《香港傭兵》: [Day 22－現在未來] PART 03
“吱...吱...轟！吱...轟轟隆！”三架被我串燒嘅坦克燃燒...同時接二連三產生爆炸...
我仍然處於作戰狀態...
因為...我感覺到...有好多...好多...人...向住我身處嘅方向...嚟緊...
我繼續向前行...已經見到唔少車頭大燈...
一盞又一盞...已經多到連埋晒...混埋一齊...一大片白光...
好光...好光...前面遠處係一大片白光...
“吱！轟轟轟轟！”我聽到...有幾十架重型車輛...
係裝甲運兵車...當中仲有幾架坦克車...
天空中仲有三十幾四十架Drone...跟隨住車隊...向住我呢個方向飛過嚟...
而且我仲感覺到...裝甲運兵車裡面...坐滿人...
夾夾埋埋...大大話話都有成五六十人...
係生命...好多...好多...生命...
我再行前多兩步...以忍步跑向白光來源！
唔使半秒...或更短時間...就已經進入我嘅攻擊範圍！
仲算係喺遠處嘅裝甲車仲未嚟得切反應...我就立即向住裝甲車車頭擲出匕首！
匕首直飛向裝甲車...當刀尖差唔多直飛到去裝甲車車頭之時...車頭裝甲扭曲...扭曲出一個...一大個黑洞...
好大...好大...差唔多有半架裝甲車咁大個黑洞...
匕首穿過個黑洞...直穿過成架裝甲車...再直飛去後面嗰架裝甲車...
以相同嘅情況貫穿四架裝甲車後...我就再次化成“黑影”般狀態一飛...穿過四架裝甲車車身上嘅大窿...接住把匕首！
“轟轟隆！轟轟隆隆！！！”身後四架被我串燒嘅裝甲車同時爆炸！
與此同時！面前架裝甲運兵車仲未嚟得切停落嚟...仲係向住我衝埋嚟！
大白光燈照住我...我伸出反手持匕首嘅左手...
伸到直一直...對住架裝甲運兵車伸到直一直...
當裝甲運兵車快要碰到我隻左手...裝甲運兵車開始減速...減速...而且...車頭開始扭曲...扭曲...
裝甲運兵車車頭不停扭曲...扭曲...然後成架裝甲運兵車向後一彈！
“轟轟轟隆！轟隆！！！”成架裝甲運兵車向後彈飛！撞向後面嘅裝甲車！裝甲運兵車！坦克車！
“轟轟隆！轟轟隆隆！！！”一堆廢鐵撞埋一堆！發生大爆炸！燃燒起嚟！
“吱...吱！啪...啪！啪...”前後都係一片火海...一堆堆廢鐵在燃燒...
熊熊烈火...燃燒...燃燒...黑煙都升到上夜空中...
幾架又幾架三角形嘅Drone喺天空中穿過黑煙...
幾條紅色Laser...越嚟越多紅色Laser指住我...越嚟越多Drone穿過黑煙...用紅色Laser指住我咁飛過嚟...但我身上亦都冇紅點...
又係咁...每條紅色Laser差唔多射到去我身上之時...就逐漸失消...
廿幾三十架Drone都未停定...
“吱！啪啪啪啪啪啪啪啪啪啪啪啪！！！”就同時向住我開槍！
無數咁多粒子彈向住我身上飛埋嚟...
我一動不動...任由子彈飛到埋嚟我身邊...
當子彈仲未接觸到我身上件長袍之前...開始減速...扭曲...扭曲...
然後！子彈極速反彈！
身上所有減速...扭曲嘅子彈就反彈返上天空！射向飄浮喺空中嗰三十幾架Drone！
好快！反彈嘅子彈飛行速度超快！比起由Drone射過嚟嘅時候快好幾倍！！！
三十幾四十架Drone被反彈嘅子彈擊中！
“轟轟隆隆！轟隆轟隆！！！”一架又一架爆炸！由天空墜落地面！
喺地面上...越嚟越多廢鐵燃燒...爆炸...
一片火海...火光熊熊...一團團濃煙升上夜空中...
仲未完...仲未完...
“轟！”一大粒砲彈穿過火海...直飛埋嚟！
我企定定...一動不動...郁都唔郁...等...等粒砲彈...飛過嚟...
但當大大粒砲彈差唔多飛到埋嚟我面前...喺正我面前...減速...靜止...扭曲...開始...扭曲...扭曲...
成粒砲彈就定喺我面前...扭曲...扭曲...
然後！砲彈極速反彈！
好快！反彈嘅砲彈飛行速度極快！比起穿過火海射過嚟嘅時候快十幾倍！！！
砲彈極速穿過火海！飛返過對面！
“轟隆！”一聲巨響！海火嘅對岸有一大團黑煙升上夜空中！
火海處處...燶煙滿佈...
仲未完...仲未完...
仲有好多敵人...好多人...
我以忍步穿過火海！向住“生命”嘅方向衝過去！
一片！一插！一刺！一擲！將一個又一個Full Gear解放軍士兵嘅人頭切落嚟...插穿心臟...
又將一架又一架裝甲車...裝甲運兵車...坦克車...Drone破壞...解體...擊落...
一路極速前進...一路殺人...破壞...
廢鐵散滿四周...一路上都屍橫遍野...血流滿地...
爆炸...燃燒...唔單止係廢鐵...仲有屍骸...
熊熊烈火當中...唔少屍骸在燃燒...
好多好多...好多解放軍士兵...全部駐守喺度嘅解放軍兵力...唔止...唔止兵力...
仲有喺度嘅研究人員...大帳篷裡面嘅電子儀器...設備...
破壞...摧毁...殺晒佢哋...一個又一個...用匕首好熟練咁切甩個頭...刺穿心臟...
生命...越嚟越少...喺呢個範圍裡面...空間裡面...快要完全消失...
差唔多...我差唔多將所有“生命”殺滅...就得返...面前...跪咗喺地上...
被火海包圍之下...
「嗚呀...嗚...嗚...嗚呀！！！」一個著住生化衣嘅研究人員跪咗喺地上...雙手撳住個頭...慘叫！
左手手持匕首嘅我穿過火海...一步一步...行近研究人員...
「嗚...嗚！嗚呀...呀！！！」研究人員仲係跪咗喺地上...雙手撳住個頭...慘叫！
我行到去研究人員面前...一手捏住佢條頸...撳佢落地...舉起手中把匕首...
「嗚...呀...嗚！嗚...呀！！！」研究人員仲係極痛苦咁雙手撳住個頭慘叫！
就喺我正要兜頭插把匕首落研究人員個頭之時...
「停手！」綽姿雙手捉實我隻左手...
「你有冇印象？」日倫凝視住我...
『冇...』一啲印象都冇...
日倫繼續講：「當綽姿雙手捉實你隻手，你就突然失去知覺...」
『冇...』真係一啲印象都冇...
日倫繼續講：「就好似進入深層睡眠一樣...」
『冇...』真係完全冇印象...
日倫繼續講：「但你由光學迷彩出返嚟開始，身上就一直都感覺唔到有精神能量...一點點都冇...完全冇...」
『冇...冇...』真係...真係乜印象都冇...
頭先日倫講咗咁耐...我都有努力代入...
好努力...出盡力...
但就算我幾努力幾盡力去代入...FF埋個畫面出嚟...都係冇印象...
日倫再追問：「純熟使用匕首...每一次攻擊都瞄住要害...最致命...身上完全冇精神能量...但就可以發揮出比精神能量更強大...更可怕嘅力量...你係點樣做到...究竟你係咩人？！」
『我唔知呀！我真係唔知呀！你所講嘅所有所有我都冇印象！冇呀！冇呀！冇發生過喺我身上呀！我係返翻去過去！返翻去過去之後又返翻嚟呀！！！』來回人間又折返地獄呀！！！
明明我已經...明明我已經！
日倫冇出聲...只係眼定定咁望住我...
唔止日倫...羅羅同綽姿都係...眼定定咁望實我...
呃...我...我係唔係反應大咗？
好難唔大反應啦吓話？！
明明王子同公主以後可以開開心心快快樂樂幸幸福福Happy End～點知過咗一Day就話俾你聽原來個故未完！
仲要行返去地獄路線！
做乜鳩姐？！痴撚線㗎？！
日倫望一望綽姿...又望一望羅羅...
「唔...」羅羅諗咗一諗，「其實...我喺科學園嘅地下研究所就覺得奇怪...」
吓？奇咩怪吖？
羅羅望住我：「當時...你嘅精神能量突然變得好強...一抽刀...一踢腳...就輕鬆將兩隻異常生命體打到飛咗去九丈遠...好唔簡單...」
好唔...簡單？
羅羅再望住綽姿...
綽姿點一點頭：「唔止嗰次...其實之前有幾次執行委託，佢已經係咁。精神能量好不穩...由好弱...突然變得好強。」
『喂有啲咁嘅事㗎？又唔早啲講？』原來我咁勁㗎？
綽姿擰擰頭，冷眼望住我：「呢啲嘢唔可以隨便表露出嚟。都唔知係真蠢定扮傻...」
咩...咩姐...
日倫諗一諗：「照我睇就唔係扮...」
唔係扮...即係真蠢？
羅羅立即攬實我：「連日倫都話飛揚哥哥唔係扮，即係真係乜都唔知啦～」
吓？係咁解㗎咩？
綽姿都點一點。
咁即係...
日倫接住講：「我係調查型行者...有冇講大話...有冇隱瞞...一眼就睇得出。你冇講大話...亦冇隱瞞...不過...真係諗唔通...」
大家都冇出聲...沉思...
日倫繼續講：「以一個人之力...完全感應唔到精神能量之下...殲滅全個解放軍駐守喺西貢遺址嘅兵力...」
嘩...講到我真係好似好勁咁喎...
可惜我完全冇印象...
點解吖...難得有機會型，但就冇印象...係唔係覺得我唔配個“型”字吖？！
羅羅攬到我實一實：「你哋係喺飛揚哥哥喺光學迷彩出返嚟之前，就感覺唔到佢嘅氣息...出到嚟就連一啲精神能量都冇...咁喺光學迷彩入面有啲咩吖？」
喺光學迷彩入面...有啲咩？
日倫望住綽姿...綽姿望返日倫一眼後又唔出聲...
羅羅就谷起塊面豬登：「喂！而家搞到咁大鑊，唔係仲要隱瞞吖嘛？攤開出嚟一齊研究啦！」
雖然我都唔知佢哋仲有乜嘢隱瞞...之但係就真係好似搞到好大鑊咁...
日倫點一點頭：「係...真係搞到好大鑊...我哋喺光學迷彩入面見到一個...好大個黑球...」
好大個...黑球？
日倫繼續講：「個黑球真係好大...係一個...一個好大...好大...成個西貢咁大嘅窿...中間有個...大黑球...」
羅羅搶住問：「你係指...西貢遺址有個大黑球？」
日倫點點頭：「嗯...喺西貢遺址正中間嘅大黑球...」
喺西貢遺址正中間嘅...大黑球...
日倫望住綽姿...
綽姿點點頭：「西貢攻防戰之時，正正喺西貢出現過大黑球。呢啲情報本來係要保密...」
原來喺...西貢攻防戰之時...
羅羅都點點頭：「冇錯...喺西貢攻防戰...有唔少高強嘅先行者突破逆行者嘅防守線，攻入西貢之時...突然喺西貢出現大黑球...係由西貢中心向外360度伸延...仲要好高速...好快速...估唔到...估唔到個黑球仲喺嗰度...」
大黑球...突然出現喺西貢嘅大黑球...就係西貢攻防戰要保密嘅情報？
羅羅諗一諗之後追問：「咁你哋喺黑球身上查到啲咩吖？」
日倫擰擰頭：「冇查到...」
「冇？！」羅羅睜大對大眼仔！「咁難得過到去竟然唔查？！」
日倫皺住眉：「大姐吖...當時嘅情況係要追住飛揚都已經好難喇...你知唔知佢嘅速度有幾快幾驚人吖？仲有吖...冇精神能量喺佢身上㗎...感覺唔到佢嘅氣息㗎...我哋一跟甩咗...就真係只可以靠啲爆炸聲同慘叫聲追返上去㗎咋...」
有...有冇咁恐怖吖...講到我真係好似隻怪物咁...
日倫面有難色：「仲有吖...搞到咁大鑊，我哋都趕住離開啦...只可以喺逃離之前，用少少時間行入去光學迷彩望一眼咋...望耐啲都怕會有先行者出現喺身後吖...」
呃...好似...我好似闖咗個大禍...
『呃...咁...咁個黑球...會唔會就係ADAM？』我就嚟個大膽假設...掩蓋我嘅大禍...
不過呢個大膽假設都唔係無跡可尋...
假如我曾經返翻過過去...而ADAM其中一個功能係穿越時空...
「呢層...」日倫諗一諗，「就要問...一個人...」
要問...一個人？邊個人？