘肢散到一地都係！
做...做咩事吖？咩...咩情況吖？
當綽姿想衝入帳篷之時，日倫已經跳到落佢面前！捉實綽姿隻手：「你做咩吖？你咁樣會打草驚蛇㗎！」
我都跳到落綽姿面前...之但係...一落到地面...好唔舒服...全身上上下下...
我望一望身後...
「放開我！呢個係我嘅委託！」
向住一大塊“空地”行過去...
「咩委託呀？！」
行到埋去空地...我感覺到...有種...感覺...
「咩...咩人...你哋...嘩！救命呀！救命呀！！！」
喺空地面前...伸手埋去...手...消失...喺薄薄一層紅色粒子之間...
「放開我！我要...」
一步一步行前...穿過薄薄一層紅色粒子之後...我望到面前...面前真實嘅...景象...
係一個...一個好大...好大...應該有...成個西貢咁大嘅窿...中間有個...大黑球！！！
個大黑球...超大...差唔多有成個西貢咁大...
而且...周圍都有唔少...黑色嘅物質...好似喺管道之中...被抽走...被抽取緊！
抽取到去...帳篷裡面...
係咩嚟...咩嚟㗎...呢個大黑球...究竟係...
“吱！”突然腦海中有“吱”一聲！
“吱！吱！”又有幾聲...好大聲！
『呀！』好痛...我個頭...
“吱！吱！吱吱！！！”好刺...好痛...
「有得食喇～」
好痛...
「嘩～係貓貓吖～」
超痛...
「喂～嗰個女仔好靚女呀呵～」
好似就嚟爆...
「好喇...都差唔多要返去喇。」
眼前嘅黑球...好似深淵一樣黑嘅…黑洞…
「好喇好喇～而家去喇～一陣見啦～」
越嚟越黑…眼前一切…
「飛揚？」
整個空間…正被深淵一樣黑嘅黑洞吞噬…
「飛揚...飛揚...」
吞噬…
…
..
.
..
…
當我開始有返啲意識...
「飛揚...飛揚...」
當我再次迷迷糊糊...睜開雙眼...
「飛揚飛揚飛揚...懶瞓豬陳飛揚！起身喇喇喇喇喇喇！！！」
我望到阿月...阿月！
我立即攬實面前嘅阿月：『阿月！阿月！我終於見返你喇！我見返你喇！！！」
「喂喂喂...」阿月推一推我，但又推唔開，「你做乜吖？瞓覺瞓到傻咗吖？」
我...我瞓覺瞓到傻咗？
我望望四周...陰暗嘅...巴士車廂？
「你就真係好啦...」我聽到前面有把男人聲...
我立即望返上前！就見到個...巴士司機扶住個醉酒阿叔望住我：「你次次瞓死都有靚女女朋友接...你睇呢個醉酒佬...又要我扶佢落去...唉...」
望住巴士司機扶住個醉酒阿叔落樓梯...
瞓...瞓死...
阿月就拉住我：「落車先～落車先～」
被阿月拉住落車...我仲係痴痴迷迷咁...腳步浮浮咁...
巴士站...係Vcity嘅...巴士總站...
巴士總站...仲有光...仲有其他巴士停泊...
冇爛...冇被破壞...
阿月拉住我...行多兩步...當差唔多行出巴士總站...我鬆開手...
「嗯？」
我行多兩步...望清楚...夜幕之下...
“吼！”馬路上仲有車駛過...
街燈仲係著...
對面馬路嘅贖世主堂都冇爛...冇被破壞...
就連背後嘅Vcity都係完整無缺...
一切都正常...好正常...
我腳步浮浮...行前多兩步...
返嚟喇...返喇嚟...
我雙腳一軟...跪喺地上：『我返嚟喇...我終於都...返咗嚟喇！』