《香港傭兵》: [Day 23－殺戮特區] PART 09
跟喺林雪身後...向住紅Van行多兩步...
日倫向住林雪背脊講：「頭先唔該晒喎。」
「客咩氣吖...」林雪喺衫袋拎咗包煙出嚟，拎一飛煙，放到嘴邊點著吸一大口，「我份人最唔閪鍾意欠人嘢...你頭先請鳩咗我食一餐...啱啱就當還返俾你...打和...」
咁有性格㗎咩？不過都似...
林雪叼住飛煙上車：「所以車錢都要俾㗎...快撚啲上車啦...」
日倫一上車，就拎咗二千蚊出嚟：「一次過俾晒。」
林雪接過日倫手上二千蚊：「快鳩啲坐定...」
由於只係得返四個位...四個位仲要係分開...我哋四個就只好分開坐...
綽姿同羅羅就同兩個女乘客坐...我同日倫就坐喺單邊嘅窗口位...
“吼！”林雪立即俾油，紅Van就衝住咁離開深井。
偷偷一望車上嘅所有乘客...清一色都係黑色大褸...黑色嘅衣著...
個個都留意住自己手上部電話...
睇嚟...全部都係SPIRIT嘅行者...
咁多行者返入去...真係打算備戰...同解放軍開戰？
會唔會真係咁？會唔會真係所有行者都察覺到...我哋SPIRIT已經同解放軍反咗面？
就算唔係百分百肯定...都應該有九成...
SPIRIT嘅行者...危機感都唔會差...對所有突變嘅事...都會好敏感...
講真同解放軍開戰與否...就算我唔清楚發生咗咩事...一知解放軍喺深井有舉動...都會過嚟行過轉...知道話要封城...就必定會一第時間閃出“進入特殊區”呢個念頭...
咁佢哋而家喺電話裡面睇到啲乜呢？
“吼！吼～”紅Van逢彎劈彎...直路加速...喺樹影之間全速向特殊區進發...
我又唔可以偷偷睇佢哋部電話...太大動作...就會俾佢哋發現...
不過我諗...點都唔會睇到比我知得更多嘅資訊...
就算情報庫...都唔會比我知得更多...
我...可以話係第一手資料...
咁好唔好放上情報庫賣？
梗係唔好啦...
錢又有咩用？而家呢段時期...
就算俾你有再多嘅Sil...都買唔到更深入嘅情報...
而寶貴嘅情報...梗係留返俾自己...越少人知就越好...
“依！吼！”我都唔再理車上嘅乘客忙住睇啲乜...
我望出車窗外...睇睇風景...
綠草...大樹...大海...高山...天空...
大自然嘅景色真美...
只係淨返...大自然嘅世界...
“依...吼...”好快就駛到過嚟西貢獻命喺小欖嘅路障...
喺呢度嘅西貢獻命光頭佬...都係好似平時咁...行行企企...望嚟望去...
嚟到呢度見返佢哋先諗起...咁西貢獻命會點？
而家嘅西貢獻命...已經再唔係革命軍...係國安局嘅爪牙...
解放軍就快要打入嚟...咁西貢獻命要點做？
會協助解放軍對付我哋SPIRIT？定係對付有逆行者喺背後嘅天門？
國安局會點安排？
但唔好忘記...日倫啱啱先講過...解放軍同國安局各懷鬼胎...國安局仲點會安排西貢獻命協助解放軍？
“吼...吼！”紅Van駛過西貢獻命路障後...繼續全速前進...好快就駛到過嚟黃金海岸...
望住黃金海岸門口都仲係有唔少金毛MK仔揸晒槍咁把守...
黃金海岸...想用平民嚟做緩衝區...呢個如意算盤根本就打唔響...
以解放軍嘅凶殘手段...唔係...唔係...唔好話解放軍...就算係警察要衝入嚟...平民都照殺...
而佢哋嘅唯一生路...就係舉手投降...
乜都唔關自己事...真係普通一個平民百姓...就睇吓解放軍會唔會真係唔想浪費彈藥...放過佢哋一馬...
“吼～吼！依！”好快就駛過三聖...
好快又就快駛過置樂...
喺差唔多駛到去市中心...日倫就開聲：「馬會有落。」
林雪舉手示意收到...
馬會...日倫喺特殊區嘅落腳點就喺馬會附近？
日倫一直都...冇講過...
“依！依！依...”紅Van停定之後...我哋四個...仲有車上三個乘客一齊落車...
企喺馬路旁邊...
“啪！吼！吼～”目送住紅Van駛去...再等多陣...
等頭先同我哋一齊落車嘅兩女一男行遠...再行遠啲...
日倫就帶住我哋行...向馬會方向行...
一路行...一路留意四周...同平時一樣...應該比平時更冷清...
一路行上橋上...破爛且充滿塗鴉同字句嘅杯渡...都只係得幾個人...
一兩個上咗年紀嘅老人家...仲有一兩個年輕少女...仲有兩三個黑色衣著...應該係SPIRIT嘅行者...
而我哋而家行緊嘅方向...係...西鐵站嗰邊...
繼續行...繼續跟住日倫身後行...行返落橋...向住西鐵站方向行...
橫過條馬路...望住入口嘅玻璃幕牆已經盡碎嘅Vcity行過去...
日倫喺特殊區嘅落腳點...就喺...瓏門？
繼續向住千瘡百孔...滿目瘡痍嘅Vcity行過去...行入既熟悉...又陌生嘅瓏門大堂...
竟...竟然...
跟住日倫入𨋢...日倫撳咗我平時都會撳開嘅樓層...
又會...唔會...
當部𨋢上到我哋要去嘅樓層...日倫帶住我哋出𨋢...向住我平時都會行開嘅方向...行過去...
唔會...唔會真係...咁啱...
當日倫企喺我既熟悉...又陌生嘅位置...撳大門嘅密碼...用指紋辨識開鎖...
『唔...唔會...』
日倫、綽姿同羅羅都望住我...
『唔會...咁啱...咁啱...呢度係我...係我...係我屋企...』
日倫、綽姿同羅羅同一時間望住我...
點會...點會咁...
我推開門...一步...一步...行入...我嘅...屋企...
點會...點會...
一步...一步...行入已經...唔同晒嘅屋企...
所有裝修...所有擺設...所有傢俱...都唔同...已經唔同...
點會...點解會...
明明...呢度明明就係我同阿月嘅屋企...
我哋一搬出嚟...一齊住...就係租呢度...呢個單位...
一直到...一直都係...
但點解...點解我會...點解我...醒唔起...
點解...嚟咗未來三個禮拜有多...就一直都...一直都...冇諗起過...我住嘅地方...
就好似...好似...從來都冇...冇呢個屋企嘅記憶...
點解會...點解...
我回望住日倫：「呢度之前嘅住客呢？」
日倫擰擰頭：「我嚟呢度之前...呢度已經係冇人住...而租呢度俾我嘅業主話係喺屯門常開成立之前購入...上一手嘅業主丟空咗呢度好耐...」
『咁之前租過呢度嘅租客呢？去咗邊吖？佢哋去咗邊吖？』之前...之前...
日倫擰擰頭：「真係唔知...個業主話上一手業主見個局勢唔對路...急住賣就急住移民...冇提過之前啲租客。」
點會咁...點會咁㗎...
日倫打量住我：「你話呢度係你屋企...你之前租過呢度...未穿越時空之前...住喺呢度？」
『嗯...我就係住喺呢度...同阿月...我女朋友...一齊住喺呢度...』我橫視四周...
唔同晒...已經唔同晒...
本來...我同阿月一齊買嘅傢俱...佈置嘅裝飾...全部冇晒...
換上...簡陋...殘舊...
羅羅都一邊行...一邊橫視四周：「呢度就係...以前飛揚哥哥...同女朋友一齊生活過嘅地方...」
日倫打量住我：「之前唔聽你提起？」
『我唔知...』我擰擰頭，『我都係...啱啱先知...』
「嗯？」日倫、羅羅同綽姿都一頭問號。
『我...我都係啱啱先醒起...』我擰擰頭...擰擰頭...
「啱啱先...」日倫諗一諗，「醒返起？你...一直都唔記得...你有住過呢度？你住喺邊？」
『嗯...』我點點頭...又擰擰頭，『冇...我冇諗過我住喺邊...一直都冇...就喺頭先...跟你行到過嚟...我先醒起...前日...我返翻去過去...同阿月一齊生活...喺呢間屋...』
冇錯...前日...我瞓醒...喺度...喺度見到阿月...阿月煮早餐俾我食...
早兩日...早兩日先返翻去...返翻嚟...返翻...返翻...
日倫、羅羅同綽姿都打量住我...
究竟...究竟我仲有啲乜嘢係...係唔記得...忘記咗...
忘記...忘記...你永遠都不知道自己忘記了甚麼...
日倫打量住我：「真係奇怪...你話你係穿越時空...理應就好似時空摺疊咁...喺廿年前嚟到廿年後...只係好似踏入下一秒咁...應該唔會唔記得啲乜㗎喎...唔通穿越時空嘅過程...會令你嘅記憶受損？」
穿越時空嘅過程...會令記憶受損？
日倫諗一諗再擰擰頭：「最大問題係你前日根本就冇返翻去過去...冇...冇...我哋三個人...六隻眼都望住你...你只係進入咗深層睡眠...」
羅羅點點頭：「嗯嗯...」
我...我只係進入咗深層睡眠...
唔係...唔係...
『一定係搞錯啲乜...我唔係進入深層睡眠...或者...或者係我真係返翻去過去...我喺過去生活咗一日...但時空摺疊...我又返翻嚟未來嘅下一秒...所以你哋唔覺我有消失過...返翻去過去...』應該係咁...好肯定係咁...
「唔...」日倫皺住眉咁諗一諗，「係有咁嘅可能嘅...始終...我唔係時空論嘅專家...好多嘢我都唔清楚...」
係...唔清楚...我哋呢度冇人係時空論嘅專家...冇人幫到我返翻去過去...
「好喇...」久久冇開過聲嘅綽姿突然冷淡咁講，「唔好再喺啲得唔到答案嘅嘢上打轉...跟住落嚟...應該點做？」
得唔到答案...都係...再喺度打轉都冇意思...
之但係...跟住落嚟應該點做？
日倫諗一諗：「跟住落嚟應該要...出去街上睇睇。」
出去街上睇睇？
日倫繼續講：「我哋拎定支精神液喺身...出去睇睇街上嘅情況...搜集返啲情報。」
羅羅行到窗邊，將窗簾布揭開少少，偷偷望落樓下：「都啱嘅～點都要睇睇咩環境...我諗應該都有唔少行者有咁嘅打算～」
日倫點點頭：「雖然頭先行返嚟嘅時候，一路上都冇乜人...之但係...應該差唔多...頭一批同一直留喺度嘅行者應該已經諗好...計劃好...會出嚟探探風聲...」
羅羅都點點頭：「嗯～咁我哋都唔可以執輸喇～要快啲準備～」
「嗯...」日倫點點頭，「咁等我拎啲精神液出嚟...」
羅羅立即追問：「收幾錢先？」
「呢啲嘢遲啲先計啦...」
「遲啲先計？一陣用完你話要收我幾萬Sil咁點算吖？」
「嘩...你咁睇我嘅...我似啲咁嘅人咩？」
就喺日倫正要行入...我同阿月間主人房之時...
我感覺到...大髀一震...
係...電話？
同時...日倫企定定...綽姿同羅羅都呆一呆...
我左手拎部電話出嚟...日倫、羅羅同綽姿都拎起部電話出嚟一睇...
一睇個Mon...就有一個訊息框...顯示住...
『緊急...』委託？！