四眼哥仔:「不如我地再打多次電話。」
 
於是我地再打多次999,電話另一邊再次接通。

「喂,依度係999報案中心。」

同上次一樣,接聽電話既係一位madam,但我唔肯定係咪同一個人:「阿madam,頭先我地已經報過一次警,我地宜家係XX村既一間便利店入面...」

未等我講完,果位madam即刻話:「係咪頭先報警,話你地因為便利店出面大霧,所以困左係間便利店入面呀?」





原來係同一立madam,可以聽得出,佢今次既語氣唔多好,可能因為佢覺得我地玩野。
另一方面,我又試發現同一樣奇怪事,就係依位madam講每一句既聲線都有少少唔同,感覺上佢把聲就好好經過d咩特別處理,有少少越講越快既感覺。

「係呀madam...係我地頭先報警...我地見未有警察黎到,所以...」我自己都覺得唔多好意思。

「你地唔洗驚,總之警察已經黎緊架喇。你地而家有冇咩事呀咁!?」

「無...無既又...」

「咁得啦,總之佢地黎緊架喇,唔好周圍走呀。」今次madam講野既速度又快左,聽落去好奇怪。





「哦...知道...」

「嘟...嘟...嘟...」報案中心果邊收左線。

報案中心果邊,會主動cut人線架咩?我唔清楚。

係依個時候,我地聽到有d急速腳步聲靠近7仔。

「應該黎喇,應該係警察黎喇。」師奶第一個有反應。




 
腳步聲越黎越近。

「呀!!!!」又一個身影衝左入黎7仔,不過好可惜,並唔係警察,而係頭先果位西裝友,大家見到佢突然衝入黎都嚇左一跳。

西裝友一入到黎,就跪左係地下度抖大氣,流晒大汗咁,似乎佢跑左相當遠既路程。

今次佢衝入黎,同頭先果對強國夫婦好唔同,今次佢抬頭望一望周圍,見到係我地,好似鬆番一口氣咁,轉頭就成個人「灘」係地下度繼續抖大氣。

「嘩,頭先你唔係走左架喇咩?做咩又走番黎架?你去左邊搞到成頭大汗?」八八掛掛既地中海阿叔又有花生食。

抖左陣,西裝男開始順番條氣少少,佢吞一吞口水,然後就話:「我...頭先係出面...」

「挑,我緊係知你係出面啦,我仲見住你跑入黎添!我係問你頭先去左邊度呀?」阿叔重申一次問題。





西裝友繼續抖大氣:「我係話...呼...呼..我頭先...就係7仔出面...呼...」

「屌你,九唔搭八!」

「你...你係話,你頭先一直都係便利店出面無幾遠??」長髮女仔問西裝友。

西裝友除左件老西,一邊抖氣,一邊點頭。

究竟咩叫做「係出面無幾遠」?我諗其他人都有類似既問題。
若然只係「係出面無幾遠」,咁做咩跑番入黎7仔都會流晒大汗咁?

依個時候,我見到西裝友部電話係褲袋跌出黎。
我見到部電話,突然醒起一件好重要既事,所以連頭先西裝男講既奇怪野我都放埋一邊。

「先生,你可唔可以俾部電話我睇睇?」我問西裝友。





西裝友聽見我咁問,覺得有少少奇怪,不過可能因為佢已經好累,累咩都唔想理,所以佢就fing fing手,示意我可以隨便拎黎睇。
 
我望一望西裝友部電話,死火...

「先生,你頭先係咪打過電話黎?」

「呀...係呀...呼...呼」對於我突然咁樣問,其他人都覺得有少少出奇。

「咁...咁電話另一邊有冇人聽?」

西裝友:「呼...呼...有就有...不過果邊聽唔到我講野...」

又係咁!講到依度,其他人都開始意會到一d野。





「話時話...呼...你做咩無啦啦咁問?」

於是我就將我暫時所知道既講出黎:「頭先我留意到一樣野,就係自從出面開始有濃霧之後,我地第一次所打既電話,都係我地聽到電話另一邊講咩,而另一邊就聽唔到我地講咩。而最大問題係,我地打完電話之後,就會再收唔到訊號,打電話同上網都唔得,就好似你個電話一樣。」

「係呀係呀!我頭先打完俾我老公之後都係咁呀。」師奶即刻表示同意,而其他人聽到我咁講,先至發現到依一點,大家開始點頭表示同意。

我繼續同西裝友講:「如果我無記錯,係你番入之前,我地其他人都打過自己部電話一次。當我見到你部電話果陣,仲以為有希望,如果你冇打過電話,或者你部電話仲上到網,咁起碼多個渠道聯絡外界,不過可惜...」

「咪住!頭先你地咪報左警lor,其實仲擔心d咩姐?你地唔撚洗咁驚呀?」地中海阿叔依然將件事諗得太簡單。
 
「下?你地報左警呀?佢地係咪黎緊呀??」由於頭先西裝男唔係7仔入面,所以未知道依件事。

「係呀,我都叫左佢地唔好搞大件事架啦,係都唔聽係都要報警。o拿!我講過架喇,唔關我事架,一陣阿Sir黎到咪撚拉埋我落水!」

「但係...如果...我話如果,如果d警察根本搵唔到黎依度呢?」長髮女仔終於講左我所擔心既事。





「事關...都報左警成廿幾三十分鐘...無理由咁耐都未到架...」

「會唔會係因為太大霧,所以佢地需要多d時間先黎到呢?」四眼哥仔嘗試搵一個合理解釋。

「依位太太,你住係附近架呵?」我轉個方向,問師奶一d野。

「係呀,我住好近架咋,就係依度隔離橦大廈。」

「咁你老公知唔知道你落左黎便利店?」

「知道呀,佢話佢沖涼先,等我買完零食番上去一齊煲劇。」

我望一望手機上面既時鐘:「距離大家走入黎便利店,都已經差唔多一個鐘,照計如果你老公無你消息,又打唔通俾你,應該會落黎睇下掛?」

師奶聽到我咁問,面色有少少沉:「無錯...而且咁近,無理由唔黎搵我架...唔通...」

「死喇死喇!可能真係搵唔到黎依度!」原來聽緊我地講野既西裝友,突然爆左一句。

係wo,頭先西裝友仲講左d奇怪野架wo,不過後尾俾我打斷左無再問佢。