隔左一排, 呢日收工之後, 我剛行到落公司樓下大廈門口嘅時候, 「呀明….!」 我見到原來係雯雯企左響門口度嗌住我, 雯雯行到上黎我面前, 「呀明, 你有無時間一齊出去食餐飯呀?」 雖然係有啲唐突, 但我亦應承左雯雯同佢一齊去食飯。

呢一晚, 雯雯表現得好似有啲唔自然咁, 但我就一路靜靜地咁觀察住佢, 睇吓到底佢今晚搵我係會有啲咩事, 響就黎食完飯嘅時候, 雯雯突然就同我講,「呀明, 我覺得同你一齊真係幾開心咁, 所以我想問, 唔知…..我可唔可以同你響埋一齊咁呢?」

果然, 雯雯真係奶左我野, 但響呢幾日以黎, 其實我都有諗過呢個問題嘅, 雯雯其實雖然唔係話唔好, 而且佢個樣亦的確係幾靚, 但講真, 可能係佢嘅性格關係, 所以同佢一齊, 我總係覺得響佢身上成日都散發住一股負能量出黎。

我同雯雯講, 「喂, 其實我覺得大家繼續 keep 住呢種朋友關係咁咪仲好, 而且我地成日都一大班人出黎玩架!」 雯雯知我正在捥拒住佢, 跟住見佢就開始表現得比較沉默寡言。

但隔多一陣之後, 雯雯又再問我, 「呀明, 你係唔係已經有左新女朋友架嘞?」 我聽到之後居然諗都唔諗就向佢答住, 「係, 我其實早排已經識左個新女朋友架嘞!」 但雯雯居然突然目露凶光咁同我講, 「你呃人, 我知你係響度呃緊我嘅!」



一種由心而寒嘅感覺, 死火嘞, 我開始感受到雯雯似乎係有種強烈嘅佔有慾咁, 腦內正在急速地盤算, 點好呢? 我應該點做先至好呢? 突然, 我諗到有一個人應該都可以幫倒我手, 跟住我就靜靜攞起個電話響枱底度狂襟住。

喂, 我而家響朗豪坊隔離間翠華度呀, 但有啲急事想妳過黎幫我忙” , 我 send 左個 whatsapp 比妙芝。

但等左好耐, 我見妙芝已經睇左訊息但就無覆番 message 黎比我, 雯雯繼續望住我, 「呀明, 你都知我以前啲男人, 個個都係為左要上床先至同我響埋一齊, 但上次我見倒你咁, 我知道你同佢地係唔同, 呀明………」

我繼續一心二用咁響枱底度狂襟住 whatsapp 比妙芝。,

上次對唔住嘞, 妳唔好嬲啦, 而家有個女仔迫我要同佢響埋一齊呀, 但唔得架, 麻煩妳過黎幫幫手扮係我女朋友耍左佢啦



又隔左一陣……

呀姐, 就黎死人架嘞, 妳快啲覆番我啦

雯雯又再同我講, 「好呀, 你話你係有女朋友吖嗎, 咁而家你就叫佢出黎比我見吓佢啦, 如果係真嘅話, 咁我就話過以後都唔會再纏住你嘞!」

好呀好呀, 我聽倒佢咁講, 我索性就攞番個電話出黎再直接打電話比妙芝, 「喂呀芝, 我而家響朗豪坊隔離果間翠華度呀, 無, 我有個女性朋友話想見吓妳喎, 咁妳得唔得閒過黎呢度等我介紹比妳識咁呀?」

妙芝傳黎好大嘅笑聲, 「哈哈哈, 做咩呀? 有女仔想同你一齊咪好囉, 咁你仲唔快啲應承人地同佢響埋一齊, 我而家響元朗食緊飯出唔倒黎呀, Sorry 呀!」 我開始有啲心急咁同佢講, 「妳飛的士出黎一陣先啦, 最多我包妳來回元朗嘅的士錢嘞!」



妙芝再同我講, 「唔得呀, 我行唔開架, 呢度有條仔響度溝緊我呀, 咁我又點可以就咁掉低佢出黎搵你呢?」

雯雯似乎開始黎料嘞, 「呀明, 你唔使扮野嘞, 你根本就無女朋友, 電話入便果個根本亦都唔係你女朋友黎嘅, 呀明, 我真係好鍾意你架, 你就應承我同我響埋一齊啦, 好唔好呀?」

我繼續同妙芝發住最後嘅哀號, 「呀芝, 妳出黎啦, 妳肯出黎嘅話咁我就咩都肯應承妳架嘞, 出黎啦, 我真係包妳來回車錢架!」

雯雯嘅情緒開始有啲激動, 見佢突然趴到上前捉住我隻手黎講,「呀明, 我到底有啲咩唔好呀? 點解你地啲男人個個都係咁嘅? 呀明, 你應承我啦, 我地響埋一齊係會好開心架!」 雯雯捉得我隻手好實,「雯雯, 妳冷靜啲先啦, 雯雯, 雯雯…..」

同雯雯再抖纏多一陣之後, 突然有一對玉手正從後就將我攬住左起黎, 耳邊響起左一把熟悉嘅聲音, 「呀明, 咩你仲未食完飯呀? 喂, 頭先我響隔離見到件衫幾啱你咁, 不如一陣我同你過去睇吓件衫你鍾唔鍾意吖?」 係妙芝, 妙芝佢終於都出現左黎救我嘞。

我擰轉個頭眼泛淚光咁黎望住佢, 跟住我再做住口型但無出到聲咁同佢講, 「多謝哂妳呀!」