日倫同綽姿都拎起件長袍,著返上身。

羅羅都落床去拎返件長袍著上身。

要...要著長袍?去邊?我件長袍又放咗喺邊?

羅羅喺張凳上拎起件長袍,交到我手中:「你件長袍~」

『哦...唔該...唔該...』都係羅羅夠體貼~



我哋四個都著好長袍...綁好匕首喺大髀...插好埋精神刀柄喺腰間...

日倫打開房門...

我哋三個就跟住日倫身後行...行去隔離間房嘅房門前...

日倫一打開房門...我就見到...簡陋嘅房間之中...有個人坐咗喺張木凳上!

房間真係好簡陋...乜都冇...又係連窗都冇...四面都係牆...牆身油上...灰灰綠綠...仲要甩晒油咁...真係同出面好唔同...



呢間充滿少女Feel嘅屋...原來有間完全冇修飾過嘅房間...

而呢間簡陋嘅房間,就只有一盞掛正喺房間中間嘅燈膽作照明...

我哋四個行入房...閂返門之後...再睇清楚...

呢個被黑布蒙頭...身穿白衫褲...赤腳嘅人...手手腳腳都被綁喺凳上...

呢個人...睇起上嚟有啲肌肉...身形似係一個男人...



而呢個男人...係...

日倫望一望我:「佢除咗黑布蒙頭之外,仲戴咗耳機...聽唔到我哋講乜。」

『哦...』戴咗耳機就聽唔到我哋講嘢㗎喇?

日倫望向綽姿:「所以可以放心。」

可以放心?放心啲乜?

綽姿接住講:「前日下午嘅時候我收到強迫委託...要去西貢遺址執行...所以我就叫你哋等埋我。」

原來...原來綽姿係要過嚟執行委託...唔怪之得...

綽姿繼續講:「發強迫委託嘅人係...片翼。」



『片...翼?!』又係片翼?!

點解又會同呢個大人物有關㗎?!

日倫同羅羅都冇出聲...靜靜咁企喺度...靜靜咁等...等綽姿繼續講落去...

綽姿就繼續講:「而委託內容係要我破壞喺西貢遺址裡面嘅所有設施...盡量殺死裡面嘅研究人員。」

原來...綽姿要...

「而當中必須完成嘅係...」綽姿指住凳上嘅男人,「殺死佢。」

『殺...』殺死佢?



佢究竟係...咩人?

日倫接住講:「呢個人...就係頭先所提到...你一手捏條頸...撳落地...舉起手中把匕首...正想兜頭插把匕首落去個頭嗰個研究人員。」

『係我想殺嘅...咁點解綽姿要阻止我?』明明綽姿就係要殺死佢...點解又唔俾我殺?

日倫拉高衫領...笠返頂帽...行近男人面前:「因為...」

我、綽姿同羅羅都拉高衫領...笠返頂帽...

綽姿行去企喺男人嘅右邊...羅羅都行去企喺個男人嘅後面...

而我都好醒目咁行去企喺男人嘅左邊...

我哋而家四個人...就圍住個男人嚟企...



日倫一手就揭開男人個黑色頭套!我就見到戴住耳機嘅短白髮男人...木無表情咁望住日倫!

我望清楚...呢個木無表情嘅短白髮男人...面色唔算蒼白...但又唔係話健康膚色...

而就咁睇個樣...應該大約三十幾歲...

而喺短白髮男人嘅左頸後方...有個...紋身?!

呢個紋身...咪係...西貢獻命?!

點會...真係...再睇清楚啲...呢個唔似西字又唔似貢字嘅紋身...正正就係西貢獻命嘅紋身!

點會...呢個短白髮男人...



短白髮男人由木無表情...慢慢轉變為冷冷一笑...望住日倫冷笑...

呢種唔笑出聲嘅冷笑真令人心寒...

日倫將短白髮男人頭上部耳機拎走...掉喺地上後:「你究竟係咩人?」

原來係要...問話...

短白髮男人Keep住冷笑...望實日倫:「你哋唔係好清楚先啱㗎咩?SPIRIT...」

SPIRIT...噏得出我哋係SPIRIT...

都好正常...因為佢係西貢獻命嘅人...

之但係...點解會喺西貢遺址...仲要係研究人員...仲要有頭髮?!

西貢獻命唔係個個都係光頭佬嚟㗎咩?

幫國安局做嘢嘅西貢獻命,唔係入晒去屯門咩?

點解又會有一個係...喺解放軍守住嘅西貢遺址...做研究工作?

唔通仲有啲西貢獻命嘅人係幫解放軍做事?而且仲可以留頭髮?

日倫繼續問:「點解你會喺西貢遺址?」

短白髮男人Keep住冷笑...望實日倫:「你知道啲乜...咪就係啲乜囉。」

日倫繼續問:「你同解放軍有咩關係?」

短白髮男人Keep住冷笑...望實日倫:「我哋似係咩關係吖?」

日倫繼續問:「你哋喺西貢遺址做啲乜?」

短白髮男人Keep住冷笑...望實日倫:「你睇我個Look似做乜嘢?走去食宵夜吖?」

日倫繼續問:「你喺西貢遺址幾耐?」

短白髮男人Keep住冷笑...望實日倫:「你指咩幾耐?食咗幾耐宵夜?」

日倫繼續問:「你哋有幾多人?」

短白髮男人Keep住冷笑...望實日倫:「呢度唔係得我一個咋咩?你哋唔係有四個咩?」

日倫繼續問:「啲帳篷裡面啲儀器係用嚟做乜?」

短白髮男人Keep住冷笑...望實日倫:「你唔係調查型咩?唔係應該有好多情報喺手㗎咩?做乜要問我?」

竟然...噏得出日倫係調查型?!

呢個人...真係一啲都唔簡單...

日倫繼續問:「個黑球係唔係就係ADAM?」

問到喇...問到重點喇...

短白髮男人Keep住冷笑...望實日倫:「咩黑球吖?咩ADAM吖?ADAM唔係一早就俾你哋SPIRIT搶走咗咩?」

竟然...竟然係答...ADAM俾我哋SPIRIT搶...搶走咗?!

ADAM俾我哋SPIRIT搶走咗?

點會...

仲要話係一早...

假如話一早俾我哋SPIRIT搶走...用得個“搶”字...即係ADAM本來係屬於佢哋?

邊個佢哋?解放軍定係西貢獻命?

定係根本就唔屬於任何人?大家都係鬥爭鬥搶之下...俾我哋SPIRIT搶贏咗?

會唔會係咁吖?

咁講法即係佢哋都知有ADAM嘅存在?

又係邊個佢哋?解放軍定西貢獻命?

唔得...好亂...呢個短白髮男人答到模棱兩可咁...又似是而非咁...

答咗好似冇答咁...

而且仲...問題仲好似多咗...

定係根本佢就係講緊大話?

又隱瞞...又唔係真...帶我哋遊花園?

日倫唔出聲一陣之後...就逆時針咁圍住短白髮男人行:「你再唔講...唔好怪我...」

我見對面嘅綽姿都逆時針咁圍住短白髮男人行...我都跟住行...

我哋四個就逆時針咁圍住短白髮男人慢慢行...

短白髮男人帶住冷笑擰擰頭:「你哋可以點?可以對我點?我都聽咗成日恐撚怖音樂~又全日冇食過嘢,冇飲過水,連大小便都冇去過~瞓都冇瞓過~我有驚過咩?」

原來唔止問話...係要迫供...

已經一日...用呢種殘酷嘅手法恐嚇咗足足一日...都可以咁啖定?

唔好話...俾著係我未聽夠五分鐘恐撚怖音樂就嚇到標屎啦...

而家望住短白髮男人嘅冷笑...真係驚都未驚過咁...

究竟...係何許人也?!

日倫繼續邊逆時針咁圍住短白髮男人行,邊講:「你係唔係想試吓?」

短白髮男人Keep住冷笑:「試?試咩吖?再激啲吖?痛苦啲?接近死亡?你哋本來唔係要殺我㗎咩?想嚴刑迫供之後再殺?」

短白髮男人好似真係好清楚個現況咁喎...

而事實上...佢真係講得啱...

綽姿講過...佢嘅委託必須完成嘅係要殺死短白髮男人...

咁即係話...只要問到重要嘅情報之後...就會殺死佢...

短白髮男人係清楚而家佢嘅處境...完全掌握到將會發生喺佢身上所有可能性...

當日倫行到嚟短白髮男人面前,日倫一手捉住短白髮男人把白髮!Chok一Chok:「咁就等你試吓生不如死!」

短白髮男人Keep住冷笑:「生不如死?日日都係㗎啦~你咁樣係唔會令到我驚㗎~」

生不如死...日日都係?

我就唔係好知佢點生不如死法...但睇佢個樣真係驚都未驚過...

一個真係...日日都生不如死嘅人...

短白髮男人Keep住冷笑:「我就最鍾意講故仔㗎喇~難得又有人想聽喎~喂...放手先啦...」

講故仔...

日倫放開手!企正喺短白髮男人面前!

短白髮男人鬆鬆條頸:「應該由邊度講起呢?應該由...西貢攻防戰...我仲係西貢獻命之時講起...」

西貢獻命...佢真係西貢獻命嘅人!

但點解會話“仲係”呢?

而家唔係?

短白髮男人諗咗一諗:「喺西貢攻防戰之前...我一直有份參與研究喚醒ADAM嘅工作...」

冇錯!ADAM真係喺西貢獻命手上!

之但係...點解會係...“喚醒”?

日倫、綽姿同羅羅都冇出聲...只係企定定咁等...等短白髮男人繼續講...

佢哋係明...定係唔想表露出唔明咋?

短白髮男人繼續講:「本來大家都唔想...之但係...我哋冇時間...」

唔想?冇時間?大家係指...西貢獻命嘅成員?

「呼~」短白髮男人鬆一口氣,「因為我哋知道...解放軍準備要攻打我哋...仲搵咗你哋SPIRIT幫手...」

即係話...西貢獻命一早就知要應付嘅唔止係解放軍...仲有我哋SPIRIT...

咁講法...西貢獻命嘅情報又喺邊度得嚟?

佢哋自己搜集?

短白髮男人繼續講:「講真要對付解放軍一啲都唔難~坦白講吖...我哋只怕你哋SPIRIT姐~」

又使唔使咁坦白...搞到我有啲唔好意思...

短白髮男人繼續講:「我哋知道...你哋會用上重兵攻打我哋...誓要將我哋連根拔起...呢樣唔難理解~」

唔難理解?呃...

其他我就唔係咁理解...

日倫呢?綽姿呢?羅羅呢?佢哋又理唔理解呢?

佢哋乜嘢反應都冇...真係好難估喎...

短白髮男人繼續講:「你哋一直都等緊呢個機會㗎啦~但係又怕...」

等緊...連根拔起西貢獻命嘅機會...之但係...怕咩呢?

「唔...」短白髮男人深呼吸一口,「我哋都知道今次係一個關鍵...而冇壓倒性嘅力量...就算俾我哋贏到...結果都係兩敗俱傷...」

兩敗俱傷...咁漁人係邊個?

短白髮男人繼續講:「種種跡象對我哋好不利...亦都冇乜辦法...就只有...喚醒ADAM...」

又提到...又提到喚醒ADAM喇!

喂你哋係唔係真係明佢講乜㗎?

唔明可唔可以開口問吖?

短白髮男人擰擰頭:「呢個可以話係最後一手...而且...唔容易...唔係...應該話...根本就未諗到有咩方法...」

最後一手...唔容易...根本未諗到方法?

「呼...」短白髮男人合埋對眼...放鬆個人...「要知道...要喚醒ADAM...比起喚醒EVE...更難...更難...難上加難...」

EVE...咩係...EVE呀?!