《香港傭兵》: [Day 23－殺戮特區] PART 08
「點都好...」日倫閂返晒所有立體投射全息影像，「我哋都係盡快離開呢度...入去特殊區。」
久久冇出過聲嘅綽姿打量住日倫：「入去特殊區？」
「嗯...」日倫點點頭，「我喺特殊區存放咗唔少精神液...而家周圍都缺...冇地方買到...要入去拎。」
睇嚟...到而家都仲係大缺貨...
而且...搵神秘商人都唔容易...我同綽姿都冇精神液喺身...應該...連羅羅都冇...
「況且...」日倫再諗諗，「七號之後...再入唔到去...」
「嗯？」綽姿打量住日倫，「今個月七號？」
「嗯...」日倫點點頭，「今個月七號...」
綽姿繼續追問：「再入唔到去係咩意思？」
日倫接住答：「聽講解放軍要封城...」
綽姿諗咗一諗：「咁睇嚟係...解放軍會喺七號嘅0000攻入去...」
『攻入去...特殊區？』解放軍會係七號嘅凌晨...
「嗯...」綽姿點點頭，「西貢攻防戰嗰次...都係咁。」
原來真係...解放軍真係想...攻入特殊區...
之但係...真係咁有信心？
特殊區裡面唔止我哋...仲有逆行者支持嘅革命軍...
唔止唔止...仲有國安局嘅爪牙...西貢獻命...
解放軍就咁攻入去...真係混戰㗎咋喎...
咁究竟解放軍嘅目標係我哋...定抑或係革命軍？
打起上嚟...真係得個亂字...
羅羅睜大對大眼仔：「咁我哋仲應唔應該入去吖？」
當然...羅羅都評估到會有幾亂...
唔係唔係...在場所有人都一定評估到...
綽姿點一點頭：「我點都要...返入去。」
『嗯...我係綽姿嘅隨行者...我都會跟住佢返入去...』唔知由幾時開始...我好認同自己呢個身份...
綽姿望我一眼...
羅羅立即雙手翹實我手臂：「飛揚哥哥去邊我就去邊～」
日倫都點點頭：「始終入去比較好...好喇...大家都準備好...拎齊嘢就出發。」
『嗯...』我拎部電話出嚟，『咁我Call定黃生過嚟先...』
我開返個Call車App...揀返黃生...
過咗一陣...就有回覆...
『黃生話十五分鐘後到...』呢個黃生...都算有效率...
「嗯...」大家點點頭後，就各自整理好裝備。
我都將自己嘅所有裝備著返上身...戴返上身...拎齊所有嘢...再著返件黑色大褸...
大家都準備好...再等多陣...等到差唔多時間到...就一齊出門口...
我哋一行四人落到樓...一行出大堂...向住馬路方向行多幾步...就已經見到黃生架白色七人車停泊咗喺馬路旁...
我哋四個都扮到從容不迫咁行去七人車...盡量避開解放軍嘅耳目...
萬一而家俾解放軍士兵截查...我哋而家四個身上都有晒裝備...就算唔了解精神刀柄同行者長袍...淨係搜到把匕首都夠晒麻煩...
當我哋差唔多行到去七人車之時...車門隨即打開...
我哋一行四人就急急腳咁上車...
一上到車...黃生就由倒後鏡中望住綽姿同羅羅：「哦...哦～」
由倒後鏡中所見...黃生面上嘅表情有啲驚訝...
呢種驚訝表情總係隱藏住點點變態嘅想法...
『點吖？開得車未吖？』我打量住倒後鏡中嘅黃生...
「哦哦...」黃生急忙咁閂返車門，「Sor吖...Sor吖...」
“吱！吱～”
黃生一路好唔專心咁揸車...一路眼尾望一望倒後鏡...望一望倒後鏡中嘅綽姿同羅羅...
唔使講...黃生一定係俾綽姿同羅羅嘅美色吸引住...
男人真係...總係會對年輕貌美嘅小妹妹心動...
仲話有老婆仔囡...
黃生望多兩望，就發現我正望實倒後鏡中嘅佢，就尷尷尬尬咁問：「呃...係呢...你哋都係一對對㗎？」
羅羅立即翹實我：「係吖係吖～我哋係一對㗎～」
又嚟喇...羅羅又亂講嘢喇...
不過都冇所謂啦...反正真相又唔可以俾黃生知...亂咁噏都有亂咁噏嘅好...
「哦～」黃生好似開心大發現咁點點頭，「睇得出～都睇得出～你哋都...搞咗幾耐喎～」
搞？誤會我哋4P嘛？
『咁你係唔係搵到唔少生意？』算啦...無謂解釋咁多...
「嘩都真係幾好搵～」黃生點晒頭咁，「啱啱真係多Call到接唔切～係接到你哋Call之前冇幾耐先叫少返咋～如果日日都咁好賺就真係發達～」
『國難財唔係咁易賺...賺到都小心冇命使...』呢個時勢...總係有人唔怕死...
「放心放心～」黃生望一望倒後鏡中嘅我之後，就留意返路面情況，「我唔貪心嘅～真係做埋你呢轉就收手喇～應承咗你㗎嘛～」
『真係又要多謝你...』你咁好人...希望你真係唔好因為貪心而冇命啦...
「客咩氣吖～我多謝你就真～」黃生望一望倒後鏡中嘅我...又望望倒後鏡中嘅羅羅同綽姿...
除咗貪婪之外...色慾都好容易令人喪命...
咁危險...點解啲人都仲係咁鍾意接近？
係因為唔怕死？唔知死？唔識死？
係因為...死都值...
人類對死亡真係睇得好輕...
或者...係人類太少機會接近死亡...
就好似家貓咁...永遠都唔覺得亂食嘢會中毒死...瞓得太冧會俾獅子老虎叼咗去...
人類...總要重複同樣的錯誤...
“吱...吱！”一路向住深井方向駛過去...
大致上都好順利...
就算遇到解放軍嘅路障...只需要減少少速...都唔使停定查...總算可以直行直過...
大概都係因為黃生喺呢段時間兜過唔少客...出入過唔少次...班解放軍都費事查...
非常好...一切都依照住預先構想咁進行...
最好就係...一直Keep住...Keep到返到入去特殊區...
“飃...”上一上橋...駛離葵涌...望一望青衣嗰邊...又望一望荃灣嗰邊...
已經唔覺眼有車輛進出呢兩個地方...
就連解放軍嘅軍車都唔多...
照咁睇...要留嘅就留...要走嘅就已經走咗...要設置嘅都設置好晒...
我哋...應該就係最後...一批...
“吱～吱...”喺暢通無阻嘅公路上飛馳...好快就嚟到深井...
“依...”黃生停定喺深井入口...
「喂～又再多謝晒喇喎梁生～今次真係最後喇嘛？」黃生由倒後鏡中望一望我...當然唔少得就係𥄫多綽姿同羅羅兩眼。
『嗯...真係最後喇...』我哋四個都解開安全帶...
「嗯～咁一路小心喇～」
『嗯...你都係...』
我哋四個都落咗車...
“吱！吱～”望住白色嘅七人車駛去...
“沙 沙 沙”我哋四個就喺鋪咗唔少碎沙石嘅路邊行...
行多幾步...再行多兩步...離遠望住班手持長槍...Full Gear嘅解放軍士兵...
我哋四個都一直好平常咁...行到去差唔多小巴站...好似平時行過警察路障咁...向住解放軍嘅路障行過去...
“沙 沙 沙”離遠望住由特殊區出入深井嘅解放軍路障...解放軍嘅軍車...企喺度駐守嘅解放軍士兵...再望一望過去...停泊喺路障前面...林雪架紅Van...
真係好...啱啱好有車...
泊得喺度嘅話...即係未滿客...仲喺度等緊客...係唔知夠唔夠位姐...
照咁睇...真係...真係要入去嘅都差唔多入晒...我哋...應該就係最後一批...
就算唔係最後一批...都應該過咗頭一批人潮...
“沙 沙 沙”我哋四個就Keep住步速...好平常咁行過去...行到去路障前...突然...
「停！」一個駐守喺路障前...手持長槍...Full Gear嘅解放軍士兵截停我哋！
搞咩吖...而家先嚟截查？唔係吖化...
日倫立即帶住微笑，指住林雪架紅Van：「兵大哥～我們都住在特殊區...想回家...趕不上...又要等了...」
解放軍士兵揮揮手：「已經禁止出入！」
已經禁止出入？！又會咁快...
日倫摸摸頭：「麻煩兵大哥通融一下...通融一下...」
「都說了禁止出入！」解放軍士兵用長槍指指我哋，「走！走呀！」
真係麻煩...又會喺呢個時候...
「走呀！不要逗留在這裡！」
點好呢...身上又冇精神液...
「立即離開！」
就喺呢個時候...我見到林雪落咗車...行緊過嚟：「兵大哥...兵大哥...就讓他們四個過來吧...我車上還有空位呢...」
第一次聽林雪講普通話...仲要一粒粗口都冇爆到...
另一個解放軍士兵立即用槍指住林雪：「不要過來！走！立即離開！別好管閒事！」
林雪行前多兩步就企喺度：「屌你老母臭化閪吖...好撚聲好鳩氣都唔柒得㗎喎...」
又變返爛口嘅林雪...
「說甚麼？！」解放軍士兵再用槍指兩指林雪，「要說就說國語！」
點好呢...而家應該點好呢...
「國你老母乳癌就有你老母個臭閪份呀！」
解放軍唔俾我哋過...我哋返唔到入去...
「你他媽的說甚麼？！沒有文化的港燦！」
身上又冇精神液...就只有...匕首...
「我屌你老母屌得好撚High呀戇撚鳩鳩！用支砲指指指...好鳩威呀？！你咁樣係唔會令到我驚㗎！」
匕首...對手只係解放軍...就算只係得匕首...都綽綽有餘...
就喺我正打算由大髀拔出匕首之時...
我感覺到...有人由背後行近...
“沙 沙 沙”我仲聽到...喺碎沙石上行緊嘅腳步聲...
當腳步聲越嚟越接近...差唔到行到嚟身邊之時...
「讓他們過！」一把嚴肅嘅男人聲...
我回頭一望...就望到一個大約五十歲... 左邊面仲有一條刀疤...著晒軍服...胸前勁多章嘅軍人...
係...解放軍嘅屠總司令...
「係！總司令！」在場嘅所有解放軍士兵都立即肅立！向屠總司令敬禮！
估唔到...屠總司令呢啲咁大粒嘅人物...都會走咗嚟前線...
我以為淨係識得匿埋喺基地入面...藏頭露尾咁用立體投射影像指手劃腳...
企到咁出唔怕死咩？
屠總司令行到嚟我面前，狗眼看人低咁打量住我：「咪即管入去囉...咁想死唔通唔俾你死咩...」
嚇鬼吖...大笨象...
屠總司令再噴多兩啖口水：「唔怕話埋俾你哋聽...過兩日我就成隊軍隊鏟入去！鏟平你哋！你哋咪入去囉...入去等死啦...」
『多謝喎...屠總司令...』我冇再理佢咁多...頭也不回咁望住路障入口行過去...
羅羅、日倫同綽姿就跟喺我身後...同我一齊喺幾個解放軍士兵面前行過...行過路障...行到嚟林雪面前...
正如頭先林雪所講...咁樣係唔會令到我驚㗎...