靈界事務所: 個案一 (2): 正式開工！之一

個案一 (2): 正式開工！之一

「你好！靈界事務所，請問有咩可以幫到你？」妮可熟練地接聽電話。那種溫柔的聲線，與她的稚齡不成正比。「救我……相機……啊！……嘟嘟嘟……」一把慘叫聲從聽筒傳來。「又係度玩電話！哼！」妮可使勁地把電話掛斷。「最近好似成日都有人玩電話。」阿細一邊摸著鬍子一邊說。「自從社長直播驅魔降靈之後，多咗好多電話打黎查詢，攰死我啦！」妮可一臉倦容，伏在桌上打盹。「但亦都因為咁我哋嘅收入先有返啲起色咋！」阿細仔細地檢查帳簿每個細項，「收支平衡，感覺實在太好了！」阿細一臉高興道。
「好攰啊！好似無瞓過，我就黎死啦！」宇恆伸了伸懶腰。「仲有好多工作要處理，仲有王小姐件事未完成，認真啲啦！」利映說。「王小姐件事一陣先搞啦，其實你唔需要跟住我架喎，我自己可以保護自己架！」「我嘅職責係要保護你。」利映冷淡地回應。宇恆沒有理會她，帶上耳機，然後上班了。

「咔嚓！咔嚓！全新 Vstart pro 9，由復古型格走到少女風格，任君選擇！內置WI-FI功能，隨時隨地與你嘅摯愛分享喜悅。」宇恆恰巧看到這個車廂廣告，忽然想起聖誕節臨近。作為獨身的男子，聖誕節與他扯不上關係。「利映，聖誕節事務所有無野做呢？」宇恆好奇地問。「好忙，由平安夜開始都會好忙。」「點解？」宇恆眉頭一皺。「平安夜係陽氣最旺盛嘅時候，陰陽調和吸引好多孤魂野鬼。另外果晚人類大多都飲到醉醺醺，靈體好容易入侵，所以會好忙。」利映回答。宇恆想了想：咁即係聖誕節都要同佢地一齊過？！過了二十分鐘，宇恆回到公司，「早晨呀！宇恆。」師傅微笑地說。師傅是一位數據分析師，亦是公司惟一會照顧及教導宇恆的同事，宇恆對於師傅有種微妙的情感。「早！」宇恆點點頭說。「今天可能要辛苦你出去影一影相，有個Project啲相好趕住要。」宇恆細心地聽著師傅的吩咐：「好呀！有得出去做野，我會努力嘅！」宇恆微笑道。「天氣凍，出去做野要著多件衫！」「知道了。」宇恆按照了師傅的指示，細心查找工作地點之後，外出工作了。

「依份就係你嘅工作？」利映問。「係啊，我係兼職調查員黎，有時會係公司做野，有時會出去，所以都好忙架！」宇恆自信地回答。「原來係咁。如果無咩事我就調查吓王小姐單個案了。」利映翻翻手上的筆記，工作幾乎擠滿了日程表。「慢慢做啦啲野，而且你可以喺陽界現身咩？」宇恆打了呵欠，然後開始看手機查閱訊息。「小雪會幫我處理，你唔需要擔心。係啦，如果你遇到有咩事，記住叫我個名，我就會返黎。」利映語畢然後就消失了。同一時間，手機鈴響起了。叮！原來，師傅傳送了一個訊息：宇恆，我地今日下晝會有Christmas Party，順便farewell阿Sam，你會唔會Join? 宇恆猶豫了一會，「對唔住，我下晝要返學，我去唔到，Sorry!!」想起公司的同事對自己非常冷淡，出席只會尷尬，所以宇恆婉拒了。「哎，算啦，我依啲咁嘅毒撚去到都無咩好傾，廢事自己唔舒服，快快手手做完野，係屋企打機好過。」宇恆一邊自言自語，一邊登上開往荃灣的小巴。




叮咚！利映輕輕的按下門鈴。一位印尼藉傭人前來迎接：「Who are you?」「你好，我姓賈，靈界事務所嘅職員嚟，我地約咗王小姐做個調查架。」利映回答。「...... OK, wait.」利映在等候進門期間，細心觀察屋子外圍。「好濃郁嘅邪氣，睇嚟今次件案好唔簡單。」「Sir, please come in.」傭人示意利映進入屋內。踏進室內，邪惡的氣息源源不絕湧出，表面屋裡雪白乾淨無比，兩層住宅，無論是擺設、裝潢，以至窗外海景，那種歐陸風格令人嚮往；實際上，屋內佈滿灰暗色的瘴氣，令人咋舌。「Hello! 賈先生，我係王小姐呀。」王小姐從利映背後走出來。利映轉身，只看到一位身穿粉紅色睡裙，透出白色內衣且上圍豐滿的小姐與她搭話。「咳……你好，我姓賈，係靈界事務所嘅職員嚟，我地約咗王小姐妳做個初步調查。」「嗯，我知道啊，你想點樣調查呢？我可以點樣配合你啊？賈‧先‧生。」王小姐向利映拋了一下媚眼，然後把雙峰貼近利映的身體說。利映沒有理會她，只是仔細檢查每一個角落。「由幾時開始發現有物件不尋常咁移動呢？」利映問。「就尋晚咋，人地見到個相架無端端咁自己郁，真係好恐怖啊，我真係好驚，然後果邊幅畫突然有把聲話要殺我啊！賈先生，不如你留係度陪我啦，好無啊？我一個人住好怕啊……」王小姐用楚楚可憐的眼神說服利映留下。「王小姐請放心，因為妳要求我地提供一個守衛，今晚我哋會派人嚟跟進架啦。」「咁賈先生會唔會都喺度？」「唔會，我另一位同事會黎。係啦，依啲相架同畫係幾時買返黎同埋係幾時同點樣製造呢？」利映仔細問。「哎呀，啲相架同畫最近係I__A買架！點製造就真係唔知啊……」王小姐語畢鼓起腮。利映望望四周，灰暗色的瘴氣不斷彌漫，「咁樣啦，我係屋嘅四角佈陣，保護依間屋，同埋試下趕唔趕到佢地走。」利映用硃砂粉在地上畫符，屋內的彷彿出現了一道微黃的光線且形成陣式然後把瘴氣綑綁。「王小姐我已經做咗個陣，依家暫時唔會有咩問題，個辟邪陣由佢係度，我地之後會清理返。」利映一邊用筆記錄情況，一邊交代王小姐不要試圖觸碰辟邪陣。王小姐沒有仔細去聽，只是不斷凝視利映。王小姐此刻突然從後抱緊利映，利映肩膊一縮。王小姐用指尖一直在利映的耳垂打圈且耳語，彷彿挑逗著。「賈先生你好吸引，高大又斯文，尤其你嘅單眼皮，真係……對唔住失禮了。」利映感覺到王小姐散發一種邪惡嘅氣息，快要讓她窒息：「今日調查去依度為止，我會同同事交代返個情況，請放心。」利映拿起公事包，準備離開。「無法啦，賈先生咁忙，咁我哋下次再見啦！」王小姐一臉失落，利映點頭以後轉身離開。此時，身後的王小姐露出一副奸狡的笑容，灰暗色的瘴氣瞬間變成墨黑色。