《香港傭兵》: [Day 20－遺址禁區] PART 09

電話震震震...

綽姿喺呢個時候打俾我...都係聽咗先...

我滑動解鎖：『喂？』

「喺邊？」綽姿立即帶住冷淡嘅聲線問...

『呃...西貢嗰邊...』正確嘅位置我都唔係好清楚...



「行動未？」綽姿繼續問...

『未...呃...不過...就快...』我諗應該就快啦...

「等埋我先行動。Send你哋嘅位置俾我。」綽姿講完就收線。

吓？等埋綽姿先？

綽姿都要嚟？



呃...

「綽姿打嚟？」日倫收返好塊平板電腦，拎盒黑色盒喺手。

『係吖...』Send位置...打返開SPIRIT App...

「佢都要嚟？」日倫就行到嚟我身邊。

『嗯...佢話等埋佢先行動喎...』我就Send自己嘅位置...



其實唔係叫Send囉...明明就係追蹤功能！

唉咩都好啦...開咗先...連返俾綽姿...

「又會咁突然嘅...」日倫諗一諗...

『係咯...唔係話唔嚟㗎咩...無啦啦又話等埋佢先...』女人真係好似天氣一樣...變幻莫測...

「咁等我都Send埋地圖同個Plan俾佢先...」日倫皺住眉咁撳電話。

『嗯嗯...』其實咁都唔錯吖...

有綽姿一齊行動，點睇都係安全啲嘅～

日倫係調查型，小心謹慎Plan好一切...綽姿係行動型，有乜唔妥就等佢出手...我就...跟住佢哋就得啦～



「咁我哋都揸返架車去將軍澳嗰邊等綽姿啦...呢邊冇車入嚟，要綽姿一個女仔入嚟唔容易。」日倫就開著電話盞閃光燈，拎住黑色盒，轉身行。

『哦...好吖...』我都開著電話盞閃光燈，跟住日倫行返落樓。

嗱～所以話日倫幾咁細心呢～連綽姿要點樣入嚟呢啲細節都考慮埋～

跟住日倫就包冇衰～

天色已暗，室內冇燈，我同日倫都只靠手上部電話嘅閃光燈作照明。

好小心咁一步一步行...行返落樓...行返出危樓...

街道上都係冇燈光...啲街燈唔係打橫咁瞓咗喺地上...就係唔著...



喺大樹之間行，月亮嘅光都唔係好照到落嚟，都係靠手上部電話嘅閃光燈作照明。

沿路好小心咁行返落去...落斜同上斜嘅感覺都好似差唔多...

都係頭暈暈...心口頂住頂住...唔係幾抖到氣咁...

「你冇嘢吖嘛？」日倫行喺前面問一問。

『冇...冇...我OK㗎...』死咯...又俾日倫發現我唔掂添...

「由頭先過嚟呢邊開始，你就唔多舒服咁喎...真係冇嘢吖嘛？」日倫再關心咁問多句。

『冇...真係冇...呼～』話就話冇...但都仲要抖晒大氣咁...

「嗯...慢慢行啦～反正綽姿都冇咁快～」日倫放慢腳步...



『真係...真係冇問題呢～唔使就我～』咁都要人就...真係好撚柒㗎嘛！

「嗯～」日倫繼續慢慢行...好小心咁行...

我都跟住日倫身後慢慢行...盡量令自己放鬆啲...舒服啲...條氣順啲...

但行咗一大段路...差唔多行到落返路口...都係差唔多...我嘅狀態都係冇好過...

不過總算叫做落返嚟...希望一陣坐日倫架車唔會暈車浪啦...

落到嚟馬路旁邊，已經有返街燈。

我同日倫都熄返閃光燈，袋返好部電話。



橫過馬路，再沿住馬路旁邊行...唔使幾耐就見到我哋今日租嗰架共享車。

好快手咁上返車，日倫都將黑色盒放喺後座後，並冇急住開車...而係：「耷低先。」

『嗯？哦...』雖然唔係好明點解要耷低...但日倫叫到都係照做啦～

日倫耷到勁低咁！我又跟住日倫耷到勁低！

過咗一陣...

“吱！”我聽到前向...遠處有車聲！

唔使幾耐...

“飃！飃！飃！”明顯有幾架巨型貨車擦身而過！

係解放軍嘅銀色巨型貨車！

一定係...咁鬼嘈又地下都震埋...呢邊又淨係得佢哋會駛過咋嘛！

“飃！飃～飃～飃...”等到啲巨型貨車駛過晒...駛到遠一遠...

我同日倫就坐返起身...

日倫望望車後：「免得俾佢哋見到我哋...起疑心...」

『嗯...都係嘅...正常人都唔會走嚟呢邊...一陣俾佢哋盯上就麻煩...』小心駛得萬年船...無謂引嚟不必要嘅目光...

「嗯...冇錯...」日倫望住巨型貨車車尾...越嚟越遠...越嚟越遠...

我都望住巨型貨車嘅車尾燈越嚟越遠...越嚟越暗...轉咗個彎之後...消失...

我同日倫都扣返安全帶...

“吱！吱～”開車調頭，向住將軍澳方向行駛。

日倫依然揸得好定...而我都開始覺得...舒服返少少...

冇錯喇...條氣終於都順返啲...心口都冇再頂住頂住...亦都開始冇咁頭暈...

係唔係因為日倫手車太好？好到舒服返晒？

真係唔知喇～

“吱～”好定咁駛出西貢公路...

路面上都開始有返其他車輛...

雖然都唔係好多...但我哋就開始混入喺其他車輛之中...

慢慢就越嚟越多...路面上越嚟越多車輛...我哋就混喺其他車輛之中，駛向將軍澳...

“吱...依...”唔使幾耐就駛到嚟將軍澳，泊喺路邊。

「等我買啲嘢食返嚟～」日倫就解開安全帶。

『哦...好...』望住日倫落車，行去街邊間七仔...

我都落車...抖抖氣...

冇再咁唔舒服～條氣順返晒～

挨喺車身等咗一陣，日倫就由七仔行返出嚟，拋咗盒...芝腿治同維他奶俾我：「食啲嘢先啦～」

『哦哦...唔該喎～』真係好～又有免費餐食～

跟住日倫真係唔似得綽姿咁，乜都同我講錢！斤斤計較！

唉不過算啦～綽姿都有優點嘅～（最大優點就係一個冷艷嘅小妹妹～）

綽姿幾時先到㗎？

同日倫挨住喺車旁，邊食芝腿治邊等。

又飲住包奶觀察四周。

唔算話有好多人...應該仲要都係住呢邊嘅街坊...

我諗...應該唔會影響到我哋嘅行動...

會影響到我哋嘅...就只有我哋嘅行者同逆行者...

仲係唔理解點解西貢遺址會變成禁查區...而且將佢列為禁區嘅係解放軍...

由解放軍駐守...裡面又要有SPIRIT嘅物質...

真係諗唔通...

而逆行者又會唔會對而家嘅西貢遺址有興趣？

點會冇...裡面咁神秘...又要關我哋同解放軍事...

問題係佢哋有冇出過手？

如果冇...又點解唔出手？會等到幾時先出手？

好多諗唔通嘅問題...但係我會覺得...好快就得到答案...

我總係有一種好強嘅預感...只要入到去西貢遺址...就會知道真相...

食完個芝腿治，飲埋包奶，再等多一陣...一陣..又一陣...

差唔多等咗一個鐘，就喺遠處見到有個嬌小嘅身影...喺街燈照射之中...行緊過嚟...

越行越近...越行越近...呢個著住黑色毛毛大褸...雙手插住褸袋嘅嬌小身影...

『綽姿～嚟喇？』終於都嚟到喇...等咗好鬼耐喇...

「嗯...」綽姿點點頭，再望住日倫。

日倫向綽姿揮揮手：「睇咗我Send俾你啲資料喇呵？」

「嗯...」綽姿又點點頭，「好清楚...好詳細...好專業添。」

日倫帶住微笑摸摸頭：「嘩...多謝喎～」

係咩係咩？好清楚好詳細好專業咩？

我都冇睇過喎...我淨係跟實佢哋就得啦～

日倫再打量住綽姿：「你冇嘢要問咩？」

綽姿行近後座車門：「冇。」

日倫仲係打量住綽姿：「我哋要入去西貢遺址㗎喎...啲資料同計劃都冇提及過入面...你真係冇嘢問？」

綽姿打開車門，諗咗一諗：「我知。我信得過你。」

連綽姿都話信得過日倫！

啱吖啱吖！日倫真係好信得過㗎！跟住佢就包冇死㗎喇！

我哋三個都上晒車，扣好安全帶...

“吱！吱～”日倫就駕駛住黑色私家車，再次向住西貢方向進發。

喺一盞盞街燈照射之下，路面上嘅車輛本來就少...仲越嚟越少...少到就只係得返我哋...

偷偷望一望倒後鏡...坐喺後面嘅綽姿...望住車窗外嘅夜景...

『呃...係呢綽姿...點解你會...突然想同我哋一齊查嘅？』其實我想問㗎喇...

明明綽姿今朝都唔贊成我同日倫走過嚟查...而家突然仲話要同我哋一齊入去...

綽姿仲係留意住車外嘅夜景：「擔心你。」

吓？擔心我？

我有冇聽錯？竟然係...因為我？！

『哦...哦...』我完全唔知應該點答落去...

好亂吖...我個腦同個心都好亂吖...

唔係唔係...其實又唔使咁亂嘅...

呢段期間，其實綽姿保護咗我好多次...

我係知嘅！唔係多得綽姿保護，我一早就收咗皮！

因為我始終都係綽姿嘅隨行者吖嘛～我明嘅～我明嘅～

所以一直都話其實跟綽姿都唔錯吖～

其實綽姿...都只係外表冰冷姐...內心仲係好溫暖嘅...

“吱～”當我哋越接近西貢...我又開始...開始有啲...唔舒服...

仲要越嚟越唔舒服...

又開始有啲頭暈...又有少少呼吸困難...又好似有啲壓力...壓住心口咁...

搞咩吖又...明明都已經抖咗好耐...仲食咗個芝腿治...又飲咗包奶...點解都仲係會暈車浪㗎？！

我都係盡量放鬆...放鬆...

『嗯...呼～嗯...呼～』深呼吸...深呼吸...

日倫望我一眼：「做咩吖？又唔舒服？」

『嗯...係囉係囉...唔知做乜又有啲唔舒服咁...』又俾日倫察覺到添...

日倫篤幾篤塊LCD控制板：「可能係送風系統壞壞地...不過又唔方便開窗...忍耐多一陣啦～」

『哦...好好...』原來係送風系統壞壞地...唔怪之得啦...

不過點解話唔方便開窗呢？

都係唔好理咁多喇～日倫話係就係啦～

“吱！吱～”喺冇其他車輛嘅馬路上，日倫就開得快啲！

或者係因為唔想要我忍咁耐掛～想快啲到目的地俾我落車呼吸新鮮空氣掛～

總之就開得比頭先快～高速咁行駛咗一大段路後...

“吱...”然後日倫就開始減速...慢慢咁將架車駛埋路邊...駛上一塊細小爛地上...停低。

日倫停車熄燈熄埋匙後：「耷低。」

今次我醒喇！立即耷到勁低！

過咗一陣...

“吱！”我聽到後方...遠處有車聲！

唔使幾耐...

“飃！飃！飃！”明顯有幾架巨型貨車擦身而過！

又係解放軍嘅銀色巨型貨車！

鬼咁嘈又地下都震埋！

“飃！飃～飃～飃...”等到啲巨型貨車駛過晒...駛到遠一遠...

我哋就坐返起身...

望住前面隊銀色巨型貨車車隊越駛越遠...遠到連車尾都見唔到之後...

綽姿除低件黑色毛毛大褸，手中拎住支精神液：「真係頻密。」

「嗯...」日倫都除低件黑色大褸，手中拎住支精神液，「越夜會越頻密。」

要...要除褸同拎支精神液出嚟？

我都不敢怠慢！立即除低件黑色大褸！拎返支精神液出嚟！

我哋三個同時落車！行去車頭！

日倫拎住支精神液，望住前方...陰暗嘅馬路上：「準備好？」

綽姿都拎住支精神液，點點頭：「嗯。」

『嗯...』準備好...要...要行動喇！