《香港傭兵》: [Day 20－遺址禁區] PART 12
同阿月打情罵俏咁行...喺陰暗嘅街道上行...
行過幾間車房...行過污糟嘅垃圾站...
然後...我望入公共停車場...
由呢度...行入內街...
我就轉身行入停車場...
「嗯？喂！你去邊吖？」阿月拉一拉我。
我就拖住阿月隻手仔，穿過停車場...行入井財街...
望望附近嘅舖頭...唔少都仲著緊燈...打開門做生意...
我望多兩眼...再行入啲...
路旁都放咗幾架單車...
睇落仲好新淨...應該係屬於喺對面間食店出面食梗嘢嘅食客...
我打量住班食客...再行入啲...喺兩旁店舖之中嘅行人路上...拖住阿月隻手仔...行多幾步...
然後我就企喺一間已經閂咗門...收咗舖嘅店舖面前：『係呢間舖頭...』
「嗯？」阿月一頭問號咁望住面前間舖。
『呢間舖...廿年後係一間洗衣舖...裡面仲有個懶瞓肥婆睇住...』我望入舖頭裡...再望望頭上個招牌....而家間舖...係綜合復康治療中心？
「洗衣舖？懶瞓肥婆？」阿月又跟住我，八八卦卦咁望入舖頭裡。
『嗯...個肥婆仲要有槍...』我再望多兩眼...
「有槍嘅肥婆？！」阿月難以置信咁嘅樣。
『嗯...唔止...呢頭仲有好多道友...』我就拖實阿月隻手仔，喺兩旁店舖之中嘅行人路上慢慢行...
「吓？道友？廿年後仲有人吸毒咁蠢㗎咩？」阿月疑惑咁望實我。
『嗯...嗰啲毒品...好神奇㗎...啲道友個個都骨瘦如柴...冇嚟精神咁...之但係上咗電之後就正正常常！好似普通人咁繼續做嘢！』我都留意住四周...睇睇有冇骨瘦如柴嘅道友...
又點會有吖？而家呢度好正常！
好似我哋咁行緊街嘅...又或者坐喺食店外食緊嘢嘅...等緊位嘅...個個都正正常常...
「你咁清楚嘅？你有食過吖？」阿月碌大對大眼仔望實我！
『我？我梗係冇啦！企硬唔Take嘢㗎嘛！只係我有留意過姐...我哋做行者嘅其中一種工作係搜集情報！要經常留意四周！身邊嘅事物！唔單止賣到錢！仲好可能喺危急之下救返你條命㗎！』真係唔係講笑！
「係吖係吖～小蟹柳～」阿月又想恥笑我～
『咩小蟹柳吖？基本嘢嚟㗎！呢啲嘢唔一早識嘅話，就真係活唔過一日喇～』所以話阿月呢～冷氣軍師嚟㗎～
又試吓真係佢去廿年後吖！做綽姿嘅隨行者吖～
「車～我哋呢啲隨機應變㗎嘛～適應力又強喎～邊使咁刻意㗎？」阿月又得得戚戚咁嘅樣～
『係吖係吖...』吹吖～繼續吹吖～
阿月冇我咁好氣，拖住我隻手向返馬路向方行。
兜咗個大圈之後，已經見到甜品店外企咗勁多人！
「行快啲～行快啲～」阿月拉住我跑多兩步～
然後穿入人群，行到嚟舖頭門外...
「兩個吖唔該～」阿月對住個靚仔侍應舉起兩隻手指～
「哦...好好...」個靚仔侍應喺張紙上畫兩畫，「等等吖...」
「嗯嗯～」阿月就接過靚仔侍應手上張紙，望清楚，「咦喂～又係六十六喎～」
『你同個六字真係好有緣...』我都拖住阿月...企返出少少...
始㚵...唔係好慣咁多人...
仲要企喺人群之中...好冇安全感...
「梗係～六係代表我～我就係惡魔嘅化身～」阿月對我莞爾一笑～
『邊有惡魔咁吸引？你睇你睇...個靚仔侍應眼定定咁望實你喇...』我打量住個靚仔侍應...
個靚仔侍應仲係俾阿月嘅美色迷到痴痴迷迷...眼定定咁望實阿月...完全察覺唔到我留意住佢...
「係咩係咩？」阿月又一面天真咁望住個靚仔侍應～
靚仔侍應一見到阿月望過去，就立即面撚懵懵食甜筒咁轉身行返入舖頭裡面！
「惡魔都可以好有吸引力～」阿月又得得戚戚咁～
『係吖係吖...唔止嗰個靚仔侍應...嗰邊班毒撚又望住你...嗰邊兩個HeHe又望住你...你睇你睇...就連嗰邊對情侶...人哋個男朋友都𥄫住你對腳喇...』我望住人哋個男朋友個女朋友開始面黑黑咁...
「係咩係咩？又好似係喎～嘻嘻～」阿月扮晒唔好意思咁～
『咁你都留意唔到...仲話由呢度打上北京...』我望住人哋個男朋友個女朋友扭住佢男朋友隻耳仔行咗去...
唔等喇？唔食添喇？
都啱嘅...大大個女朋友喺身邊都𥄫人哋個女朋友...俾我都嬲嬲豬啦...
「哎吖吖...講到自己嘅摩擦力好強咁喎！」阿月又谷起塊面豬登！
『好明顯啦...』除咗話感覺到身邊四周嘅街外人...我仲感覺到...氣溫...
「收...皮...啦...陳...飛...揚...」
好熱...好鬼熱...
『真係熱到出晒水...』啱吖啱吖...差啲都唔記得...而家正值炎夏...就算係夜晚都鬼死咁熱...
再加上...喺廿年後嘅冬天生活咗兩個幾禮拜...凍得太耐...一時之間唔多習慣...
「係咩係咩？我又唔覺得真係好熱咋喎～」阿月彈兩彈～跳兩跳～
『你就梗係唔覺啦～又Tee又熱褲咁～』我打量住阿月...都真係好耐冇見過...冇望過...更冇拖過...冇觸碰過...
「許～你夠喺巴士上面歎咗成程冷氣咯～」
『嘩...咁計㗎咩？你夠喺屋企歎咗成日冷氣啦～』
「嘩...喺屋企唔歎冷氣唔通歎風扇吖？幾時做咗環保撚㗎？」
繼續同阿月打情罵俏咁等...
「好肚餓吖～好肚餓吖～」
『點解你食極都唔肥？』
繼續留意四周...
「天生麗質難自棄囉～」
『係吖係吖...應該係生蟲吖～』
仲係有好多人...
「你就生蟲～咪同我一樣咁瘦～」
『好明顯我呢啲係冇啖好食...日日返工捱到瘦啦...』
馬路旁邊仲泊滿晒車...
「真係辛苦你喇～六十三喇六十三喇～仲有三個咋～」阿月興高采烈咁～
『嗯...呢度仲係好多人呢...』真係好多人...仲有好多人喺面前等緊...
好多都係啱啱嚟...
好唔習慣...
我哋已經企喺馬路旁邊...可以話算係盡量同其他人保持距離...
之但係...仲係好唔習慣見到咁多安逸嘅面孔...
不如我直接話戇鳩鳩咁嘅樣比較貼切...
馬放南山～刀槍入庫～五谷豐登～萬民樂業咁～個個都唔識驚...
廿年...仲有廿年...但係香港已經漸漸走向地獄...
我哋真係仲可以戇鳩鳩咁落去咩？
「到我哋喇～到我哋喇～六十六呢度～」阿月就拉住我行入甜品店～
唉...算啦...既然都返咗嚟...我都係做返個戇鳩鳩嘅港豬算啦～
我同阿月一坐低，佢就急住叫嘢食：「唔該～要呢個同呢個～」
「哦...好好...」個靚仔侍應仲係眼甘甘咁望實阿月...
我就睥撚住個靚仔侍應...睥撚咗一陣...佢先識得行開...
「喂喂喂～做乜咁兇姐～」阿月對我莞爾一笑～
『喂佢真係當我死㗎喎！』屌你老母大大個男朋友喺度都夠敢𥄫到眼甘甘咁！
「花哈哈～我哋都一齊咗咁耐啦～而家仲會呷醋～」阿月又恥笑我～
『一齊咗幾耐都係咁大醋意～係唔鍾意其他人𥄫我個靚靚女朋友㗎喇～』我就扮晒霸道～
「係喇係喇～唔俾其他人𥄫喇～」阿月就冇我咁好氣咁～
『淨係俾我一個𥄫～』我就一路望住阿月...望實阿月...
阿月又望住我...莞爾一笑...
終於都...可以見返阿月...
然後個靚仔侍應就放低兩碟窩夫...
我立即怒視住個靚仔侍應！
今次個靚仔侍應感應到我嘅殺氣而立即行開！
算你醒目...
然後我就再望返面前嘅阿月...
望住阿月甜絲絲咁指住...窩夫旁邊...碟上隻...用朱古力醬畫成嘅貓貓：「你睇你睇～我隻貓貓幾可愛～」
『可愛～可愛～同你一樣笑到古古惑惑咁～』十足十又唔知有乜驚天大陰謀～
「咩古古惑惑吖？係好似我咁可愛～」阿月又對住我莞爾一笑～
嘩...就係你呢個笑容囉...可愛得嚟帶點古惑...
「你嗰隻都好似你吖～」阿月又指住我碟上隻用朱古力醬畫成嘅貓貓～「一樣呆呆毒毒～」
『有幾呆又有幾毒吖？係攰吖月月娘娘...』你都唔係唔知我連續OT咗幾多晚㗎啦...
你都唔係唔知我連續幾多晚未沖完個涼你就瞓咗啦...
唔係我唔想早瞓...
係我返到嚟都成十二點喇...
沖埋個涼洗埋個頭都成點幾喇...
瞓唔夠六個鐘就要起身準備返工喇...
人嚟㗎我...一日瞓唔夠八個鐘係會短命㗎...
仲要連續Keep住兩個禮拜都係咁...你好快就守寡㗎喇...
「我就係知你辛苦～所以咪帶你嚟食糖水囉～」阿月又對我莞爾一笑～
『呢個唔係糖水嚟㗎喎...』我望住面前兩碟窩夫...
真係大大碟...每碟都整晒四件...
仲要係鋪滿晒士多啤梨...朱古力...中間仲要有雪糕...
咁夜食咁飽...點瞓吖...
「哎吖～你唔覺得好滿足㗎咩～仲要有隻咁可愛嘅貓貓望住你喎～」阿月又對住我莞爾一笑～
『最重要都係有我陪住你呢隻貓貓食甜品...』真係會飽到上心口...
「明明就係我陪你啦好唔好～」阿月谷一谷塊面豬登～
『係喇係喇係喇～多謝月月娘娘肯百忙之中抽時間嚟陪我食甜品～』真係...未食已經心都甜埋～
「使乜講～」阿月就開始開餐～
望住阿月呢個滋味樣...真係乜嘢攰意都全消...
阿月...真係我嘅精神支柱...
只要有阿月喺身邊...同阿月一齊...就算幾攰幾辛苦都好...我都捱得過...
『阿月...』我雙手捉實阿月隻手，好認真咁望實佢雙眼。
「嗯？」阿月就眼仔碌碌咁望實我。
『唔好再...離開我...』
「哈～你講咩吖？我又點會離開你吖？」阿月帶住微笑擰擰頭～
『真係唔係講笑㗎...你知唔知喺嗰兩個幾禮拜裡面...原來沒有你...日子好難過㗎...』真係生不如死㗎...
「睇嚟你真係跌得太深...跌落Limbo...」阿月認真咁打量住我...
『吓？』咩...Limbo？
「Inception吖～你發夢發得太深啦～所以先會令本來只係瞓咗十分鐘左右嘅你，好似過咗兩個幾禮拜～同時好真實！真實到完全分唔到邊度係現實...邊度係夢境...」阿月好認真咁點點頭...
『唔好睇咁多電影啦...假㗎...』我冷眼打量住阿月...
「許～你唔好發咁多夢啦～假㗎～」阿月又回返個冷眼俾我～
唔好發咁多...夢？
發夢嘅嘢控制唔到㗎喎...
「係穿越時空，去咗廿年後嘅未來又好...定係發夢發得太深，跌落Limbo又好...你而家咪返咗嚟囉～係咪？」阿月對我莞爾一笑～
我...我而家咪...返咗嚟？
「嗯～好味好味～」阿月繼續開餐～面露幸福滿足嘅微笑～
都...都係嘅...不論係穿越時空定係發夢...我終於都返到嚟阿月身邊～
TO BE CONTINUED