《香港傭兵》: [Day 21－現在過去] PART 01
喺一個藍色嘅空間之中...
藍...四周都好似被一層薄薄嘅...薄薄嘅藍色所包圍...
藍...成個空間都藍...總係好似鋪上一層薄薄嘅藍...
不論係佈滿裂紋嘅牆身...鋪滿碎石嘅石屎地板...穿咗一個個窿嘅天花...
呢度係...邊度？我又喺...邊度？
“飃！”好大風！由...破爛嘅落地大玻璃幕牆嗰邊吹過嚟！
應該係...本來全部都係玻璃幕牆...而家眼前已經冇晒...就只有蔓藤...猛風吹開蔓藤...吹入室內...
而且我仲可以見到對面...建築物嘅外牆都掛咗唔少蔓藤...藍藍嘅空間...綠綠嘅蔓藤...
我...究竟喺...邊度？
喺呢個空間...呢個室內...應該好高...好高好高嘅高層...除咗我...身邊仲有兩個人...
兩個人身上...都係著住...輕皮甲裝？！
唔止佢地身上...就連我身上都係！
點解...會係...
再睇清楚啲...護手...護碗...護臂護腿護肩護胸護甲...全部都係以皮革製造！
呢身裝備...係咩裝備嚟㗎？
「唔好...唔好...」突然面前有把男人聲！
我望返上前...有個著住雪白色真皮大褸嘅中年男人...捱喺牆邊...一面驚恐咁望住我...擰擰頭...
我就行近一步...
呢個男人...又係咩人？
只見個男人不停咁擰頭...腳軟軟咁...又揮揮手：「唔好...求求你哋...放過...」
我右手撳住男人個嘴...再壓佢埋牆...
個男人碌大對眼...全身震晒咁望實我：「唔...唔！」
與此同時...我左手拔出綁喺大髀上嘅匕首...舉到去我與男人眼前之間...
我望住把黑色刀身...銀色刀刃嘅匕首...
銀色嘅刀刃仲要散發出陣陣嘅寒氣...鋒利無比...
而刀身上仲好似刻有...刻有...SPIRIT？！
俾我撳住把口嘅男人極度驚恐！全身猛震！
驚恐嘅雙眼之中...流出淚水！
我將匕首嘅刀尖指向男人嘅胸口...慢慢咁...慢慢咁...指埋去...
「唔...唔唔...唔！！！」男人想掙扎！但已經嚇到手軟腳軟...完全冇力...
我再將匕首嘅刀尖指...向住男人嘅胸口...慢慢...一少...一少...刺入...
「唔！！！唔！！！」
慢慢入...感覺到匕首嘅刀刃...由刀尖...慢慢刺入...男人嘅身體...刺入胸口...
「唔！！！唔唔！唔！！！」
刀刃與皮肉嘅磨擦...好清楚...感覺到...
「唔唔！！！唔！唔！！！」
越嚟越入...越嚟越深...
「唔！唔...唔唔...唔...」
已經刺到入心臟...好清楚咁感覺得到...刀刃刺進心臟嘅一刻...
心...仲跳動...由好激烈...慢慢咁...隨住我將把匕首越插越入...慢慢咁...虛弱...
「唔...唔...」
我望住一對絕望...瞳孔逐漸放大...快要失去意識嘅雙眼：『去死啦...天上人...』
淚水由絕望嘅雙眼...沿住淚痕流落我手...慢慢停頓落嚟...整個空間由薄薄一層藍...變成灰色...分裂...
分裂到我手上把...刺入男人胸口嘅匕首...我撳住男人把口隻手...淚痕...快要失去意識嘅絕望眼神之中...粉碎...飄散...
當我再次有意識之時...再次睜開眼之時...
『天...天...』天花板？
係白色嘅天花板...冇穿冇爛...好新淨...乾淨...我同阿月屋企嘅天花板！
我真係返咗嚟...我真係返翻嚟！
好吖好吖...嚇死寶寶吖...我幾撚驚一睜開眼又望到殘舊嘅天花板！
真係謝天謝地...謝天謝地...
不過講開又講...點解頭先發夢...夢到嘅...
頭先個夢...仲好記得...好真實咁...
點解會係一個...咁陌生嘅環境...陌生嘅空間...
總係有一層薄薄...薄薄一層藍色...
睇到嘅嘢...都係帶藍...偏藍...
而最大嘅問題都係...我身上嘅裝備！
唔係行者長袍...而係輕皮甲！
其實當我一見到嗰兩個人...我就好奇點解佢哋身上唔係著住黑色嘅行者長袍...而係輕皮甲...
連我自己都係...
我以為自己...又返咗去有如地獄一樣嘅未來...繼續做行者...
之但係...睇嗰度嘅環境...都唔似係天堂...
而更奇怪嘅就係...我手上把匕首...刀身上係刻住...SPIRIT！
把匕首...唔單止同我哋SPIRIT用開嘅匕首一模一樣...仲要刻住SPIRIT嘅字樣...
正當我想落床拎把匕首出嚟睇...
『痴咩線...』呢度冇匕首...我返咗嚟喇...
點會咁㗎呢？
身上冇紅色粒子...感覺唔到有精神能量...
明顯就唔係...精神化...
用嘅武器唔係精神刀...但就係我哋SPIRIT用開...仲要刻有SPIRIT字樣嘅匕首...
究竟...究竟我哋係咩人？
除咗我哋...再諗一諗...嗰一個著住雪白色真皮大褸...俾我撳住把口...插把匕首入胸口嘅男人...又係咩人呢？
我叫佢做...天...上...人？！
點會...我點會噏得出...天上人？
喺未來玩咗生存遊戲成兩個幾禮拜，都未接觸過呢個Terms...點會又冇啦啦...
唉～都係唔好諗咁多啦～發夢嘅嘢就係咁奇奇怪怪㗎啦～
都係阿月講得啱～唔好發咁多夢～
我落一落床...行返出廳...望一望窗外...
隻窗...呢隻半開嘅...大窗...
就喺我正想行近窗邊之時...
「瞓醒喇？懶瞓豬～」係阿月把甜美聲線～
『醒喇～』我回頭一望...
我望住著住白色大Tee...喺開放式廚房...拎住兩碟早餐嘅阿月...
冇錯...我已經返翻嚟...有阿月嘅時空...唔需要再諗咁多～
「有得食喇～」阿月將兩碟早餐都放喺餐檯上～
『好似好正咁喎～』我都行近餐檯，一邊坐低～一邊欣賞住餐檯上，阿月親手煮嘅西式早餐～
「梗係正啦～阿月出品～必屬精品～」阿月再拎埋包牛奶放喺餐檯上～對住我嚟坐～
『哈哈～或者係...太耐冇食過你親手煮嘅嘢...』或者...太耐冇食過人食嘅嘢...
「你咁講即係咩意思吖？」阿月對我莞爾一笑，「即係想話我平時少煮嘢食啦？」
『唔係唔係～』我立即向阿月揮晒手～擰晒頭～『我嘅說話之中，邊會有意思喺裡面吖～你唔好咁敏感啦～』
「哈～係咩係咩？」阿月冇我咁好氣～拎起刀叉準備開餐～
我都拎起刀叉...但又唔捨得落手...一直只係痴痴迷咁欣賞住餐檯上...煎雙蛋...腸仔...火腿...
好似一個笑面咁...
真係好...真係太好...
「點吖你～煮個早餐你食姐～使唔使咁感動吖？」阿月含住條腸仔，對我莞爾一笑～
『有你真係好...只有你喺我身邊嘅日子...先係最幸福嘅人生...如果沒有你...日子好難過...』我含著淚水...望實對我莞爾一笑嘅阿月...
「嘩～口甜舌滑都唔止～仲要雙眼水汪汪咁～溝死晒啲𡃁妹仔啦～」阿月又古古惑惑咁莞爾一笑～
『邊...邊有姐...』我總係覺得阿月心中充滿住陰謀...
好似又唔知想恥笑我啲乜咁...
「嘿嘿...仲話冇仲話冇～睇你個尷尬樣～嘿嘿...」阿月仲係古古惑惑咁對我莞爾一笑～
『冇吖冇吖冇吖...食嘢食嘢食嘢...』唔好再俾阿月咁樣望住...明明冇做過虧心事...但都真係俾佢望到心都虛埋...
「冇囉冇囉冇囉～食嘢囉～」阿月又莞爾一笑咁繼續食腸仔～
我都一邊品嚐住阿月嘅廚藝...一邊欣賞住阿月嘅美麗...
「喂點吖你～又話食嘢～又眼都唔眨咁望住人～」阿月又莞爾一笑咁打量住我～
『望住你同食嘢係冇衝突㗎喎～對眼望住你同時個口食嘢係Work㗎喎～』我一邊咬條腸仔～一邊望到阿月實一實咁～
「嘩～一心二用喎～勁喎～」阿月一邊含住條腸仔嚟咬～一邊俾個叻叻我～
『梗係～今時唔同往日吖～』我又扮晒叻叻豬咁～
「係喇係喇係喇～難得今日有假放...想去邊吖？」阿月又冇我咁好氣咁～轉移個話題～
『想去邊吖...梗係你話事啦～你想去邊，我就陪你去邊～』難得今日放假～難得又可以陪阿月...
「我想...」就喺阿月含住隻叉，眼仔碌碌咁諗諗之時...
“And you don't seem to understand”
電話響...
我望望身後張茶几...望到自己部電話響緊...
“A shame you seemed an honest man”
咁早邊鬼個...
我就行去茶几拎起部電話一睇...
“And all the fears you hold so dear”
『係肥豬...』我立即滑動解鎖接聽，『老細？』
「喂飛揚你而家得唔得閒？」肥豬腦細急住咁問。
『我而家？得嘅...』又做乜鳩？
「得就啱啦吖葉總話今日得閒傾你去搵佢啦。」肥豬腦細一輪嘴咁。
『今日？唔得喎...』傾乜春吖搵佢老母咩...
「你又話得閒？」肥豬腦細反問返我。
『放假吖嘛...梗係得閒㗎...』屌你我都開咗成個月星期六OT啦...難得有得放返假...你又要我去見客？！
「但葉總話今日得喎...」肥豬腦細仲要扭。
『佢今日得係佢嘅事啦...我今日放假嘅...』我就打死都唔撚妥協！
「咁...咁...」我冇等肥豬腦細繼續咁落去...
『再唔係你自己見囉...啲文件喺我檯面咋嘛...』屌你間公司係你嘅...我就打工㗎姐...同你賣命吖？
「唉咁算啦...你遲幾日先再同佢傾啦...」肥豬腦細冇我辦法...
『嗯...冇嘢喇嘛？』冇嘢就唔好阻鳩住我放假...
老老柒柒我肯聽你電話都係咁...
「仲有仲有...你星期一準時返公司開門喎！有人送電腦嚟...」肥豬腦細冇嘢搵嘢嚟提...
『送電腦嚟...』送咩電腦嚟？
「係吖...俾我個世姪女用㗎...你記唔記得我尋日同你講過佢星期一會嚟返工喇吖？」肥豬腦細再提一提我...
『記得...記得...』其實我已經唔撚記得...
好似係...喺我忙到成隻狗咁嗰時...肥豬腦細臨走同我講咩下星期有個世侄女嚟返工...跟我嘅...人地喺咩咩大大老闆最錫嘅孫女...咩掌上明珠諸如此類咁啦...
「部電腦嚟到你就搞掂佢先啦～到我個世姪女上到嚟再介紹～」肥豬腦細再講多兩句...
『嗯...得喇...』冇嘢喇嘛？冇嘢就收皮啦...
「好啦...係咁啦...」
『嗯...拜...』
Cut鳩肥豬腦細電話後，就放返部電話，坐返喺阿月面前...
「你唔同咗喎～」阿月含住隻叉～古古惑惑咁打量住我～
『吓？』有咩唔同咗吖？
「你一向唔識得Say No㗎～」
我之前...唔識得Say No？
「你一向...老細打嚟要你做乜就做乜㗎喎～」
腦細打嚟要我做乜就做乜...
『哈...呃...或者真係...真係唔同咗喇...』真係...真係有啲唔同...
「哦？」阿月一頭問號咁...
『或...者...喺廿年後嘅香港地獄玩生存遊戲得耐...改變咗...』點解好似...似曾相識？！