又係呢種...被人盯住嘅...感覺...

究竟喺邊度呢?

我望住舊街上...幾個人行過...

冇人望上嚟...每個人都係好自然咁行...

對面嘅唐樓呢?都唔覺...唔覺有人喺窗邊...



點解呢?點解仲係有...被人盯住嘅感覺...

好唔自在...周身唔自在...

喺唔知邊個地方...邊個角落...一對眼...凝望住你...

係唔係真...又係唔係真係...

“喵...”一隻黑貓冷眼咁望住我喵一聲後...施施然咁行過...就好似話俾我聽:「你諗多咗喇柒頭...」



呃...或者真係...真係諗多咗啦~

或者係...做行者做得太耐...

屌咩...做緊行者嘅時候,又唔見感應咁敏銳!

成日俾綽姿話弱!

返到嚟平靜嘅世界先嚟變超西...有撚用咩~



「喂!你又做乜發晒呆咁吖~」阿月就拎咗件黑森林蛋糕同士多啤梨Cheesecake返嚟~

『我...我...冇吖~睇見呢度啲貓貓咁休閒咁,搞到自己都放鬆埋咋嘛~』呢度啲貓...真係好鬼休閒~

隻隻唔係玩就係瞓...無憂無慮咁...真係開心...

「梗係休閒啦~自由自在咁喺呢個安全嘅空間裡面生活~冇管束~冇壓制~鍾意做乜就做乜~反正又唔會有破壞~佢哋已經完全習慣咗呢度嘅生活方式~」阿月拎起碟黑森林蛋糕,用隻叉砌一細忽放入口~「嗯~好味~」

『嗯...又真係...最多都係搞到周圍都係貓毛姐...』我都拎起碟士多啤梨Cheesecake,用隻叉砌一細忽放入口~『唔!』

呢種味道...士多啤梨嘅甜...勾起返...羅羅嘅口水!

而家成個口...都好似充滿住...羅羅口水嘅甜味...

我有食過...羅羅嘅口水尾...仲要係士多啤梨...又係士多啤梨...



「嗯?做咩吖?」阿月含住隻叉,一頭問號咁打量住我~

『我!我...冇~冇冇~件士多啤梨Cheesecake好好味咋嘛~』唔可以俾阿月察覺到...

絕對唔可以俾阿月察覺到我食過羅羅嘅口水尾...

唔止...唔止...仲更加唔可以俾阿月知道有羅羅嘅存在!

俾阿月知道我同個十四歲嘅小妹妹...

我同羅羅乜都冇做過囉!

唔係唔係...就算係乜都冇做過...都會俾阿月FF到變重甜!



「係咩係咩?我又試~我又試~吖吖~」阿月擘大個嘴仔~成隻雛鳥咁等我餵~

『哦...好好...』我就用隻叉切一細忽...放到去阿月嘴仔邊...

「唔...」阿月含住我隻叉...啜一啜,「好似唔夠甜...」

『吓?我覺得好甜喇喎...定係你啲黑森林蛋糕仲喺口裡面,先唔覺甜咋?』我覺得真係好甜好甜...羅羅啲口水咁甜囉...

「唔好話係因為你啲口水苦...」阿月冷眼打量住我...

『嘩...聽聞你食開苦嘢㗎喎...咁我啲口水咪啱晒你口味囉~』

「係吖係吖~真心正添吖~」

『咁使唔使而家我餵啲口水俾你飲吖?』



「咦~好核突吖~」

同阿月一邊食甜品~一邊打情罵俏~

呢種日子...真係好幸福...

你話幸福算唔算係容易得到?

又似唔係咁容易...

你話同自己深愛嘅人,坐喺咖啡店輕輕鬆鬆飲啖咖啡~食啖蛋糕~碌碌電話~打情罵俏好似好簡單?

但要有呢段時光其實一啲都唔簡單...



由幾時開始建立...邊個建立...幾多人一齊努力建立...又可唔可以維持到...堅守到...到幾時...又係由幾時開始...慢慢咁瓦解...慢慢咁失去...

逐少逐少咁...一小部分一小部分...喺不知不覺之後...被侵蝕...被奪去...

仍然懵然未覺嘅你,到驚覺嘅時候,就只剩一小塊立足之地...

然而仲有廿年時間...但香港已經步入末日倒數...

突然!阿月眼甘甘咁...望住...

我又跟住阿月嘅視線望...望到有一個...著住黑色...長袍嘅長髮女仔...

望住個黑色長袍女仔慢慢行...慢慢行...

嘩...大熱天時仲著黑色長袍咁型吖?唔怕熱㗎真係?

不過見件黑色長袍都好輕身咁...好似紗一樣咁...應該通風嘅~唔熱得去邊嘅~

然後我就再睇清楚啲...個女仔睇落都應該有...三十幾?

我又真係唔係好分到...因為化晒妝咁...個妝都仲要幾濃...

對我嚟講,啲女仔一化咗妝我就分唔到佢幾多歲㗎喇~

而且...佢個妝真係化得好特別...

唔係一般喺街上見到嗰啲𡃁妹仔化嘅偽韓妝...

但你話係唔係賣化妝品嗰啲咁...又未去到咁濃...

我只可以話眼前呢個黑色長袍女仔,個妝係成熟得嚟帶點清新~驚艷得嚟帶點內斂~

好矛盾複雜吖呵?

係吖係吖~就係咁矛盾複雜~

老老柒柒,佢而家個妝唔係好似戴咗面具咁咁奇怪,但我相信佢落咗妝嘅話,你一定認唔出佢!

呢啲係唔係就係傳說中嘅喬裝?!

我同阿月就一路望實個黑色長袍女仔...行...一直行...行埋去遠處...靠近落地大玻璃窗嘅一張空檯...坐低...

呢張檯...呢個位...咪就係頭先阿月所講嘅...

「占卜師吖!」

冇錯喇!個黑色長袍女仔坐咗喺...占卜師...

冇錯喇...個黑色長袍女仔就係...占卜師!

只見占卜師喺檯上鋪上一塊...深藍色嘅絨布...

占卜師坐好之後...喺絨布上放咗疊...塔羅牌...

真係...真係一個塔羅牌占卜師...

「喂喂!我哋過去占返個卜咯!」阿月就急不可待咁拉住我隻手!

『喂...喂...』又使唔使咁心急吖?

阿月滿心期待咁拉住我行到嚟占卜師面前:「唔該~可唔可以幫我哋占個卜呢?」

行到咁近再睇清楚啲...占卜師個妝真係好靚...

唔係單單話佢化到好靚女...係個妝同佢塊面融為一體...

已經唔係單單喬裝咁簡單...直頭係易容術!

占卜師帶住微笑:「既然有緣...當然可能...兩位請坐...」

既然有緣...又真係估唔到會...

阿月就好興奮咁拉住我一齊坐喺占卜師面前:「有勞有勞~」

「想問啲咩?」占卜師放疊塔羅牌喺我同阿月面前。

「我想問問...」阿月諗咗一諗...就帶住微笑指住我~「我同呢個傻佬嘅命運~」

咩...咩呢個傻佬吖?

「哦?係命運吖?哈...好~洗洗牌先~」占卜師向我同阿月示意洗洗面前疊塔羅牌,「既然你哋係想問有關你哋兩個...你哋兩個就同時用心諗住你哋想問嘅問題...」

『哦...好好...』我同阿月就開始用左手...洗牌...

我同阿月嘅...命運...

掃吖掃...

我同阿月...我哋兩個嘅...命運...

洗吖洗...

洗到差唔多...洗到我同阿月嘅內心之中...都覺得係時候...

「好...」占卜師疊好塔羅牌,放喺我哋嘅右邊...掃!

好順咁就掃咗把工整嘅扇出嚟!

「繼續諗住你哋想問嘅嘢...然後抽一張...」

我同阿月都好似心有靈犀咁...由扇中同一時間抽出同一張...

「再抽一張...」

再同一時間抽出同一張...

「再抽一張...」

又再同一時間抽出同一張...

抽完三張塔羅牌後,占卜師放好其他牌,再將我哋頭先抽出嗰三張牌...左至右放正喺我哋面前...

占卜師揭開第一張:「戀人...正位...」

第一張竟然就係戀人...仲要係正位?!

就咁睇都知係好嘢嚟啦~

占卜師眼定定望實張牌:「唔...睇嚟你哋係...命中注定喎...」

『係吖係吖~我哋真係命中注定㗎~』我同阿月成日都係咁講嘅~

「你哋之前...應該都遇過唔少事情...」占卜師望實張牌再諗諗,「走過唔少崎嶇嘅路...總算一齊行到嚟呢度...」

「係吖係吖~」阿月都點點頭~「我同呢個傻佬都真係走過唔少崎嶇嘅路~」

嗯...都真係...唔少...

又校草...又升唔到上大學...要阿月陪我呢個廢柴一齊讀I大...然後就遇到班仆街同學...仲有嗰個借閨蜜為名,實際係想撬我牆腳嘅Jen Jen...

「難得嘅一對...」占卜師點點頭。

難得嘅...一對...

「然後...跟住落嚟...」占卜師揭開中間嗰張,「命運之輪...逆位...」

命運之輪...我記得好似係...

「命運之輪...不可預測...本來喺上面幸福嘅人,有可能轉到落下面不幸...只要命運之輪一轉動...改變是無法避免...」占卜師擰擰頭...

係呀!我記得命運之輪係一張好特別嘅牌!!!

原本好運會變衰運...而原本衰運則會變好運...所有事情都有機會逆轉...

我而家同阿月好地地...即係話...

「如今仲要係逆位...」占卜師諗咗一諗,「除咗無法接受嘅改變之外...仲會帶嚟失敗...失去...」

仲會帶嚟失敗...失去...

「睇嚟...你哋將要面對分開...而且仲無法避免...」占卜師擰擰頭。

『咁...咁點算吖?』我...我唔想同阿月再分開吖!

冇阿月嘅日子...比地獄更可怕...

我唔可以再失去阿月!

「你又唔使擔心咁多...」占卜師點點頭,「仲有最後一張牌吖嘛~」

仲有最後一張牌...

占卜師揭開埋最後一張...

當最後一張牌正要被揭開之時...我就已經睇到...一個...黃色嘅...

『月亮?!』我見到...我見到係月亮!!!

「月亮...逆位...」占卜師皺一皺眉。

『即...即係點吖?』你唔好皺眉先啦...令我好不安吖...

「月亮...不安...迷惑與恐懼...最讓人感到恐懼嘅時刻...就係面對未知之時...而非敵人已經出現之後...讓人感到精神最緊繃嘅時刻...」占卜師諗一諗...

點解點聽都唔似係好嘢?

「面對未來嘅迷惘...面對陌生情況嘅不安...隱藏嘅秘密...危險...敵人...你哋嘅未來...正等著你哋...」占卜師凝視住我同阿月...

我哋嘅未來...我同阿月嘅未來...隱藏嘅秘密...危險...敵人...

「不過唔需要太過困惑...由於係逆位嘅關係...隱藏嘅事物將逐漸浮現...無論係暗藏嘅敵人...危險...秘密...都將一一浮現...而變得較不具危險性...因為當佢哋都浮出檯面之時...自然知道該如何應對...」占卜師望住“月亮”,點點頭。

咁即係...好定壞吖?