[讓謊言與虛偽堆砌成我們的最後樂土]《終末後．新世界》: 30-策劃

「地震會再發生，而且我大概估到會喺咩時候發生。我地如果要行動就一定要喺下一次地震前結束到，如果唔係就……」
紫宜突然說到地震的事情。
「你知道幾時會再地震？」我不解地問。
「係咁嘅，正確嚟講係餘震。第一次第二次地震都係喺第一天嘅十一點發生，而上次則係朝早地震嘅餘震，喺凌晨十二點左右出現。」紫宜在說明：「咁即係話……中間相隔咗十三個鐘。」
「你意思係，下一次餘震都係會喺上一次地震十三個鐘之後再嚟？」阿慈問。
「我唔係咁認為，我覺得應該會至少十四至十七個鐘之後。」紫宜回應：「因為上兩次地震之間隔咁長時間……我覺得震波可能係已經傳遞到地殼底層再反彈上嚟，每次餘震應該都應該會消耗大量能量，應該每次都更弱需要隔更多嘅時間先有一波餘震。」
「係咁咩……」阿俊喃喃地說。我們正在消化紫宜的說話。
「如果我推斷冇錯，屈指一算，下一次餘震應該就喺今日兩點或者之後幾個鐘發生。」紫宜提到結論。
我拿出手機，屏幕上的時間是「11:24」。
「我地淨返冇幾時間。如果要行動嘅話，我同阿和一定要喺兩點之前返到嚟。」紫宜再強調。




「咁我地要點入去地鐵站？」阿慈問。
「原本我淨係諗住三個人都幾難搞，而家咁多人人手上係鬆動啲嘅……」紫宜開始說明作戰計劃：「我留喺圖書館呢度做指揮同IT支援，等陣大家全程手機聯絡、即時互相提供情報，阿和你同阿俊偷偷唔用正門搵其他路入去商場搵地鐵站，其他人由正門入去搞事、盡量調虎離山。阿兒，你咪有槍嘅？你負責喺阿和同阿俊後面，必要時間幫佢地解難。」
「好。簡單。」阿兒毫無猶疑地答應紫宜的指示，揮動沉重的槍枝。
必需承認的是，她無疑是我們之中唯一的戰力。我們其他人要活命大概只能靠鬥智。
「阿和你地要識執生，有咩事就唯有好聲好氣咁下應酬議會班人。有咩事我會諗辦法救你地。」紫宜提醒我和阿俊。
「包喺我地兩個身上。」阿俊也爽快地接過了工作，露出很是激動的神情。這傢伙果然喜歡冒險……
「咁我同阿慈要點『搞事』先調虎離山到？」阿欣問，阿慈也頭起頭來。
「我等陣間俾啲嘢你地，到時再另外同你地兩個講要點做。放心，個方法好簡單但好有效。」紫宜說。
這樣子我們每個人都有各自要負責的崗位了，紫宜的計劃算是已經完整起來、可以實行的了。雖然如此，我總有有預感會遇到一些意想不到的突發狀況，俗語有云「人算不天算」，如果這樣的話唯有到時再動腦筋要怎麼逃離險境吧。
「咁……而家十一點半，休息一下，大家十二點就開始行動啦。」紫宜說。




在等待的時間，我一直在閒想著，到底這次的計劃算不算是魯莽呢……
「你話我地咁就衝入去會唔會好白痴？」我忍不住問著阿俊。
阿俊想了想，回應：「我覺得我地如果咩都唔知……咁仲白痴。」
我唸道：「係咩？」
我莫名其妙就在仔細思考著阿俊的說話。
「人就算唔知要面對嘅係好事又或者係壞事，都要去搵答案？」我傻傻地自言自語著。
「因為我地唔想俾人隱瞞……好似俾人玩緊都咩都唔知咁。」阿俊又回應。
「咩啊……又冇人要你應。」為了掩飾自己的尷尬，我唯有很嘴壞地回應他。
看著他露出恥笑的模樣，如果我稍為有些心情玩鬧，早就一下揍下去了。
可是他說得沒有錯。




是的，人總想要知道真相。
我不禁在設想，如果我和阿俊沒有遇到阿欣阿慈，也沒有遇到紫宜的話……
我們是不是就不會意識到「新世界議會」的另一面？是不是就會以為我們身處的世界依然是充滿友善的？
那到底會是好事還是壞事？