我回到宿舍後,當然被超人及佩君不斷責怪,一下子忘記了自己沒有帶電話,還去半小時才回來,打羽毛球的時間也快過了,他們只好臨時叫南兄加入。

正當我們在戶外的餐桌說笑時,有數位男生走到我們面前,對著我說:

「你就係單卓龍?」

我仰望著說話的男生,點點頭。

「我係中五級嘅Tutor,有啲嘢想同你哋中四級嘅話事人傾下……跟我嚟……」





他用手指著男宿生的天台。這時佩君不悅說著:

「喂!你哋想點呀?有咩咪喺度講囉!」

那男的不屑看佩君一眼,轉身準備離開,再說:

「你,一個人嚟好喇……我唔想叫晒成個中五級嘅宿生上嚟招呼你哋……你明㗎……」

那班學生離開後,超人才說:





「個師兄樣衰衰咁,擺到明想搞事啦!唔好理佢……」

南兄聽後卻搖搖頭說:

「唔理佢都要諗個方法去處理㗎,按兵不動唔係上策……」

「咁就一於上去同佢地打過!我哋4B班唔係咁好蝦㗎!」

佩君聽到超人的說話,不禁緊張起來:





「喂,人哋都無話打交!就算打,4B班有幾多個男仔入咗嚟住啫?數埋得你哋幾個,其他班都好,有事都唔會幫你哋!都係話俾Man Sir知啦……」

沒想到剛入宿便遇到這種疑似欺凌事件。我細心考慮了一下,如佩君所說,只要將事件告訴Man Sir,應該十分易辦,但現在什麼也沒有發生,只是「要求我去到天台聊聊天」罷了,才不會因為這種事而令他們認錯,就算Man Sir可以保護了我們今次,但從他們明目張膽囂張的態度來看,似乎已經是慣犯,將來還有很多日子要看他們面色……

「卓龍,咁你諗住點?」

在旁的阿鼎淡淡說著。他示意那班男生的其中一員在遠處站著,似乎在監視著我。

「我……其實唔係好想打交,身體都係最近先好返,諗住最多都係打下羽毛球啫……但係俾人咁叫到,唔去又好似唔得……」

聽後,佩君直接說道:

「咁咪唔好去囉!同Man Sir講啦!」

我搖搖頭,再說:





「唔係呢……我又好想去睇下佢哋可以喺度搞啲咩花樣出嚟,我覺得人生無幾可有啲咁嘅事發生,我都好想體驗一下。」

佩君雙目無神,一幅無奈相對著我們。而相反,南兄及超人似乎十分興奮。

「咪就係囉!你係我哋Tutor嚟㗎嘛!有咩事我實撐你㗎喎!一齊上去!」

「唉……人哋都無請你去赴會,指名係Tutor一個……」

南兄帶笑著嘆氣。

「唓!你估你唔想去咩,你頭先聽到之後對眼發晒光添!」

南兄抑制不了自己內心的興奮,對著超人大笑起來。





「講開又講,我真係好想喺戰場上實踐一下三十六計,我等咗呢個機會好耐……」

佩君聽後罵著我們,而阿鼎卻搖搖頭說:

「我對打交無興趣……但我諗我可以幫你隨時搵Man Sir嘅……」

阿鼎說著,之後佩君又搶著說:

「係喎!我可以喺女生天台嗰邊偷拍住你哋嘅情況,有咩唔對路,即刻通知阿鼎咪得囉!到時又有片做證據!」

「咁麻煩妳啦,但千祈唔好咁快叫Man Sir,如果唔係就無用。另外妳會唔會有上次喺Camp度用嗰支自拍棍?」

佩君聽到我的問題後有點愕然,但還是照我的說法把自拍棍交給阿鼎。說後我們分別行動。而我、超人及南兄站起來,跟著等待我們的人一同走上天台赴會。

(待續)





如想直接看完整個第一冊(一共四節)的故事,可到香港各大書店向職員查詢有關《DSE幻想校園》(一),
或是到網上訂購:Pena Shore 。關於第二冊的出版的情況,可到作品專頁留意。(如無意外會在2019年底出版)
已有 0 人追稿