《香港傭兵》: [Day 21－現在過去] PART 09
我仲係未清楚塔羅牌俾我嘅啟示...
占卜師眼定定咁望實三張牌：「三張牌得嚟嘅啟示係...你哋係命中注定...喺命運之輪之中轉動...暗藏嘅敵人...危險...秘密...好快都會一一浮現...但唔需要擔心...因為當所有所有都浮出檯面之時...應對嘅方法亦隨之出現～」
咁即係...點吖？
「嗯～」阿月好似好明白咁～好似好安心咁～
真係明白？真係可以安心？
我仲係一頭霧水喎...忐忑不安喎...
「不過有一點你哋要好好記住。」占卜師舉起隻食指。
有一點要好好記住？
「就係...結局唔一定係得一個！」占卜師好認真咁望實阿月！
結局唔一定係...得一個？
又話應對嘅方法會隨之出現...又話結局唔一定係得一個？
係唔係有啲矛盾呢？
「好好記住喇。」占卜師再叮嚀我哋多一句。
「嗯～好好～我會好好記住～係呢～幾錢吖？」阿月摷摷個銀包仔～
「我哋有緣...唔收你錢～」占卜師帶住微笑望住我同阿月揮揮手～
「咁就多謝晒喇～」阿月向占卜師鞠一鞠躬～
『多謝...多謝...』我都向占卜師鞠一鞠躬...
占卜師同我哋揮揮手～
我同阿月都同占卜師揮揮手後，就一齊起身轉身離開～
同阿月坐返埋位之後...我再偷偷咁望住啱啱拎起本書睇緊嘅占卜師：『喂喂...你明佢講乜吖？』
阿月拎起部電話，眼仔碌碌咁點點頭：「明吖明吖～」
『咁即係點吖？』我繼續留意住個占卜師...
「咪講得好清楚囉～仲問～」阿月又好似冇我咁好氣咁～撳撳部電話～
『我就係唔清楚先問你咋嘛...』占卜師仲係好專心咁睇佢手上本書...
「咪就係話我哋係命中注定～將會遇上命運之中要遇上嘅難關～但唔使擔心咁多～因為應對方法會隨住隱藏嘅危機浮現而相繼浮現～而且結局唔一定係得一個囉～」阿月又點點頭～
『嘩...你講到好似好放心咁喎...』我就真係冇你咁樂觀喇...
「放心又有咩問題呢？」阿月冷眼打量住我，「同船到橋頭自然直一樣道理咋嘛～」
『啱吖啱吖...撞到冰山特別攣...』幾咁危險吖...
「做人唔好咁灰先得㗎嘛～都話咗結局唔一定係得一個㗎嘛～」阿月一副“聽日一定會好天嘅”咁嘅樣～
『所以咪話有機會撞冰山囉...』咁都唔明...
「唉～冇你咁好氣吖～去叫多杯咖啡先～」阿月彈一彈起身～「你飲唔飲吖？」
『哦...好好...』
「咁你想飲咩吖？Latte吖？」
『呃...都係要杯Espresso啦...』
「嘩...連你都話要飲Espresso...果然命運之輪正在轉動吖～」阿月就彈彈跳跳咁走去櫃檯～
望住阿月嘅背影...再望返占卜師...
啱啱就有一對情侶坐喺占卜師面前...
望住呢對情侶同占卜師講咗幾句...占卜師就開始為呢對情侶占卜...
總係帶住不安...
頭先占卜師為我哋占出嚟嘅啟示...總係覺得帶住不祥之兆...
係我誤解？定係我諗多？
「喂～Espresso吖～唔好發呆啦～」等到阿月拎咗兩杯Espresso返嚟之後，又有幾隻貓貓跟住阿月身邊～
『唔該～』我接過阿月手上杯Espresso，望住啲貓貓...
啲貓貓當然又係唔Show我～只係想同阿月玩～
唉～算啦～我都慣㗎喇～
有得離遠望住阿月同啲貓貓玩都開心㗎喇～
我細味一口Espresso...唔...都係冇宋伯伯嗰杯咁正～
宋伯伯...
呢個年代嘅宋伯伯...會喺邊呢？
唔止宋伯伯...仲有Owner...輝哥...雨姐...梓翹...子茵...
綽姿同羅羅就仲未出世㗎喇～咁仁慈呢？片翼呢？SPIRIT呢？
SPIRIT...冇錯喇...呢個世界...係有SPIRIT...
縱使我返咗嚟...SPIRIT一直都潛藏喺呢個世界之中...
而家佢哋做緊乜呢？又有幾多行者潛伏咗喺香港呢？
呢個年代...我諗應該就唔會好多...
咁應該幾時先多？
再遲啲...再動盪啲...
一邊品嚐住Espresso...一邊望住阿月同幾隻貓貓玩...
和平嘅日子...越嚟越少...
我哋正在步入亂世之中...
絕大多數嘅人都仲係懵然未覺...
安逸久了...變成一隻唔識得捕獵...更唔識得保護自己嘅家貓...
殘酷嘅未來...就等緊我哋送到嘴邊呢...
繼續同阿月享受僅餘嘅安寧...
歎住杯Espresso...同貓貓玩...（就只有阿月有得玩...冇我分...）
又留意一眼占卜師...又有一對情侶搵佢占卜...
「好喇～都差唔多喇～」阿月飲埋最後一啖Espresso～
『嗯？走喇？』我都飲埋最後一啖Espresso...都真係冇宋伯伯嗰杯咁好飲...
如果喺呢個年代都可以飲到宋伯伯嘅咖啡...Today Coffee嘅咖啡同食物...你話幾好呢～
「嗯～都坐咗好耐喇～差唔多係時候要走喇～」阿月就企起身，同啲貓貓揮揮手～
『哦...好好...』我都起身～同啲貓貓揮揮手～（當然冇一隻貓貓係理我嘅...）
同阿月拎齊嘢，就拖實佢隻手仔，離開呢間充滿特色嘅古著貓貓占卜咖啡店～
拖住阿月隻手仔，落到嚟街上行～
時間仲算早～都仲係中午～
阿月捉實我隻手，伸咗個大懶腰：「嗯～吖～都真係好耐都冇返過嚟喇～喂～仲記唔記得你追巴士吖？」
『梗係記得啦！都好難忘記啦！』同阿月向住大馬路嘅方向行過去。
「係咯係咯～你個傻佬～巴士都好追嘅～」阿月對我莞爾一笑～
『嘩...你仲好講喎...我想追返你翻嚟咋...』我對你情深一片...你就當我痴鳩撚線...
「你係追到我返嚟～但追唔到架巴士呢～真係好弱㗎～」阿月又得得戚戚咁嘅樣～
『嘩...你真係講得輕鬆吖...巴士嚟㗎嗰架...』跑得快過巴士就唔使搭巴士啦...
「我又唔覺得有幾難囉～」阿月拖住我過馬路～
『係係係～講你就叻～』阿月口才了得世界級～
「話我講就叻吖化？又睇睇我做唔做到～」阿月又對我莞爾一笑～
『點睇吖？』我一面困惑咁打量住阿月～
「跑過咪知囉～」阿月立即做拉筋動作～
跑過咪知？
我望一望四周...馬路旁邊...巴士站就喺正我哋面前...
呢個巴士站...正正就係起點！
嗰陣時...阿月就係喺呢個站上巴士...我就由呢度開始追住架巴士跑...
「好啦～準備喇～三...一！GO！！！」阿月一個箭步就向前跑！
『喂！咁奸㗎！』我立即跟住阿月背後跑！
你就拉晒筋...又唔係數晒三聲就起步！
唔好理喇！要全速跑！唔可以輸俾阿月...我要追上阿月...喺下一個巴士站...我一定要追過阿月！
我瘋狂咁喺條狹窄嘅街道上追住阿月喪奔！
距離並冇拉近過...一直都係俾阿月拉住距離...
點會咁...望住阿月背影...黑色吊帶連身長裙...裙尾好有節奏咁飄揚...飄揚...
跑到嚟燈位前，綠公仔正正閃著...閃著...
眼前嘅阿月立即加速！衝過馬路！與幾個路人擦身而過！
我都奮力加速！與幾個路人擦身而過！衝過馬路！
『嗄！嗄！』點會㗎...阿月點會...跑得咁快？！
明明係著住長裙...一對布鞋仔...都可以身輕如燕咁...跑得超快！
仲有幾遠？距離終點仲有大約...五分之四路程...
我已經覺得有啲勉強...
與此同時...阿月越跑越快咁...與我嘅距離又拉遠咗少少咁...
點會...點會咁...
唔得！我要再出力啲...跑得再快啲！
面前嘅阿月啱啱好喺綠公仔轉紅公仔之前，衝過馬路！
我就無視盞紅公仔，直衝過路口！
面前嘅阿月就喺幾個路人之間左穿右插！
我都作出反射反應！喺幾個路人之間穿插！奮力追上阿月！
但阿月就好似擁有無限能量咁！完全冇攰嘅跡象...冇減過速...仲好似越跑越快咁直衝過路口！
點會咁...點會...
我帶住疲乏嘅身軀衝過正在閃著閃著嘅綠公仔！
仲有大約四分三路程！我要加把勁！唔可以輸俾阿月！
死衝爛衝！對腳好似裝咗V12咁！
喺人與人之間左穿右插！十足十成個忍者咁！
之但係面前嘅阿月...直頭好似啪咗精神液...處於精神化咁！
好快...越嚟越快...跑咗咁耐...阿月唔單止冇減過速...仲要越跑越快咁！
點解呀？
大家都係鬥直路...跑同樣嘅路...點解阿月好似...真係唔會攰咁㗎呢？！
阿月又極速衝過閃著閃著嘅綠公仔！
我又Keep住極速狂奔！對腳好似唔屬於自己咁！追住阿月身後衝過剛轉紅公仔嘅行人過路燈！
好想拉近...但點都係拉唔近...就算我無視紅公仔狂衝過路口...都係拉唔近同阿月之間嘅距離！
差唔多喇...已經差唔多喇...仲有大約二百米...二百米左右...
差唔多喇...我嘅氣力都差唔多喇...要谷到最盡...用盡全身氣力咁追住阿月！
但就算我跑得有幾快...阿月嘅背影都係越嚟越遠...越嚟越遠...
我望住阿月嘅背影跑...一心想追過阿月...
但莫講話要追過...就連想追上都做唔到...
仲有五十米...差唔多五十米嘅距離...
我邊跑邊望住阿月跑到去巴士站...
阿月一個轉身，就向住我揮揮手～
我就強行咁跑...已經筋疲力盡咁向住阿月跑埋嗰一少少...一少段路...
『嗄！嗄嗄！唔得喇...嗄...嗄...我死喇...嗄！我死得喇！！！』我坐到去阿月面前...坐咗喺地上！
唔得喇...唔得喇...真係死得喇...
「你真係好弱㗎～」阿月雙手叉住條小蠻腰～企正喺我面前恥笑我～
『嗄...嗄！你...嗄...你痴線㗎！嗄...嗄！』跑得咁鬼快都算...仲要氣都唔扯多啖...人類嚟㗎？！
「咩痴線吖？明明就係你弱～我都話咗如果係我嘅話，一定追得到架巴士㗎啦～」阿月又得得戚戚咁彈彈跳跳～
『嗄...痴...痴線嗄！你有冇諗過...嗄...係你身體有...嗄...有問...題嗄！』咁跑都唔攰...人類喇㗎？
「你身體就有問題～跑幾步都斷氣咁～」阿又恥笑我～
嘩...咁叫跑幾步吖？成條馬頭涌道喇...