《DSE幻想校園(一)》── 從這裡開始 (Do Something Easy): 第二節：從宿生長開始 4.2

「係？你搵我？」

她突然轉身問道。

「下？妳知我喺度㗎？」

「我聽到腳步聲……因為你嚇一嚇，頭先差點吹到走音……」

她微笑著，令我有點不好意思。她再輕聲說：





「……你上次話，唔好喺宿舍到吹樂器，所以我咪走出嚟，應該……唔係騷擾度人啩？Tutor……」

聽到她對我的稱呼，這幾天已成為了我的名字，有點討厭。

「唔係！唔係，其實應該嘈唔到，不過我聽到小小音樂，吸引咗我過嚟睇下啫……」

Vinci一臉茫然。

「我向海吹，應該已經好細聲，你喺宿舍都聽到呀？睇嚟你對聲音都好敏感。」





她一直看著自己手上金光閃閃的小號，檢視著它的威力。

「係……係啩。我都唔知，我都覺得有啲奇怪，我嘅五感都好似比其他人好好多，聽聲音、睇遠嘢同嗅覺都好似特別靈敏過人。」

她聽後似乎接受了我的說法，微微點頭。但如此一來……大家又變得沉默了……

「可唔可以完整咁吹一首歌俾我聽下？」

她聽後，用疑惑的眼神看著我，語氣有點疑慮。





「唔……可以……」

說後，她坐在碼頭的長椅上，在一個黑色皮製的樂器箱內取出白布，開始清理手中的小號，再補充說：

「我唔想未準備好嘅情況下隨便演奏俾人聽……我會覺得好緊張……對唔住……」

這是她的原因，我還以為她是討厭我的人，急著回道：

「唔緊要唔緊要！我只係隨口問下啫……」

怎料，她聽到後盯著我，更不悅地說：

「既然你係咁隨便問，我更加唔會演奏俾你聽，你一啲都唔認真……」

這樣子……我應該說些什麼好……但我為難的表情，似乎也令她苦惱起來，再說：





「啊……對唔住，我走先……」

還沒有清理好，她已經將樂器收好，匆匆忙忙走到我身邊，輕輕點頭道：

「多謝你話我知呢個地方。」

我看著她急步走回宿舍，直到她離開我視線，我還是想不通她為何有這種反應。這一次我只可以用狂風暴雨來形容她。那種即時變化的感覺，就像被電擊一樣，不單是來不及反應，而且被電擊後更不知所為何事，只留下「對不起」、「多謝你」……等等……她就是拒絕了德哥的女生嗎？

(待續)