《香港傭兵》: [Day 22－現在未來] PART 05
短白髮男人提到一樣我從未聽過嘅嘢...EVE！
EVE...係咩嚟㗎？
喚醒ADAM...喚醒EVE...唔通係？！
短白髮男人繼續講：「ADAM同EVE唔同...應該比起EVE封印得更深...」
用ADAM同EVE相比嘅話...應該就係喇...
EVE都係原核嘅一種...同ADAM...仲有日倫提過嘅LILITH加埋一齊...就係三原核！
短白髮男人皺一皺眉：「雖然我都唔知道EVE喚醒到去邊個階層...佢哋唔肯透露...我哋亦冇權過問...」
“我哋”應該係指西貢獻命...
咁佢哋呢？係指邊個佢哋？
短白髮男人擰擰頭：「EVE嘅保密功夫真係做得好足呢...我哋用咗好多方法同時間去偷相關資料...但唔係無從入手...就係極速被識破...真係難怪...班人...可以咁成功...」
保密功夫？想偷都無從入手...極速被識破...班人...係指咩人？
短白髮男人又帶住冷笑：「就係咁先搞到我哋嘅關係越嚟越差～意見分歧～」
當期時...同西貢獻命有關係嘅...唔通係...
短白髮男人繼續講：「導致我哋除咗地理上...手法上...思想上...甚至關係上都真真正正分咗東西兩邊...」
一定係！一定係指屯門常開同天水圍城！
一定係...一定冇錯！
講得出地理上分為東西兩邊就已經可以肯定...
再加上手法上同思想上...西貢獻命比起屯門常開同天水圍城激進！
咁就係...咁就真係...EVE喺屯門常開或者天水圍城手上...
咁而家呢？而家就應該喺...天門手上？
三原核之一嘅EVE...
其實喺邊個手上都唔重要...反正我對EVE並無半點興趣...
我只對...ADAM有興趣...可以幫我返翻去過去嘅ADAM...
「嗄...」短白髮男人抖啖大氣，「本來已經要由零去開始研究...再加上ADAM比起EVE封印得更深...縱使ADAM喺我哋手上...都仲係無從入手...完全唔知點可以喚醒...仲係一頭霧水...」
ADAM一直喺西貢獻命手中...都係一頭霧水...
之但係...點解要喚醒？
喚醒又會點？又有咩用？
短白髮男人繼續講：「莫講話要完全喚醒...只係想好似EVE咁...唔係...或者係第一階段...只係想喚醒到去第一階段都冇辦法...」
第一階段...會係點㗎呢？
又有幾多個...階段呢？
短白髮男人繼續講：「但我哋真係時間無多...解放軍睇準咗呢個機會...我哋關係決裂嘅時機...力量分為兩邊嘅時機...」
『冇人叫你哋咁蠢...分化...割蓆...』我忍唔住要開聲...
任何時候...任何情況...喺亂世之中...不分化...不割蓆係基本...
力量係要聚...團結係必須...
明知團結都唔足以壓倒性打倒敵人...只能勉強抗衡...你仲要走去割？！
香港人係唔係真係咁蠢？
打仗吖而家...你估講玩吖？小朋友玩泥沙吖？
我係解放軍仲唔趁呢個機會將你哋連根拔吖？
有乜好得過敵人自己內鬥內耗內訌？
你哋兩個唔互相廝殺唔緊要吖～唔幫拖就夠我贏啦～
「哈哈～」短白髮男人笑兩聲，「係吖...我哋真係好蠢...蠢在太過自負...自大...狂妄...只相信自己嗰套...唔接受人控制...自把自為...」
知道喇咩？知道又點？都已經太遲...
不過正正就因為太遲...先會自覺...
發生咗喇嘛...你試吓返轉頭再嚟多次...咪一樣犯同樣嘅錯誤...
短白髮男人帶住冷笑擰擰頭：「不過一切都已經太遲...由我哋決裂嘅一刻...已經返唔到轉頭...」
知就最好...不過知都係冇用...
短白髮男人繼續講：「我哋只好繼續研究...雖然ADAM一直都喺我哋手上...我哋一直都有研究...好努力...好努力...仲要好驚...好怕...」
好驚？好怕？
驚啲乜又怕啲乜？
短白髮男人面青青咁繼續講：「一直都覺得好恐怖...由第一日交到嚟我哋手上...ADAM...接近ADAM...就等於接近死亡...但同時唔可以唔接近...一定要靠ADAM...一直都要靠ADAM...要喺一定範圍之內...唔可以太遠...」
好恐怖？接近ADAM等於接近死亡？但唔可以唔接近？要靠ADAM？靠啲乜？又點解一定要喺一定範圍內？
講緊啲乜嘢呀？
「唔...嗄...」短白髮男人深深一吸...一呼...「或者呢個就係當初佢哋交ADAM俾我哋嘅原因...因為要靠ADAM...佢哋都係...」
呢個就係當初...交ADAM俾西貢獻命嘅原因？
點解...既然屯門常開同天水圍城都要靠ADAM...又點會交俾西貢獻命？
唔係應該...自己Keep先啱㗎咩？
諗唔通...真係諗極都諗唔通...完全唔合邏輯...
短白髮男人諗一諗，再繼續講：「最初...當佢哋交ADAM俾我哋嘅時候...研究咗一段短時間...見ADAM咁危險，都冇打算再研究落去...反正唔喚醒都有我哋想要嘅功用...」
功用...ADAM嘅功用...
除咗話穿越時空...ADAM仲有乜功用呢？
冇錯喇...穿越時空係ADAM其中一種功用...咁其他呢？
唔喚醒都有西貢獻命想要嘅功用...咁喚醒嘅話...又會係點呢？
短白髮男人講嘅嘢...總係好似...講啲唔講啲...
你的確好似喺佢口中聽到唔少有用嘅情報...
之但係...總係好似...零零碎碎...又好似...冇次冇序...
已經唔係啱啱嘅事...日倫一開始審問就已經覺得...怪怪地...
起初答非所問...而家又零零碎碎...冇次冇序...
短白髮男人又眉頭一皺：「之但係...而家嘅情況唔同...已經唔同...你哋SPIRIT已經向我哋展開調查...評估形勢...已經迫在眉睫...所以我就提議...喚醒ADAM...」
原來...係眼前呢個短白髮男人提議嘅...
短白髮男人放鬆成個人：「雖然已經放低咗一段時間...冇去研究過...而且大家都唔多願意...唔多敢去冒呢個險...但實在係迫不得已...已經再冇退路...喚醒ADAM係唯一出路...」
喚醒ADAM...真係咁危險？
又會有幾危險？
最壞嘅情況係...
短白髮男人再帶住冷笑：「只有ADAM...只有喚醒ADAM...先可以解決面前嘅危機...殲滅SPIRIT！」
『點解你會咁相信ADAM？』我又忍唔住要發問...
一直都冇講過...只係一直不停咁Loop住話要喚醒ADAM...
喚醒ADAM好危險...但只要喚醒到ADAM就穩操勝券...
咁原因呢？一直都冇講過原因喎...
短白髮男人眼尾望一望我...帶住冷笑：「因為死海文書...」
死海...文書？！
短白髮男人擰一擰頭：「果然唔知道呢...不過都好正常...啲咁機密嘅嘢...又有幾多人知？就算知都唔會知得好多...最多都只係聽過...傳聞...傳說...」
『我又唔覺得你會知得幾多...』講到自己咁巴閉咁...
「哈～」短白髮男人冷冷一笑，「啱吖啱吖...你講得啱吖...我都唔係知得幾多...傳聞...傳說...我只係知道只要有完全喚醒嘅ADAM...勝利就喺我哋手上...係喺一個大人物口中得知...」
大人物？
『你唔俾佢呃你㗎？』唔係咁天真吖化？
講就信？
「唔會...」短白髮男人帶住冷笑擰擰頭，「佢唔會講大話...只會隱瞞...」
唔會講大話...只會隱瞞？
短白髮男人繼續講：「佢只會講你需要知嘅嘢俾你聽...唔需要就唔會講...呢個就係佢嘅處事手法...同時係佢成功嘅地方...」
呢種處事手法...點解好似...咁暗黑咁嘅？
短白髮男人擰擰頭：「知道關鍵就係喚醒ADAM...卻唔知喚醒ADAM嘅關鍵...搞到我哋好焦急...但就喺呢個時候...一位SPIRIT嘅大人物竟然主動搵我...」
SPIRIT嘅...大人物？
短白髮男人繼續講：「一位SPIRIT嘅大人物主動搵敵對嘅我已經夠出奇...更意想不到嘅係佢竟然係嚟話俾我聽喚醒ADAM嘅方法！」
一個知道喚醒ADAM方法嘅大人物...喺SPIRIT...會係...
唔通係...片翼？！
唔會掛...唔會又係片翼掛？！
短白髮男人擰擰頭：「SPIRIT...應該係呢個世界上最了解原核嘅組織...」
最了解？乜真係咁咩？
我身為SPIRIT嘅一份子，完全唔了解喎！
情報庫裡面有關原核嘅情報又少...有嘅話都貴到痴孖筋！
好難想像可以有幾了解喎...
短白髮男人繼續講：「再加上我哋真係冇晒辦法...時間緊迫...我真係冇辦法唔相信佢...」
相信...自己嘅敵人...
短白髮男人帶住冷笑：「當然...我就冇咁蠢...邊會有人教敵人對付自己...仲要係唯一嘅方法...仲要係SPIRIT...但我又好想知佢有咩目的...所以就將佢教識我嘅方法...轉述俾同伴聽...然後喺差唔多進入喚醒嘅最後階段嘅一晚...我偷偷逃走...」
逃走？即然...
短白髮男人繼續講：「已經差唔多攻到入嚟...SPIRIT嘅先行者大軍...果然...頂唔得幾耐...」
係...西貢攻防戰...
「呼...」短白髮男人抖一啖氣，「我離遠觀察...當先行者差唔多都攻晒入西貢之時....西貢嘅正中心突然出然一個黑球！」
係...黑球...
「內裡藏住發出白光五芒星嘅黑球以極高速由西貢中心向外伸展！吞噬一切！」
吞...噬...
「全個西貢...連埋攻入去嘅先行者都一一被吞噬...」
一一被...吞噬...
「原來...ADAM嘅不穩定會產生黑球...吞噬一帶所有所有...而導致ADAM不穩...就係佢教我喚醒ADAM嘅方法...」
原來...呢個就係...
「呢個就係佢嘅目的...而因為ADAM不穩產生出嚟嘅副產物黑球...會遺留落嚟...黑球係一種好特別嘅物質...只要成功抽取...轉化...就可以製造到好多高科技嘅武器...設備...」
黑球...係好特別嘅物質？！
「呢啲嘢都係由我幫解放軍做事先知...而呢啲技術...都係由SPIRIT提供...」
呢啲技術...係由我哋提供？
技術...SPIRIT嘅技術...同解放軍...仲有國安局...係片翼提過嘅合作！
「黑球嘅質量好高...而且好巨型...日以繼夜咁不停抽...都好似抽唔晒...真係可以製造到好多...好多...好多好多...再加上我哋嘅技術越嚟越成熟...只會更多...更多...」
製造好多...好多...
「雖然有70%要交俾SPIRIT...但我哋都有30%...30%...已經好多...」
七三分帳...
『咁ADAM呢？ADAM而家喺邊？！』我唔理你哋有咩交易又點分帳法...我要返翻去過去呀！
「我咪講咗囉...」短白髮男人冷眼望住我，「俾你哋SPIRIT搶走咗嘛...係我親眼睇住...恐怖親自帶咗隊人嚟將ADAM運走...」
恐怖...係...預行者？！
『咁...』我一手捉住短白髮男人衫領！『ADAM係點嘅樣㗎？！有幾大舊？！』
要搵到ADAM...起碼要知係點嘅樣！
「嗄...」短白髮男人抖咗啖大氣，「自從ADAM被奪後...好耐都冇感覺到呢種能量咁近...」
『喂...講咩吖？』發乜噏瘋吖？
「呢個亦都係點解我哋唔可以用本來嘅能量對抗...要喚醒ADAM...」
『喂！』
「真係咁...就算有ADAM都唔夠...越近嗰度...就越大能量...更加大...」
『喂！好喇喎！你亂噏啲乜吖？』
「嗄...差唔多...已經爭取足夠時間...可以...」短白髮男人對眼有一點綠...越嚟越綠...成對眼都發出綠光！
突然！短白髮男人背後閃出一對...散發住綠色粒子嘅...天使翼？！